टोक्यो ओलंपिक-रजत पदक
टोक्यो ओलंपिक खेल म भारत ह शानदार सुरूवात करे हे। भारोत्तोलक मीराबाई चानू ह देस बर पहिली रजत पदक जीत ले हवय। ओमन ह भारोत्तोलन के उनचास किलोग्राम भार वर्ग के क्लीन एण्ड जर्क स्पर्धा म कुल दू सौ किलोग्राम वजन उठा के ए खेल म भारत ल पहिली सफलता देवाईन।
राष्ट्रपति रामनाथ कोविंद, उपराष्ट्रपति एम. वेंकैया नायडू, प्रधानमंत्री नरेन्द्र मोदी, केन्द्रीय खेल मंत्री अनुराग सिंह ठाकुर अउ छत्तीसगढ़ के मुख्यमंत्री भूपेश बघेल ह मीराबाई चानू ल उंखर प्रदर्सन बर बधाई दीन हे।
नीट-प्रवेश परीक्षा
केन्द्र सरकार ह केहे गे कि राष्ट्रीय पात्रता सह-प्रवेश परीक्षा नीट अउ दूसर संयुक्त प्रवेश परीक्षा मन ल निरस्त करे के कोनों योजना नइ हे। लोकसभा म लिखित उत्तर म केन्द्रीय स्वास्थ्य राज्यमंत्री भारती प्रवीण पवार ह किहीन कि नीट-पोस्ट ग्रेजुएट परीक्षा ग्यारह सितंबर के अउ नीट-अंडर ग्रेजुएट परीक्षा बारह सितंबर के होही। भीड-भाड़ अउ लंबी दूरी के यात्रा ले बाचे बर देस म परीक्षा केन्द्र के संख्या बढ़ाय गे हवय। स्वास्थ्य राज्यमंत्री ह बतईन कि परीक्षा संचालन म कोविड संबंधी सब्बो नियम के कड़ाई ले अनुपालन करे जाही। सब्बो परीक्षार्थी मन ल सुरक्षा किट दे जाही।
कोरोना समाचार/टीकाकरण
प्रदेस म कोरोना संक्रमण के स्थिति म सरलग सुधार होवत हे अउ औसत पॉजिटीविटी दर ह गिर के शून्य दशमलव तीन प्रतिसत म आ गे हवय। काली प्रदेस म कोरोना संक्रमण के एक सौ अट्ठारह नवा मामला आगू आय हे। वर्तमान म लगभग तीन हजार मरीज मनके इलाज आने-आने अस्पताल अउ होम आइसोलेशन म चलत हे।
ऐति, जांजगीर-चांपा जिला म कोरोना संक्रमण के रोकथाम बर कोविड प्रोटोकॉल के उल्लंघन करइया मनके खिलाफ जिला प्रसासन के संयुक्त टीम ह कड़ा कार्रवाई करही। कलेक्टर अउ पुलिस अधीक्षक के निरदेस म राखे गे राजस्व अउ पुलिस अधिकारी मनके बइठका म ए संबंध म जरूरी निरदेस दे गेहे।
उहें, महासमुंद जिला म कोरोना के संभावित तीसरा लहर ले निपटे बर प्रसासन डहार ले तैयारी सुरू कर दे गेहे। जिला के सब्बो सामुदायिक स्वास्थ्य केन्द्र मन म ब्लड बैंक बनाय जावत हे। कलेक्टर ह अधिकारी मनके बइठका लेके जिला के सब्बो अस्पताल म मरीज मनके उपचार बर स्वास्थ्य सुविधा देवाय के निरदेस दीन हे।
इही बीच, प्रदेस म कोरोना टीकाकरण के काम जोर-सोर ले जारी हे। राज्य म कोरोना ले बचाव बर अभी तक एक करोड़ सोलह लाख सात हजार ले जादा टीका लगाय गे हवय। एमा प्रदेस के चौरानवे लाख दस हजार ले जादा लोगन ल पहली टीका अउ इक्कीस लाख तिरसठ हजार लोगन ल दूनों टीका लग गे हवय।
कोरोना टीकाकरण के मामला म रईपुर सहर ह देस के राजधानी दिल्ली संघरा कतकोर महानगर मन ले आगू हे। रईपुर सहर म अभी तक छियासठ दशमलव चार-शून्य प्रतिशत लोगन ल पहली टीका अउ उन्नीस दशमलव आठ-दू प्रतिशत लोगन ल दूनों टीका लग गे हवय।
मन की बात
प्रधानमंत्री नरेन्द्र मोदी काली बिहनिया ग्यारह बजे आकाशवाणी ले ‘‘मन की बात‘‘ कारीकरम म अपन विचार साझा करही। ए ह कारीकरम के उनयासीवां कड़ी होही।
आकाशवाणी अउ दूरदर्शन के जम्मों नेटवर्क ले एखर प्रसारण होही। कारीकरम आकाशवाणी समाचार के वेबसाइट डब्ल्यू.डब्ल्यू.डब्ल्यू. डॉट न्यूज ऑन एआईआर डॉट कॉम अउ न्यूज ऑन एआईआर मोबाइल ऐप म घलो उपलब्ध रइही। ए कारीकरम आकाशवाणी, दूरदर्शन, प्रधानमंत्री कार्यालय अउ सूचना अउ प्रसारण मंत्रालय के यू-ट्यूब चैनल म घलो सीधा प्रसारित होही।
मुख्यमंत्री-कार्यक्रम
मुख्यमंत्री भूपेश बघेल ह किहीन हे कि सहकारी बैंक ले किसान मनके बहुत उम्मीद हवय। ग्रामीण अर्थव्यवस्था ल स्वालंबी बनाय बर सहकारिता आंदोलन के विस्तार करे के जरूरत हे।
मुख्यमंत्री ह आज अपन निवास कार्यालय म वीडियो कान्फ्रेंसिंग के माध्यम ले जिला सहकारी केन्द्रीय बैंक राजनांदगांव के नव-नियुक्त अध्यक्ष नवाज़ खान के पदभार ग्रहण समारोह म बोलत रिहीन। ओमन किहीन कि किसान मनके संगेसंग मजदूर, गौ-पालक अउ वनवासी मन ल घलो सहकारी बैंक मन ले जोड़े जाना चाही, जेखर ले ओमन ल घलो बैंक के सुविधा के फायदा मिल सकय।
खेल-चयन
भिलाई इस्पात संयंत्र के पांच खिलाड़ी – डी अनुषा, जसदीप कौर रंधावा, आंचल यादव, इशिका सिंह अउ हर्षिता प्रसाद के अंडर-सिक्टीन महिला राष्ट्रीय बास्केटबॉल कोचिंग बर चयन करे गेहे।
उहें, सोनीपत हरियाणा म छब्बीस ले राखे गे जूनियर मेन राष्ट्रीय मुक्केबाजी प्रतियोगिता बर स्टील प्लांट स्पोटर्स बोर्ड के टीम म भिलाई स्टील प्लांट के उत्कृष्ट कोच डहार ले प्रशिक्षित तीन झन खिलाड़ी मनके चुनाव करे गेहे।
मॉडल डिग्री कॉलेज-भाजपा
भारतीय जनता पार्टी के प्रदेस मंत्री ओ.पी. चौधरी ह केन्द्र सरकार डहार ले छत्तीसगढ़ बर दस ठिन नवा मॉडल डिग्री कॉलेज के मंजूरी दे जाय बर केन्द्र सरकार के आभार जताईन हे। श्री चौधरी ह किहीन कि केन्द्र सरकार के ए पहल छत्तीसगढ़ म उच्च सिक्षा ल बेहतर करे म क्रांतिकारी साबित होही।
मौसम
प्रदेस म आज-कल मानसून के गतिविधि तेज होगे हवय। पाछु चौबीस घंटा के दउरान राजधानी रईपुर संघरा प्रदेस के कतकोन इलाका म हल्का ले मध्यम बरसा दर्ज करे गीस। एखर ले नदी-नाला के जलस्तर बढ़ गेहे। उहें, कुछेक रद्दा म अवई-जवई के प्रभावित होय के खबर हे। रायगढ़ जिला म दू दिन ले होवत बरसा ले निचला इलाका म पानी भर गे हवय।
मौसम विभाग के अनुसार झारखंड अउ ओखर ले लगे उत्तर छत्तीसगढ़ के ओड़िशा के उपर एक ठिन निम्न दाब के क्षेत्र हवय। एखरे संग उपरी हवा म चक्रवाती घेरा घलो फैले हे। उहें, निम्नदाब के क्षेत्र ले उत्तर-गुजरात तक छत्तीसगढ़ अउ मध्यप्रदेश ले होवत एक ठिन द्रोणिका बने हे। एखर असर छत्तीसगढ़ म घलो देखे बर मिलत हे। एखर प्रभाव ले अवइया चौबीस घंटा म प्रदेस के आने-आने जगह म हल्का ले मध्यम बरसा होय के संभावना हे। एखर अलावा कुछेक जघा म तेज बरसा होय के घलो चेतावनी दे गे हवय।
इही बीच, पेंड्रा-अमरकंटक क्षेत्र म तेज बरसा होय ले अरपा-भैंसाझार बैराज ले आज बिहनिया सात सौ क्यूसेक पानी छोड़े गीस। एखर ले बिलासपुर सहर म अरपा नदी के जलस्तर बाढ़ गे हवय, जेला देखत सिंचाई विभाग ह नदी के तीर-तखार म रहइया लोगन ले सावधानी बरते के अपील करीन हे।
अउ अब थोरकुन समाचार सार म-
– भगवान शिव के अराधना के परब के सावन महीना काली ले सुरू होवत हे। ए मउका म राज्यपाल अनुसुईया उइके अउ मुख्यमंत्री भूपेश बघेल ह प्रदेसवासी मन ल सुभकामना दीन हे।
– छत्तीसगढ़ माध्यमिक सिक्षा मंडल के हायर सेकेंडरी अउ व्यावसायिक पाठ्यक्रम मुख्य परीक्षा बछर दू हजार इक्कीस के परीक्षा परिणाम काली पच्चीस जुलाई स्कूल सिक्षा मंत्री डहार ले जारी करे जाही।
– पंचायत अउ ग्रामीण विकास विभाग के एजेंसी, छत्तीसगढ़ ग्रामीण सड़क विकास अभिकरण ह प्रधानमंत्री ग्राम सड़क योजना म स्टेट क्वालिटी मॉनिटर्स के इम्पैनलमेंट बर इकतीस जुलाई तक आवेदन मंगाय हे।
– छत्तीसगढ़ पाठ्य पुस्तक निगम ह राजनांदगांव के सब्बो अशासकीय स्कूल म पढ़ईया लइका मन बर निःशुल्क पाठ्य पुस्तक के वितरण सुरू कर दे हवय। एमा आने-आने विकासखंड म आने-आने दिन किताब बांटे जाही।
– जांजगीर-चांपा जिला म मालखरौदा पुलिस ह नौकरी लगाय के नाम म करीबन साढ़े नौ लाख रूपिया के ठगी के मामला म तीन झिन आरोपी मन ल गिरफ्तार करे हे।
– राजनांदगांव जिला म चिचोली के उरई डबरी के तीर चारपहिया गाड़ी के टक्कर ले फटफटी म बइठे दू झिन युवक मनके मउत होगे।
अउ
– रायगढ़ के पुलिस अधीक्षक ह जिला के चार निरीक्षक अउ दू उप निरीक्षक मनके स्थानांतरण के आदेस जारी कर देहे।