आज दिनभर के खबर ल अपन गुरतुर छत्तीसगढ़ी भाखा म पढ़व

न्युमोकोकल कंजुगेट वैक्सीन

छत्तीसगढ़ म नियमित टीकाकरण कार्यक्रम के अंतर्गत लइका मन ल अब न्युमोकोकल कंजुगेट वैक्सीन मुफ्त म लगाय जाही। ए टीका लइका मन ल न्युमोकोकल बैक्टीरिया ले होवइया निमोनिया, मस्तिष्क ज्वर, सेप्टीसिनिया, साइनोसाइटिस, ओटाइटिस जइसे कतको बीमारी मन ले बचाही। नान्हें लइका मन ल छह सप्ताह, सात सप्ताह अउ नौ महीना के उमर म तीन खुराक दे जाही।
स्वास्थ्य मंत्री टी.एस. सिंहदेव ह आज एक वर्चुअल कार्यक्रम म ए टीकाकरण अभियान के सुरूवात करीन। ए मउका म ओमन किहीन कि ए वैक्सीन ले पांच साल तक के लइका मन ल न्युमोकोकल बैक्टीरिया ले होवइया बीमारी मन ले बचाय जा सकथे। एखर ले प्रदेस म मृत्यु दर ल कम करे म मदद मिलही।

कोरोना टीका

छत्तीसगढ़ म ए साल जनवरी ले लेके अब तक केन्द्र सरकार ले 82 लाख 59 हजार ले जादा कोरोना टीका के डोज मिले हे। एमा कोविशील्ड के 75 लाख 92 हजार ले जादा डोज अउ को-वैक्सीन के 6 लाख 66 हजार ले जादा डोज सामिल हवय।
प्रदेश म 18 ले 44 साल के लोगन मन बर अब तक करीब साढ़े 11 लाख डोज मिले हे। ए आयु वर्ग म अब तक 9 लाख 33 हजार ले जादा लोगन मन ल पहली डोज अउ साढे़ 23 हजार ले जादा लोगन मन ल कोरोना रोधी टीका के दूसर डोज लगाय जा चुके हे।
ऐति, राजनांदगांव के जिला विधिक सेवा प्राधिकरण न्यायालय परिसर म बीते दिन न्यायिक अधिकारी-कर्मचारी, अधिवक्ता अउ उंखर परिजन मनके टीकाकरण करे गीस। ए मउका म जिला अउ सत्र न्यायाधीश विनय कुमार कश्यप मौजूद रिहीन।

कोरोना समाचार

प्रदेस म कोरोना संक्रमण के हालात तेली ले सुधरत हे। राज्य म संक्रमण के दर गिरके 1.3 प्रतिशत होगे हे। उहें, रिकवरी दर 97.37 प्रतिशत हे। प्रदेश म काली 43 हजार ले जादा कोरोना टेस्ट कराय गीस, जेमा 600 पाॅजिटिव मरीज मिले हे। उहें, काली कोरोना संक्रमण ले 17 लोगन मनके मउत होय हे। अभी के बेरा म राज्य म सक्रिय मरीज मनके संख्या 12 हजार 608 हे।

कोविड टीकाकरण-वेबिनार

कोविड टीकाकरण ल लेके लोगन मन के भरम ल दूरिहा करे बर प्रादेशिक लोक संपर्क कार्यालय, पत्र सूचना कार्यालय रायपुर अउ क्षेत्रीय लोक संपर्क कार्यालय बिलासपुर डहार ले आज वेबिनार के आयोजन करे गीस। एमा भ्रांति निवारण विशेषज्ञ डाॅक्टर प्रज्ञा कौशिक, आई.एम.ए. बिलासपुर के अध्यक्ष डाॅक्टर अविजित रायजादा अउ डाॅक्टर रजनीश पांडेय ह वैक्सीनेशन ल लेके आने-आने प्रकार के प्रचलित भरम अउ ओखर कमी के बारे म प्रतिभाग मन ल जानकारी दीन।
ए मउका म डाॅक्टर कौशिक ह किहीन कि टीकाकरण बर समाज म फइले भरम ल रोकना हमर जिम्मेदारी हरय, तभे ए दुनिया के सबले बड़का अभियान सफल हो पाही।

मुख्यमंत्री-भूमिपूजन

मुख्यमंत्री भूपेश बघेल ह आज वर्चुअल कार्यक्रम म सरगुजा अउ बलरामपुर-रामानुजगंज जिला म 324 करोड़ रूपिया ले जादा के आने-आने विकास काम के लोकार्पण अउ भूमिपूजन करीन। एमा सरगुजा जिला बर करीब 248 करोड़ रूपिया के लागत के 107 विकास के काम सामिल हे। उहें, मुख्यमंत्री ह बलरामपुर-रामानुजगंज जिला म 76 करोड़ 5 लाख ले जादा के 195 विकास काम के लोकार्पण अउ भूमिपूजन करीन।
उहें, मुख्यमंत्री काली 16 जून के कोरिया जिला म 204 करोड़ 72 लाख रूपिया के लागत ले 233 विकास के काम जिला के जनता ल समर्पित करही।

अंबिकापुर-एयर कनेक्टीविटी

उत्तर छत्तीसगढ़ म एयर कनेक्टीविटी बर अंबिकापुर के मां महामाया एयर पोर्ट के उन्नयन करीब 44 करोड़ रूपिया के लागत ले करे जाही। मुख्यमंत्री भूपेश बघेल ह आज वर्चुअल कार्यक्रम म एयरपोर्ट के उन्नयन काम के भूमिपूजन करीन। ए मउका म मुख्यमंत्री ह किहीन कि सरगुजा म हवाई सेवा सुरू होय ले अंबिकापुर, बलरामपुर, कोरिया अउ जशपुर के संग पूरा छत्तीसगढ़ म विकास अउ पर्यटन ल बढ़ावा मिलही। अंबिकापुर ले रायपुर अउ बनारस के सफर घलो आसान हो जही।

पाठ्य-पुस्तक

राज्य म ए बछर घलो स्कूली लइका मन ल निःशुल्क पाठ्य पुस्तक घर म पहुंचा के दे जाही, जिखर ले आॅनलाइन पढ़ाई करे जा सकय। लइका मन ल ए किताब जुलाई महीना के आखिरी तक मिल जही। ए संबंध म स्कूल सिक्षा विभाग ह संबंधित अधिकारी मन ल निर्देश जारी करे हे। एमा केहे गेहे कि पाठ्य-पुस्तक निगम डहार ले ए बछर कक्षा नवमीं अउ दसवीं के पुस्तक संबंधित स्कूल तक अउ कक्षा पहली ले आठवीं तक के पुस्तक स्कूल मन म दर्ज संख्या के अनुसार पहुंचाय जाय।

ट्रैफिक चैपाल

सड़क दुर्घटना म कमी लाय बर रायपुर के यातायात पुलिस ह आज ग्रामीण क्षेत्र मन म ट्रैफिक चैपाल के सुरूवात करीन। जिला म अइसे 5 बड़े गांव म जिहां दुर्घटना अउ मउत के प्रतिसत जादा हे, उहां पुलिस ट्रैफिक चैपाल लगाके लोगन मन ल नियम के बारे म बतईस। पुलिस उप महानिरीक्षक अउ रायपुर के वरिष्ठ पुलिस अधीक्षक के अगुवई म कार्यक्रम के सुरूवात करे गीस।
खबर के मुताबिक पाछु करीब ढाई बछर म रायपुर जिला म 4 हजार 600 ले जादा दुर्घटना होय हे, जेमा 1 हजार 138 लोगन मनके मृत्यु होय हे। उहें, 3 हजार 300 ले जादा लोगन मन घायल होय हे। ग्रामीण क्षेत्र मन म मौत के प्रतिशत शहर के तुलना म जादा हे।

रायपुर विकास प्राधिकरण

कोरोना संक्रमण ल देखत लाॅकडाउन के सेती रायपुर विकास प्राधिकरण ह अइसन लोगन मन ल जेमन किश्त के भुगतान नइ कर पाय हे, ओमन ल 31 जुलाई तक सरचार्ज के रासि दे बर छूट देहे। प्राधिकरण संचालक मंडल के बैठक म ए फइसला ले गीस। एखर अनुसार जेन लोगन मन 1 मार्च ले 30 जून तक किश्त के राशि जमा नइ करे हे। ओमन ल 31 जुलाई तक रासि जमा करे बर 15 प्रतिशत सरचार्ज म छूट दे गेहे।

छत्तीसगढ़ वर्चुअल योग मैराथन

राज्य म 21 जून के अंतर्राष्ट्रीय योग दिवस के अवसर म होवइया छत्तीसगढ़ वर्चुअल योग मैराथन म भाग लेवइया प्रतिभागी अब 20 जून तक आॅनलाइन पंजीयन करा सकथे। ए मैराथन बर अब तक साढे़ 3 लाख ले जादा लोगन मन पंजीयन करवा डरे हे।
अउ अब थोरकुन समाचार सार म-

– राजधानी रायपुर म आज भाजपा पार्षद मन ह आने-आने मुद्दा ल लेके नगर निगम धरना-प्रदर्सन करीन। पार्षद मन अमृत मिशन योजना म अनियमितता के आरोप लगावत जांच के मांग करत हे। संगेसंग ओमन ह राज्य म प्रधानमंत्री आवास योजना ल बंद करे के आरोप लगाय हे।

– जांजगीर-चांपा जिला के सक्ती विकासखंड स्थित संयुक्त एकलव्य आवासीय विद्यालय पहाड़ीखुर्द म कक्षा आठवीं म प्रवेस बर अनुसूचित जनजाति वर्ग के लइका मन ल 26 जून तक आवेदन मंगाय हे। स्कूल म प्रवेश बर चयन परीक्षा के आयोजन 15 जुलाई के होही।

– महासमुंद जिला के सल्डीह प्राथमिक कृषि साख सहकारी समिति के फड़ प्रभारी ल धान के रखरखाव म लापरवाही बरते के आरोप म निलंबित कर दे हे।

– सुकमा जिला म जगरगुंडा रद्दा ल सुरक्षा बल के जवान मन ह सप्ताह भर बाद बहाल करे हे। ए रद्दा म माओवादी मन ह बीते 5 जून के कतको जगह गढ्ढा कर दे रिहीन अउ पेड़ ल काट के गिरा दे रिहीन।

अउ

– कोरिया जिला के खड़गवां वन परिक्षेत्र के बेलकामार म हाथी मनके दल ह कतको मकान मन ल तोड़ देहे अउ अनाज के नुकसान करे हे।