आज दिनभर के खबर ल अपन गुरतुर छत्तीसगढ़ी भाखा म पढ़व

प्रधानमंत्री भारतीय अंतरिक्ष

प्रधानमंत्री ह भारतीय अंतरिक्ष संघ के शुभारंभ करत किहीन कि इक्कीसवीं सदी म दुनिया ल एकजुट करे म भारत अंतरिक्ष क्षेत्र म महत्ता के भूमिका निभाही। ओमन किहीन कि अंतरिक्ष क्षेत्र अउ अंतरिक्ष क्षेत्र के तकनीक म आज भारत म होवत बड़े सुधार फइसला ले म सक्षम सरकार के सेती हवय। प्रधानमंत्री ह किहीन कि अंतरिक्ष सुधार ल लेके सरकार के दृष्टिकोण चार विशेष स्तंभ म आधारित हवय। देस आज गतिसील सुधार ल देखत हे। काबर कि भारत के दृष्टिकोण स्पष्ट हे अउ ओ हरय, आत्मनिर्भर भारत। ओमन किहीन कि ए रणनीति भारत के तकनीकी विशेषज्ञता के आधार म ओला नवाचार के वैश्विक केन्द्र बनाही।

एसईसीएल-कोयला आपूर्ति

छत्तीसगढ़ के ताप विद्युत संयंत्र बर एस.ई.सी.एल. कोति ले हरेक दिन उनतीस हजार पांच सौ मीटरिक टन कोयला के आपूर्ति करे जाही। एस.ई.सी.एल. के महानिदेशक अंबिका प्रसाद पंडा ह एखर मंजूरी दे देहे। अभी एस.ई.सी.एल. कोति ले छत्तीसगढ़ ल तेईस हजार दू सौ नब्बे मीटरिक टन कोयला के आपूर्ति करे जात हे। मुख्यमंत्री ह आज अपन निवास कार्यालय ले प्रदेस के तापविद्युत संयंत्र म कोयला के आपूर्ति के समीक्षा करीन। ए बेरा म ओमन एस.ई.सी.एल. के महानिदेशक ले किहीन कि प्राथमिकता के आधार म छत्तीसगढ़ के ताप विद्युत संयंत्र ल ओखर जरूरत के मुताबिक कोयला देवाय जाना चाही। बइठका म मुख्यमंत्री ह किहीन कि रेलवे कोति ले छत्तीसगढ़ ल कोयला अउ चाउर बर जरूरत के मुताबिक संख्या म रेलवे रैक देवाय जाना चाही। एखर बर छत्तीसगढ़ पूर्व मध्य रेलवे के महाप्रबंधक आलोक कुमार ह मंजूरी दे देहे।

कोरोना-टीका/समाचार

देस जल्दीच कोविड टीकाकरण म सौ करोड़ के आंकड़ा ल पार कर लीहीं। राष्ट्रभर म टीकाकरण अभियान म अब तक पंचानवे करोड़ उन्नीस लाख लोगन ल टीका लगाय गेहे। केन्द्रीय स्वास्थ्य मंत्रालय ह केहे हे कि देसभर म काली छियालीस लाख संतावन हजार ले जादा टीका लगाय गीस।
ऐति, छत्तीसगढ़ म कोरोना ले बचाव बर अब तक दू करोड़ दू लाख उनसठ हजार ले जादा झन ल कोरोना टीका लग गेहे।
इही बीच, प्रदेस म कोरोना संक्रमण के दर म सरलग कमी आवत हे अउ औसत पॉजिटीविटी दर शून्य दमशलव एक-चार प्रतिसत म आ गेहे। राज्य के पांच ठिन जिला – बालोद, कबीरधाम, गौरेला-पेण्डा-मरवाही, नारायणपुर अउ बीजापुर म कोरोना के एको सक्रिय मामला नइ हे। प्रदेस म काली कोरोना संक्रमण के उन्नीस ठिन नवा मामला आगू आईस। अभी दू सौ ले जादा मरीज के इलाज आने-आने अस्पताल म होवत हे।

पीआईबी-स्पष्टीकरण

पत्र सूचना कार्यालय ह ए खबर के खंडन करे हे, जेमा कोरोना के बाढ़त मामला के सेती काली ले राष्ट्रभर म तालाबंदी होय अउ देवारी तक जम्मों रेल सेवा बंद होय के दावा करे गेहे। कार्यालय ह केहे हे कि केन्द्र सरकार ह अइसन कोनों घोषणा नइ करे हे।

दशहरा-दिशा/निर्देश

प्रदेस म दसेरा परब ल लेके जिला प्रसासन कोति ले कोरोना संक्रमण ल देखत दिसा-निरदेस जारी करे गेहे। ए संबंध म जांजगीर-चांपा जिला कलेक्टर जितेन्द्र शुक्ला ह नियम के कड़ाई ले पालन करे बर किहीन हे। जारी निरदेस म केहे गेहे कि रावण के पुतला के ऊंचई दस फीट ले जादा नइ होना चाही। उहें, दसेरा परब समिति के पदाधिकारी मन ल केहे गेहे कि तियारी बर कोनों भी जघा म पचास ले जादा झन इकट्ठा झन होवय। आयोजन स्थल म अवइया-जवइया लोगन के नाव अउ पता रजिस्टर म लिखना जरूरी हे। पुतला दहन वाले जगह म सांस्कृतिक कारीकरम मेला अउ पंडाल लगाय के मंजूरी नइ होही। उहें, डीजे अउ बैंड पार्टी म घलो रोक होही।

कवर्धा-मामला

कवर्धा सहर म पाछु दिन दू गुट के बीच होय विवाद के बाद अब स्थिति सामान्य होवत हे। करीबन हफ्ताभर बाद सहर के सब्बो व्यावसायिक संस्थान, बैंक, कार्यालय, स्कूल-कालेज अउ कोचिंग सेंटर आज ले खोले गीस। एखर बर प्रसासन कोति ले बिहनिया नौ बजे ले मंझनिया तीन बजे तक के बेरा तय करे गे रिहीस। ए बेरा म सहर के जम्मों सीमा सील रिहीस। उहें, कवर्धा पुलिस ह आज ए मामला जुड़े ग्यारह झिन आने आरोपी ल गिरफ्तार करके न्यायालय के आगू पेस करे गेहे, जिहां ओमन ल न्यायिक रिमांड म जेल भेजे गेहे।
इही बीच, भाजपा के राष्ट्रीय उपाध्यक्ष अउ पूर्व मुख्यमंत्री डॉक्टर रमन सिंह ए मामला म दुरूग के केन्द्रीय जेल म बंद सत्तर झिन भाजपा कार्यकर्ता मन ले मिले बर पहुंचीन। ए बेरा म ओमन पत्रकार मन ले गोठबात करत आरोप लगाईन कि कवर्धा म होय घटना बर प्रदेस के कांग्रेस सरकार जिम्मेवार हवय। ओमन परिवहन मंत्री मोहम्मद अकबर लगावत किहीन कि अल्पसंख्यक समुदाय के लोगन ल बाहिर ले लाके प्रदेस के निवासी बताय जाय के सेती अइसन किसम के हालात बनत हे।

स्वर्णिम विजय मशाल

बछर उन्नीस सौ इकहत्तर के युद्ध म पाकिस्तान उपर भारतीय सेना के ऐहतिहासिक जीत के पचास बछर पूरा होय के मउका म एसो ‘‘स्वर्णिम विजय वर्ष‘‘ के रूप म मनाय जात हे। ए बेरा चार स्वर्णिम विजय मशाल देस के आने-आने जगह के यात्रा करत हे। ए विजय मसाल पाछु बछर सोलह दिसंबर के प्रधानमंत्री नरेन्द्र मोदी ह नई दिल्ली के राष्ट्रीय युद्ध स्मारक म अमर जवान ज्योति ले प्रजवल्लित कर रवाना करे रिहीन। एमा ले एक विजय मशाल काली बारह अक्टूबर के छत्तीसगढ़ पहुंचही। ए विजय मसाल उन्नीस अक्टूबर तक छत्तीसगढ़ म रइही। ए बेरा म भारतीय सेना कोति ले प्रदेस म कतकोन करीकरम करे जाही। उहें, मिलिट्री बैंड के प्रस्तुत होही। फटफटी रैली निकाले जाही अउ रक्षाउपकरण के प्रदर्शनी घलो जाही।
तेरह अक्टूबर के छत्तीसगढ़ के राज्यपाल अनुसुईया उइके राजभवन म विजय मशाल के सुवागत करही। उहें, सोलह अक्टूबर के मुख्यमंत्री भूपेश बघेल ए युद्ध के नायक मन ल छत्तीसगढ़ के वीर के रूप म सम्मानित करही। बारह ले उन्नीस अक्टूबर के दउरान ए स्वर्णिम विजय मसाल ल छत्तीसगढ़ म भिलई, दुरूग, बिलासपुर, कांकेर अउ धमतरी घलो ले जाय जाही।

अमृत महोत्सव-प्रश्नोत्तरी

‘‘आजादी के अमृत महोत्सव‘‘ म आकाशवाणी समाचार स्वाधीनता संग्राम अउ उंखर गौरवसाली इतिहास म बिसेस अमृत महोत्सव प्रश्नोत्तरी आयोजित करत हे। ए प्रश्न राष्ट्रीय स्तर म आयोजित प्रश्नोत्तरी स्पर्धा के तहत पूछे जाही, जेखर सेती एखर जवाब प्रादेशिक बुलेटिन के क्विज बर निर्धारित ई-मेल या फेर मोबाइल नंबर के बजाय आज के प्रश्न के बाद बतइया वाट्सऐप नंबर अउ ई-मेल भेजना हे। अमृत महोत्सव क्विज आज के प्रश्न हरय।
‘‘सन् 1806 म कोन जगह म भारतीय सिपाही मन ईस्ट इंडिया कंपनी के खिलाफ बगावत करीन ? ‘‘
सुनइया मन अपन उत्तर वाट्सऐप नंबर 8 8 2 6 5 4 6 2 6 2 म या फेर ई-मेल आईडी अमृत महोत्सव क्विज एट द रेट प्रसार भारती डॉट जीओवी डॉट इन म भेज सकत हे। ए प्रतियोगिता बर एक झिन भाग्यसाली प्रतिभागी ल विजेता चुने जाही अउ काली के समाचार प्रभात म उंखर नाव के घोसना करे जाही।

अंतर्राष्ट्रीय बालिका दिवस

आज अंतर्राष्ट्रीय बालिका दिवय हरय। उप राष्ट्रपति एम. वेकैंया नायडू ह अंतर्राष्ट्रीय बालिका दिवस म किहीन कि एखर बर परयास करना चाही कि नोनी मन ल डिजिटल उपकरण तकनीकी कौशल अउ नौकरी म सामान पहुंच अउ आगू बढ़े के मउका मिलय।

मिलिए मंत्री से कार्यक्रम

प्रदेश कांग्रेस कार्यालय राजीव भवन म काली बारह अक्टूबर ले ‘‘मिलिए मंत्री से कार्यक्रम‘‘ फेर ले सुरू होवत हे। कोरोना संक्रमण के सेती ए कारीकरम पाछु कुछेक महीना ले स्थगित रिहीस। काली पहिली दिन कृषि मंत्री रविन्द्र चौबे मंझनिया बारह बजे ए कारीकरम के सुरूवात करही। ए बेरा म कांग्रेस कार्यकर्ता, पदाधिकारी अउ आमलोगन अपन समस्या अउ सिकईत लेके मंत्री ले भेंट करही।

अउ अब थोरकुन समाचार सार म –

– प्रधानमंत्री नरेन्द्र मोदी काली वीडियो कान्फ्रेंसिंग ले राष्ट्रीय मानव अधिकार आयोग के अट्ठाईसवां स्थापना दिवस कारीकरम ल संबोधित करही।

– आजादी के अमृत महोत्सव के आयोजन बर प्रदेस के संस्कृति विभाग ल नोडल विभाग बनाय गेहे। एखर बर राज्य अउ जिला स्तर समिति के गठन घलो करे गेहे।

– खेल के क्षेत्र म सबले बने खिलाड़ी मन ल राज्य स्थापना दिवस के मउका म महाराजा प्रवीरचंद भंजदेव सम्मान अउ गुण्डाधूर सम्मान ले सम्मानित करे जाही। एखर बर पन्द्रह अक्टूबर तक अरजी मंगाय गेहे।

– योग आयोग कोति ले रईपुर ग्रामीण क्षेत्र के दू ठिन वार्ड यतियतन लाल अउ बंजारी माता वार्ड म काली योग केन्द्र सुरू करे गीस।

अउ

– कोरबा जनसंपर्क कार्यालय म संचालक के पद म प्रसासनिक सेवा के अधिकारी मनके नियुक्ति के विरोध म आज कार्यालय के अधिकारी अउ करमचारी मन ल करिया पट्टी लगाके के काम करीन।