राष्ट्रपति-पद्म पुरस्कार
राष्ट्रपति रामनाथ कोविंद ह आज राष्ट्रपति भवन म एक समारोह म पद्म पुरस्कार प्रदान करीन। पूर्व केन्द्रीय मंत्री अरूण जेटली, जॉर्ज फर्नांडीस अउ सुषमा स्वराज ल मरणोपरांत पद्म विभूषण ले सम्मानित करे गीस। शास्त्रीय गायक पंडित छन्नूलाल मिश्रा ल घलो पद्म विभूषण ले सम्मानित करे गीस। सुषमा स्वराज के बेटी बांसुरी स्वराज अउ अरूण जेटली के पत्नी संगीता जेटली ह राष्ट्रपति ले ये सम्मान प्राप्त करीन।
बैडमिंटन खिलाड़ी पी.वी. सिंधु ह पद्म भूषण सम्मान प्राप्त करीन।
उहें, छत्तीसगढ़ के जाने-माने सूफी गायक मदन सिंह चौहान ल घलो पद्मश्री ले सम्मानित करे गीस। रईपुर के रहइया श्री चौहान लोक संगीत शिक्षक, गजल गायक अउ सूफी गायक हवय। श्री चौहान ल ‘‘गुरूजी‘‘ के नाव ले घलो जाने जाथे।
मुख्यमंत्री भूपेश बघेल ह संगीतज्ञ मदन सिंह चौहान ल कला के क्षेत्र म पद्मश्री ले सम्मानित करे जाय म ओमन ल बधाई अउ सुभकामना दीन हे। श्री बघेल ह किहीन कि श्री चौहान ह अपन पूरा जीवन संगीत साधना ल समर्पित कर देहे। उंखर ए उपलब्धि पूरा छत्तीसगढ़ ल गौरवान्वित करने वाला हरय।
किसान-जिनोम पुरस्कार
छत्तीसगढ़ के छत्तीस तरह के भाजी मन ल संरक्षित करने वाला युवा किसान दीनदयाल यादव ल ग्यारह नवंबर के नई दिल्ली म जिनोम पुरस्कार ले सम्मानित करे जाही। जांजगीर-चांपा जिला के बहेराडीह गांव के रहइया किसान दीनदयाल यादव ह भाजी मनके संगेसंग पसहर चाउर, जंगली मिर्चा अउ जंगली भिंडी जइसे फसल मन ल संरक्षित करे हे। एखर बर ओमन ल केन्द्रीय कृषि अउ किसान कल्याण मंत्रालय डहार ले जिनोम पुरस्कार दे जाही।
फायरिंग-जवान मौत
सुकमा जिला म केन्द्रीय रिजर्व पुलिस बल सीआरपीएफ के एक जवान ह आज बिहनिया कैम्प म सोवत जवान मन उपर फायरिंग कर दीस। ए घटना म चार झिन जवान मनके मउत होगे हे। उहें, तीन झिन दूसर जवान घायल होगे हे। एमा ले दू जवान मन ल एयर एम्बुलेंस ले रईपुर लाय गेहे। जबकि एक झिन दूसर जवान के भद्राचलम के अस्पताल म इलाज चलत हे।
जिला के पुलिस अधीक्षक सुनील शर्मा ह घटना के पुष्टि करत बतईन कि मारियागुड़ाम-लिंगपल्ली बेस कैम्प म तैनात जवान मनके बीच कोनों बात ल लेके झगड़ा होईस, जेखर बाद एक जवान ह आज बिहनिया करीबन तीन ले चार बजे के बीच कैम्प म सुतत जवान मन उपर अचानक फायरिंग सुरू कर दीस। ए घटना म तीन झिन जवान मनके मउकाच म मउत होगे। जबकि एक झिन दूसर जवान ह इलाज के दउरान दम तोड़ दीस। पुलिस ह आरोपी जवान रितेश रंजन ल गिरफ्तार कर लेहे।
घटना के सूचना मिलतेच सीआरपीएफ के पुलिस महानिरीक्षक, बस्तर रेंज के आई.जी., सुकमा कलेक्टर अउ एसपी घटनास्थल म पहुंच गेहे अउ जवान मन ले ए घटना के जानकारी लेवत हे।
मुख्यमंत्री भूपेश बघेल ह ए घटना ल दुर्भाग्यपूर्ण बतावत मृतक जवान मनके प्रति गहरा दुख व्यक्त करीन हे। ओमन पुलिस अधिकारी मन ले किहीन हे कि अइसन घटना के पुनरावृत्ति न हो, तेखर सेती जम्मों जरूरी उपाय करे जाय।
अमृत महोत्सव प्रश्नोत्तरी
आजादी के अमृत महोत्सव म आकाशवाणी समाचार ह स्वाधीनता संग्राम अउ ओखर गौरवशाली इतिहास उपर विशेष अमृत महोत्सव प्रश्नोत्तरी कार्यक्रम आयोजित करत हे। सुनइया मन ल बतादन कि ए प्रश्न ह राष्ट्रीय स्तर म राखे गे प्रश्नोत्तरी के तहत पूछे जाही। एखर जवाब प्रादेशिक बुलेटिन के प्रश्नोत्तरी बर राखे गे ई-मेल या मोबाईल नंबर के बजाय आज के प्रश्न के बाद बताय गे वाट्सअप नंबर या ई-मेल म भेजना होही।
आज के प्रश्न हे – स्वराज ध्वज के डिजायन कोन तैयार करे रिहीन अउ ए ध्वज का बात के प्रतीक हरय।
श्रोता मन अपन उत्तर वाट्सअप नंबर – आठ आठ दू छै पांच चार छै दो छै दो या ई-मेल अमृत महोत्सव क्विज एट द रेट प्रसार भारती डॅाट जीओवी डॅाट इन म भेज सकत हे।
ए प्रतियोगिता बर एक झिन भाग्यशाली प्रतिभागी ल विजेता के रूप म चुने जाही अउ काली के समाचार प्रभात म उंखर नाव के घोषणा करे जाही। विजेता ल ई-प्रमाण पत्र अउ सांकेतिक पुरस्कार दे जाही।
इंद्रावती नदी-मौत
दंतेवाड़ा जिला म इंद्रावती नंदिया म डूबे ले एन.एम.डी.सी. के दू झिन करमचारी मनके मउत होगे हे। मिले जानकारी अनुसार जिला के बारसूर स्थित सातधार पुलिया के नीचे दूनों करमचारी मन अपन परिवार संग पिकनिक मनाय गे रिहीन। ए दउरान परिवार के कुछ मनखे मन नदिया म नहावत रिहीन। नंदिया के बहाव तेज होय के कारण एमा ले दू झिन लोगन मनके पानी म डूबे ले मउत होगे। गोताखोर मनके मदद ले दूनों करमचारी के सव बरामद कर ले गेहे।
मुख्यमंत्री भूपेश बघेल ह ए घटना उपर दुख जतावत दूनों करमचारी के सोक संतप्त परिवार ल संवेदना व्यक्त करीन हे।
इही बीच, बीजापुर जिला म आज इंद्रावती नदी म डोंगी पलटे ले एक युवक पानी म बोहा गे। गोताखोर मनके मदद ले लापता युवक ल खोजे जात हे।
छठ पर्व
देस के आने-आने हिस्सा म नहाय-खाय के संग आज ले चार दिन के छठ महापर्व के अनुष्ठान सुरू होगे हे। श्रद्धालु मन आज स्नान-ध्यान के बाद व्रत सुरू करीन। काली खरना हरय। जेखर बाद छत्तीस घंटा के निर्जला उपवास सुरू हो जथे। बुधवार के डूबत सूरज ल अर्ध्य अर्पित करे जाही। उहें, गुरूवार के उगता सूरज ल अर्ध्य देके संग ए परब के अनुष्ठान संपन्न हो जही।
छत्तीसगढ़ म घलो छठ परब ल लेके भारी उछाह देखे जात हे। रईपुर समेत दूसर जिला के नदी अउ तालाब किनारे छठ पूजा बर घाट के सफाई कर ले गेहे।
माओवादी-ग्रामीण रिहा
सुकमा जिला म तीन दिन पहिली अगवा करे गे पांच झिन ग्रामीण मन ल आज माओवादी मन रिहा कर दीन। खबर के मुताबिक माओवादी मन अगवा करे गे जम्मों ग्रामीण मनके पिटाई करे हे, जेमा दू झिन ल गंभीर चोट आय हे। ए जम्मों ग्रामीण बटेर गांव के रहइया हरय। माओवादी मन पाछु सुक्रवार के चार अउ सनिवार के एक मनखे ल अगवा कर ले रिहीन। सर्व आदिवासी समाज ह माओवादी मन ले अपील करे रिहीस कि ओमन अगवा करे गे जम्मों ग्रामीण मन ल सुरक्षित रिहा कर दे।
कोविड टीका
राष्ट्रीय टीकाकरण अभियान के तहत अब तक एक सौ आठ करोड़ इंक्यावन लाख ले जादा कोविड टीका लगाय जा चुके हे।
ऐति, छत्तीसगढ़ म कोरोन ले बचाव बर अब तक दू करोड़ सैंतीस लाख तैंतीस हजार ले जादा टीका लगाय गेहे। एमा एक करोड़ इकसठ लाख उनचालीस हजार लोगन मन ल पहिली टीका अउ पचहत्तर लाख तिरानवे हजार ले जादा लोगन मन ल कोविड के दूनों टीका लगाय जा चुके हे।
इही बीच, प्रदेस म कोरोना संक्रमण के दर म सरलग सुधार होवत हे अउ औसत पॉजिटीविटी दर शून्य दशमलव एक-चार प्रतिशत उपर आ गेहे। प्रदेश म काली कोरोना संक्रमण के तेरह ठन नवा मामला आगू आईस। वर्तमान म प्रदेश म दू सौ चवालीस मरीज मनके इलाज आने-आने अस्पताल या होम आइसोलेशन म चलत हे।
अउ अब थोरकुन समाचार सार म-
– मुख्यमंत्री भूपेश बघेल ह आज रायगढ़ जिला के खरसिया म कांग्रेस नेता नंदकुमार पटेल के दस फीट ऊंचा प्रतिमा के अनावरण करीन। ए मूर्ति ल तांबा, जिंक, लेड अउ टिन के मिश्र धातु ले तैयार करे गेहे।
– रईपुर जिला म काली नौ नवंबर ले कलेक्टर जनदर्शन के आयोजन फेर ले सुरू होही। कलेक्टर ह बतईन कि एखर माध्यम ले रईपुर जिला के नागरिक अपन समस्या के समाधार बर व्यक्तिगत रूप ले मिलके आवेदन दे सकत हे।
अउ
– अंबिकापुर के भकुरा-नवापारा गांव म हाथी के हमला म एक झिन मनखे के मउत होगे।