अंतर्राष्ट्रीय योग दिवस-प्रधानमंत्री
प्रधानमंत्री नरेन्द्र मोदी ह काली सातवां अंतर्राष्ट्रीय योग दिवस समारोह के मुख्य कारीकरम ल संबोधित करही। कोविड महामारी ल देखत एखर प्रसारण बिहनिया साढ़े छह बजे ले दूरदर्शन के सबो चैनल मन ले होही। कारीकरम म राज्यमंत्री किरन रिजिजू घलो बोलही। एखर बाद पन्द्रह झिन आध्यात्मिक अउ योग गुरू मन डहार ले संदेस दे जाही, जेमा गुरूदेव श्री श्री रविशंकर, सद्गुरू जग्गी वासुदेव सामिल रइही।
अंतर्राष्ट्रीय योग दिवस दू हजार इक्कीस के मुख्य बिसय – ‘‘स्वास्थ्य के लिए योग‘‘ हवय। विदेस मन म घलो कई ठिन कारीकरम होही। जानकारी मुताबिक योग दिवस ल विश्वभर के करीबन एक सौ नब्बे देस म मनाय जाही।
इही भीतर, संस्कृति मंत्रालय ह एला ‘‘योग एक भारतीय विरासत‘‘ के चलत मनाही।
उहें, योग दिवस ल देसभर के उच्च शिक्षा संस्थान मन म घलो मनाय जाही।
योग दिवस-छत्तीसगढ़
छत्तीसगढ़ म घलो अंतर्राष्ट्रीय योग दिवस के मउका म ‘‘योग करबो-स्वस्थ रहिबो‘‘ के भाव ले लाखों मनखे मन काली बिहनिया पौने सात बजे ले वर्चुअल योगा अभ्यास यानि आॅनलाइन माध्यम ले सामिल होही, जेमा मुख्यमंत्री भूपेश बघेल, मंत्री गण, विधायक, जनप्रतिनिधि अउ अधिकारी-करमचारी मन घलो वर्चुअल रूप ले योग करही।
उहें, ए मउका म काली राज्य म छत्तीसगढ़ वर्चुअल योग मैराथन राखे जाही। एमा सामिल होय बर अब तक नौ लाख ले जादा मनखे मन आॅनलाइन एंट्री कराय हे। फेर, एखर बर भाग लेवइया मन आज रतिहा बारह बजे तक आॅनलाइन एंट्री करा सकत हे। ए मैराथन ल काली बिहनिया पौने सात बजे ले बाईस जून के बिहनिया सात बजे तक सरलग समाज कल्याण विभाग अउ छत्तीसगढ़ योग आयोग के सोसल मीडिया म प्रसारित करे जाही।
कोविड-टीका
केन्द्र सरकार डहार ले काली ले राज्य अउ केन्द्रसासित प्रदेस मन ल कुल कोविड वैक्सीन उत्पादन के पचहत्तर प्रतिशत मुफत हिस्सा दे जाही। ए वैक्सीन ह अट्ठारह बछर अउ ओखर ले जादा उमर के सबो झन बर होही। एखर उद्देश्य म कोविड टीकाचकरण अभियान ल मजबूती देना अउ आगे बढ़ाना हे।
इहां ए बतादन कि प्रधानमंत्री नरेन्द्र मोदी ह बीते सात जून के राष्ट्र ल संबोधित करत ए घोसना करे रिहीन। केन्द्र के ए नीति सुरू होय के बाद राज्य मन ल वैक्सीन बिसाय बर नइ पड़य। केन्द्र सरकारें ह एखर सारा खरचा उठाही।
इही बीच, केन्द्रीय अल्पसंख्यक कार्यमंत्री मुख्तार अब्बास नकवी ह किहीन हे कि देसभर म गंवई अउ दूरिहा इलाका मन म कोरोना टीकाकरण के जागरूकता बर काली ले राष्ट्रव्यापी अभियान ‘‘जान है तो जहान है‘‘ शुरू करे जाही।
मुख्यमंत्री-लोकार्पण
मुख्यमंत्री भूपेश बघेल ह आज वर्चुअल कारीकरम म कोंडागांव अउ दंतेवाड़ा जिला म करीबन पांच सौ पैंतालीस करोड़ रूपिया के लागत वाले कई ठिन विकास काम के लोकार्पण अउ भूमिपूजन करीन। कारीकरम म मुख्यमंत्री ह आने-आने योजना के हितग्राही मन ले गोठबात घलो करीन।
अमृत महोत्सव-योग दिवस
भारत के आजादी के पचहत्तरवां बर्षगांठ के मउका म आजादी के अमृत महोत्सव अउ अंतर्राष्ट्रीय योग दिवस बेरा म काली जांजगीर-चांपा जिला के ग्राम पंचायत म स्वास्थ्य जागरूकता सिविर अउ योग दिवस मनाय जाही। ए ह महात्मा गांधी राष्ट्रीय ग्रामीण रोजगार गारंटी योजना-मनरेगा के माध्यम ले कोरोना ले बचइया नियम ल मानत होही। ए दउरान टीकाकरण के भरम ल दूरिहाय अउ टीका लगाय बर प्रेरित करे जाही। संगे योग अभ्यास घलो होही, जेमा गंवई के मनखे, किसान, मनरेगा म कमइया अउ महिला स्व-सहायता समूह के सदस्य मन रइही।
रेणुका सिंह-रेल मंत्री पत्र
केन्द्रीय राज्यमंत्री अउ सरगुजा सांसद रेणुका सिंह ह कोरबा-अंबिकापुर-रेनुकोट रेल लाइन विस्तार बर रेल मंत्री पीयूष गोयल ल पाती पठो के एखर बर मंजूरी देके आग्रह करीन। अपन पाती म ओमन किहीन कि ए रेलवाही ह सरगुजा समेत छत्तीसगढ़ अउ तीर-तखार के राज्य मन बर वरदान बनही। सांसद श्रीमती सिंह ह कोरबा ले अंबिकापुर होवत रेनुकोट रेलवाही ल जतका जल्दी हो सकय मंजूरी खातिर अनुरोध करीन।
हमर ग्राम सभा
पंचायत अउ ग्रामीण विकास मंत्री टी.एस. सिंहदेव ह आज रतिहा साढ़े सात बजे आकाशवाणी रायपुर ले प्रसारित बिसेस कारीकरम ‘‘हमर ग्राम सभा‘‘ म राज्य सासन के जम्मों नीति, योजना अउ कारीकरम बारे म जानकारी दीही। एला मीडियम वेव नौ सौ इक्यासी किलोहर्ट्ज म सुने जा सकत हे, जेला प्रदेस स्थित आकाशवाणी के सबो केन्द्र ले एके संघरा रिले करे जाही।
मुख्यमंत्री-आदिवासी समाज
मुख्यमंत्री भूपेश बघेल ह सर्व आदिवासी समाज ले अपील करे हे कि ओमन सरकारी योजना के लाभ ले छूटे आदिवासी मन ल उंखर कब्जा वाले जमीन के पट्टा देवाय म सरकार के संग देवय। श्री बघेल ह किहीन हे कि जब आदिवासी मन ल जमीन के पट्टा मिलही, जेमा ओमन काबिज हे, तब ओमन ल घलो सरकारी योजना मनके फायदा मिलही। मुख्यमंत्री ह काली संझा अपन निवास कार्यालय म सर्व आदिवासी समाज के प्रतिनिधिमंडल मन ले गोठबात बेरा ए बात किहीन।
माओवादी-मुठभेड़
नारायणपुर जिला म सुरक्षा बल मन संग होय मुठभेड़ म दू झिन माओवादी मारे गीस। ए मुठभेड़ ओ बेरा होईस, जब इतुर के जंगल म गश्ती दउरान सुरक्षा बल मन उपर माओवादी मन फायरिंग सुरू कर दीस। उहें, सुरक्षा बल के जवान मन जब कार्रवाई बाद लहुटत रिहीन, तभो माओवादी मन कोरोवाया के जंगल म एम्बुस लगाके फेर एक बाद जवान मन उपर गोलीबारी सुरू कर दीस। जवान मन डहार ले होय जवाबी कार्रवाई बाद माओवादी मन जंगल डहार भगा गे।
बारहवीं-उत्तर-पुस्तिका जांच
छत्तीसगढ़ माध्यमिक शिक्षा मंडल डहार ले बारहवीं के उत्तर-पुस्तिका ल जांच के काम सुरू कर दे गेहे। ए बार मंडल ह फइसला लेहे कि विद्यार्थी मनके उत्तर-पुस्तिका मूल्यांकन बर दूसर जिला नइ पठोय जाही अउ पेपर जचइया मन घरे ले उत्तर-पुस्तिका जाचही।
इहां ए बतादन कि कोरोना संक्रमण ल देखत ए बखत मंडल डहार ले बारहवीं के विद्यार्थी मन ल प्रश्न के उत्तर घरे म रहि के हल करे के छूट दे गे रिहीस हे।
कोरोना समाचार
प्रदेस म कोरोना संक्रमण के मामला ह सरलग कमती होवत हे। राज्य म संक्रमण दर एक दशमलव एक प्रतिशत होगे हे। उहें, प्रदेस म काली कोरोना संक्रमण के चार सौ उनयासी झिन नवा मरीज मिले हे। ए बेरा राज्य म करीबन साढ़े नौ हजार सक्रिय मरीज हे। प्रदेस म कई ठन ऐसे जिला ले जिहां संक्रमण दर एकदम कम होगे हे। मुंगेली जिला म काली कोरोना संक्रमण के एक भी मामला आगू नइ आय हे।
मलेरिया मुक्त बस्तर अभियान
मलेरिया मुक्त बस्तर अभियान के सफलता ल देखत प्रदेस म ए अभियान ल एक्कईस (21) जिला मन म बगराय जाही। ए अभियान ले मलेरिया सिराय के संगे एनीमिया यानि खून के कमी अउ कुपोषण ल घलो सिरोय अउ शिशु अउ मातृ मृत्यु दर कमतियाय म मदद मिलही। ए अभियान म करीबन बीस लाख उनतीस हजार मनखे मनके मलेरिया जांच होही।
रोका-छेका अभियान
किसान मनके फसल ल मवेसी मन ले बचाय बर ए बछर घलो रोका-छेका कारीकरम चलाय जाही। ग्राम पंचायत, सरपंच, पंच अउ जनप्रतिनिधि मन ले ए बारे म गांव स्तर म बइठका राख के बेवस्था तय करे बर केहे गेहे। रोका-छेका कारीकरम म फलस बुआई ल बढ़ावा दे बर अउ मवेसी मन ले फसल ल होवइया नकसान ले बचाय बर ए मन बांध के राखे के संगे चरवाहा राखे जाही।