मन की बात
प्रधानमंत्री नरेन्द्र मोदी ह देसवासी मन ले खेल ल प्रोत्साहन देके आरो दीन हे। आकासवाणी ले प्रसारित मन की बात कारीकरम म ओमन किहीन कि हाले म होय ओलंपिक के माध्यम ले देस म खेल मन ल जउन गति मिले हे, ओला हर स्तर म आगू बढ़ाना जरूरी हे। गांव अउ सहर जघा मन म खेल के मैदान के जरूअत बर बोलत ओमन किहीन कि सबो झन के संघरा परयासे ले भारत ह खेल म नवा बुलंदी ल अमरही।
आज हाकी के जादूगर मेजर ध्यानचंद के जयंती ल सुरता करत श्री मोदी ह टोक्यो ओलंपिक म भारत के पुरूष अउ महिला हाकी टीम मन ले परदसन ल बतावत किहीन कि ऐहा मेजर ध्यानचंद बर सच्चा श्रद्धांजलि हवय।
प्रधानमंत्री ह किहीन कि जवान लइका मनके सोच ह बदलत हे अउ आज के युवा ह जुन्ना तौर-तरीका ल छोड़ के कुछु नवा करना चाहत हे। अंतरिक्ष ल प्रायवेट क्षेत्र बर खोले के सरकार डहार ले हाले म उठाय कदम बारे म श्री मोदी ह किहीन कि कालेज अउ यूनिवर्सिटी के पढ़इया लइका अउ प्राइवेट क्षेत्र म काम करत जवान लइका मन ए सोझ आगू आवत हे।
मन की बात कारीकरम म प्रधानमंत्री ह लोगन मन ले कोविड के बांचे खातिर टीका लगवाए के आग्रह करत दवाई भी कड़ाई भी ए मंत्र के सुरता देवइन।
फिट इंडिया मोबाइल ऐप
केंद्रीय युवा कार्य अउ खेल मंत्री अनुराग सिंह ठाकुर ह फिट इंडिया अभियान के दूसरइया वर्षगांठ मनाए अउ आजादी के अमृत महोत्सव के हिस्सा के रूप म आज फिट इंडिया मोबाइल ऐप के सुभारंभ करीन। ए ऐप ह एंडाइड अउ आई.ओ.एस. प्लेटफारम दूनों म मिलही। संगे ऐहा आम स्माट फोन म घलो काम करही। नई दिल्ली म एखर सुरूआत करत श्री ठाकुर ह लोगन मन ले फिटनेस बर रोजिना आधा घंटा देके आग्रह करीन।
केन्द्रीय मंत्री-वनोपज
केन्द्रीय जनजातीय कार्यमंत्री अर्जुन मुंडा ह कोरोना संकट काल होय के बावजूद पाछु दू बछर के दउरान लघु वनोपज के सकलई वैल्यू एडिशन अउ रोजगार क्षेत्र म छत्तीसगढ़ सरकार डहार ले करे गे कामकाज ल सहरईन हे। केन्द्रीय मंत्री श्री मुंडा ह काली मुख्यमंत्री भूपेश बघेल संग रईपुर म होय बइठका म छत्तीसगढ़ के वनवासी क्षेत्र मन म चलत कई ठिन योजना के समीक्षा करीन।
सोनोवाल-अमृत महोत्सव
केन्द्रीय आयुष मंत्री सर्बानंद सोनोवाल आजादी के अमृत महोत्सव के सुरूवात करत आयुष मंत्रालय के कई ठिन कारीकरम अउ अभियान के घोसना करीन। ए कारीकरम म किसान मनके फायदा पचहत्तर हजार हेक्टेयर भूईंया म औषधि पौधा के खेती अउ इकतीस अगस्त के वाई-ब्रेक ऐप के लोकार्पण के संगे एक सितंबर के ऑफिस जवइया मनखे मन बर पांच मिनट के योगाभ्यास सामिल हे।
श्री सोनोवाल ह किहीन कि तीस अगस्त ले पांच सितंबर तक चलइया ए गतिविधि मनके जरिया ले देस के दूरिहा जगह के इलाका म पहुंच के समाज के सबो वरग ल सामिल करे जाही।
राष्ट्रीय खेल दिवस
आज राष्ट्रीय खेल दिवस हरय। ऐला जाने-माने हाकी खेलाड़ी मेजर ध्यानचंद के जयंती मउका म बछर के उनतीस अगस्त के दिन खेल दिवस के रूप म मनाए जाथे। केन्द्र सरकार ह इही महीना म मेजर ध्यानचंद के सम्मान म उंखर नाम ले राष्टीय खेल रत्न पुरस्कार के नामकरण करे हे।
छत्तीसगढ़ के मुख्यमंत्री भूपेश बघेल ह राष्ट्रीय खेल दिवस के मउका म प्रदेसवासी, खेलाड़ी अउ खेल प्रेमी मन ल बधई अउ सुभकामना दीन हे।
ओबीसी-गणना
छत्तीसगढ़ म अन्य पिछड़ा वर्ग-ओबीसी अउ आर्थिक रूप ले कमजोर वर्ग के गनती मोबाइल ऐप ले होही। एखर सर्वे के काम पूरा प्रदेस म एक सितंबर ले चालू हो जही। चिप्स डहार ले एखर बर सी.जी.क्यू.डी.सी. नाव ले मोबाइल ऐप तियार करे गेहे, जेला प्ले स्टोर ले डाउनलोड करे जा सकत हे। छत्तीसगढ़ क्वांटिफाइबर डाटा आयोग के सचिव बी.सी. साहू ह बतइन कि मोबाइल ऐप डाउनलोड करे बाद ऐमा आवेदक मन रजिस्टेसन कर सकत हे।
इहां ए बतादन कि राज्य सासन डहार ले राज्य के जनसंख्या म अन्य पिछड़ा वर्ग-ओबीसी अउ आर्थिक रूप से कमजोर वर्ग के गनती बर ए आयोग के गठन करे गेहे।
पोषण-महिला और बाल विकास
केन्द्रीय महिला अउ बाल विकास मंत्रालय ह अवइया महीना पूरा देसभर म पोषण माह मनाही। पोषण अभियान ह नान्हें लइका, बाढ़े नोनी, गर्भवती माईलोगिन अउ नान्हें लइका ल दूध पिवइया महतारी मनके स्वास्थ्य ल सुघ्घर बनाय बर केन्द्र सरकार के प्रमुख कारीकरम हे। प्रधानमंत्री नरेन्द्र मोदी ह बछर दू हजार अट्ठारह म ए कारीकरम के सुरूवात करे रिहीन।
ए बछर पोषण माह के दउरान आंगनबाड़ी केन्द्र, स्कूल जगह, ग्राम पंचायत ए सब जगह म सबो हितधारी डहार ले पोषण वाटिका बर पौधा रोपण अभियान उपर ध्यान दे जाही। संगे छह बछर ले कमती उमर के लइका मनके लंबाई अउ वजन नापे बर एक ठिन बिसेस अभियान घलो चलाय जाही।
इही बीच, छत्तीसगढ़ म घलो कुपोषण अउ एनीमिया म कमी लाय बर एक ले तीस सितंबर तक राष्ट्रीय पोषण माह के आयोजन करे जाही।
श्रीकृष्ण जन्माष्टमी
भगवान श्रीकृष्ण के जन्म परब जन्माष्टमी ल काली धार्मिक श्रद्धा संग मनाए जाही। ए मउका म राजधानी रईपुर समेत प्रदेस के कृष्ण मंदिर मन म जन्मोत्सव मनाय बर तैयारी करे जात हे।
श्रीकृष्ण जन्माष्टमी के मउका म राज्यपाल अनुसुईया उइके, मुख्यमंत्री भूपेश बघेल अउ विधानसभा अध्यक्ष डॉक्टर चरणदास महंत ह प्रदेसवासी मन ल सुभकामना दीन हे। राज्यपाल ह अपन संदेस म किहीन कि भगवान श्रीकृष्ण ह भागवत गीता के माध्यम ले मनखे ल जीये बर सही रद्दा दिखाय हे, जउन ह युगों-युगों ले रद्दा देखइया पथ-प्रदर्सक हवय।
उहें, मुख्यमंत्री ह अपन संदेस म किहीन हे कि भगवान श्रीकृष्ण के जीवन लीला अउ उंखर उपदेस ह हमन ल जीये के सुघ्घर कला सिखाथे। उंखर दे सीख ह जीवन के हरेक मउका बर महत्तम राखथे अउ बने रद्दा देखाथे।
इही तरह, विधानसभा अध्यक्ष डॉक्टर चरणदास महंत ह किहीन हे कि भगवान श्रीकृष्ण ह जीवन ल उछाह संग जीये अउ समाज कल्याण बर सीख देथे।
इही बीच, राज्य सरकार ह जन्माष्टमी परब के मउका प्रदेसभर म सराब दुकान अउ मांसाहार दुकान मन ल काली तीस अगस्त के बंद राखे के निर्णय लेहे।
दुर्घटना
रईपुर अउ बिलासपुर जिला म बीते चौबीस घंटा के दउरान होय दू-दि ठिन रोड एक्सीडेंट म चार झिन मनखे के मउत होगे।
मिले जानकारी मुताबिक नवा रईपुर अटल नगर म एयरपोर्ट तीर बीते रतिहा एक ठिन तेज रफ्तार कार ह अनते-तनते होके डिवाईडर ले टकरा गे। ए एक्सीटेंड म दू झिन जवान लइका के मउकाच म मउत होगे। उहें, एक झिन आने मनखे गंभीर रूप ले घायल होगे।
ओति, बिलासपुर-रईपुर रद्दा म हिर्री तीर कार अउ फटफटी के बीच टक्कर होगे। ए घटना म कार चलइया अउ फटफटी म बइठे माईलोगिन के मउत होगे।
अउ अब जानव मौसम के हाल..
प्रदेस म अवइया चौबीस घंटा के दउरान कतकोन जगह म थोरकुन ले जादा बरसा हो सकत हे। संगे एक-दू जगह म गरजई-चमकई के संगेसंग जोरदरहा पानी घलो गिर सकत हे।
मौसम विभाग के मुताबिक निम्मदाब के क्षेत्र उत्तर-पश्चिम बंगाल के खाड़ी ले होवत आंध्रप्रदेस के उपर स्थित हे। संगे उपरी हवा के चक्रीय चक्रवाती घेरा घलो बने हवय। मानसून द्रोणिका गंगानगर ले पूर्व मध्य बंगाल के खाड़ी तक नाहकत हे, जेखर असर छत्तीसगढ़ म घलो दिखत हे।