प्रधानमंत्री सीएसआईआर बैठक
प्रधानमंत्री नरेंद्र मोदी ह कीहिन कि भारत हर क्षेत्र म आत्मनिर्भर बने बर दृढ़ संकल्पित हे। ओमन कीहिन कि वैश्विक कोविड-नाइंटिन महामारी ह ए लक्ष्य ल हासिल करे म गति धीमा करे हे, फेर हमर लक्ष्य, निश्चय आने आने क्षेत्र म आत्मनिर्भर अउ मजबूत बनाये के हे। आज वैज्ञानिक अउ औद्योगिक अनुसंधान परिषद -सी.एस.आई.आर. के बइठका म वर्चुअल माध्यम ले अध्यक्षता करत ओमन कीहिन कि भारत हर क्षेत्र म आत्मनिर्भर अउ सशक्त बनना चाहत हे।
प्रधानमंत्री ह कीहिन कि वैज्ञानिक मन कोविड जांच किट, दवाई अउ आॅक्सीजन के उत्पान मदेश ल आत्मनिर्भर बनाये हे। एक साल के भीतर म देश म कोवडि वैक्सिन तियार करे म भारतीय वैज्ञानिक मनके भूमिका के सराहना करत श्री मोदी ह कीहिन कि जउन गति अउ पैमाना म ये काम करे गेहे, वो ह अभूवपूर्व हरय।
केंद्रीय मंत्री वर्चुअल बैठक
केंद्रीय खान अउ कोयला मंत्री प्रहलाद जोशी ह आज छत्तीसगढ़ के मुख्यमंत्री भूपेश बघेल के संग आयोजित वर्चुअल बैठक म केंद्र के निर्देश म तुरते पहल करे बर छत्तीसगढ़ के सराहना करीन। बइठका म जानकारी दे गीस कि केंद्र सरकार के प्राथमिकता म खनिज ब्लाक के आवंटन निलामी के माध्यम ले करे के लक्ष्य राखे गेहे। जेखर ले छत्तीसगढ़ म पहिली चरण के तहत अवइया दू-तीन महीना म लौह अयस्क अउ चूना पत्थर के कुल सोला नवा खदान के निलामी के तियारी करे जात हे। केेंद्रीय मंत्री ह कीहिन कि केंद्र सरकार के निर्देश के अनुरूप खनिज ब्लाक के निलामी बर पहल करने वाला छत्तीसगढ़ ह पहिला राज्य हरय।
प्रकरण – वापसी
प्रदेस के माओवादी प्रभावित क्षेत्र मन म अनुसूचित जनजाति वर्ग के रहवइया मनके खिलाफ दर्ज सात सौ अठारा प्रकरण वापिस कर ले हे। जेमा ले नौ सौ चंवालिस लोगन मन ल राहत मिले हे।
बतादन कि छत्तीसगढ़ सरकार डहार ले माओवाद प्रभावित क्षेत्र म निर्दोश आदिवासी मनके खिलाफ दर्ज प्रकरण के वापसी बर उच्चतम न्यायालय के सेवानिवृत्त न्यायाधीश ए.के. पटनायक के अध्यक्षता म कमेटी के गठन करे गे रीहिस। उंहें जिला प्रशासन अउ पुलिस विभाग ल घलो आदिवासी के विरूद्ध दर्ज माओवाद संबंधी मामला के छानबीन करके निर्दोष आदिवासी मन ल राहत देके निर्देश दे गेहे।
पक्का मकान
प्रदेश म शहरी गरीब आवासहीन मन ल सर्वसुविधा युक्त पक्का मकान देवाय जाही। मुख्यमंत्री भूपेश बघेल ह ये घोषणा ल अमल करत छत्तीस हजार एक सौ सतहत्तर आवास के निर्माण बर एक हजार अठासी करोड़ रूपिया के स्वीकृति दीन हे।
मुख्य सचिव अमिताभ जैन के अध्यक्षता म आयोजित राज्य स्तरीय स्वीकृति अउ निगरानी समिति के बइठका म नगरीय प्रशासन विभाग डहार ले बारे म देगे प्रस्ताव ल मंजूरी दे गीस हे। मोर जमीन-मोर मकान के अंतर्गत आने आने नगरीय निकाय मन म एक सौ अड़तीस परियोजना के तहत चैंतीस हजार तीन सौ आठ आवास निर्माण बर एक हजार छियासी करोड़ रूपिया के स्वीकृति करे गीस। संगेसंग रायपुर विकास प्राधिकरण के परियोजना के अंतर्गत एक हजार आठ सौ उनहत्तर आवास निर्माण बर करीबन एक सौ बाईस करोड़ रूपिया स्वीकृत करे गेहे।
पौधारोपण
प्रदेश म ये साल आने आने योजना के तहत निन्यानबे लाख पैंतीस हजार ले जादा पौधा लगाये जाही। ये पौधारोपण एक सौ सत्यासी किलोमीटर या तेरा हजार नौ सौ पांच हेक्टेयर रकबा म होही। वन विभाग ह चालू साल के दउरान दू करोड़ सत्ताईस लाख पौधा बांटे के लक्ष्य राखे हे। वन विभाग के दू सौ पचहत्तर नर्सरी म दू सौ चैरासी प्रजाती के करीबन तीन करोड़ नवासी लाख पौधा अभी उपलब्ध हे।
वन मंत्री मोहम्मद अकबर ह वर्चुअल बैठक म पौधारोपण कार्यक्रम के समीक्षा करत वन मंडल अधिकारी मन ल जरूरी निर्देश दीन हे। प्रदेश म पौधारोपण काम के सही ढंग ले मूल्यांकन बर पौधा लगाये के पहिली अउ बाद म वीडियोग्राफी घलो कराये जाही।
खरीफ सीजन फसल बोवाई
प्रदेस म खरीफ सीजन दू हजार इक्कसी बर कृषि विभाग ह धान, मक्का अउ आने अनाज समेत दलहन-तिलहन के संगेसंग आने फसल मनके बोआई ल लेके नवा सिरा ले लक्ष्य तय करे हे। कृषि मंत्री रविंद्र चैबे ह बताइन कि ए बखत खरीफ सीजन म फसल के बोआई के कुल रकबा अड़तालिस लाख बीस हजार हेक्टेयर प्रस्तावित हे। ये ह पाछू साल के बोनी के तुलना म करीबन तेरा हजार छह सौ चालीस हेक्टेयर जादा हे।
कृषि मंत्री ह बताइन कि प्रदेश म धान के संगेसंग आने अनाज के फसल ल बढ़ावा देबर धान के रकबा म पांच प्रतिशत के कमी करे गेहे। उंहें मक्का के रकबा म पच्चीस प्रतिशत अउ आने अनाज फसल के रकबा म तिरालिस प्रतिशत के बढ़ोत्तरी के लक्ष्य हवय।
उंहें प्रदेश म प्री-मानसून के पहिली बरसात के बाद अब खरीफ सीजन बर फसल के बोआई के काम शुरू हो गेहे। किसान मन अपन खेती काम म लग गेहे।
इंगिलश मीडियम स्कूल
मुख्यमंत्री भूपेश बघेल ह वर्चुअल कार्यक्रम के माध्यम ले मुंगेली म स्वामी आत्मानंद शासकीय इंग्लिश स्कूल के लोकार्पण करीन। ए स्कूल के निर्माण लगभग पांच करोड़ रूपिया के लागत ले कराये गेहे। ए मउका म मुख्यमंत्री ह स्कूल के विद्यार्थी मनले गोठबात करत ओमन ल प्रोत्साहित घलो करीन।
कार्यक्रम ल संबोधित करत मुख्यमंत्री ह कीहिन कि राज्य सरकार प्रदेश के जम्मों लईका मन तक गुणवत्तापूर्ण शिक्षा पहुंचाय बर संकल्पित हे। सरकार ए दिशा म जोरदरहा ढंग ले प्रयास करत हे। ओमन कीहिन कि राज्य के गरीब लईका मन ल निजी स्कूल के जइसन सुविधा मिले, ओमन घलो अंग्रेजी माध्यम ले पढ़ई करके प्रतियोगिता बर खुद ल तियार कर सके, एखर बर स्वामी आत्मानंद अंग्रेजी माध्यम स्कूल के स्थापना करे गेहे। प्रदेश म अंग्रेजी माध्यम के सरकारी स्कूल के संख्या अब कुल एक सौ इकहत्तर होगे हे।
निर्माण कार्य निर्देश
रायपुर जिला म चलत निर्माण काम ल अवइया दस दिन के भीतर अभियान चलाके पूरा करे जाही। कलेक्टर डॅाक्टर एस. भारतीदासन ह निर्माण काम के समीक्षा के बेरा म कीहिन कि अवइया कुछ दिन म बरसात शुरू हो जाही। ओमन ह अधिकारी मन ल निर्देशित करत कहिन कि जिला के जम्मों विकासखंड म चलत निर्माण काम ल तुरते पूरा करे के प्रमाण पत्र प्रस्तुत करयं ।
उंहें रायपुर जिला म किसान चैपाल खरीफ अभियान के तहत जिला म आज ले रिण वितरण शिविर शुरू होगे हे। कलेक्टर ह जिला के जम्मों विकासखंड मन म आठ जून तक एक सौ बाईस शिविर लगाये बर कीहिन हे।
मौसम
प्रदेश म अवइया चैबीस घंटा के दउरान कई जगा मन म हल्का ले मध्यम बरसा होय के संभावना हे। उंहें एक दू जगा म गरज चमक के संग अंधड़ चले अउ गाज गिरे के चेतावनी घलो दे गेहे।
मौसम विभाग के मुताबिक हवा के एक चक्रीय वक्रवात घेरा दक्षिण बिहार के उपर म हवय। छत्तीसगढ़ के उपरी भाग म अरब सागर ले अउ दक्षिण छत्तीसगढ़ म बंगाल के खाड़ी ले नमी आवत हे। जेखर ले प्रदेश के कुछएक जगा म बीते चैबीस घंटा के दउरान हल्का बरसा दर्ज करे गेहे।
मलेरिया मुक्त बस्तर
मलेरिया नियंत्रण बर शुरू करे गे मलेरिया मुक्त बस्तर अभियान के जोरदरहा ढंग ले असर देखे बर मिलत हे। बस्तर क्षेत्र म एखर सुघ्घर परिणाम आगू आय के बाद ए अभियान ल मलेरिया मुक्त छत्तीसगढ़ अभियान के रूप म पाछू बछर सरगुजा संभाग म घलो शुरू करे गीस।
राष्ट्रीय स्वास्थ्य मिशन डहार ले दूनों संभाग म चलाए गे ए विशेष अभियान ले मलेरिया के मामला म लगातार कमी आवत हे। अप्रैल दू हजार बीस के तुलना म अप्रैल दू हजार इक्कीस म सरगुजा संभाग म मलेरिया के मामला साठ प्रतिशत अउ बस्तर संभाग म पैंतालिस प्रतिशत के कमी पाये गीस। ए अभियान के सफलता ल देखत अब ग्लोबल फंड फॅार एड्स, टीबी एंड मलेरिया संस्था घलो छत्तीसगढ़ ले मलेरिया ल खतम करे बर राज्य सरकार के सहयोग करही।