राष्ट्रीय लोक अदालत
राष्ट्रीय विधिक सेवा प्राधिकरण नई दिल्ली डहार ले छत्तीसगढ़ सहित देशभर म आज राष्ट्रीय लोक अदालत के आयोजन करे गीस। लोक अदालत म विशेष रूप ले भाड़ा नियंत्रण, चेक बांउस, आबकारी, सिविल, जलकर, भूमिकर श्रम कानून सहित राजीनामा योग्य प्रकरण के निराकरण करे गीस।
जिला अउ सत्र न्यायालय रायपुर डहार ले जिला परिसर म आयोजित लोक अदालत शुभारंभ जिला सत्र न्यायाधीश अउ जिला विधिक सेवा प्राधिकरण के अध्यक्ष अरविंद वर्मा ह करीन। लोक अदालत म निराकरण बर लगभग एक हजार मामला राखे गे रीहिस। ये अवसर म महिला अउ बाल विकास विभाग डहार ले प्रदर्शनी घलो लगाये गे रीहिस।
किसान मेला
इंदिरा गांधी कृषि विश्व विद्यालय परिसर रायपुर म काली ले चार दिवसीय अंतर्राष्ट्रीय किसान मेला अउ कृषि प्रदर्शनी के आयोजन करे जाही।
कृषि मंत्री रविंद्र चौबे ह काली फार्मटेक एशिया अंतर्राष्ट्रीय कृषि प्रदर्शनी के शुभारंभ करीन। ए अवसर म श्री चौबे ह कीहिन कि कृषि क्षेत्र के विकास बर प्रदेश म कृषि आधारित उद्योग मन ल बढ़ावा दे जाय के जरूरत हे। ओमन कीहिन कि छत्तीसगढ़ म राज्य निर्माण के बाद कृषि अउ किसान मनके स्थिति काफी बेहतर होय हे अउ एमा इंदिरा गांधी कृषि विश्वविद्यालय के बहुत बड़े योगदान हे।
किसान मौत
नवा रायपुर म प्रदर्शन के दउरान काली बरौदा निवासी एक झिन किसान सियाराम पटेल के मउत हेगे। मुख्यमंत्री भूपेश बघेल ह किसान के आकस्मिक निधन उपर शोक व्यक्त करे हे। श्री बघेल ह मृतक किसान के परिजन मन ल चार लाख रूपिया आर्थिक सहायता राशि प्रदान करे के घोषणा करीन। मुख्यमंत्री ह आज मृतक किसान के बेटा से फोन म बातचीत करीन, संगेसंग ओमन मुआवजा संबंधी मामला म अपर मुख्य सचिव ल जांच के निर्देश दीन। मुख्यमंत्री ह कीहिन कि ये दुख के घड़ी म ओमन पीड़ित किसान परिवार के संग हे अउ उंखर हरसंभव सहायता करही।
उंहें भाजपा के प्रदेश अध्यक्ष विष्णुदेव साय ह नवा रायपुर म किसान के मउत के मामला म राज्य सरकार ल जिम्मेदार ठहरावत हुए एखर स्वतंत्र जांच के मांग करीन हे। श्री साय ह कीहिन कि किसान मनके नाम उपर सत्ता म आये कांग्रेस सरकार के कार्यकाल म किसान आत्महत्या करे बर मजबूर हे। श्री साय ह राज्य सरकार से मृतक किसान के परिजन मन ल कम से कम एक करोड़ रूपिया मुआवजा देके मांग करे हे।
आयकर छापा
आयकर विभाग के टीम ह छत्तीसगढ़ के दू झिन कारोबारी अउ उंखर करीबी मनके इक्कीस ठन ठिकाना मन म जांच अउ तलाशी अभियान के दउरान लगभग पांच करोड़ रूपिया के नकद राशि जब्त करे हे। नकदी के संगेसंग लगभग तीन किलोग्राम के बिना बिल वाले सोना के आभूषण घलो जब्त करे गेहे। जेखर कीमत करीब डेढ़ करोड़ रूपिया बताय गेहे। जांच के दउरान अधिकारी मन ह निषेधाज्ञा आदेश पीओ के जरिया नौ ठिन बैंक लॉकर ल घलो सील कर देहे। रायपुर, जशपुर, सूरजपुर, भिलाइ,र् दुर्ग अउ कबीरधाम जिला मनके सतरह ले जादा ठिकाना मन म अभी भी तलाशी अभियान जारी हे ।
वन विभाग कार्यवाही
प्रदेश म वन अपराध मन उपर रोकथाम बर वन विभाग डहार ले लगातार अभियान चलाये जात हे। इही कड़ी म बीजापुर जिला के भोपालपट्नम म वन विभाग के टीम ह बड़े कार्रवाई करत लगभग दस लाख रूपिया मूल्य के सागौन लट्ठा अउ चिरान लकड़ी जब्त करे हे। संगेसंग बीजापुर, इंद्रावती टाइगर रिजर्व के मद्देड़ परिक्षेत्र के अंतर्गत संचालित तीन ठन फर्नीचर मार्ट ल घलो सील कर दे गेहे। उंहें दस ठिन मशीन घलो जब्त करे गेहे।
अइसने कोंडागांव जिला म पुलिस ह एक ठिन वाहन से दू करोड़ रूपिया कीमत के नौ सौ पच्यासी किलोग्राम चंदन के लकड़ी बरामद करे हे। ये मामला म चार झिन आरोपी मन ल गिरप्तार करे गेहे। ये आरोपी मन चंदन के लकड़ी ल वाहन म छुपाके नागपुर ले जावत रीहिन।
लोकवाणी
मुख्यमंत्री भूपेश बघेल के मासिक रेडियो वार्ता लोकवाणी के सत्ताईसवीं कड़ी के प्रसारण काली इतवार तेरह मार्च के होही। मुख्यमंत्री ह लोकवाणी म ये बखत छत्तीसगढ़ सरकार-नारी शक्ति के सरोकार- विषय उपर प्रदेशवासी मन संग बातचीत करहीं । लोकवाणी के प्रसारण छत्तीसगढ़ स्थित आकाशवाणी के सबो केंद्र, एफ.एम. रेडियो, अउ क्षेत्रीय समाचार चैनल मनले बीहनिया साढ़े दस बजे ले करे जाही।
बातों बातों में
प्रादेशिक समाचार एकांश डहार ले समसामयिक विषय मन उपर प्रसारित करे जाने वाला बातों बातों में कार्यक्रम ये बखत अंतर्राष्ट्रीय महिला दिवस उपर केंद्रित रीही।
एखर तहत काली इतवार के महिला सशक्तिकरण के क्षेत्र म उल्लेखनीय कार्य करइया राजनांदगांव जिला के सुश्री मधुलिका रामटेके ले करे गे भेंटवार्ता प्रसारित करे जाही। अंतर्राष्ट्रीय महिला दिवस के अवसर म आयोजित एक ठिन कार्यक्रम म राष्ट्रपति रामनाथ कोविंद के हाथों सुश्री रामटेके ह बछर दू हजार इक्कीस बर नारी शक्ति पुरस्कार ले सम्मानित होय हे। उंखर लेगे भेंटवार्ता के प्रसारण आकाशवाणी रायपुर केंद्र डहार ले काली बीहनिया नौ बजके तीस मिनट म करे जाही। एला छत्तीसगढ़ स्थित आकाशवाणी के सबो केंद्र रिले करही।
जिले की चिट्ठी
आकाशवाणी के रायपुर केंद्र डहार ले काली संझा छै बजके तीस मिनट से छै बजके पैंतीस मिनट तक जिला के चिट्ठी कार्यक्रम के प्रसारण करे जाही। समाचार एकांश के ये कार्यक्रम ल छत्तीसगढ़ स्थित आकाशवाणी के सबो केंद्र रिले करहीं । ये बखत के अंक म बस्तर जिला के गतिविधि मनके बारे म जानकारी दे जाही।
राजनांदगांव पुलिस बैंक
राजनांदगांव जिला म पुलिस के घलो अपन एक ठन बैंक हे, जिहां पुलिस कर्मचारी मन बचत राशि जमा करे के संग जरूरत पड़े म ये बैंक ले ऋण घलो ले सकत हे। बैंक से ऋण उपलब्ध कराय बर नियम मनके सरलीकरण घलो करे गेहे। ताकि पुलिसकर्मी मन आसानी से ऋण ले सकयं । ब्याजदर म घलो कमी करे गेहे। ये बैंक म पुलिसकर्मी मन बर अधिकतम पांच लाख रूपिया तक ऋण लेके सुविधा हे। ये पुलिस बैंक ह बछर दू हजार ले छत्तीसगढ़ पुलिस साख सहकारी मर्यादित राजनांदगांव के नाम से संचालित हे। ये बैंक म कुल एक हजार चार सौ अठाईस कर्मचारी हितग्राही के रूप म जुड़े हे।
शिवरीनारायण मानस मंडली
संस्कृति अउ पुरातत्व विभाग डहार ले जांजगीर-चांपा जिला के शिवरीनारायण म आठ ले दस अप्रैल तक मानस मंडली मनके तीन दिवसीय राज्य स्तरीय प्रतियोगिता के आयोजन करे जाही।
एखर पहिली ग्राम पंचायत स्तर म प्रतियोगिता मनके आयोजन करे जाही। एखर बाद पंद्रह से तीस मार्च तक जनपद पंचायत स्तरीय अउ तीन से पांच अप्रैल तक जिला स्तरीय प्रतियोगिता आयोजित करे जाही। राज्य स्तरीय प्रतियोगिता म विजेता मानस मंडली मन ल पुरस्कृत करे जाही।
माओवादी समर्पण
सुकमा जिला म मिलिशिया कमांडर सहित दस झिन माओवादी मन ह पुलिस के समक्ष आत्मसमर्पण कर देहे। जिला के पुलिस अधीक्षक सुनील शर्मा ह बताइन कि ये माओवादी मन सीआरपीएफ के दू सौ सत्ताईसवां बटालियन अउ जिला पुलिस बल के समक्ष आत्मसमर्पण करे हे। एमा से तीन झन माओवादी मन उपर टहकवाड़ा हमला म शामिल रेहे के आरोप हे ।
अउ अब थोरकुन समाचार सार म-
– छत्तीसगढ़ योग आयोग डहार ले कोविड नांइटिन संक्रमण म योग की भूमिका विषय उपर आज रायपुर म अंतर्राष्ट्रीय वेबिनार के आयोजन करे गीस।
– कोरोना संक्रमण के मामला म कमी ल देखत रायपुर जिला के सबो मॉल, जिम, सिनेमाघर, ऑडिटोरियम, लाइब्रेरी, स्वीमिंग पूल अउ आने आयोजन स्थल ल अब शत प्रतिशत क्षमता के संग संचालित करे जा सकही।
– रायपुर जिला म तेरह, छब्बीस, सत्ताईस अउ अठाईस मार्च के अवकाश के दिन घलो पंजीयन कार्यालय खुला रही।
अउ
– कोरबा जिला के बांगो थाना क्षेत्र म ट्रक अउ कार के भिडंत म तीन झन लोगन मनके मउत हेगे।