कोरोना टीकाकरण
कोरोना संक्रमण से बचाव बर अब इक्कीस जून ले सब्बो वर्ग मन बर कोरोना के टीका केन्द्र सरकार डहार ले निःशुल्क प्रदान करे जाही। टीकाकरण बर केन्द्र सरकार के गाईडलाइन के अनुसार प्रदान करे जावत सब्बो टीका मनके प्राथमिकता क्रम निर्धारित करे गेहे। एखर तहत स्वास्थ्यकर्मी, फ्रंटलाइन वर्कर, पैंतालीस बछर ले जादा आयु वर्ग के नागरिक अउ अइसन लोगन जउन ल दूसरइया डोज लगाय के समय आ गेहे, उंखर प्राथमिकता से टीकाकरण करे जाही। अट्ठारह बछर ले जादा आयु वर्ग के लोगन मनके टीकाकरण बर केन्द्र सरकार ह प्राथमिकता क्रम निर्धारित करे के छूट राज्य सरकार ल देहे। छत्तीसगढ़ म अट्ठारह ले चवालीस बछर आयु वर्ग म अलग-अलग श्रेणी बर टीकाकरण के निर्धारित प्रतिशत यथावत लागू रइही। इक्कीस जून ले सब्बो आयु वर्ग के लोगन मन ल टीकाकरण को-विन पोर्टल से ही करे जाही।
इही बीच, छत्तीसगढ़ म अब तक चैहत्तर लाख तिरासी हजार ले जादा कोरोना वैक्सीन के डोज लगाय जा चुके हे। उहें, अट्ठारह ले चवालीस बछर आयु वर्ग म अब तक करीब दस लाख संतानवे हजार ले जादा लाभार्थी मन ल पहला टीका अउ अट्ठाईस हजार ले जादा लाभार्थी मन ल दूसरा टीका लगाय जा चुके हे।
ऐति, प्रदेस म कोरोना संक्रमण के मामला म लगातार कमी आवत हे। राज्य म संक्रमण के दर एक दशमलव एक प्रतिशत होगे हे। प्रदेस म काली कोरोना संक्रमण के पांच सौ नौ नवा मरीज मिले हे। वर्तमान म राज्य म सक्रिय मरीज मनके संख्या लगभग दस हजार हे।
मुख्यमंत्री-लोकार्पण/भूमिपूजन
मुख्यमंत्री भूपेश बघेल ह आज वर्चुअल कार्यक्रम म कांकेर अउ नारायणपुर जिला बर करीब दू सौ बाईस करोड़ रूपिया लागत के अलग-अलग विकास कार्य मनके लोकार्पण अउ भूमिपूजन करीन। एमा कांकेर जिला बर एक सौ बावन करोड़ रूपिया लागत के एक सौ पैंतालीस विकास कार्य सामिल हे। उहें, मुख्यमंत्री ह नारायणपुर जिला म लगभग सत्तर करोड़ रूपिया के लागत के एक सौ तीस निर्माण कार्य मनके लोकार्पण अउ भूमिपूजन करीन।
ये अवसर म मुख्यमंत्री ह राज्य सासन के अलग-अलग योजना मनके लाभार्थी मन से सीधा संवाद करीन।
अंतर्राष्ट्रीय योग दिवस
सोमवार के अंतर्राष्ट्रीय योग दिवस मनाय जाही। एखर पहली देसभर म कई कार्यक्रम मनके आयोजन करे जात हे। संयुक्त राष्ट्र महासभा ग्यारह दिसंबर दो हजार चैदह के प्रस्ताव पारित कर हर साल इक्कीस जून के अंतर्राष्ट्रीय योग दिवस मनाय के घोसना करे रिहीस हे। बर्ष दो हजार पन्द्रह ले ये दिवस ल पूरा विश्व म आयोजित करे जाथे।
इहू साल कोविड महामारी ल देखत हुए ज्यादातर जगह मन म कार्यक्रम के आयोजन वर्चुअल माध्यम ले होही। ए साल के योग दिवस के विषय आय – ‘‘योग के साथ रहे, घर पर रहें‘‘।
वर्चुअल योग मैराथन
अंतर्राष्ट्रीय योग दिवस के अवसर म इक्कीस जून के छत्तीसगढ़ वर्चुअल योग मैराथन के आयोजन करे जाही। मैराथन म सामिल होय बर अब तक आठ लाख पन्द्रह हजार ले जादा लोगन मन आॅनलाइन पंजीयन कराय हे। मैराथन म हिस्सा ले बर प्रतिभागी मन आज रात बारह बजे तक आॅनलाइन पंजीयन करा सकत हे। मैराथन म सब्बो पंजीयनकर्ता मन ल डिजिटल प्रमाण पत्र प्रदान करे जाही। संगेसंग सब्बो जिला के प्रथम पंजीयनकर्ता मन ल टी-सर्ट घलो दे जाही। मैराथन म हिस्सा लेवइया आवेदक मन ल योगासन करत हुए अपन फोटो या वीडियो सोशल मीडिया एकाउंट म हैशटैग के साथ सेयर करे लागही। एखर अलावा प्रतिभागी मन अपन फोटो या वीडियो मेल घलो कर सकत हे।
पीएससी-मुख्य परीक्षा
छत्तीसगढ़ लोक सेवा आयोग ह मुख्य परीक्षा के तिथि घोषित कर देहे। आयोग के मुताबिक राज्य सेवा मुख्य परीक्षा दू हजार बीस के परीक्षा ल छब्बीस, सत्ताईस, अट्ठाईस अउ उनतीस जुलाई के प्रदेस के अलग-अलग जिला म आयोजित करे जाही। ए परीक्षा दू पाली म होही।
सीबीएसई-परीक्षा परिणाम
केन्द्रीय माध्यमिक शिक्षा बोर्ड-सी.बी.एस.ई. ह अपन मान्यता प्राप्त विद्यालय मन ल सूचित करे हे कि बारहवीं के परीक्षा परिणाम तैयार करे बर एक सूचना प्रौद्योगिक प्रणाली तैयार करे जात हे, जउन ह सबो विद्यालय मन ल उपलब्ध कराय जाही। एखर ले परीक्षा परिणाम संबंधी गणना आसान हो जही। समय के बचत होही अउ अन्य बाधा मन घलो दूर होही। ए प्रणाली ले सी.बी.एस.ई. से उत्तीर्ण दसवीं के विद्यार्थी मनके अंक के डेटाबेस घलो तैयार करे जाही। दूसर बोर्ड मनके दसवीं के परीक्षा के डेटा लेके प्रयास घलो करे जाही।
गौरतलब है कि सीबीएसई ह गुरूवार के बारहवीं के बोर्ड परीक्षा के अंक के गणना के नीति जारी करे रिहीस हे।
पढ़ई तुंहर दुआर/पढ़ना लिखना अभियान
छत्तीसगढ़ म स्कूल शिक्षा विभाग के अंतर्गत शिक्षा सत्र दू हजार इक्कीस-बाईस म घलो ‘‘पढ़ई तुंहर दुआर‘‘ कारीकरम के माध्यम ले लइका मनके आॅनलाइन पढ़ाई जारी राखे जाही। स्कूल शिक्षा विभाग ह ए संबंध म सब्बो जिला अधिकारी मन ल ये निर्देश जारी कर देहे।
एखर अलावा मोहल्ला क्लास, लाउड स्पीकर क्लास आदि के माध्यम ले लइका मन ल पढ़ाई से जोड़े जाही।
उहें, पढ़ना-लिखना अभियान के अंतर्गत लइका मनके संगेसंग पालक मन ल घलो बुनियादी साक्षरता प्रदान करके शिक्षा के मुख्यधारा म जोड़े जाही। पहली चरण म अशिक्षित पालक मन ल शिक्षित करे जाही। एखर तहत बालक अउ पालक दूनांें मोहल्ला क्लास म पढ़ही।
इही बीच, स्कूल शिक्षा मंत्री डाॅक्टर प्रेमसाय सिंह टेकाम ह वीडियो कान्फ्रेंसिंग के माध्यम ले कक्षा पहली ले आठवीं तक के लइका मन ल उंखर वर्तमान कक्षा के अनुरूप दक्षता सुधारे बर तैयार करे गे ‘‘सेतु‘‘ अभियान के सुरूवात करीन। एखर उद्देश्य एक माह म कक्षा पहली ले आठवीं तक के सबो लइका मन म पाठ्य विषय के बुनियादी दक्षता मनके विकास करना आय।
कोरोना-आर्थिक सहायता
कोरोना महामारी से परिवार के मुखिया के मृत्यु होय के सेती जीवन यापन म कठिनाई के सामना करत अनुसूचित जाति अउ पिछड़ा वर्ग के परिवार मन ल आर्थिक सहायता प्रदान करे जाही। एखर बर छत्तीसगढ़ राज्य अंत्यव्यसायी सहाकारी वित्त विकास निगम डहार ले ‘‘आशा अउ इस्माइल‘‘ नाम से योजना सुरू करे गेहे। योजना के लाभ ले बर जांजगीर-चांपा जिला अंत्यवसायी सहकारी कार्यालय म अट्ठाईस जून तक आवेदन जमा करे जा सकत हे।
उहें, रायपुर कलेक्टर स्थित जिला अंत्यवसायी सहकारी कार्यालय म घलो इच्छुक आवेदक मन दू जुलाई तक आवेदन जमा सकत हे।
सुशासन-रायपुर
छत्तीसगढ़ के राजधानी रायपुर ल सुशासन म दूसरइया स्थान मिले हे। उहें, रायपुर देश के टाॅप दस रहइया योग्य राजधानी मन म आठवां स्थान म हे।
सेंटर फाॅर र्साइंंस एंड एनवायरमेंट डहार ले ईज आॅफ लिविंग इंडेक्स दू हजार बीस जारी करे गेहे। ये रिपोर्ट म बताय गेहे कि राज्य के राजधानी मन ह देस के सबले जादा रहइया योग्य सहर में से एक हे। रिपोर्ट के अनुसार छत्तीसगढ़ के राजधानी रायपुर ह आठवां सर्वश्रेष्ठ राजधानी म सामिल हे। अइसने, रायपुर गुड गर्वनेंस के टाॅप सहर मन म घलो सामिल हे। रिपोर्ट म बताय गेहे कि सुशासन म रायपुर देस के राजधानी मन म दूसरइया स्थान म हे। पहला स्थान म भोपाल अउ दिल्ली ह चैथा स्थान प्राप्त करे हे।
मिल्खा सिंह-निधन
फ्लाइंग सिख के नाम से विख्यात अउ पद्मश्री से सम्मानित महान भारतीय धावक मिल्खा सिंह के काली रात निधन होगे। ओमन इंक्यानवे बछर के रिहीस हे अउ पाछु एक महीना ले कोविड ले संक्रमित रिहीन हे। मोहाली के फोर्टिस अस्पताल म उपचार के बाद ओमन ल इही महीना के तीन तारीख के चंडीगढ़ के चिकित्सा, सिक्षा अउ अनुसंधान संस्थान अस्पताल म भर्ती कराय गे रिहीस हे।
राष्ट्रपति रामनाथ कोविंद, उपराष्ट्रपति एम. वेंकैया नायडू, प्रधानमंत्री नरेन्द्र मोदी अउ छत्तीसगढ़ के मुख्यमंत्री भूपेश बघेल ह मिल्खा सिंह के निधन उपर सोक व्यक्त करीन।
टास्क फोर्स-बैठक
स्वास्थ्य, पोषण अउ खाद्य सुरक्षा के संबंध म राज्य योजना ल सुझाव दे बर गठित टास्क फोर्स के बैठक म सदस्य मन ल कई महत्वपूर्ण सुझाव दे गीस। बैठक म टास्क फोर्स के अध्यक्ष राजेश तिवारी ह किहीन कि राज्य सरकार के कल्याणकारी योजना मनके क्रियान्वयन अउ व्यवहारिक सुझाव दे बर चैदह टास्क फोर्स गठित करे गेहे। श्री तिवारी ह बतईन कि टास्क फोर्स के अंतर्गत गठित वर्किंग ग्रुप डहार ले विचार-विमर्श के बाद जो सुझाव प्राप्त होय हे, ओला आयोग के समक्ष प्रस्तुत करे जाही।
बैठक म सदस्य बिराज पटनायक ह कोरोना संक्रमण के संभावित तीसरइया लहर से निपटे बर स्वास्थ्य सेवा मन ल सुदृढ़ करे बर आवश्यक कदम उठाय के सलाह दीन। सदस्य डाॅक्टर दिनेश मिश्रा ह स्वास्थ्य क्षेत्र म जिलेवार कार्यक्रम बनाय अउ तहसील स्तर म ब्लड बैंक के संचालन उपर जोर दीन। उहें, डाॅक्टर राकेश गुप्ता ह स्वास्थ्य क्षेत्र ल मजबूत बनाय बर अधोसंरचना, मानव संसाधन अउ तकनीकी दक्षता ल प्राथमिकता से पूरा करे के सलाह दीन।
साल बीज
प्रदेश म ए बछर अब तक तैंतीस हजार क्विंटल साल बीज के संग्रहण करे जा चुके हे। सुरूआती दौर म ही वनमंडल धमतरी अउ गरियाबंद जिला ह साल बीज संग्रहण के लक्ष्य ल प्राप्त कर लेहे। राज्य लघु वनोपज संघ के अपर प्रबंध संचालक संजय शुक्ला ह बतईन कि साल बीज संग्रहण बर वर्तमान म प्रति किलोग्राम बीस रूपिया के दर निर्धारित करे गेहे।
अउ पेश हे मौसम के हाल..
प्रदेस म आगामी चैबीस घंटा के दौरान कई जगह म हल्का ले मध्यम वर्षा होय के संभावना हे। उहें, एक-दू स्थान म गरज-चमक के संग आकाशीय बिजली गिरे के घलो चेतावनी दे गेहे।
मौसम विभाग के मुताबिक निम्न दाब के क्षेत्र दक्षिण पूर्व उत्तरप्रदेश अउ ओखर आसपास हे। एक द्रोणिका पश्चिम राजस्थान ले उत्तर-पूर्व बंगाल के खाड़ी तक बने हुए हे। एखर प्रभाव ले छत्तीसगढ़ म घलो कई जगह म हल्का ले मध्यम बारिस होवत हे। बीते चैबीस घंटा के दौरान राजधानी रायपुर सहित प्रदेश के कई हिस्सा म हल्का ले मध्यम बारिस दर्ज करे गेहे।
अउ अब थोरकुन समाचार सार म-
– दंतेवाड़ा जिला के अरनपुर थाना क्षेत्र म सुरक्षा बल ह एक इनामी सहित दू माओवादी मन ल गिरफ्तार करे हे। एखर मन करा भरमार बंदूक अउ डेटोनेटर बरामद करे गेहे।
– जिला रोजगार अउ स्व-रोजगार मार्गदर्शन केन्द्र रायपुर डहार ले ग्राम राखी म संचालित रोजगार कार्यालय के एक्सटेंशन काउंटर अब हर सुक्रवार के बिहनिया साढ़े दस बजे ले संझा साढ़े पांच बजे तक खोले जाही।
अउ
– कोंडागांव जिला के ग्राम जोबा अउ सुकुरपाल के तीर कार अउ मोटर साइकिल के बीच होय टक्कर म दू झिन के मउत होगे। उहें, चार अन्य लोगन मन घायल होगे।