टोक्यो ओलंपिक-स्वर्ण पदक
टोक्यो ओलंपिक म आज नीरज चोपड़ा ह इतिहास रचत हुए स्वर्ण पदक जीत लेहे। आज भालाफेंक मुकाबला म नीरज चोपड़ा ह सत्यायी दमशलव पांच आठ मीटर भालाफेंक के, स्वर्ण पदक अपन नाम कर लीन अउ भारत ल टोक्यो ओलंपिक म पहली स्पर्ण पदक दिलईस।
ये उपलब्धि बर केन्द्रीय खेल मंत्री अनुराग ठाकुर ह नीरज चोपड़ा ल बधाई अउ सुभकामना दीन।
एखरे संग टोक्यो ओलंपिक म भारत ह सात मेडल अपन नाम कर लेहे। एमा एक स्वर्ण, दू रजत अउ चार कांस्य पदक सामिल हे।
फ्लैगशिप-जल जीवन मिशन
केन्द्रीय जलशक्ति मंत्री गजेन्द्र सिंह शेखावत ह आज अपन छत्तीसगढ़ प्रवास के दौरान राजधानी रायपुर म मुख्यमंत्री भूपेश बघेल के संग राज्य म जल जीवन मिशन अउ जलशक्ति अभियान के प्रगति के समीक्षा करीन।
बाद म पत्रकार मन से चर्चा करत हुए केन्द्रीय मंत्री श्री शेखावत ह किहीन कि बीते लगभग सोलह महीना के दौरान कोविड महामारी के चुनौती के बावजूद देश ह जल जीवन मिशन के तहत महत्वपूर्ण उपलब्धि हासिल करे हे। लगभग चौहत्तर जिला अइसे हे, जिहां सब्बो घर म नल के माध्यम ले पानी पहुंच चुके हे। उहें, एक लाख ले ज्यादा गांव अउ करीब पचहत्तर हजार पंचायत मन म घलो जल जीवन मिशन के तहत शत-प्रतिशत लक्ष्य ल हासिल करे गेहे।
केन्द्रीय मंत्री ह किहीन कि जल जीवन मिशन के संदर्भ म छत्तीसगढ़ के प्रदर्सन अभी तक अच्छा नहीं रेहे हे। पूरा देस म छत्तीसगढ़ राज्य ह ये मामला म तीसरइया पायदान म हे।
केन्द्रीय मंत्री ह बतईन कि समीक्षा बैठक के दौरान मुख्यमंत्री भूपेश बघेल ह ये विश्वास दिलाईन कि ये बछर छत्तीसगढ़ के करीब बाईस लाख घर मन म नल के जरिया पानी पहुंचा दे जाही।
कोरोना समाचार
प्रदेस म कोरोना संक्रमण के स्थिति म लगातार सुधार होवत हे अउ औसत पॉजिटीविटी गिरके शून्य दशमलव दू पांच प्रतिशत म आ गेहे। प्रदेश के सब्बो जिला म संक्रमण के दर एक प्रतिशत ले नीचे पहुंच गेहे। राज्य म काली कोरोना संक्रमण के एक सौ नौ नवा मामला सामने आय हे। काली प्रदेश के सात जिला मन म कोरोना के एको नवा मरीज नइ मिले हे।
इही बीच, प्रदेश म कोरोना टीकाकरण के काम जोर-शोर ले जारी हे। प्रदेश म कोरोना ले बचाव बर अब तक एक करोड़ अट्ठाईस लाख पच्चीस हजार ले जादा टीका लगाय जा चुके हे। एमा एक करोड़ दू लाख बहत्तर हजार ले जादा पहली डोज के रूप म अउ पच्चीस लाख तिरपन हजार ले जादा दूसरइया डोज के रूप म टीका लगाय गेहे। उहें, प्रदेश म पैंतालीस बछर ले जादा आयु वर्ग के नब्बे प्रतिशत लोगन मन ल पहलइया टीका लगाय जा चुके हे।
राष्ट्रीय हथकरघा-दिवस
केन्द्रीय वस्त्र मंत्रालय ह आज सातवां राष्ट्रीय हथकरघा दिवस मनावत हे। हथकरघा क्षेत्र सीधा तौर म महिला मनके ससक्तिकरण करत हे। सत्तर प्रतिसत ले जादा महिला मन हथकरघा अउ उंखर ले जुड़े काम म लगे हे।
प्रधानमंत्री नरेन्द्र मोदी ह किहीन हे कि हथकरघा भारत के विविधता अउ बुनकर अउ कारीगर मनके निपुणता ल दर्शाथे। एक ट्वीट म श्री मोदी ह किहीन कि राष्ट्रीय हथकरघा दिवस ‘‘माई हैंडलूम-माई प्राईड‘‘ के भावना ल बढ़ाके देस के बुनकर मन ल प्रोत्साहित करे के मौका आय। ओमन देसवासी मन ले स्थानीय हथकरघा उत्पाद ल खरीदे के आग्रह करीन।
मानसिक स्वास्थ्य-एक्सीलेंस अवॉर्ड
छत्तीसगढ़ के स्वास्थ्य अउ परिवार कल्याण विभाग ल ‘‘पब्लिक हेल्थ फाउंडेशन ऑफ इंडिया संस्था‘‘ डहार ले कोरोना काल म मानसिक स्वास्थ्य कारीकरम के अंतर्गत उत्कृष्ट सेवा दे बर ‘‘एक्सीलेंस इन मेंटल हेल्थ अवार्ड‘‘ से सम्मानित करे गेहे।
राष्ट्रीय स्वास्थ्य मिशन के संचालक डॉक्टर प्रियंका शुक्ला ह नई दिल्ली म आयोजित कारीकरम म राज्य डहार ले ये पुरस्कार ग्रहण करीन। डॉक्टर शुक्ला ह बतईन कि मानसिक स्वास्थ्य ले जुड़े सेवा मन ल राज्य के दूरस्थ क्षेत्र तक पहुंचाय खातिर छत्तीसगढ़ के चयन ये पुरस्कार बर करे गीस।
ओति, लघु वनोपज संग्रहण के क्षेत्र म मॉडल राज्य के रूप म उभरे छत्तीसगढ़ ल केन्द्र सरकार डहार ले अलग-अलग श्रेणी मन म दस ठन पुरस्कार से नवाजे गेहे। छत्तीसगढ़ ल छह श्रेणी म देसभर म प्रथम स्थान मिले हे। उहें, राज्य म निर्मित महुआ सैनिटाईजर अउ इमली चस्का ल नव उत्पाद अउ नवाचार श्रेणी म पुरस्कार प्राप्त होय हे। प्रदेस के बारह वन-धन केन्द्र मन ल पन्द्रह राज्य स्तरीय पुरस्कार मिले हे।
केन्द्रीय जनजातीय मंत्री अर्जुन मुंडा ह नई दिल्ली म आयोजित वर्चुअल कारीकरम म छत्तीसगढ़ ल ये पुरस्कार प्रदान करीन।
अमृत महोत्सव-क्विज प्रतियोगिता
श्रोता मन, आजादी के अमृत महोत्सव उपर प्रादेशिक समाचार एकांश, आकाशवाणी, रायपुर डहार ले आयोजित करे जात ‘‘प्रश्नोत्तरी प्रतियोगिता‘‘ म हिस्सा ले बर आप मन जेन उत्साह दिखाय हव, ओखर बर आकाशवाणी समाचार आप मनके हार्दिक प्रभार व्यक्त करत हे। हमर श्रोता मनके ये प्रतियोगिता ल लेके उत्साह के अंदाजा इही बात से लगाय जा सकत हे कि समाचार बुलेटिन म प्रश्न प्रसारित होय के मात्र कुछ मिनट म श्रोता मनके एस.एम.एस. अउ ई-मेल के जरिया जवाब भेजना सुरू होगे। हमन ल काली पूछे गे प्रश्न के उत्तर म बड़ संख्या म लोगन मन अपन जवाब भेजे हे। फेर, प्रश्नोत्तरी श्रृंखला के ये पहली कड़ी म सबले पहली जवाब भेजने वाला विजेता हरय – बिलासपुर जिला के लमेर गांव के निवासी श्री शिवलोचन रजक। हम आकाशवाणी परिवार डहार ले श्री रजक ल हार्दिक बधाई अउ सुभकामनाएं देवत हन।
श्रोता मन, शिवलोचन रजक जी हमर आकाशवाणी समाचार के नियमित श्रोता हरय। आकाशवाणी समाचार से बात करत हुए ओमन किहीन कि आजादी के अमृत महोत्सव उपर प्रादेशिक समाचार एकांश डहार ले सुरू करे गे प्रश्नोत्तरी कारीकरम एक अभिनव प्रयास हरय।
श्रोता मन, ये प्रश्नोत्तरी कारीकरम ल लेके आप मनके उत्साह ल देखत हुए प्रादेशिक समाचार एकांश ह ये निर्णय लेहे कि अगले सुक्रवार यानि तेरह अगस्त ले छत्तीसगढ़ी अउ हिन्दी प्रादेशिक समाचार म अलग-अलग प्रश्न पूछे जाही अउ ए दूनों समाचार बुलेटिन म पूछे गे प्रश्न के आधार म सबले पहली सही जवाब देवइया एक-एक विजेता के चयन करे जाही।
राज्यपाल विशेष साक्षात्कार
देश के आजादी के पचहत्तर बछर पूरा होय के उपलक्ष्य म अमृत महोत्सव के तहत प्रादेशिक समाचार एकांश, आकाशवाणी रायपुर डहार ले छत्तीसगढ़ म स्वतंत्रता संग्राम ले संबंधित प्रमुख घटना अउ इंहा के स्वतंत्रता सेनानी ले संबंधित विशेष कार्यक्रम के श्रृंखला प्रसारित करे जाही।
एखर पहला कड़ी के रूप म छत्तीसगढ़ के राज्यपाल अनुसूइया उइके ले करे गे विशेष साक्षात्कार के प्रसारण आकाशवाणी केंद्र रायपुर डहार ले रविवार काली आठ अगस्त के बीहनिया नौ बजके तीस मिनट ले करे जाही। एला छत्तीसगढ़ के सबो आकाशवाणी केंद्र मन ह एके संगरा रिले करही।
लोकवाणी
मुख्यमंत्री के मासिक रेडियो वार्ता लोकवाणी के बीसवां कड़ी के प्रसारण काली आठ अगस्त रविवार के होही। मुख्यमंत्री ह लोकवाणी म ए बखत ‘‘आदिवासी अंचल की अपेक्षाएं और विकास‘‘ – विषय म लोगन मन से गोठबात करही। एखर प्रसारण छत्तीसगढ़ के आकाशवाणी के सबो केंद्र एफ.एम. रेडियो अउ क्षेत्रीय समाचार चैनल मनले बीहनिया साढ़े दस बजे ले ग्यारह बजे तक करे जाही।
अउ अब पेश हे मौसम के हाल..
प्रदेश म आगामी चौबीस घंटा के दौरान कई जगह म हल्का ले मध्यम बरसा होय के संभावना हे। मौसम विभाग के मुताबिक उत्तर-पूर्व मध्यप्रदेश अउ ओखर आसपास एक निम्न दाब के क्षेत्र बने हुए हे। एखरे संग हवा के चक्रीय चक्रवाती घेरा स्थित हे। बीकानेर से जयपुर होवत उत्तर-पूर्व बंगाल के खाड़ी तक मानसून द्रोणिका घलो बने हुए हे। एखर प्रभाव ले बीते चौबीस घंटा के दौरान कुछ स्थान मन म हल्का ले मध्यम बारिस दर्ज करे गीस।