प्रधानमंत्री-कोरोना समीक्षा
प्रधानमंत्री नरेन्द्र मोदी ह देस म कोरोना संक्रमण ले होय स्थिति के आज समीक्षा करीन। ओमन ह देस के आने-आने भाग के स्थिति अउ आने-आने राज्य के तैयारी के जायजा लीन। श्री मोदी ह सार्वजनिक स्थल म व्यक्तिगत स्वच्छता अउ सामाजिक अनुसासन बनाय उपर जोर दीन।
ओमन किहीन कि कोरोना वायरस के बारे म जागरूकता लाय के परयास सरलग होना चाही। ओमन ह दिल्ली म महामारी के स्थिति म नियंत्रण पाय म केन्द्र, राज्य सरकार अउ स्थानीय प्राधिकरण के परयास के तारीफ करीन।
ई-लोक अदालत
प्रदेस म आज राज्य स्तरीय ई-लोक अदालत के आयोजन करे गीस। छत्तीसगढ़ उच्च न्यायालय के मुख्य न्यायाधीश पी.आर. रामचंद्र मेनन के पगरइति म ए लोक अदालत के सुरूवात होईस। उद्घाटन के बाद सबो खंडपीठ म वीडियो कान्फ्रेंसिंग के माध्यम ले मामला के सुनवाई करे गीस।
कोरोना संक्रमण ले देखत ए ई-लोक अदालत म पक्षकार अउ अधिवक्ता मन ह न्यायालय म सीधा उपस्थिति देके बजाय वीडियो कान्फ्रेंसिंग के माध्यम ले अपन पक्ष रखीन। रईपुर जिला न्यायालय म चैबीस खंडपीठ बनाय गे रिहीस, जेमा लगभग नौ सौ प्रकरण ल सुनवाई बर रखे गीस। उहें, बिलासपुर जिला म नौ खंडपीठ के माध्यम ले पांच सौ ले जादा मामला के सुनवाई करे गीस। एमा लंबित सिविल वाद, मोटर दुर्घटना दावा, पारिवारिक अउ आपराधिक मामला के अलावा राजीमाना योग्य मामला सामिल रिहीस।
प्रवासी मजदूर-राशन
प्रदेस म बिना रासनकार्ड वाले प्रवासी श्रमिक मन ल उचित मूल्य के दुकान ले अब जुलाई अउ अगस्त महीना म घलो प्रति व्यक्ति प्रति महीना पांच किलो अनाज निःसुल्क दे जाही। खाद्य विभाग ह ए संबंध म सबो जिला कलेक्टर मन ल पत्र जारी करके इकतीस अगस्त तक चाउर बांटे जाय के निरदेस दीन हे। रासन लेवइया प्रवासी श्रमिक मनके पंजीयन खाद्य विभाग के जनभागीदारी वेबसाइट म आॅनलाइन करे जा सकत हे। हितग्राही मन ल चिन्हे बर आधार नंबर नइ होय म मतदाता परिचय पत्र, पैनकार्ड, किसान फोटो पासबुक या राज्य या जिला प्रसासन डहार ले जारी करे गे कोनों दूसर फोटो वाले परिचय पत्र ल घलो मान्य करे गे हवय।
उद्यानिकी फसल-बीमा
प्रदेस म चालू खरीफ बछर म पुनर्गठित मौसम आधारित फसल बीमा योजना लागू करे गेहे। एमा ऋणी अउ अऋणी किसान मन अवइया पन्द्रह जुलाई तक लोक सेवा केन्द्र, बैंक शाखा, सहकारी समिति या बीमा कंपनी के प्रतिनिधि मन ले संपर्क करके अपन उद्यानिकी फसल के बीमा करवा सकत हे। चुने गे उद्यानिकी फसल के बीमा कराय बर किसान मन ल ओ फसल बर तय करे गे ऋण के पांच प्रतिसत रासि देना होही अउ बांचे रासि सासन डहार ले वहन करे जाही।
गढ़कलेवा
प्रदेस के सबो जिला मन म लोगन मन ल सस्ता कीमत म छत्तीसगढ़ी व्यंजन देवाय बर पन्द्रह अगस्त ले गढ़कलेवा सुरू करे जाही। जम्मों जिला कलेक्टर परिसर म गढ़कलेवा सुरू करे के निरदेस कलेक्टर मन ल दे गेहे।
संस्कृति मंत्री अमरजीत भगत ह रईपुर म विभागीय कामकाज के समीक्षा के दउरान ए जानकारी दीन। ओमन अधिकारी मन ले किहीन कि छत्तीसगढ़ के संस्कृति ल संरक्षित करना मूल उद्देश्य होना चाही। ओमन बांस गीत, मोरही जइसन पारंपरिक विधा ल संरक्षित करे बर कार्ययोजना बनाय के घलो निरदेस दीन। श्री भगत ह किहीन कि बस्तर अउ सरगुजा म कई ठिन पारंपरिक लोकगीत, नृत्य अउ संगीत विलुप्त होवत हे, ओमन ल चिन्हित करके संरक्षित करना जरूरी हे।
मन की बात
प्रधानमंत्री नरेन्द्र मोदी ह छब्बीस जुलाई के आकाशवाणी के ‘‘मन की बात‘‘ कारीकरम म देस-बिदेस के लोगन ले अपन विचार साझा करही। ए ह मासिक रेडियो कारीकरम के सड़सठवां कड़ी होही। लोगन मन ल अपन बिचार साझा करे बर आमंत्रित करे गेहे। लोगन अपन संदेस रिकार्ड करे बर एक आठ एक एक – एक एक – सात आठ शून्य शून्य डाॅयल कर सकत हे या नमो ऐप ओपन फोरम अउ माई जीओवी म संदेस लिख सकत हे।
बीमा-कोरोना कवच
भारतीय बीमा विनियामक अउ विकास प्राधिकरण-आई.आर.डी.ए.आई. ह उनतीस सामान्य अउ स्वास्थ्य बीमा कंपनी मन ल कम अवधि के स्वास्थ्य बीमा पाॅलिसी कोरोना कवच सुरू करे के मंजूरी दे दे हवय। एमा कोरोना वायरस बीमारी उपर इलाज के खरचा के भुगतान सामिल होही।
प्राधिकरण ह केहे हे कि ओमन ह कोरोना वायरस ले जुड़े बिसेस पाॅलिसी बनाय हे, जेमा लोगन के स्वास्थ्य बीमा के जरूरत ल पूरा करे जाही अउ सबो बीमा कंपनी मन ह एके जइसन पाॅलिसी दीही। एमा बीमा के रासि पांच हजार ले पांच लाख रूपिया के बीच राखे गे हवय। अट्ठारह ले पैंसठ बछर के लोगन ए पाॅलिसी ल ले सकत हे। कोरोना कवच पाॅलिसी ल अपन बर, पति-पत्नी, माता-पिता, सास-ससुर अउ पच्चीस बछर के आश्रित लइका मन बर ले जा सकत हे।
विवि-परीक्षाएं
केन्द्रीय मानव संसाधन विकास मंत्रालय ह देस म विश्वविद्यालय के परीक्षा कराय बर संचालन प्रक्रिया तैयार करे हे। एला गृह अउ स्वास्थ्य मंत्रालय के मदद ले बनाय गे हवय। कोरोना महामारी ल देखत ए प्रक्रिया म विद्यार्थी मनके सुरक्षा, निष्पक्षता अउ एक जइसन मउका के मानदंड ल राखे गे हवय।
केन्द्रीय मानव संसाधन विकास मंत्री रमेश पोखरियाल निशंक ह बतईन कि विश्वविद्यालय अनुदान आयोग ह ए बछर तीस सितंबर तक विश्वविद्यालय म सबो टर्मिनल सेमेस्टर परीक्षा कराय के बारे म निरदेस जारी करे हे। ए परीक्षा आॅनलाइन या आॅफलाइन या दूनों तरीका ले कराय जाही। यदि कोनों विद्यार्थी ए परीक्षा नइ बइठ सकही त ओला बाद म एक मउका अउ दे जाही।
विश्व जनसंख्या दिवस
आज विश्व जनसंख्या दिवस हरय। हर बछर ग्यारह जुलाई ए दिन मनाय जाथे। केन्द्रीय स्वास्थ्य मंत्री डाॅक्टर हर्षवर्धन ह एक ठिन ट्वीट म किहीन कि परिवार कल्याण योजना न केवल विकास के आधार हे, बल्कि गरीबी हटाय अउ सूखी जीवन पाय बर घलो एखर बड़े योगदान हे।
ऐति, छत्तीसगढ़ म घलो विश्व जनसंख्या दिवस म कतकोन कारीकरम कराय गीस। ए मउका म जनसंख्या नियंत्रण बर परिवार नियोजन के बारे म लोगन ल जानकारी दे गीस।
रिश्वत-गिरफ्तारी
एंटी करप्शन ब्यूरो ह पदस्थ रेहे एएसआई विनोद वर्मा संघरा आरक्षक गजानंद वर्मा अउ एक झिन वकील ल बलौदाबाजार पुलिस ह गिरफ्तार करे हे। मिले जानकारी के अनुसार ए आरोपी
