प्रधानमंत्री-टाॅयकैथाॅन
प्रधानमंत्री नरेन्द्र मोदी ह किहीन हे कि परंपरा अउ प्रौद्योगिकी आत्मनिर्भर भारत के ताकत हवय। खिलौना के क्षेत्र म देस के क्षमता सरलग बाढ़त हे। प्रधानमंत्री ह किहीन कि खिलाड़ी मन म अगुवई करे के गुण समेत आने-आने कौसल होना चाही।
प्रधानमंत्री ह आज टाॅयकैथाॅन के प्रतिभागी मन संग वर्चुअल माध्यम ले गोठबात करीन। एखर सुरूवात भारतीय मूल्य म आधारित नवा खिलौना बनाय बर करे गे रिहीस, जेखर ले लइका मन म बने व्यवहार आ सकय। ओमन किहीन कि खिलौना ले जुड़े व्यवसाय के बड़वार ले माईलोगिन संग देस के आदिवासी अउ गरीब संगी मन ल फायदा मिलही। फेर ए तभे होही, जब हम अपन इहां बने खिलौना ल बिसाबो।
प्रधानमंत्री ह योग के महत्ता ल बतावत किहीन कि नवा किसम के ए खिलौना योग ल अउ बढ़ावा दीही।
टाॅयकैथाॅन पांच जनवरी दू हजार इक्कीस ले सुरू होय रिहीस। प्रतियोगिता बर एक लाख बीस हजार प्रतिभागी मन ह पंजीयन कराय हे अउ सत्रह हजार ले जादा झन अपन बिचार बतईन।
जावड़ेकर-एआईआर/डीडी
केन्द्रीय सूचना अउ प्रसारण मंत्री प्रकाश जावड़ेकर ह आकाशवाणी अउ दूरदर्शन ले प्रसारित होवइया समाचार म सुनइया मनके भरोसा करे म खुसी जताईन हे। राॅयटर्स इंस्टीट्यूट फाॅर द स्टडी आॅफ जर्नलिज्म के डिजिटल रिपोर्ट दू हजार इक्कीस के मुताबिक लोक सेवा प्रसारक, आकाशवाणी अउ दूरदर्शन समाचार के संगेसंग प्रिंट मीडिया ह श्रोता अउ पाठक के भरोसा बनाय राखे हे।
प्रसार भारती के मुख्य कार्यकारी अधिकारी शशि शेखर वेमपटि ह प्रसार भारती के आकाशवाणी अउ दूरदर्शन के पांच सौ ले जादा इकाई म इलेक्ट्राॅनिक रूप म पूरा काम करइया करमचारी मन ल बधाई दीन हे।
टीकाकरण/कोरोना समाचार
केन्द्रीय स्वास्थ्य मंत्रालय ह केहे हे कि राज्य अउ केन्द्रसासित प्रदेस तीर अभी एक करोड़ नवासी लाख कोविड वैक्सीन मौजूद हवय। केन्द्र सरकार ह अब तक तीस करोड़ तैंतीस लाख ले जादा वैक्सीन राज्य अउ केन्द्रसासित प्रदेस ल दे हवय। संगेसंग अवइया तीन दिन म इक्कीस लाख पांच हजार ले जादा टीका देवाय जाही।
ऐति, छत्तीसगढ़ म काली एक लाख अंठावन हजार ले जादा पात्र लोगन ल कोविड वैक्सीन लगाय गीस। एखर बार राज्य म तीन हजार आठ सौ सैंतालीस केन्द्र बनाय गे रिहीस। प्रदेस म अट्ठारह बछर ले जादा आयु वरग म करीबन उनयासी लाख छियासी हजार ले जादा ल कोरोना टीका लग गेहे।
महासमुंद जिला म बरसा होवत म घलो लोगन टीका लगवाय बर आत रिहीन। काली नौ हजार पांच सौ सड़सठ लोगन ल टीका लगीस।
इही बीच, रईपुर कलेक्टर सौरभ कुमार ह जिला म टीकाकरण अभियान ल बढ़ावा दे बर अड़सठ झिन कलस्टर प्रभारी नियुक्त करे हे।
ओति, प्रदेस म कोरोना संक्रमण के दर घटके एक दशमलव एक प्रतिशत होगे हे। प्रदेस म काली कोरोना संक्रमण के चार सौ इक्कीस नवा मामला आगू आईस। एला मिलाके प्रदेस म अब तक नौ लाख बयानवे हजार ले जादा लोगन कोरोना संक्रमित होय हे। अभी सात हजार ले जादा झन के इलाज आने-आने अस्पताल म होवत हे।
इही बीच, मुख्यमंत्री भूपेश बघेल पड़ोसी राज्य मध्यप्रदेश अउ महाराष्ट्र म कोरोना वायरस के डेल्टा प्लस वैरियंट के बाढ़त मामला ल देखत प्रदेस के लोगन ल सतर्क रेहे बर चेताय हे। संगेसंग अंतर्राज्यीय सीमा म अवइया-जवइया उपर नजर राखे के निरदेस दीन।
मुख्यमंत्री-खाद आपूर्ति
मुख्यमंत्री भूपेश बघेल ह खातू कंपनी मन ल राज्य के कोटा के मुताबिक यूरिया अउ डी.ए.पी. खाद के आपूर्ति करे के निरदेस दीन हे। ओमन तय आपूर्ति नइ होय म जमाखोरी के सिकईत म तुरते कार्रवाई करे के निरदेस दीन हे।
ऐति, मुख्यमंत्री के निरदेस के बाद अधिकारी मन कोति ले रसायनिक खातू, बीजा अउ कीटनाशक दवई के गुणवत्ता म निगरानी राखे जात हे। जिला स्तर के अधिकारी अपन-अपन क्षेत्र म बीजा, खातू अउ कीटनाशक दवई के सैम्पल लेवत हे अउ ओखर जांच प्रयोगसाला म करे जात हे।
मुख्यमंत्री-योजना क्रियान्वयन
मुख्यमंत्री भूपेश बघेल अवइया पन्द्रह दिन तक राज्य सरकार के सबले जादा प्राथमिकता वाले योजना खातिर समीक्षा बइठका लीही। एखर सुरूवात काली पच्चीस जून ले होही। ए बइठका म नामांतरण, बटवारा, सीमांकन अउ अबूझमाड़ म दे जात पट्टा के समीक्षा करे जाही।
अइसने, छब्बीस जून के गोधन न्याय योजना, सुराजी गांव, वृक्षारोपण समेत राजीव गांधी किसान न्याय योजना, लघु वनोपज, फलदार अउ औषधि पौधा लगाय के संगेसंग रद्दा तीर वृक्षारोपण योजना के समीक्षा करे जाही।
उहें, मुख्यमंत्री अट्ठाईस जून के खनिज अउ उनतीस जून के ऊर्जा विभाग के समीक्षा करही। तीस तारीख के मुख्यमंत्री ह मनरेगा म रोजगार, सिंचई क्षमता म बढ़वार, गौठान, आजीविका केन्द्र अउ नरवा विकास के प्रभाव के संबंध म बइठका लीहीं।
मुख्यमंत्री एक जुलाई के स्वास्थ्य विभाग के संगेसंग गृह, खाद्य, पेयजल, सिंचई, पर्यटन, शिक्षा, महिला अउ बाल विकास ले जुड़े कामकाज ल देखही। ए जम्मों बइठका म विभागीय मंत्री समेत अधिकारी सामिल होही।
कबीर जयंती/रानी दुर्गावती बलिदान दिवस
आज संत कबीरदास जी के जयंती हे। ए मउका म मुख्यमंत्री भूपेश बघेल ह किहीन कि संत कबीर प्रेम, मानवता अउ समाज सुधारक रिहीन। आज अपन रईपुर स्थित निवास कार्यालय म राखे गे वर्चुअल कारीकरम म बोलत ओमन किहीन कि छत्तीसगढ़ के लोगन म संत कबीर अउ बाबा गुरू घासीदास के संदेस के प्रभाव हवय।
मुख्यमंत्री ह कारीकरम म रईपुर के कुशाभाऊ ठाकरे पत्रकारिता अउ जनसंचार विश्वविद्यालय के प्रशासनिक भवन के गेट के नामकरण संत करीब के नाव म करे के घोसना करीन अउ कबीर द्वार के सिलान्यास करीन। संगेसंग ‘‘संत कबीर का छत्तीसगढ़‘‘ किताब के विमोचन घलो करीन।
उहें, मुख्यमंत्री ह रानी दुर्गावती के बलिदान दिवस म आज अपन निवास कार्यालय म उंखर चित्र म फूल-माला चढ़ाके सुरता करीन। मुख्यमंत्री ह किहीन कि रानी दुर्गावती के साहस अउ बलिदान देसवासी मन ल प्रेरणा देवत रिहीस।
साय-बयान
भारतीय जनता पार्टी के प्रदेश अध्यक्ष विष्णुदेव साय ह किहीन कि डाॅक्टर श्यामाप्रसाद मुखर्जी के पुण्यतिथि ले सुरू होय वृक्षारोपण के कारीकरम अवइया छह जुलाई तक चलही। राजनांदगांव म पत्रकार मन ले गोठबात करत ओमन बतईन कि प्रदेस म हरयाली राखे बर भाजपा कोति ले वृक्षारोपण अभियान चलाय जात हे। ओमन किहीन कि राष्ट्र के एकता बर डाॅक्टर मुखर्जी के योगदान कभू भुलाय नइ जा सकय।
खबर के मुताबिक छह जुलाई के डाॅक्टर श्यामाप्रसाद मुखर्जी के जयंती हवय।
ट्रेन सुविधा
यात्री मनके सुभीता ल देखत दक्षिण-पूर्व मध्य रेलवे कोति ले अवइया चार जुलाई ले दुर्ग-अजमेर-दुर्ग स्पेशल ट्रेन सुरू करे जात हे। जउन चार जुलाई ले हरेक इतवार के रवाना होही। उहें, अजमेर-दुर्ग स्पेशल ट्रेन पांच जुलाई ले हरेक सम्मार के चलाय जाही। ए बेरा म गाड़ी छत्तीसगढ़ के दुरूग, रईपुर, भाटापारा, उसलापुर अउ पेण्ड्रा रोड स्टेशन म रूकही।
उहें, रेलवे डहार ले एल.टी.टी. हावड़ा ल दू जुलाई ले तीस अक्टूबर अउ हावडा़ एल.टी.टी. ल चार जुलाई ले एक नवंबर तक चलाय जाही।
अउ अब थोरकुन समाचार सार म-
– सूरजपुर वनमंडल म काम म कोताही बरते के आरोप म तीन झिन अधिकारी मन अटैच करे अउ दू झिन करमचारी मनके निलंबन के कार्रवाई करे गेहे।
– राजनांदगांव जिला म डोंगरगढ़ क्षेत्र के ढेलकाडीह म नवा थाना के उद्घाटन करे गीस।
– रायगढ़ जिला के एक प्राईवेट प्लांट म होय हादसा म घायल होय एक मनखे के आज इलाज के बेरा मउत होगे। उहें, चार झिन आने मनखे ल बने इलाज बर एयर एम्बुलेंस ले मुंबई भेजे गेहे।
– कोंडगांव जिला म वन विभाग के उड़नदस्ता टीम ह पाछु संझा सागौन तस्करी के आरोप म एक मनखे ल गिरफ्तार करे हे। संगेसंग एक गाड़ी समेत डेढ़ लाख रूपिया कीमत के लकड़ी घलो जब्त करे गीस।
अउ
– महासमुंद जिला के सांकरा म गांजा तस्करी के आरोपी म दू झिन मनखे ल गिरफ्तार करे गेहे। इंखर तीर ले दस किलो गांजा बरामद करे गेहे।