आज दिनभर के खबर ल अपन गुरतुर छत्तीसगढ़ी भाखा म पढ़व

स्वतंत्रता दिवस-प्रधानमंत्री

देस ह आज 75वां स्वाधीनता दिवस मनावत हे। प्रधानमंत्री नरेन्द्र मोदी ह नई दिल्ली म लालकिला के प्राचीर म राष्ट्रध्वज तिरंगा झंडा फहराईन अउ देस ल संबोधित करीन। प्रधानमंत्री ह संबोधन म राष्ट्र निर्माण बर ‘‘सबका साथ-सबका विकास, सबका विश्वास और सबका प्रयास‘‘ के मंत्र दीन। प्रधानमंत्री ह देसवासी अउ दुनियाभर के उन लोगन ल घलो बधाई दीन, जउन भारत अउ लोकतंत्र ले प्रेम करथें। श्री मोदी ह देस खातिर परान गंवइया स्वतंत्रता सेनानी मन ल सुरता करीन अउ ओमन ल श्रद्धांजलि दीन। प्रधानमंत्री ह किहीन कि देस ह सब्बो       स्वाधीनता सेनानी मन के ऋणी हवय।
श्री मोदी ह टोक्यो ओलंपिक म भारत के मान बढ़हईया सब्बो खिलाड़ी मन ल घलो सुभकामना दीन अउ कोरोना महामारी ले लड़ई म निडर होके सेवा करइया जम्मों लोगन मन ल नमन करीन।
श्री मोदी ह किहीन कि देस ए बछर 12 मार्च ले 15 अगस्त 2023 तक आजादी के अमृत महोत्सव मनाही। प्रधानमंत्री ह किहीन कि हमन ल सिरिफ अमृत महोत्सव तक ही सीमित नइ रहना हे।
प्रधानमंत्री ह किहीन कि हमन ल आयुष्मान भारत योजना, उज्ज्वला योजना, पेंशन योजना अउ आवास योजना जइसन कारीकरम ले देस के हर नागरिक के संग जुड़ना होही।
श्री मोदी ह किहीन कि सरकार ह छोटे किसान मनके कल्याण उपर ध्यान देवत हे अउ ‘‘प्रधानमंत्री किसान सम्मान निधि योजना‘‘ उंखर मन बर चलाय जात हे। 10 करोड़ ले जादा किसान परिवार के बैंक खाता म अब तक डेढ़ लाख करोड़ रूपिया ले जादा पइसा जमा करा दे गेहे।
प्रधानमंत्री ह यहू किहीन कि भारतीय रेल म घलो तेजी आवत हे अउ आजादी के अमृत महोत्सव ल 75 हफ्ता तक मनाय के फैसला ले गीस। बतादन कि आजादी के अमृत महोत्सव के 75 हफ्ता म 75 ठन वंदे भारत रेलगाड़ी देस म चलाय के फइसला करे गेहे।

स्वतंत्रता दिवस-छत्तीसगढ़-01

छत्तीसगढ़ म घलो 75वां स्वाधीनता दिवस उछाह के संग मनाय जावत हे। राजधानी रईपुर म आयोजित मुख्य समारोह म मुख्यमंत्री भूपेश बघेल ह झंडा फहराईन। ए मउका म प्रदेस के जनता के नाव अपन संदेस के वाचन करत मुख्यमंत्री ह कई ठिन घोसना करिन। छत्तीसगढ़ म चार ठिन नवा जिला – मोहला-मानपुर, सक्ती, सारंगढ़-बिलाईगढ़ अउ मनेन्द्रगढ़ के गठन करे जाही। एखरे संग राज्य म 18 ठन नवा तहसील घलो बनाय जाहीं।
मुख्यमंत्री ह ए मउका म प्रदेस के सबो जिला मुख्यालय अउ नगर निगम मन म महिला मन बर अलग से मिनीमाता के नाव म एक ठन उद्यान बनाय के अउ महाविद्यालय म प्रवेश बर उमर सीमा के बंधन ल खतम करे के घलो घोसना करीन।
प्रदेस के ग्रामीण क्षेत्र मन म आबादी भूमि म निवास करइया लोगन मन ल उंखर जमीन के हक देवाय बर ‘‘स्वामित्व योजना‘‘ सुरू करे जाही। एखर अलावा बिजली कंपनी मन के कई ठिन पद बर ढाई हजार ले जादा कर्मी मन के भर्ती करे जाही। संगेसंग डायल-112 सेवा के जम्मों प्रदेस म विस्तार करे जाही। मुख्यमंत्री ह किहीन कि छूट दर म दवई देवाय बर नगरीय क्षेत्र म लागू ‘‘मुख्यमंत्री सस्ती दवाई योजना‘‘ अब ‘‘श्री धनवंतरी योजना‘‘ के नांव ले जाने जाही। ए मउका म मुख्यमंत्री ह कोरोना काल म बढ़िया कारज करइया 21 लोगन अउ 4 सरकारी अस्पताल मन ल सम्मानित करीन।

स्वतंत्रता दिवस-छत्तीसगढ़-02

उहें, स्वतंत्रता दिवस के मउका म राज्यपाल अनुसुईया उइके ह राजभवन म तिरंगा फहरा के परेड के निरीक्षन करीन।
अइसने, बिलासपुर स्थित छत्तीसगढ़ उच्च न्यायालय म कार्यकारी मुख्य न्यायाधीश प्रशांत कुमार मिश्रा ह झंडा फहराईन। ए मउका म सब्बो न्यायाधीश, महाधिवक्ता अउ अधिवक्ता मौजूद रिहीन।
इही बीच, विधानसभा अध्यक्ष डॉक्टर चरणदास महंत ह कोरिया जिला मुख्यालय बैकुंठपुर म झंडा फहरा के परेड के सलामी लीन। समारोह म ओमन बढ़िया कारज करइया 76 करमचारी अउ कोरोना वॉरियर्स मन ल सम्मानित करीन।
उहें, कबीरधाम जिला म स्वास्थ्य मंत्री टी.एस. सिंहदेव ह झंडा फहराईन अउ मुख्यमंत्री के संदेस के वाचन करीन।
ऐति, महासमुंद के मिनी स्टेडियम म आयोजित समारोह म गृहमंत्री ताम्रध्वज साहू ह झंडा फहराईन। कारीकरम म ओमन 19 सहीद के परिजन मन ल साल अउ नरियर देके सम्मानित करीन। संगेसंग ओमन जिला म बढ़िया कारज करइया 55 अधिकारी अउ कमरचारी मन ल घलो सम्मानित करीन।
उहें, कृषि मंत्री रविन्द्र चौबे ह रायगढ़ म अउ वन मंत्री मोहम्मद अकबर ह दुरूग म तिरंगा झंडा फहरा के परेड के सलामी लीन।
ओति, बस्तर जिला म स्वतंत्रता दिवस सादगी के संग मनाय गीस। जगदलपुर के लालबाग परेड मैदान म बस्तर के प्रभारी मंत्री कवासी लखमा ह झंडा फहराईन अउ गार्ड ऑफ ऑनर के सलामी लीन।
उहें, दक्षिण-पूर्व-मध्य रेलवे के मुख्यालय समेत सबो मंडल मन म घलो स्वतंत्रता दिवस मनाय गीस। बिलासपुर म दक्षिण पूर्व मध्य रेलवे के महाप्रबंधक आलोक कुमार ह झंडा फहराईन।

स्वतंत्रता दिवस-छत्तीसगढ़-03

75वां स्वाधीनता दिवस बस्तर संभाग म घलो आज उछाह के संग मनाय जावत हे। सुरक्षाबल के अगुवई म माओवाद प्रभावित इलाका मन म घलो ए दरी ग्रामीण मन स्वतंत्रता दिवस कारीकरम म बढ़-चढ़के हिस्सा लीन।
इही कड़ी म दंतेवाड़ा पुलिस डहार ले चलाय जावत ‘‘लोन वर्राटू अभियान‘‘ के बाद जउन गांव म नक्सलवाद खतम हो चुके हे अउ ओ ह ग्रीन जोन सामिल होगे हे, उहां के ग्रामीण पुलिस अधिकारी मन संग इंद्रावती नदी म छिंदनार-पाहुरनार म बने पुल म पहिली दरी आजादी के खुसी मनाईन। सुरक्षा म तैनात जवान मन संग इलाका के लइका मन ह तिरंगा फहरा के राष्ट्रगान घलो गाइन।
उहें, बीजापुर जिला म करीबन 16 बछर बाद दूरिहा-दूरिहा गांव म बने स्कूल मन म आज स्वतंत्रता दिवस के उछाह देखे गीस। ए मउका म नान्हें-नान्हें लइका मन हाथ म तिरंगा लेके स्कूल पहुंचीन। बतादन कि ए स्कूल भवन मन ल माओवादी मन ह तोड़ दे रिहीन। फेर, ग्रामीण मन के मदद ले प्रसासन ह ए स्कूल मन ल फेर ले खोल दीस।
अइसने, माओवाद प्रभावित सुकमा जिला के मिनपा गांव म आजादी के परब ह एक नवा अंजोर लेके आइस। इहां करीबन 16 बछर बाद बिजली के अंजोर पहुंचे हे। इहां सुरक्षाबल के तैनाती के बाद सड़क बनीस अउ बिजली आपूर्ति घलो सुरू करे गीस।

अमृत महोत्सव-फिल्म महोत्सव

केन्द्रीय सूचना अउ प्रसारण मंत्रालय के फिल्म प्रभाग ह आज ले तीन दिन के ‘‘आजादी के अमृत महोत्सव‘‘ के तहत फिल्म महोत्सव आयोजित करत हे। महोत्सव म स्वतंत्रता संग्राम अउ सेनानी मन उपर 20 ठन वृत्तचित्र फिल्म प्रदर्सित करे जाहीं। 17 अगस्त तक ए वृत्तचित्र फिल्म प्रभाग के वेबसाइट अउ यू-ट्यूब चैनल म देखाय जाही।  

मौसम

मौसम विभाग ह अवइया 24 घंटा के दउरान दक्षिण क्षेत्र म एक-दू जघा म गाज गिरे अउ भारी बरसा होय के संभावना जताय हे। उहें, प्रदेस के अधिकांश जघा म हल्का ले मध्यम बरसा होय अउ गरज चमक के संग छींटा पड़ सकत हे।