प्रधानमंत्री-सम्मान निधि किश्त
प्रधानमंत्री नरेन्द्र मोदी ह काली वीडियो कॅान्फ्रेसिंग के माध्यम ले प्रधानमंत्री किसान सम्मान निधि योजना के अवइया किश्त जारी करही। नौ करोड़ पचहत्तर लाख ले जादा किसान परिवार मन ल साढ़े उन्नीस हजार करोड़ रूपिया ले जादा के राशि दे जाही। प्रधानमंत्री ए दउरान किसान लाभार्थी मनले गोठबात घलो करहीं।
लोकवाणी
मुख्यमंत्री भूपेश बघेल ह आज प्रसारित मासिक रेडियोवार्ता लोकवाणी के बीसवां कड़ी म -आदिवासी अंचलों की अपेक्षाएं और विकास – विषय उपर गोठबात करत कीहिन कि हमन ल आदिवासी समाज के परंपरा, संस्कृति अउ उंखर उच्च जीवन मूल्य ल समझे के मउका मिले हे। ओमन कीहिन कि ढाई साल के दौरान उनतीस नवा तहसील अउ चार अनुविभाग बनाये गेहे। एमा ले जादातर आदिवासी अंचल म हे। श्री बघेल ह कीहिन कि माओवाद प्रभावित इलाका म एक हजार छै सौ सैंतीस करोड़ रूपिया के लागत ले सड़क बनाये के काम करे जात हे। एखर ले आदिवासी अंचल के विकास होही।
लोकवाणी म मुख्यमंत्री ह कहिन कि बस्तर जिला के लोहंडीगुड़ा म बड़े उद्योग बनाये बर लेगे जमीन वापसी के घोषणा के संगेसंग आदिवासी मन ल न्याय दिलाये के शुरूआत होगे हे।
श्री बघेल ह कीहिन कि राज्य सरकार डहार ले चलाए जावत मलेरिया मुक्त बस्तर अभियान के यू.एन.डी.पी. अउ नीति आयोग ह सराहना करीन हे। ओमन कीहिन कि आदिवासी अंचल म स्थानीय बोली अउ भाषा म लईका मन बर पुस्तक छपवाये गेहे। संगेसंग ए क्षेत्र मन म शिक्षक के कमी ल दूर करे बर साढ़े चौदह हजार शिक्षक मनके भर्ती करे जाही।
फ्लैगशिप जल जीवन मिशन
केद्रीय जल शक्ति मंत्री गजेन्द्र सिंह शेखावत ह कीहिन कि साफ पेयजल के उपलब्धता जीवन के जरूरी आवश्यकता हे। काली रायपुर म आयोजित जल जीवन मिशन के समीक्षा बइठका म श्री शेखावत ह कीहिन कि केंद्र सरकार ह वर्ष दू हजार चौबीस तक देश के हर एक घर म पीये के साफ पानी पहुंचाये के लक्ष्य राखे हे अउ एला प्राथमिकता ले पूरा करे जावत हे। केंद्रीय मंत्री ह ए मिशन के काम के नियमित समीक्षा के जरूरत बताइन।
बइठका म मुख्यमंत्री भूपेश बघेल ह कीहिन कि प्रदेश म जल जीवन मिशन के काम ह एक अभियान के रूप म करे जावत हे। एखर तहत ए बछर बाईस लाख ले जादा घर मन म नल कनेक्शन देके लक्ष्य राखे गेहे। ओमन कीहिन कि राज्य सरकार के नरवा योजना ले भू-जल स्तर ह लगातार बाढ़त हे।
रेलवे-हाइड्रोजन एनर्जी मिशन
भारतीय रेलवे ह नेशनल हाइड्रोजन एनर्जी मिशन के तहत हाइड्रोजन फ्यूल सेल ले ट्रेन चलाए के एतिहासिक फैसला करे हे। एखर ले ग्रीन एनर्जी के उपयोग करे जा सकथे, जेखर ले कार्बन डाईऑक्साइड के उत्पादन नइ होय। देश म हाइड्रोजन मोबिलिटी ल बढ़ावा दे खातिर बजट म एखर प्रावधान करे गे रीहिस। देश म शुरूआती बेरा म डेमू गाड़ी के दू रैक म बदलाव करके हाइड्रोजन फ्यूल सेल लगाए जाही। जेखर निविदा अवइया इक्कीस सितंबर ले मंगाए जाही।
विश्व आदिवासी दिवस
काली विश्व आदिवासी दिवस हरय। ए मउका म राज्यपाल अनुसूइया उइके अउ मुख्यमंत्री भूपेश बघेल ह देश अउ प्रदेश के आदिवासी समाज के संगेसंग सबो नागरिक मन ल अपन बधाई अउ शुभकामना दीन हे। ओमन अपन शुभकामना संदेश म कीहिन कि आदिवासी समाज के लोगन मन हमेशा ले परंपरा, संस्कृति अउ प्रकृति के संरक्षक रेहे हे।
उंहें, विश्व आदिवासी दिवस के मउका म राजनांदगांव जिला म सर्व आदिवासी समाज डहार ले मोटर सायकिल रैली निकाले गीस।
भाजपा अनुसूचित जनजाति बैठक
भारतीय जनता पार्टी अनुसूचित जनजाति मोर्चा के बइठका रायपुर म होइस। एमा केंद्रीय राज्य मंत्री फग्गन सिंह गुलस्ते अउ रेणुका सिंह ह शामिल होइन। बइठका म धर्मांतरण, वन अधिकार, अउ आदिवासी मनके आने आने मुद्दा उपर गोठबात करे गीस।
बइठका के बाद पत्रकार वार्ता म प्रदेश अध्यक्ष विष्णुदेव साय ह कीहिन कि आदिवासी समाज के आने आने मुद्दा ल लेके राजनीतिक प्रस्ताव पारित करे गेहे। ओमन ह कीहिन कि अवइया समय म आदिवासी माइलोगिन के संग होवइया अत्याचार ल रोके के संगेसंग दूसर मांग ल लेके प्रदेशभर म प्रदर्शन करे जाही।
भाजपा प्रशिक्षण
भारतीय जनता पाटी के स्वास्थ्य स्वयं सेवक मन बूथ तक जाके कोरोना के खिलाफ जन जागरूकता अभियान चलाही। रायपुर म भाजपा के स्वास्थ्य स्वयं सेवक के राज्य स्तरीय प्रशिक्षण शिविर ल संबोधित करत प्रदेश भाजपा प्रभारी डी. पुरंदेश्वरी ह कीहिन कि एखर बर चिकित्सा प्रकाष्ठ ले जुड़े चार झिन लोगन मन ल प्रशिक्षण दे जाही।
मंडल अउ बूथ स्तरीय प्रशिक्षण के माध्यम ले चुने गे प्रशिक्षित कार्यकर्ता मन लोगन मन ल कोरोना ले बचाव के बारे म जागरूक करही। डी. पुरंदेश्वरी ह कीहिन कि लोक कल्याण बर काम करना अउ अंत्योदय के लक्ष्य ल लेके आगू बढ़ना ही भाजपा के मूल मंत्र हवय।
एमओयू प्रौढ़ साक्षरता
प्रदेश म प्रौढ़ साक्षरता के क्षेत्र म रोटरी इंडिया लिट्रेसी मिशन ह सहयोग करही। संगेसंग स्कूल छोड़ चुके लईका मन ल शिक्षा के मुख्य धारा ले जोड़े बर मिशन कोति ले सहयोग कार्यक्रम चलाए जाही। ए संबंध म मुख्यमंत्री भूपेश बघेल के उपस्थिति म रोटरी इंडिया लिट्रेसी मिशन अउ एससीईआरटी छत्तीसगढ़ के बीच एमओयू करे गीस।
हरेली
हरियाली के तिहार हरेली आज प्रदेश भर म पारंपरिक उल्लास के संग मनाये जावत हे। राज्य शासन डहार ले ए तिहार बर जगा-जगा आयोजन करे गीस। ए दउरान लईका मन सहित मनखे मन घलो गेड़ी के आनंद लीन।
रायपुर स्थित मुख्यमंत्री निवास म घलो पारंपरिक रीति रिवाज के संग हरेली के तिहार मनाये गीस। ए मउका म मुख्यमंत्री ह खेती के औजार के पूजा करीन अउ गाय गरूआ ल लोंदी खवाइन। मुख्यमंत्री निवास म होय सांस्कृतिक कार्यक्रम म लोक कलाकार, नर्तक अउ लोक गायक मन अपन पारंपरिक वेशभूषा म वाद्ययंत्र अउ साज सज्जा के संग प्रस्तुती दिन।
श्रावण कृष्ण अमावस्या के दिन मनाये जाने वाले ए परब म किसान भाई मन अपन खेती किसानी के औजार अउ उपकरण के संगेसंग ग्राम देवता के पूजा अर्चना घलो करीन। आज विशेष रूप ले ग्रामीण इलाका के घर-दुआर म गोबर ले चिन्हा बनाये गीस। उंहें लोगन मन अपन मकान अउ दुकान के आगू म नीम पत्ती ल घलो लगाइन। छत्तीसगढ़ अंचल के पहिली तिहार हरेली ह पर्यावरण के प्रति हमर जुड़ाव अउ लोक संस्कृति ल घलो प्रदर्शित करथे।
उंहें मुंगेली, धमतरी, जांजगीर-चांपा, राजनांदगांव सहित प्रदेश के आने आने जिला मन म घलो हरेली पर्व पारंपरिक उल्लास के संग मनाये के समाचार मिले हे।
राज्यपाल अनुसूइया उइके अउ मुख्यमंत्री भूपेश बघेल ह हरेली पर्व के अवसर म प्रदेशवासी मन ल बधाई अउ शुभकामना दीन हे।
बस्तर दशहरा
विश्व प्रसिद्ध बस्तर दशहरा के पर्व आज ले शुरू होगे हे। एखर शुभारंभ के मउका म आज पाटजात्रा के नेग करे गीस। ए दउरान ग्रामीण दंतेश्वरी मंदिर पहुंचीन जिहां गांव के पुजारी ह रथ बनाये के पहिली लकड़ी के परंपरा अनुसार पूजा अर्चना करीन। एखर संग बस्तर दशहरा के बड़का रथ बनाये बर जंगल ले लकड़ी लाये क काम शुरू हो जाथे। कार्यक्रम म संसदीय सचिव अउ जगदलपुर विधायक सहित बस्तर संभाग के जनप्रतिनिधि मांझी चालकी अउ लोगन मन शामिल होइन।