विधानसभा-सिंहदेव मामला
राज्य विधानसभा म बीते दू दिन से स्वास्थ्य मंत्री टी.एस. सिंहदेव के खिलाफ लगाय गे आरोप मन ल लेके जारी गतिरोध आज खतम होगे।
सदन म आज गृहमंत्री ताम्रध्वज साहू ह बतईन कि श्री सिंहदेव उपर लगाय गे सब्बो आरोप झूठा अउ निराधार हे। गृहमंत्री ह ये स्पष्ट करीन कि एक विधायक के सुरक्षाकर्मी मनके दुर्व्यवहार के घटना से स्वास्थ्य मंत्री के कोई संबंध नइ हे। एखर पहिली, सदन म कांग्रेस विधायक बृहस्पत सिंह ह स्वास्थ्य मंत्री के खिलाफ पहली दे गे अपन बयान उपर खेद जताईन। ओमन किहीन कि ए बयान से यदि काखरो भावना आहत होईस होही त एखर बर ओमन खेद व्यक्त करत हे।
मुख्यमंत्री भूपेश बघेल, नेता प्रतिपक्ष धरमलाल कौशिक, संसदीय कार्यमंत्री रविन्द्र चौबे ह ये गतिरोध के दूर होय ले प्रसन्नता जाहिर करत हुए किहीन कि एखर से राज्य विधानसभा के उच्च परंपरा मनके पालन होईस हे। विधानसभा अध्यक्ष डॉक्टर चरणदास महंत ह किहीन कि ए प्रकरण के समाप्त होय ले उच्च परंपरा म अउ बढ़ोतरी होही, जउन ल छत्तीसगढ विधानसभा ह पूर्व म अर्जित करे हे। एखर बाद स्वास्थ्य मंत्री टी.एस. सिंहदेव ह विधानसभा पहुंचीन अउ सबके आभार व्यक्त करत हुए सदन के कार्यवाही म भाग लीन।
एखर पहली, काली रात कांग्रेस डहार ले विधायक बृहस्पत सिंह ल कारण बताओ नोटिस जारी करके स्वास्थ्य मंत्री उपर लगाय गे आरोप उपर आधार स्पष्ट करे ल केहे गे रिहीस।
गौरतलब हे कि बीते सनिवार के अंबिकापुर म विधायक बृहस्पत सिंह के काफिला के एक वाहन उपर कुछ लोगन मन हमला करे रिहीस। एखर बाद कथित रूप से विधायक ह ये हमला के संबंध म स्वास्थ्य मंत्री उपर आरोप लगाय रिहीस।
विस-महाविद्यालय अधिग्रहण
राज्य विधानसभा म आज चंदूलाल चंद्राकर स्मृति चिकित्सा महाविद्यालय दुर्ग के अधिग्रहण संबंधी विधेयक पेस करे गीस। सदन म आज संसदीय कार्यमंत्री द्वारा विधेयक पेस करे उपर विपक्षी दल भाजपा के सदस्य मन आपत्ति जताईन। भाजपा सदस्य बृजमोहन अग्रवाल अउ अजय चंद्राकर ह विरोध जतावत किहीन कि संसदीय कार्यमंत्री द्वारा मूल विधेयक पेस करे ले अइसने परंपरा कायम हो जही। एखर बाद स्वास्थ्य मंत्री टी.एस. सिंहदेव ह सदन म ये विधेयक प्रस्तुत करीन। श्री सिंहदेव ह सदन ल भरोसा दिलाईन कि महाविद्यालय के अधिग्रहण के बाद कोनों प्रकार के लेन-देन या देनदारी म कोई दिक्कत नइ आवय।
विस-हाथी मामला
राज्य विधानसभा म आज भाजपा ह प्रदेस के अलग-अलग हिस्सा म हाथी मनके हमला ले होय मउत के मामला म सरकार ल घेरे के कोसिस करीन। भाजपा सदस्य अजय चंद्राकर ह ये मुद्दा ल उठावत हुए किहीन कि राज्य सरकार करा हाथी मनके हमला के घटना ल रोके के कोई व्यवस्था नइ हे। श्री चंद्राकर ह हाथी मनके मौत के मामला उपर घलो सवाल उठाईन।
जवाब म वन मंत्री मोहम्मद अकबर ह बतईन कि प्रदेस के अलग-अलग क्षेत्र मन म करीब तीन सौ हाथी विचरण करत हे। कई बार भोजन के तलाश म जब हाथी के दल रिहायसी इलाका म पहुंच जथे, त वइसने घटना होथे। मंत्री ह ग्रामीण क्षेत्र म हाथी मनके हमला के डर से ग्रामीण मन द्वारा अपन घर ल छोड़े के आरोप ल गलत बतईन। ओमन मैनपाट इलाका म हाथी मनके आतंक के कारण कुछ गांव वाले मनके रेहे के व्यवस्था दूसर गांव म करे के बात ल स्वीकार करीन।
वन अधिकार पत्र-ऑनलाइन
प्रदेस म वन अधिकार पत्र वितरण के दावा अब ऑनलाइन घलो करे जा सकत हे। फिलहाल ये सुविधा राज्य के धमतरी अउ कोरबा जिला के एक-एक विकासखंड म पायलट प्रोजेक्ट के रूप म सुरू करे गेहे। एखर बर संचालित ऑनलाइन पोर्टल म धमतरी जिला नगरी विकासखंड के हितग्राही मन काली तक अउ कोरबा जिला के पोड़ी-उपरोड़ा विकासखंड के हितग्राही मन दू से चार अगस्त तक दावा प्रस्तुत कर सकत हे।
आदिम जाति अउ अनुसूचित जाति विकास मंत्री डॉक्टर प्रेमसाय सिंह टेकाम ह उम्मीद जताईन कि ऑनलाइन व्यवस्था होय ले हितग्राही मन ल कागजी दस्तावेज से मुक्ति मिलही अउ कार्रवाई घलो जल्दी हो सकही।
संयुक्त राष्ट्र-स्कूल
संयुक्त राष्ट्र ह किहीन कि कोरोना महामारी के कारण बंद स्कूल जल्दी ही खोले जाना चाही। अनुमान हे कि महामारी के कारण साठ करोड़ ले ज्यादा लइका मनके शिक्षा उपर बुरा असर पड़े हे।
यूनिसेफ के प्रवक्ता जेम्स एल्डर ह काली जिनेवा म पत्रकार मन से बातचीत करत किहीन कि दूरस्थ शिक्षा, लाखों विद्यार्थी मनके पहुंच से बाहिर हे, जेखर से स्कूल म सुरक्षा, मैत्री अउ मिल-जुलके खाय-पीये के संस्कृति के जगह चिंता, खींझ, व्यग्रता अउ हिंसा ह ले लेहे। ओमन किहीन कि स्कूल ल फेर खोले बर अध्यापक अउ छात्र मनके टीकाकरण तक इंतजार नइ करे जा सकय। ओमन अलग-अलग देस के सरकार ले महामारी के कारण आर्थिक कठिनाई के बावजूद शिक्षा बजट ल बरकरार रखे के अपील करीन।
मनरेगा-टेक्नीशियन प्रशिक्षण
महात्मा गांधी राष्ट्रीय ग्रामीण रोजगार गारंटी योजना-मनरेगा के तहत कार्यस्थल मन म कोविड अनुकूल व्यवहार सुनिश्चित करे खातिर बेयरफुट टेक्नीशियन ल तीन अउ पांच अगस्त के प्रशिक्षण दे जाही। एखर बर विभाग डहार ले ऑनलाइन प्रशिक्षण के कार्ययोजना तैयार करे गेहे। ए प्रशिक्षण ले मनरेगा निर्माण कार्य मन म नियोजित श्रमिक मनके बीच कोरोना संक्रमण से बचाव संबंधी जरूरी सावधानी अउ उपाय मनके पालन करे म सहायता मिलही।
नड्डा-स्वास्थ्य अभियान
भारतीय जनता पार्टी के राष्ट्रीय अध्यक्ष जगत प्रकाश नड्डा ह आज नई दिल्ली म पार्टी मुख्यालय के राष्ट्रीय स्वयंसेवक अभियान के सुरूवात करीन। ए अभियान के तहत लगभग चार लाख स्वयंसेवक मन ल प्रशिक्षित करे जाही, जउन मन कोविड उपर जमीनी स्तर म काम करही। श्री नड्डा ह किहीन कि ए अभियान के तहत स्वयंसेवक मन ल दू लाख गांव तक पहुंचना होही।
माओवादी-समाचार
दंतेवाड़ा जिला के कटेकल्याण थाना क्षेत्र म सुरक्षा बल ह पांच लाख रूपिया के एक इनामी माओवादी ल गिरफ्तार करे म सफलता हासिल करे हे। जनमिलिसिया कमांडर हांदा कर्रा माड़वी ल जियाकोड़ता के जंगल ले घेराबंदी कर पकड़े गीस। ए माओवादी उपर लूट, हत्या, अउ विस्फोटक लगाय के अलावा पुलिस पार्टी उपर हमला जइसे कई घटना म सामिल होय के आरोप हे।
उहें, इही जिला के अरनपुर थाना क्षेत्र स्थित रेवाली गांव म सुरक्षा बल के टीम ह एक माओवादी स्मारक ल ध्वस्त कर दीस।
लोकवाणी
मुख्यमंत्री भूपेश बघेल ह लोकवाणी म ए दारी ‘‘आदिवासी अंचलों की अपेक्षाएं और विकास‘‘ विसय उपर गोठबात करही। ए संबंध म कोनो भी मनखे आकाशवाणी रायपुर के दूरभाष नंबर शून्य सात सात एक दू चार तीन शून्य पांच शून्य एक, पांच शून्य दू अउ पांच शून्य तीन म उनतीस अउ तीस जुलाई के मंझनियां तीन ले चार बजे के बीच फोन करके अपन सवाल रिकार्ड करा सकत हे।
मुख्यमंत्री के मासिक रेडियो वार्ता लोकवाणी के बीसवां कड़ी के प्रसारण आठ अगस्त के होही। ए प्रसारण ल छत्तीसगढ़ स्थित आकाशवाणी के सबो केंद्र एफ.एम. रेडियो अउ क्षेत्रीय समाचार चैनल मनले बीहनिया साढ़े दस बजे ले ग्यारा बजे तक करे जाही।