मनरेगा लेबर बजट
केंद्रीय ग्रामीण विकास मंत्रालय ह छत्तीसगढ़ म मनरेगा के लेबर बजट म दू करोड़ बाईस लाख मानव दिवस के बढ़ोत्तरी ल मंजूरी देहे। अब प्रदेश म चालू वित्तीय बछर बर मनरेगा म रोजगार सृजन के लक्ष्य साढ़े तेरह करोड़ मानव दिवस ले बाढ़के पंद्रह करोड़ बहत्तर लाख मानव दिवस हो जाही। राज्य के पंचायत अउ ग्रामीण विकास विभाग अउ भारत सरकार के ग्रामीण विकास मंत्रालय के अधिकारी मनके बीच हाल म होय बइठका म ए प्रस्ताव ल मंजूरी देगे हवय।
प्रदेश के पंचायत अउ ग्रामीण विकास मंत्री टी.एस. सिंहदेव ह बताइन कि छत्तीसगढ़ ह चालू वित्तीय बछर म मनरेगा म तय करे गे साढ़े तेरह करोड़ मानव दिवस रोजगार सृजन के लक्ष्य ल पाछू फरवरी महीनाच म हासिल कर ले रीहिस। मनरेगा म होवत काम अउ लक्ष्य ल देखत मानव दिवस बढ़ाय के प्रस्ताव भारत सरकार ल भेजे गे रीहिस।
मुख्यमंत्री दामाखेड़ा मेला
मुख्यमंत्री भूपेश बघेल ह कबीर साहब के धरमनगरी बलौदाबाजार-भाटापारा जिला के दामाखेड़ा म आज करीबन बाईस करोड़ रूपिया के आने-आने विकास काम के भूमिपूजन करीन।
मुख्यमंत्री ह ए बछर दामाखेड़ा मेला के व्यवस्था बर खर्च होवइया राशि ल सत्ताईस लाख ले बढ़ाके पचास लाख रूपिया करे जाय के घोषणा करीन। संगेसंग दामाखेड़ा म एक ठन धर्मशाला अउ अतिथिगृह बनाय जाय के घलो मंजूरी दीन। अपन प्रवास के दउरान मुख्यमंत्री ह प्रदेश म कबीरपंथ के प्रमुख प्रकाशमुनि साहेब ले घलो भेंट करीन।
स्वस्थ बालक-बालिका स्पर्धा
छै बछर तक के लईका मन म पोषण के स्तर जाने बर छत्तीसगढ़ संगरा देशभर म इक्कीस ले सत्ताईस मार्च तक स्वस्थ बालक-बालिका स्पर्धा के आयोजन करे जाही। ये अभियान के दउरान स्वास्थ्य अउ पोषण ले जुड़े विषय उपर सामुदायिक सहभागिता बढ़ाय के घलो प्रयास करे जाही।
ए दउरान आंगनबाड़ी केंद्र, स्कूल अउ प्राथमिक स्वास्थ्य केंद्र म जाके लईका मनके विकास के परीक्षण घलो करे जाही। ए अभियान के उद्देश्य छै बछर तक के लईका मनके पोषण स्तर म सुधार लाना अउ उंखर माता-पिता मन ल सुपोषण बर जागरूक बनाना हे।
होलिका दहन
प्रेम, भाईचारा अउ रंग के तिहार होली काली मनाये जाही। एखर पहिली आज रतिहा होलिका दहन घलो करे जाही। राजधानी रायपुर संघरा प्रदेश के आने आने जिला म एखर बर तियार कर ले गेहे। उंहे ए बखत जागरूकता के सेती कतकोन जगा म लकड़ी के बदला छेना-कंडा के होली जलाये के तियारी करे गे हावय।
राज्यपाल अनुसुईया उइके, मुख्यमंत्री भूपेश बघेल अउ विधानसभा अध्यक्ष डॅाक्टर चरणदास महंत ह प्रदेशवासी मन ल होली के बधाई अउ शुभकामना दीन हे। राज्यपाल ह कीहिन कि होली के तिहार सांस्कृतिक एकता ल मजबूत करे म अपन भूमिका निभात हे। उंहें मुख्यमंत्री ह अपन संदेश म कीहिन हे कि होली के दिन उंच-नीच ले दूरिहा लोगन प्रेम के रंग म डूबे रहिथे। ओमन कीहिन कि ए बखत कोरोना बहुत कम होगे हे, फेर बचाव म ही हमर मनके सुरक्षा हे।
मुख्यमंत्री ह लोगन ले पर्यावरण ल धियान म राखत होली मनाये के अपील करीन हे। होली के तिहार पर्यावरण अउ आयुर्वेद ले घलो जुड़े हे। ए संबंध म शासकीय आयुर्वेदिक महाविद्यालय रायपुर के सह प्राध्यापक डॅाक्टर संजय शुक्ला ह बताइन कि ए समय वातावरण म कतकोन पराग कण मौजूद रहिथे, जउन ह एलर्जी वाले बीमारी पैदा करथे। तेखरे बर होलिका दहन म आम, साल, नीम के सूखा पेड़ के टहनी अउ गुग्गुल कपूर के उपयोग हवन के रूप म करना चाही। जेखर ले वातावरण ल संक्रमण ले मुक्त करे जा सकय। रंग अउ गुलाल के उपयोग करे के बेरा सावधानी बरतना चाही।
हर्बल गुलाल
ए बखत होली म स्थानीय स्तर म बनाये गे हर्बल गुलाल के विशेष मांग देखे जावत हे। एला प्रदेश के आने आने जिला के माइलोगिन मन डहार ले बनाय गे हावय। नारायणपुर अउ कोंडागांव जिला के माइलोगिन मन ह केंद्र के राष्ट्रीय ग्रामीण आजीविका मिशन अउ राज्य सरकार के बिहान योजना म स्व सहायता समूह के माध्यम ले हर्बल गुलाल बनाय के पहल करीन हे। समूह के माइलोगिन मन अभी तक पूरा प्रदेश म दू कुंटल हर्बल गुलाल बना डरे हे।
राज्यपाल अनुसुईया उइके ह प्रदेश के माइलोगिन मन डहार ले बनाय गे हर्बल गुलाल के पहल ल उंखर आत्मनिर्भरता बर एक ठन सुघ्घर शुरूआत बताइन हे।
कोविड टीका
देशभर म राष्ट्रीय टीकाकरण दिवस के मउका म बारह ले चौदा बछर के लईका मन बर कोविड टीकाकरण काली ले शुरू होगे हे। काली पहिलीच दिन तीन लाख ले जादा लईका मन ल कोविड के टीका लगाये गीस।
छत्तीसगढ़ म घलो ए अभियान के पहिली दिन बारह ले चौदा बछर के एक हजार छै सौ अठारा लईका मन ल टीका लगाये गीस। प्रदेश के आने-आने जिला अस्पताल म ये उमर के लईका मन ल कॅार्बिवैक्स टीका लगाये जावत हे। प्रदेश म बारह ले चौदा बछर के तेरा लाख इक्कीस हजार दू सौ छियांसी लईका मनके टीकाकरण के लक्ष्य राखे गे हावय। बछर दू हजार आठ, नौ अउ दस म पैदा होय लइका मन ए टीका लगाये बर पात्र होही।
हाथी विचरण
बालोद जिला के पुसवाड़ा अउ कुसमी वनक्षेत्र म जंगली हाथी मनके सेती हलचल तेज होगे हावय, फेर वन विभाग के अधिकारी मनके अनुसार छै झिन हाथी के ए दल ह राजनांदगांव जिला के पीपरखार अउ खड़गांव ले होवत बालोद के सीमा तक पहुंच गे हावय। ए हाथी मनके महाराष्ट्र डहार जाय के संभावना हे।
वन विभाग के अधिकारी मन संग स्थानीय पुलिस घलो हाथी मनके दल उपर लगातार नजर राखे हे। अधिकारी मनके कहना हे कि ए बखत हाथी मन महाराष्ट्र कोति जावत हे। फेर उंखर मनके लहुटे के आशंका ल देखत वन विभाग ह महाराष्ट्र के सीमा ले लगे राजनांदगांव जिला के मोहला क्षेत्र म कर्मचारी मन ल सचेत रेहे बर निर्देश दीन हे।
होली पुलिस बल तैनात
इही बीच होली तिहार के दउरान कोनो भी खराब घटना ल रोके बर पुलिस ह प्रदेश भर म सुरक्षा के बड़ इंतजाम करे हे। संवेदनशील जगा मन म पुलिस अउ नगर सेना के जवान मन ल तैनात करे गेहे।
उंहें पुलिस निगरानी गाड़ी घलो प्रमुख रद्दा मन म घूमत हे। इही कड़ी म दुर्ग रेंज के पुलिस महानिरीक्षक ह काली होली ल देखत दुर्ग म पुलिस अधिकारी मनके बइठका लीन। ओमन ह आने-आने जगा म तैनात अधिकारी मनले कीहिन कि होली म कोनो भी प्रकार के घटना ल रोके बर निगरानी शुदा बदमाश मन उपर विशेष रूप ले नजर राखे जाय। होली तिहार ल सुघ्घर ढंग ले मनाये बर जिला के संवेदनशील जगा म बड़ संख्या म पुलिस जवान मन ल तैनात करे गे हावय।
वन कर्मचारी पदनाम
वन विभाग के मैदानी क्षेत्र म काम करइया वनरक्षक-बीट गार्ड, वनपाल, उप वनक्षेत्रपाल अउ वनक्षेत्रपाल के पदनाम म बदलाव करे गेहे। ए सबो कर्मचारी मन ल अब अधिकारी केहे जाही। वन विभाग डहार ले ए संबंध म संशोधित पदनाम के प्रस्ताव उपर सहमति दे जाय के आदेश जारी कर दे गेहे।
ये आदेश के अनुसार वनरक्षक बीटगार्ड अब बीट फॉरेस्ट ऑफिसर के नाव ले जाने जाही। अइसने वनपाल ल अब सर्किल फॅारेस्ट ऑफिसर कहे जाही। उंहें उप वनक्षेत्र पाल ल सीनियर सर्किल फॉरेस्ट ऑफिसर के नाव दे गेहे। अइसने वनक्षेत्रपाल अब रेंज फॅारेस्ट ऑफिसर के नाव ले जाने जाही।
अंतर्राष्ट्रीय लॉन टेनिस प्रतियोगिता
भिलाई म अवइया उन्नीस ले छब्बीस मार्च तक अंतर्राष्ट्रीय लॉन टेनिस प्रतियोगिता के आयोजन करे जाही । अंतर्राष्ट्रीय टेनिस महासंघ डहार ले राखे गे ए प्रतियोगिता म पुरूष अउ महिला वर्ग म कुल चौसठ झन खिलाड़ी मन भाग लीही। प्रतियोगिता के सबो मैच नॉक आउट पद्धति ले खेले जाही।