कोविड टीका
राष्ट्रीय टीकाकरण दिवस के मउका म आज ले बारह ले चौदह बछर के लइका मन ल कोविड रोधी टीका लगाय के अभियान सुरू होगे। ए आयु वरग के लइका मन ल कार्बेवैक्स टीका लगाय जात हे। ए टीका हैदराबाद के कंपनी बायोलॉजिकल ई-लिमिटेड म बने हे। टीका लगाय बर पंजीयन ऑनलाइन या सोझे टीकाकरण केन्द्र म जाके करे जा सकत हे।
साठ बछर अउ ओखर ले जादा आयु वरग के जम्मों झन ल ऐहतियाती टीका लगत हे। एखर पहिली, ए आयु वरग के गंभीर रोग ले पीड़ित लोगन ल ही टीका लगाय जात रिहीस। कोविड के दूसर टीका के नौ महीना के बादे ए टीका लगाय जा सकही। केन्द्र ह ए संबंध म जम्मों राज्य अउ केन्द्रसासित प्रदेस के मुख्य सचिव मन ल दिसा-निरदेस जारी कर दे गेहे।
प्रधानमंत्री नरेन्द्र मोदी ह बारह ले चौदह बछर लइका मन ल कोविड टीका लगवाय के आग्रह करीन। अपन ट्वीट संदेस म ओमन किहीन कि आज के दिन बहुत महत्ता के हरय।
ऐति, छत्तीसगढ़ म घलो आज ले बारह ले चौदह बछर आयु वरग के लइका मन बर कोविड रोधी टीका लगाय के सुरूवात होगे। राज्य म ए आयु वरग के तेरह लाख इक्कीस हजार दू सौ छियासी लइका ल टीका लगाय के लक्ष्य राखे गेहे।
खैरागढ़-उपचुनाव
खैरागढ़ उपचुनाव बर काली सत्रह मार्च के अधिसूचना जारी होय के संगेसंग नामांकन पत्र भरे के काम सुरू हो जही, जउन चौबीस मार्च तक भरे जा सकही। उहें, पच्चीस मार्च के नामांकन पत्र के जांच होही अउ अट्ठाईस मार्च तक अभ्यर्थी अपन नाव वापिस ले सकही। ए उपचुनाव बर बारह अप्रैल के मतदान होना हे। उहें, वोट के गिनती सोलह अप्रैल के होही।
खबर के मुताबिक खैरागढ़ विधानसभा सीट जनता कांग्रेस छत्तीसगढ़ के विधायक देवव्रत सिंह के निधन के बाद ले खाली हवय। खैरागढ़ विधानसभा क्षेत्र म मतदाता मनके संख्या बाढ़के दू लाख ग्यारह हजार पांच सौ चालीस होगे हे।
विधानसभा-समाचार
राज्य विधानसभा म आज स्वास्थ्य कर्मचारी अउ मितानिन मनके मुद्दा ल लेके हंगामा होईस। एखर बाद विपक्षी सदस्य मन ह सदन ले बहिर्गमन कर दीन। प्रश्नकाल म आज विधायक डमरूधर पुजारी ह जानना चाही कि स्वास्थ्य कर्मचारी अउ मितानिन मनके संबंध म सरकार ह अपन जन-घोषणा पत्र म जउन वादा करे रिहीन, ओमा ले कतका पूरा होय हे।
एखर जुवाब म स्वास्थ्य मंत्री टी.एस. सिंहदेव के अनुपस्थिति म वन मंत्री मोहम्मद अकबर ह जुवाब दे बर खड़े होईन, फेर विपक्ष संतुष्ट नइ होईस। पाछु विपक्षी सदस्य अजय चंद्राकर, धर्मजीत सिंह अउ नारायण चंदेल ह पूरक प्रश्न पूछीन। इही बीच, विधानसभा अध्यक्ष डॉक्टर चरणदास महंत ह किहीन कि विभागीय मंत्री ही बने असन जानकारी दीहीं। ए बात म विपक्षी सदस्य मन ह हंगामा करत सदन ले बहिर्गमन कर दीन।
अस्पताल-प्रमाण पत्र
बने स्वास्थ्य सेवा अउ मरीज मन ल इलाज देवाय बर छत्तीसगढ़ के छै ठिन सरकारी अस्पताल ल केन्द्रीय स्वास्थ्य मंत्रालय कोति ले राष्ट्रीय गुणवत्ता आश्वासन मानक प्रमाण पत्र दे गेहे। एमा जशपुर जिला के प्राथमिक स्वास्थ्य केन्द्र भेलवा अउ फरसाबहार, रईपुर जिला के तीन सहरी प्राथमिक स्वास्थ्य केन्द्र- चंगोराभाटा, उरला अउ भरपुरी, कोरबा जिला के ढोढीपारा अउ दुरूग जिला के चरौदा सहरी प्राथमिक केन्द्र सामिल हे। संगेसंग जगदलपुर जिला अस्पताल अउ लोरमी सामुदायिक स्वास्थ्य केन्द्र ल गर्भवती माईलोगिन मनके देखभाल बर लक्ष्य प्रमाण पत्र दे गेहे।
स्वास्थ्य मंत्री टी.एस. सिंहदेव ह ए उपलब्धि खातिर अस्पताल के अधिकारी अउ करमचारी मन ल बधाई दीन हे।
राज्यपाल-नारी शक्ति सम्मान
राज्यपाल अनुसुईया उइके ह काली दुरूग म आने-आने क्षेत्र म बने काम करइया माईलोगिन मन ल नारी शक्ति सम्मान ले सम्मानित करीन। शाही दशहरा महिला उत्सव समिति कोति ले राखे गे ए कारीकरम म राज्यपाल ह किहीन कि सार्वजनिक जीवन म आगू बढ़इया माईलोगिन ल अपन जइसन दिगर माईलोगिन मन ल घलो आगू बढ़ाय के परयास करना चाही। ओमन किहीन कि महिला सशक्तिकरण बर कतकोन कानून बनाय हे। फेर ओ कानून के जानकारी होही, तभे तो महिला मजबूत बनही।
दुर्घटना
गरियाबंद जिला म काली होय एक रद्दा दुर्घटना म पांच झिन माईलोगिन समेत छै झिन के मउत होगे। उहें, दस ले जादा झन घायल होय हे। ए जम्मों झन एक ट्रेक्टर म बइठ के पारिवारिक कार्यक्रम म संघरे के बाद नवागढ़ ले मजरकट्टा लहुटत रिहीन। तभे जोबा मोड़ तीर टरक अउ ट्रेक्टर म भिंड़त होगे। ए हादसा म मउकाच म चार झिन के मउत होगे। उहें, दू झन आने के अस्पताल म इलाज के बेरा मउत होइस।
मुख्यमंत्री भूपेश बघेल ह ए हादसा म सोक जतईन हे अउ मउत होय लोगन के परिवार वाले मन ल दू-दू लाख रूपिया अउ घायल मनके इलाज बर पचास-पचास हजार रूपिया के सहायता रासि देके निरदेस दीन हे।
उहें, राजनांदगांव जिला के आरी-कोनारी बेरियर तीर दू फटफटी म होय टक्कर म दू झन मनखे के मउत होगे। दूनों डोंगरगांव ले लगे राजाखुज्जी गांव के रहवइया रिहीन।
माओवादी-समर्पण
सुकमा जिला म छह झिन माओवादी मन ह आत्मसमर्पण करे हे। एखर मन उपर जिला म होय कई ठिन बड़े घटना म सामिल रेहे के आरोप हवय। ए जम्मों माओवादी मन ह सीआरपीएफ के डीआईजी योज्ञान सिंह अउ पुलिस अधीक्षक सुनील शर्मा के आगू आत्मसमर्पण करीन हे। पुलिस के मुताबिक ए माओवादी मन सासन के पुनर्वास नीति ले परभावित होके समाज के मुख्यधारा ले जुड़े के फइसला करीन हे।
होली-ईको फ्रैंडली गुलाल
प्रेम, भाईचारा अउ रंग के तिहार होली परन दिन मनाय जाही। काली रतिहा होलिका दहन होही। राजधानी रईपुर समेत प्रदेस के आने-आने जिला म होलिका दहन के तियारी होगे हे। एसो हाट-बाजार म स्व-सहायता समूह के माईलोगिन मन कोति ले बनाय गे हर्बल गुलाल के संग गोबर ले बने गुलाल के मांग हवय। कुछेक दिन पहिली मुख्यमंत्री भूपेश बघेल ह गोबर ले बने गोमय गुलाल लांच करीन। एला दंतेवाड़ा जिला के महिला स्व-सहायता समूह ह कृषि विज्ञान केन्द्र के वैज्ञानिक मनके अगुवई म तियार करीन हे। ए गुलाल ल ऑनलाइन घलो बिसाय जा सकत हे। कृषि विज्ञान केन्द्र के वरिष्ठ वैज्ञानिक डॉक्टर नारायण साहू ह बतईन कि गोमय हर्बल गुलाल म गोबर के संगेसंग प्रसंस्कृत वर्मी कम्पोस्ट, हल्दी, चंदन जइसन प्राकृतिक जिनीस मिलाय गेहे।
उहें, आने-आने जिला के स्व-सहायता समूह के माईलोगिन मन फूल, मक्का के आटा, पालक, लाल भाजी, चुकुंदर, हरदी अउ सेंदूर ले हर्बल तियार करे हे। ए गुलाल हाट-बाजार के संगेसंग सबरी मार्ट म मिलत हे।
हाथी-उत्पात
रायगढ़ जिला के चिखलापानी अउ छत्तासराई गांव म पाछु रतिहा हाथी के हमला म दू झिन माईलोगिन के मउत होगे। उहें, राजनांदगांव जिला के मोहला पानाबरस जंगल ले खड़गांव ले लगे सिरोली गांव म एक घांव फेर हाथी के दल देखे गेहे, जेला देखत वन विभाग ह तीर-तखार के दस ले जादा गांव म मुनादी करवा देहे अउ गांव के लोगन ल सतर्क रेहे बर केहे हे।
परिवहन विभाग-अभियान
प्रदेस म परिवहन विभाग कोति ले गाड़ी के बकाया टैक्स वसूली बर अभियान चलाय जात हे। काली एके दिन म साढ़े चौव्वन लाख रूपिया के बकाया टैक्स वसूले गीस। उहें, रईपुर जिला म परिवहन विभाग कोति ले उन्नीस ठिन गाड़ी के कुर्की के कार्रवाई घलो करे गीस।
अउ अब थोरकुन समाचार सार म-
– प्रदेस म कस्टम मिलिंग बर धान के उठाव तेजी ले होवत हे। पन्द्रह मार्च तक चौरानवे लाख मीटरिक टन ले जादा धान के उठाव होगे हे। उहें, केन्द्रीय पुल म उनतीस लाख अठहत्तर हजार मीटरिक टन चाउर जमा कराय गेहे।
– राज्य सूचना आयोग ह तय बेरा म जानकारी नइ देवाय के आरोप म चार झिन अधिकारी उपर पच्चीस-पच्चीस हजार रूपिया के जुर्माना लगाय हे।
– जशपुर पुलिस ह एनटीपीसी अउ रेलवे म नौकरी लगाय के नाम म एक मनखे ले करीबन साढ़े सत्रह लाख रूपिया के ठगी के मामला म एक आरोपी ल राची ले गिरफ्तार करे हे। एक आने आरोपी ल खोजे जात हे।
अउ
– होली तिहार म देखत प्रदेस म पुलिस ह पेट्रोलिंग अउ चेकिंग अभियान सुरू कर देहे। कोंडागांव पुलिस ह तिहार के पहिली सहर म पैदल मार्च करीन अउ संदिग्ध लोगन उपर कार्रवाई करीन।
ू