स्वच्छता पुरस्कार
छत्तीसगढ़ ल नई दिल्ली म राखे गे स्वच्छ अमृत महोत्सव कारीकरम म सबले स्वच्छ राज्य के इनाम मिले हे। ए इनाम राष्ट्रपति रामनाथ कोविंद के हाथ मुख्यमंत्री भूपेश बघेल ह लीन। ए समारोह म छत्तीसगढ़ के सबले जादा सड़सठ नगरीय निकाय ल घलो बने प्रदर्सन बर आने-आने श्रेणी म पुरस्कार दे गीस। ए बेरा म राष्ट्रपति ह किहीन कि स्वच्छ भारत अभियान के सबले बड़े सफलता देस के लोगन के सोच म बदलाव हवय। स्वच्छता बर अपन सोच म बदलाव लाय बर राष्ट्रपति ह देसवासी मन ल बधाई दीन।
राष्ट्रपिता महात्मा गांधी ल सुरता करत श्री कोविंद ह किहीन कि स्वच्छता सबले पहिली प्राथमिकता होना चाही। ओमन किहीन कि गांधीजी के सोच ल प्रधानमंत्री नरेन्द्र मोदी ह स्वच्छत भारत मिशन ले एक जन आंदोलन के रूप म आगू बढ़ईन। देस ल स्वच्छ बनाना स्वतंत्रता सेनानी मन बर सच्चा श्रद्धांजलि हवय। राष्ट्रपति ह किहीन कि एसो के स्वच्छ सर्वेक्षण पुरस्कार के बिसेस महत्ता हवय, काबर कि देस आजादी के अमृत महोत्सव मनावत हे।
ए मउका म मुख्यमंत्री भूपेश बघेल ह किहीन कि छत्तीसगढ़ ह सरलग तीसर बछर स्वच्छ राज्य के राष्ट्रीय पुरस्कार जीते हे। एखर श्रेय छत्तीसगढ़ के लोगन ल जाथे।
उहें, स्वच्छ सर्वेक्षण गार्बेज फ्री सिटी बर रईपुर समेत अंबिकापुर, भिलाई-चरौदा, बिलासपुर, चिरमिरी, रायगढ़, कोरबा, राजनांदगांव अउ दुरूग नगर निगम ल इनाम दे गीस। एखर संगेसंग छत्तीसगढ़ ल सफई मित्र सुरक्षा चैलेंज दू हजार इक्कीस म घलो बेस्ट राज्य के अवॉर्ड दे गेहे।
गोधन न्याय योजना
मुख्यमंत्री भूपेश बघेल काली इक्कीस नवंबर के गोधन न्याय योजना म पशुपालक स्व-सहायता समूह अउ गौठान ल करीबन दू करोड़ पैंतीस लाख रूपिया के रकम ऑनलाइन जारी करही। एमा पाछु एक नवंबर ले पन्द्रह नवंबर तक राज्य के गौठान म पशुपालक, ग्रामीण, किसान अउ जिखर भूईंया नइ हे उंखर मन ले गोधन न्याय योजना म बिसाय गे एक लाख नौ हजार कुंटल गोबर के बदला म दू करोड़ चार लाख रूपिया के भुगतान अउ गौठान समिति महिला स्व-सहायता समूह ल इकतीस लाख रूपिया के लाभांश राशि सामिल हवय।
विद्युत कर्मी-डीए भत्ता
राज्य सरकार ह बिजली करमचारी मनके महंगाई भत्ता म तीन प्रतिसत के बढ़वार करे के संगेसंग उंखर उच्च कार्यदक्षता ल प्रोत्साहित करे खातिर नौ हजार बोनस देके घोषणा करे हे। राज्य सरकार के ए घोसना ले छत्तीसगढ़ विद्युत कंपनी के सोलह हजार ले जादा करमचारी अउ अधिकारी मन ल एखर फायदा मिलही। छत्तीसगढ़ स्टेट पावर कंपनी के चेयरमैन अंकित आनंद ह बतईन कि पहिली बिजली करमचारी मन ल अट्ठाईस प्रतिशत तक महंगाई भत्ता मिलत रिहीस। ओ अब तीन प्रतिशत बाढ़के इकतीस प्रतिशत जो जही। एखर गणना एक जुलाई दू हजार इक्कीस ले होही। पेंसन पवइया मन ल महंगाई भत्ता के फायदा मिलही।
महिला नगर सैनिक-भर्ती
प्रदेस म एक हजार सात सौ पन्द्रह नगर महिला सैनिक के भर्ती करे जाही। ए महिला नगर सैनिक प्रदेस के महिला आश्रम छात्रावास म तैनात होही। प्रदेस म एक हजार चार सौ उनहत्तर महिला आश्रम छात्रावास हवय। हरेक जघा दू महिला नगर सैनिक के ड्यूटी लगाय जाही। भर्ती के संबंध म परिपत्र जारी करे गेहे।
भाजपा-प्रदर्शन
भारतीय जनता पार्टी ह आज पेट्रोल-डीजल म वैट कमती करे के मांग ल लेके राजधानी रईपुर समेत प्रदेस के जम्मों जिला मुख्यालय म धरना-प्रदर्शन करीन अउ चउक-चउराहा म चक्काजाम करे विरोध जतईन।
रईपुर के शास्त्री चउक म प्रदेश भाजपा अध्यक्ष विष्णुदेव साय के अगुवई म भाजपा नेता अउ कार्यकर्ता मन ह चक्काजाम करे विरोध जतईन। ए बेरा म पुलिस ह जम्मों नेता अउ कार्यकर्ता मन ल गिरफ्तार कर लीन। श्री साय ह किहीन कि प्रदेस के राज्य सरकार झूठ बोले के काम करत हे। ओमन किहीन कि कहू हमर मांग नइ माने गीस त हमन उग्र आंदोलन करबो।
ओति, बिलासपुर सांसद अरूण साव, महासमुंद म सांसद चुन्नीलाल साहू, जांजगीर-चांपा म सांसद गुहाराम अजगले अउ विधायक नारायण चंदेल के अगुवई म भाजपा कार्यकर्ता मन ह विरोध प्रदर्शन करीन। प्रदेश के आने जिला मुख्यालय ले घलो धरना प्रदर्शन के खबर हवय।
मन की बात
प्रधानमंत्री नरेन्द्र मोदी ए महीना के अट्ठाईस तारीख के आकाशवाणी ले मन की बात कारीकरम म देस-बिदेस के लोगन संग अपन विचार साझा करही। प्रधानमंत्री ह लोगन ले अपन विचार साझा करे बर किहीन। एक ट्वीट म श्री मोदी ह किहीन कि ए बखत मन की बात कारीकरम बर संभावित विषय अउ शीर्षक म लोगन के विचार जानना चाहत हे। ओमन लोगन ल अपन संदेस माईजीओवी अउ नमो ऐप म रिकार्ड कराय के आग्रह करीन हे। सुनइया मन टोल फ्री नंबर- एक आठ शून्य-शून्य एक-एक – सात आठ शून्य-शून्य म अंग्रेजी या हिन्दी म अपन संदेस रिकार्ड करा सकत हे।
आरएसएस-घोष शिविर
राष्ट्रीय स्वयंसेवक संघ के सर संघचालक मोहन भागवत ह किहीन कि भारत हर एक ल अपनाथे। ओमन किहीन कि हमन धर्मांतरण नइ करावन। हम ओ सनातन परंपरा ले हवय, जउन ल अब हिन्दू धर्म माने जाथे। सर संघचालक काली मुंगेली जिला के मदकूद्वीप म आरएसएस के तीन दिवसीय घोष प्रशिक्षण शिविर म बोलत रिहीन। ओमन स्वयंसेवक मन ले किहीन कि हमर पुरखा मन दुनियाभर म गीन अउ सत्य के ज्ञान दीन। हमर सत्य म भगवान राम विराजथे। भारत अनेकता म एकता सिखोथे।
एखर पहिली, आर.एस.एस. प्रमुख ह प्रदेश पदाधिकारी मनके बइठका लीन अउ घोष वरग के आयोजन म सामिल होईन।
अमृत महोत्सव-क्विज विजेता-जवाब
आजादी के अमृत महोत्सव म प्रादेशिक समाचार एकांश, आकाशवाणी, रईपुर डहार ले राखे गे ‘‘प्रश्नोत्तरी प्रतियोगिता‘‘ म हमर श्रोता मन ह बड़ उछाह के संग भाग लेवत हे। काली ए प्रश्नोत्तरी के चौदहवां अंक म छत्तीसगढ़ी बुलेटिन म प्रश्न रिहीस- ‘छत्तीसगढ़ के प्रथम सहीद सोनाखान के वीर नारायण सिंह ल अंग्रेज मन ह रईपुर म कोन तारीख के फांसी दे रिहीन ?। एखर सही जवाब हे – 10 दिसंबर, 1857।
सवाल के जवाब म बड़ संख्या म श्रोता मन ह अपन जवाब भेजीन। फेर, सबले पहिली जवाब भेजइया विजेता हवय – धमतरी जिला के गांव घुटकेल नगरी के रहइवया गोविंदा कुमार साहू। आकाशवाणी परिवार डहार ले हमन श्री साहू ल बधई अउ सुभकामना देवत हन। श्री साहू ह आकाशवाणी समाचार के नियमित श्रोता हरय।
बातों-बातों-में
अभी आजादी के अमृत महोत्सव मनाय जावत हे। एमा आजादी के आंदोलन म भाग लेवइया नेता मनके संगेसंग गुमनाम नायक के संबंध म घलो जानकारी दे जावत हे। आजादी के आंदोलन के बेरा महात्मा गांधी कोति ले करे गे छत्तीसगढ़ दउरा के संबंध म अउ जादा जानकारी पाय बर आकाशवाणी समाचार ह बात करीन – प्रदेश के जाने-माने राजनीतिक अउ सामाजिक विश्लेषक अउ वरिष्ठ पत्रकार शशांक शर्मा ले।
ए गोठबात के प्रसारण समसामयिक विषय म आधारित हमर साप्ताहिक कारीकरम ‘‘बातों-बातों-में‘‘ काली इक्कीस नवंबर इतवार के बिहनिया साढ़े नौ बजे आकाशवाणी केन्द्र रईपुर ले करे जाही। एला छत्तीसगढ़ स्थित आकाशवाणी के जम्मों केन्द्र एक संघरा रिले करही।
अउ अब थोरकुन समाचार सार म-
– राज्य सरकार ह आज आईजी अउ डीआईजी के पदोन्नति सूची जारी करे हे। ए सूची म कोनों भी अधिकारी मनके प्रभार म फेरबदल नइ होय हे। एखर संगेसंग तीन आईपीएस अधिकारी मन ल प्रोफार्मा पदोन्नति दे गेहे।
– राज्य के जनसंख्या म आने पिछड़ा वरग अउ आर्थिक रूप ले कमजोर वरग के सर्वें के आखिरी तारीख तीस नवंबर हवय।
– राजधानी रईपुर म आज अनुसूचित जाति-अनुसूचित जनजाति के विद्यार्थी मन ह आदिम जाति मंत्री डॉक्टर प्रेमसाय सिंह टेकाम के बंगला के घेराव करीन। ए विद्यार्थी हॉस्टल म रेहे बर पच्चीस बछर के उम्र बंधन ल हटाय के मांग करत रिहीन।
अउ
– धमतरी म काली ले तीन दिवसीय राज्य स्तरीय भारोत्तोलन प्रतियोगिता सुरू होगे हे। एमा प्रदेस के चौबीस जिला ले करीबन चार सौ खिलाड़ी भाग लेवत हे। चुने गे खिलाड़ी ओड़िशा के भुवनेश्वर म होवइया राष्ट्रीय प्रतियोगिता म भाग लीहीं।