प्रधानमंत्री-पैरालंपिक खिलाड़ी
प्रधानमंत्री नरेन्द्र मोदी ह पैरालंपिक खिलाड़ी मन ले किहीन हे कि ओमन ह आजादी का अमृत महोत्सव मनाय बर खेल के अलावा कुछु आने क्षेत्र ल चुन के अउ लोगन मन ल प्रेरित करके बदलाव लाय म उंखर सहायता करय।
प्रधानमंत्री ह पैरालंपिक दल के अदम्य साहस अउ दृढ़ इच्छाशक्ति के बड़ई करीन। श्री मोदी ह किहीन कि कड़ा मेहनत के बल म खिलाड़ी मन ह ए प्रतिष्ठा पाय हे। इही कारण मनखे मन उंखर गोठबात ल सुनही अउ उंखर विचार ल स्वीकार करही। एखर ले एमन देस म बदलाव लाय म बड़का भूमिका निभा सकथे। प्रधानमंत्री ह खिलाड़ी मन ल पूरा मदद देहे के आश्वासन घलो दीन।
लोकवाणी
मुख्यमंत्री भूपेश बघेल ह किहीन हे कि राज्य के सब्बो जिला के समन्वित विकास बर स्थानीय जनता के सोच, इच्छा अउ अपेक्षा के अनुरूप काम करे म जिला प्रसासन ल अउ जादा सक्षम बनाय जावत हे। राज्य म हरेक मनखे ल ससक्त बनावत विकास म उंखर भागीदारी ल सुनिश्चित करके नवा छत्तीसगढ़ ल गढ़े जावत हे।
मुख्यमंत्री आज मासिक रेडियोवार्ता लोकवाणी के 21वां कड़ी म ‘‘जिला स्तर पर विशेष रणनीति से विकास की नई राह‘‘ बिसय उपर प्रदेसवासी मन संग बातचीत करत रिहीन। ओमन ह किहीन कि प्रसासनिक इकाई के रूप म जिला ल महत्व देवत हुए राज्य सरकार ह कम समय म ही पांच ठिन नवा जिला बनाय के पहल करे हे। छत्तीसगढ़ के सब्बो जिला के समन्वित विकास बर आम जनता के समस्या ल संवेदनसीलता संग सुने अउ स्थानीय जरूरत के हिसाब ले कदम उठाय बर प्रसासन ल फ्री हैंड दे गेहे।
श्री बघेल ह किहीन कि प्रदेस म किसान मनके हित ल ध्यान म रखत हुए अब लघु फसल के उत्पादन बढ़ाय के संगेसंग बेहतर दाम अउ सुविधा देके पहल करे गेहे। एखर बर छत्तीसगढ़ मिलेट मिशन के स्थापना करे गेहे अउ उत्पादन म वृद्धि अउ प्रसंस्करण बर व्यापक कार्ययोजना बनाय जावत हे।
मुख्यमंत्री ह बतईन कि दुर्ग सहर ले पच्चीस किलोमीटर के दुरिहा म स्थित ग्राम नंदिनी म पच्चीस सौ एकड़ म जंगल विकसित करे के कार्ययोजना बनाय गेहे। एखर ले दुर्ग-भिलाई के कारखाना ले निकले प्रदूषण ल नियंत्रित करे म मदद मिलही।
श्री बघेल ह बतईन कि मलेरिया मुक्त बस्तर अभियान के माध्यम ले लोगन मन ल बड़का राहत देवाय गेहे। पूरा बस्तर संभाग म मलेरिया के प्रभाव दर पैंतालीस प्रतिसत कम होगे हे। ओमन बतईन कि नवाचार के तहत दंतेवाड़ा म डेनेक्स ब्राण्ड के कपड़ा फैक्ट्री इही साल सुरू होगे हे।
टीबी उन्मूलन
टीबी उन्मूलन कार्यक्रम के तहत प्रदेस के सब्बो जिला म दस सितंबर ले दस अक्टूबर तक सघन टीबी खोज अभियान चलही। एमा मितानिन अउ स्वास्थ्य कार्यकर्ता मन ह ग्रामीण अउ सहरी दूनों क्षेत्र म घर-घर जाके टीबी मरीज के खोज करही। ए अभियान के बारे म जानकारी देवत स्वास्थ्य अधिकारी मन बतईन कि सघन टीबी खोज अभियान के दउरान संदेहास्पद मरीज मन बर जांच अउ उपचार के सुविधा मुफ्त होही।
क्वांटीफाइबल डाटा आयोग-दौरा
राज्य के जनसंख्या म अन्य पिछड़ा वर्ग अउ आर्थिक रूप से कमजोर वर्ग के सर्वेक्षण करके क्वांटीफायबल डाटा जमा करे बर गठित आयोग ह काली तेरह सितंबर ले पन्द्रह सितंबर तक बस्तर संभाग के दउरा म रइही।
प्रस्तावित कारीकरम के अनुसार आयोग के अध्यक्ष अउ सचिव काली बिहनिया दस बजे रायपुर ले रवाना होके एक बजे कांकेर पहुंचही अउ उहां अन्य पिछड़ा वर्ग अउ आर्थिक रूप ले कमजोर वर्ग के संगठन अउ प्रतिनिधि मन ले भेंट करही।
नीट-प्रवेश परीक्षा
मेडिकल स्नातक पाठ्यक्रम म प्रवेस बर पात्रता अउ प्रवेस परीक्षा-नीट कोविड नियम के पालन करत हुए आज आयोजित कराय गीस। राष्ट्रीय परीक्षा एजेंसी ह देस-विदेस के दू सौ दू सहर के आने-आने केन्द्र म परीक्षा के आयोजन करीन। मंझनिया दू बजे ले संझा पांच बजे तक चले ए परीक्षा म विद्यार्थी मन बर मास्क अउ सेनिटाईजर के व्यवस्था करे गे रिहीस।
हादसा
रायगढ़ जिला के खरसिया म स्काई एलॉयज फैक्ट्री म सेलो टैंक के गिरे ले तीन कमरचारी के मउत होगे। उहें, दू अन्य करमचारी मन घायल होगे हे।
मिले जानबा के मुताबिक फैक्ट्री म रोजे असन काम चलत रिहीस। इही बीच, अचानक सेलो टैंक के नीचे गिरे ले छह झिन करमचारी ओमा चपका गे। घटना के खबर मिलतेच पुलिस के रेस्क्यू टीम ह मउका म पहुंचीन अउ पांच करमचारी ल बाहिर निकालीन, जेमा ले तीन करमचारी के मउका म मउत होगे। उहें, दू गंभीर करमचारी मन ल जिला अस्पताल म भर्ती कराय गेहे अउ एक झिन करमचारी के तलास जारी हे।
मुख्यमंत्री ह ए दुर्घटना म मजदूर मनके मउत उपर गहरा दुख व्यक्त करीन हे।
कोविड टीका/समाचार
देस म अब तक 74 करोड़ ले जादा लोगन मन ल कोरोना के टीका लगाय जा चुके हे। केन्द्रीय स्वास्थ्य मंत्रालय के अनुसार कोविड के खिलाफ लड़ाई म ए ह एक ठिन अउ बड़े उपलब्धि हे।
ऐति, छत्तीसगढ़ म कोरोना ले बचाव बर अब तक 01 करोड़ 55 लाख 38 हजार ले जादा टीका लग गेहे। एमा ले 01 करोड़ 18 लाख 50 हजार ले जादा लोगन ल पहिली डोज अउ 36 लाख 87 हजार ले जादा लोगन ल दूसरइया डोज दे जा चुके हे।
इही बीच, प्रदेस म कोरोना संक्रमण के दर ह लगातार कम होवत हे अउ औसत पॉजिटीविटी दर सून्य दशमलव एक-शून्य प्रतिसत म आ गेहे। प्रदेस म काली कोरोना संक्रमण के 24 नवा मामला आगू आईस हे।
राष्ट्रीय लोक अदालत
राष्ट्रीय विधिक सेवा प्राधिकरण के निरदेस म छत्तीसगढ़ म काली तहसील ले लेके उच्च न्यायालय स्तर तक राष्ट्रीय लोक अदालत के वर्चुअल अउ भौतिक रूप ले आयोजन करे गीस। ए दउरान सब्बो न्यायालय म पचास हजार ले जादा राजीनामा योग्य प्रकरण मनके निराकरण पक्षकार के आपसी सुलह-समझौता ले करे गीस।
अउ अब प्रस्तुत हे मौसम के हाल..
मौसम विभाग ह प्रदेस म अवइया चौबीस घंटा म बिलासपुर, सरगुजा, दुर्ग अउ रायपुर संभाग म एक-दू जघा म भारी ले अतिभारी वर्षा होय अउ गरज-चमक के संग गाज गिरे के चेतावनी दे हे।
रायपुर स्थित मौसम विज्ञान केन्द्र के मुताबिक एक निम्न दाब के क्षेत्र उत्तर-पश्चिम बंगाल के खाड़ी अउ ओखर ले लगे पश्चिम-मध्य बंगाल के खाड़ी के उपर स्थित हे। उहें, ऊपरी हवा म चक्रीय चक्रवाती घेरा बने हुए हे। एखर असर ले राज्य म अधिकांश जघा म हल्का ले मध्यम बरसा होय अउ गरज-चमक के संगेसंग छींटा पड़े के संभावना हे।
महासमुंद-हाथी विचरण
महासमुंद जिला के सिरपुर अउ बलौदाबाजार जिला के रोहांसी वन क्षेत्र म हाथी के एक अउ दल आ पहुंचे हे। एखर ले क्षेत्र म हाथी के गिनती बाढ़के सात होगे हे। एखर ले ग्रामीण मन म दहसत के माहौल हे। वन अधिकारी मन ह हाथी दल के विचरण के खबर के पुष्टि करे के बाद तीर-तखार के गांव मन म चेतावनी जारी कर देहे।