प्रधानमंत्री टीकाकरण समीक्षा
प्रधानमंत्री नरेंद्र मोदी ह एक अरब ले जादा टीका लगाये बर कोरोना योद्धा मनके सराहना करीन। वचुअर्ल माध्यम ले देश के चालीस ले जादा जिला मनके अधिकारी मनके संग बइठका के दउरान श्री मोदी ह कीहिन कि देश म जादा ले जादा टीका लगाये बर आने आने जिला मनके अनुभव ले सीखना होही।
प्रधानमंत्री ह कीहिन कि टीकाकरण के अभियान म आने आने प्रकार के चुनौती ले निपटे खातिर हर तरह के प्रयास करे बर पड़ही अउ राज्य मन ल हर घर टीका, घर-घर टीका – मंत्र ल अपनाना होही। ओमन यहू कीहिन कि धर्मगुरू मनके घलो बड़का भूमिका हे। श्री मोदी ह टीकाकरण अभियान म एनसीसी कैडेट संग सबके सहायता लेके सुझाव दीन।
प्रधानमंत्री ह कहिन कि अफवाह के खंडन अउ भ्रम ल दूर करे बर जागरूकता अभियान बहुत जरूरी हे। ए बइठका म छत्तीसगढ़ के मुख्यमंत्री भूपेश बघेल अपन निवास कार्यालय ले वीडियो कॉन्फ्रेसिंग के माध्यम ले शामिल होइन। बइठका म स्वास्थ्य मंत्री टी.एस. सिंहदेव, मुख्य सचिव अमिताभ जैन, अपर मुख्य सचिव सुब्रत साहू, प्रमुख सचिव स्वास्थ्य डॅाक्टर आलोक शुक्ला घलो वीडियो कॅान्फ्रेसिंग के माध्यम ले उपस्थित रीहिन। ये समीक्षा वो जिला म केंद्रित रीहिस जिहां पचास प्रतिशत ले कम पात्र लोगन मन ह पहिला टीका लगवाय हें।
गुड गवर्नेंस
सर्वश्रेष्ठ शासन बर करे गे सर्वे म छत्तीसगढ़ शीर्ष पांच ठिन राज्य मन म शामिल होगे हे। बछर दू हजार इक्कीस म छत्तीसगढ़ ल सर्वश्रेष्ठ राज्य मनके सूची म चौथा स्थान मिले हे। केरल राज्य ह सूची म शीर्ष स्थाना पाय हे।
खबर के मुताबिक पब्लिक अफेयर्स इंडेक्स- पीएआई स्थिरता सूचकांक संसाधन मन तक पहुंच अउ उपयोग के आधार म राज्य मन ल रैंक देथे। एखर प्रभाव अर्थव्यवस्था, पर्यावरण अउ मानव जाति उपर पड़थे।
नरक चौदस
आज छोटे देवारी हरय। एला रूपचौदस अउ नरकचौदस के नाव ले जाने जाथे। रीति रिवाज के अनुसार रूप चौदस म घर के अंगना अउ बाहिर म रंगोली सजाके चौदा दीया जलाये जाथे। राज्य के आने आने जगा मन म रौशनी के ए तिहार म प्रतिष्ठान अउ घर मन म बिजली के झालर ले आकर्षक सजावट करे गेहे।
काली दीया के परब देवारी मनाये जाही। देवारी तिहार ले लेके लोगन मन म बड़ उछाह हे। राजधानी रायपुर संग प्रदेश के सबो शहर अउ कस्बा के बाजार मन म चहल पहल अउ रौनक देखे जात हे।
राज्यपाल अनुसूइया उइके अउ मुख्यमंत्री भूपेश बघेल ह प्रकाश के महापर्व देवारी तिहार के पहिली संझा म प्रदेशवारी मन ल बधाई अउ शुभकामना दीन हे।
एनजीटी निर्देश
नेशनल ग्रीन ट्रिब्यूनल डहार ले जारी निर्देश के अनुसार ए बछर देवारी, छठ, गुरूपर्व, नवा बछर, अउ क्रिसमस के अवसर म फटाका ल फोड़े के समय दू घंटा तय करे गेहे। देवारी परब म रात आठ बजे रात दस बजे तक अउ छठ पूजा म बीहनिया छै बजे ले बीहनिया आठ बजे तक फटाका फोड़े जा सकही।
अइसन पटाखा बनइया के लाइसेंस रद्द करे के निर्देश दे गेहे, जेखर डहार ले पटाखा म लीथीयम, आर्सेनिक, एंटीमनी, लेड अउ मर्करी के उपयोग करे गेहे। ऑनलाईन वेबसाइट ले फटाका मनके बिक्री प्रतिबंधित रीही।
लक्ष्मण मस्तूरिया पुण्यतिथि
प्रदेश के प्रसिद्ध जनकवि अउ गीतकार लक्ष्मण मस्तूरिया के आज पुण्यतिथि हरय। ए मउका म मुख्यमंत्री भूपेश बघेल ह स्वर्गीय मस्तूरिया ल श्रद्धांजलि अर्पित करीन। श्री बघेल ह अपन संदेश म कीहिन कि मस्तूरिया के गीत मन म छत्तीसगढ़ के माटी के महक अउ स्थानीय लोक जीवन के झलक देखे बर मिलथे। ओमन कीहिन कि अपन मधुर आवाज ले स्वर्गीय मस्तूरिया ह एक अलग पहिचान बनाये रीहिस।
लोकवाणी
मुख्यमंत्री भूपेश बघेल लोकवाणी म ए दारी उद्यमिता अउ जनसशक्तिकरण के छत्तीसगढ़ मॉडल उपर गोठबात करही।
मुख्यमंत्री के मासिक रेडियो वार्ता लोकवाणी के तेइसवां कड़ी के प्रसारण चौदा नवंबर रविवार के होही। एखर प्रसारण छत्तीसगढ़ स्थित आकाशवाणी के सबो केंद्र एफ.एम. रेडियो अउ क्षेत्रीय समाचार चैनल मनले बीहनिया साढ़े दस बजे ले ग्यारा बजे तक करे जाही।
हज ऑनलाइन आवेदन
हज दू हजार बाईस बर बीते एक नवंबर ले ऑनलाईन हज आवेदन के प्रक्रिया शुरू होगे हे। राज्य हज कमेटी के कार्यपालन अधिकारी ह बताइन कि ऑनलाईन हज आवेदन अउ संपूर्ण नियमावली संग जरूरी दिशा-निर्देश केंद्र सरकार के वेबसाईट म उपलब्ध हे । एखरे संग प्रदेश भर म अड़तीस ई-हज सुविधा केंद्र म घलो आवेदक मन डहार ले अपन निशुल्क आवेदन भरे के सुविधा उपलब्ध कराय गेहे। ऑनलाईन हज आवेदन करे के आखरी तारीख इकतीस जनवरी निर्धारित करे गेहे।
एकल खिड़की फिल्मांकन
रेल मंत्रालय अउ सूचना प्रसारण मंत्रालय ह रेलवे के परिसर मन म फिल्मांकन ल आसान बनाये खातिर एकल खिड़की फिल्मांकन बेवस्था करे हे। फिल्म निर्माता अब फिल्मांकन बर फिल्म सुविधा कार्यालय के वेब पोर्टल के माध्यम ले आवेदन कर सकथे। ए एकल खिड़की के उद्देश्य रेलवे जइसन आने आने जगा मन म फिल्मांकन ल आसान बनाके फिल्म निर्माता मन ल सुविधा देना हे।
खबर के मुताबिक ए नवा बेवस्था ले दक्षिण पूर्व मध्य रेलवे के प्राकृतिक दृश्य ले भरपूर क्षेत्र अउ बिलासपुर रायपुर के संग नागपुर मंडल म फिल्मांकन के अनुमति मिले म आसानी होही।
डीएपी खाद
केंद्रीय रसायन अउ उर्वरक मंत्री मनसुख मांडविया ह कीहिन कि यूरिया अउ डीएपी जइसे उर्वरक के पर्याप्त मात्रा म आपूर्ति होही। ओमन नवंबर महीना बर उर्वरक के उपलब्धता के अधिकारी मन संग समीक्षा करे हे। श्री मांडविया ह कीहिन कि उर्वरक मनके उपलब्धता राज्य अउ केंद्र शासित प्रदेश मनके मांग ले जादा रीही। श्री मांडविया ह किसान मनले अनुरोध करे हे कि वोमन ह अफवाह के आधार म उर्वरक के जमाखोरी झन करय।
औषधि खाद पंजीयन
इही बीच रबी फसल मनके बीच उर्वरक अउ पौधा संरक्षण औषधि मनके जांच के अभियान प्रदेश के जम्मों जिला म शुरू होगे हे। कृषि विभाग के जिला स्तरीय अधिकारी अपन-अपन क्षेत्र मन म बीज, खाद, अउ औषधि मनके जांच बर उंखर नमूना इकट्ठा करत हे।
ए दउरान पाछू इक्कीस अक्टूबर तक बीज के दू नमूना अउ रासायनिक उर्वरक के आठ नमूना पाय गेहे। एति किसान मन डहार ले सहकारी समिति अउ निजी क्षेत्र मन म उपलब्ध रासायनिक उर्वरक के उठाव शुरू कर दे गेहे।
कृषि विभाग ले मिले जानकारी के मुताबिक किसान मन ह अब तक पैंतीस हजार उनतीस मीट्रिक टन खाद के उठाव करे हे। ओति राजीव गांधी किसान न्याय योजना के तहत समर्थन मूल्य म धान बेचे अउ खरीफ फसल के खेती बर आदान सहायता राशि के लाभ लेबर किसान मन अब दस नवंबर तक पंजीयन करा सकही।
अउ अब थोरकुन समाचार सार म-
– रायपुर कलेक्टर ह छै नवंबर भाइदूज म स्थानीय अवकाश घोषित करे हे।
– अनुसूचित जाति, जनजाति अउ अन्य पिछड़ा वर्ग के छात्रा मन बर पोस्ट मैट्रिक छात्रवृत्ति बर ऑनलाईन आवेदन मंगाय गेहे। आवेदन के आखरी तारीख तीस नवंबर निर्धारित करे गेहे।
– राजनांदगांव जिला के झलप म राजीव गांधी किसान न्याय योजना के राशि खाता म जमा नइ होय ले नाराज किसान मन ह आज चक्का जाम करीन। अधिकारी मनके समझाये के बाद चक्का जाम समाप्त होइस।
अउ
– ओति गरियाबंद जिला म बोनस के राशि मिले म देरी के सेती किसान मन ह राष्ट्रीय राजमार्ग म चक्काजाम करीन। बाद म बोनस वितरण शुरू होय ले किसान मन ह चक्का जाम समाप्त करीन।