आज दिनभर के खबर ल अपन गुरतुर छत्तीसगढ़ी भाखा म पढ़व

संसद-मानसून सत्र

संसद के मानसून सत्र काली ले चालू होवत हे। ए सत्र अवइया महीना के तेरह तारीख तक चलही। ए दउरान लोकसभा अउ राज्यसभा के कुल उन्नीस बइठका होही।
मानसून सत्र ल देखत हुए आज संसद भवन म प्रधानमंत्री नरेन्द्र मोदी के अध्यक्षता म सर्वदलीय बइठका होईस। ए बइठका संसद के दूनों सदन के सुचारू कामकाज ल सुनिश्चत करे बर राजनीतिक दल मन के समर्थन लेहे के उद्देश्य ले बुलाय गे रिहीस।

मन की बात

प्रधानमंत्री नरेन्द्र मोदी ह पच्चीस जुलाई के आकाशवाणी म ‘‘मन की बात‘‘ कारीकरम म देस-विदेस के लोगन मन संग अपन विचार साझा करही। लोगन मन अपन विचार नमो ऐप या माई. जी.ओ.वी. ओपन फोरम म बता सकत हे। ओमन ह टोल फ्री नंबर 1 8 0 0 1 1 7 8 0 0 म डायल करके हिन्दी अउ अंग्रेजी म प्रधानमंत्री बर अपन संदेस रिकार्ड करा सकत हे। फोन लाइन बाईस जुलाई तक खुले रइही। 1 9 2 2 म मिस्ड कॉल देके अउ एसएमएस लिंक पा के प्रधानमंत्री ल सीधा अपन सुझाव दे जा सकथे।

पुरंदेश्वरी-पत्रकारवार्ता

भारतीय जनता पार्टी के प्रदेश प्रभारी डी. पुरंदेश्वरी ह राज्य सरकार उपर वादाखिलाफी के आरोप लगाय हे। ओमन किहीन कि चुनाव के बखत कांग्रेस ह युवा मन ल रोजगार देहे के, गरीब मन ल घर देवाय के अउ माईलोगिन मन ल सुरक्षा देहे जइसे कई ठिन वादा करे रिहीस। फेर, सत्ता म आय के बाद कांग्रेस सरकार ह अपन वादा ल भूल गेहे। ओमन ह आदिवासी इलाका म धर्मांतरण के लगातार आवत मामला के बात कह के राज्य सरकार उपर धर्मांतरण ल बढ़ावा देके आरोप लगाय हे।
आज रायपुर म एक ठिन पत्रकारवार्ता म खातू के कमी के सवाल उपर  जवाब देवत भाजपा के प्रदेस प्रभारी ह किहीन कि राज्य सरकार ह केन्द्र सरकार ले खातू के ठीक तरह से मांग नइ करे हे।
एखर पहली, सुश्री डी. पुरंदेश्वरी ह पार्टी के मोर्चा प्रकोष्ठ अउ अन्य विभाग के समीक्षा करीन अउ पदाधिकारी मन ल जरूरी दिसा-निरदेस घलो दीन। ओमन पार्टी पदाधिकारी मन ले किहीन कि मुद्दा के आधार म राज्य सरकार के खिलाफ आंदोलन करे जाय।

मोहल्ला क्लास

स्कूल शिक्षा मंत्री डॉक्टर प्रेमसाय सिंह टेकाम ह सिक्षक मन ल मोहल्ला कक्षा के संचालन के समय कोरोना ले बचाव संबंधी सब्बो सुरक्षा उपाय के कड़ाई ले पालन करे के निरदेस देहे। श्री टेकाम ह काली स्कूल सिक्षा विभाग अउ यूनिसेफ के संयुक्त तत्वाधान म ‘‘कोविड महामारी के दौरान संचालित मोहल्ला कक्षाओं के लिए सुरक्षा प्रोटोकॉल‘‘ बिषय उपर राखे के वेबीनार ल संबोधित करत रिहीन।
ए मउका म यूनिसेफ के राज्य प्रमुख डॉक्टर जॉब जकारिया ह सिक्षक अउ प्रधान अध्यापक मन ल मोहल्ला कक्षा म बरते जाय वाले सुरक्षा उपाय के बारे म बिस्तार ले जानकारी दीन। उहें, स्कूल सिक्षा विभाग के सचिव डॉक्टर कमलप्रीत सिंह ह शिक्षकीय अउ गैर शिक्षिकीय स्टाफ ले वैक्सीन लगवाय के अपील करीन।

खाद/बीज-जांच

राज्य म रासायनिक खातू, बीज अउ कीटनाशक दवाई के गुणवत्ता उपर बिसेस निगरानी राखे जावत हे। एमन के गुणवत्ता के जांच प्रयोगसाला म नियमित रूप ले करे जावत हे। राज्य म अब तक बीज के बयालीस अउ रासायनिक खातू के पैंतालीस नमूना मन अमानक पाय गेहे, जेखर लाट के बिक्री उपर रोक लगाय के संगेसंग संबंधित कंपनी ल नोटिस जारी करके ओमन ले जवाब मांगे गेहे।

माओवादी-आत्मसमर्पण

सुकमा जिला म माओवादी संगठन पालाचलमा एल.ओ.एस. के कमांडर सविता ह ओड़िसा के डीजीपी के आगू मल्कानगिरी म आत्मसमर्पण कर देहे। ए महिला माओवादी उपर सुकमा जिला म आने-आने आपराधिक घटना म सामिल रेहे के आरोप हे। उंखर संग कई अउ माओवादी मनके आत्मसमर्पण करे के खबर हे।

कोरोना समाचार

प्रदेश म कोरोना संक्रमण के स्थिति म लगतार सुधार होवत हे अउ औसत पॉजीटिविटी दर गिरके शून्य दशमलव पांच प्रतिशत म आ गेहे। काली प्रदेश म कोरोना संक्रमण के दू सौ छब्बीस नवा मामला आगू आय हे। एला जोड़के प्रदेस म कोरोना मरीज के संख्या लगभग दस लाख पहुंच गेहे। एमा ले नौ लाख बयासी हजार ले जादा मरीज मन ह स्वस्थ घलो होगे हे। अभी तीन हजार आठ सौ ले जादा मरीज मनके इलाज आने-आने अस्पताल अउ होम आइसोलेशन म चलत हे।
ऐति, प्रदेश म कोरोना टीकाकरण के काम घलो जोरदरहा जारी हे। राज्य म कोरोना ले बचाव बर अब तक एक करोड़ ग्यारह लाख नौ हजार ले जादा टीका लगाय जा चुके हे।
उहें, प्रदेस के लोक स्वास्थ्य यांत्रिकी अउ ग्रामोद्योग मंत्री गुरू रूद्रकुमार ह काली रायपुर के एक ठिन निजी अस्पताल म कोरोना के टीका लगवाईस। ए मउका म ओमन ह प्रदेसवासी मन ले कोरोना ले बचाव बर अनिवार्य रूप ले टीका लगवाय के अपील करीन।

केन्द्र-राज्य टीके

केन्द्र सरकार ह किहीन हे कि राज्य, केन्द्रसासित प्रदेस अउ निजी अस्पताल के पास दू करोड़ छप्पन लाख ले जादा कोविड रोधी टीका बाचे हे। केन्द्रीय स्वास्थ्य मंत्रालय के अनुसार राज्य अउ केन्द्रसासित प्रदेस ल इकतालीस करोड़ निन्यानवे लाख ले जादा कोविड टीका के डोज उपलब्ध कराय गेहे। एखर ले अलग पन्द्रह लाख पचहत्तर हजार ले जादा डोज अउ दे जाना हे।

बीएसएफ-सम्मान

केन्द्रीय गृह मंत्री अमित शाह काली नई दिल्ली म आयोजित एक समारोह म बीएसएफ के तेईस जवान मन ल वीरता पदक ले सम्मानित करीन। एमा बारह सदस्य ल पुलिस पदक-पी.एम.जी. अउ ग्यारह सदस्य ल सराहनीय सेवा बर पुलिस पदक-पी.एम.एम.एस. ले अलंकृत करे गीस। समारोह म बीएसएफ भिलाई के डीआईजी अनिल कुमार ठाकुर ल घलो उत्कृष्ट सेवा बर पुलिस पदक ले सम्मानित करे गीस।
ए समारोह के आयोजन बछर दू हजार तीन ले हर साल बीएसएफ के पहिली महानिदेशक अउ पद्म विभूषण ले सम्मानित के.एफ. रूस्तक के जनम दिन के मौका म करे जाथे। फेर, ए साल कोरोना महामारी के सेतीर एखर आयोजन सत्रह जुलाई के करे बर पड़ीस।

दुर्घटना

महासमुंद जिला के तुमगांव के तीर आज होय एक सड़क दुर्घटना म तीन युवक मनके मउत होगे।
मिले जानकारी के अनुसार एमन मोटरसाइकिल म सवार होके पारिवारिक काम म जावत रिहीस। इही बीच तुमगांव तिराहा के पास सरायपाली कोति ले आवत एक ठो बस ह मोटरसाइकिल ल टक्कर मार दीस, जेखर ले दू युवक के मौका म ही मउत होगे। उहें, एक युवक ह इलाज के दौरान दम तोड़ दीस।
एक ठिन आने दुर्घटना म महासमुंद म चारपहिया गाड़ी ह अनियंत्रित होके दुर्घटनाग्रस्त होगे। ए घटना म उन्नीस झिन घायल होगे।  
अउ अब थोरकुन समाचार सार म-

– रायपुर के जिला रोजगार अउ स्वरोजगार मार्गदर्शन केन्द्र डहार ले काली उन्नीस जुलाई के रोजगार दफ्तर म भर्ती सिविर के आयोजन करे जाही। एमा प्राईवेट बैंक डहार ले दू सौ चालीस पद म स्नातक उम्मीदवार मनके भर्ती करे जाना हे।

– राज्य सरकार ह कृषि विकास अउ कृषि कल्याण विभाग के संयुक्त सचिव शिव अनंत तायल ल कृषि विपणन के संचालक नियुक्त करे हे।

– महासमुंद पुलिस ह हाथी दांत के तस्करी करइया एक झिन मनखे ल गिरफ्तार करके ओखर तीर ले सात नग हाथी दांत बरामद करे हे, जेखर कीमत पांच लाख रूपिया ले जादा बताय जावत हे।

अउ

– राजनांदगांव के जालबांधा पुलिस ह गांजा तस्करी के मामला म दू झिन आरोपी ल गिरफ्तार करे हे।