बारहवीं-परीक्षा
छत्तीसगढ़ म बारहवीं के परीक्षा आज ले सुरू होगे हे। कोरोना काल म परीक्षा बर नवा बेवस्था बनाय गेहे। एखर तहत प्रदेस के कतकोन स्कूल मन ले छात्र मन ल प्रश्न पत्र अउ उत्तर पुस्तिका दे जात हे। छात्र मन ल पांच दिन के अंदर प्रश्न पत्र हल करे के बाद उत्तर पुस्तिका ल संबंधित स्कूल मन म जमा करना होही। यदि कोनों छात्र पांच दिन के अंदर उत्तर पुस्तिका जमा नइ कर पाही त ओला परीक्षा ले अनुपस्थित माने जाही।
ए परीक्षा बर आज ले स्कूल मन म प्रश्न पत्र अउ उत्तर पुस्तिका बंटना सुरू होगे हे। स्कूल मन म घलो कोरोना नियम के पालन करत बारहवीं के छात्र मन ल उत्तर पुस्तिका बांटे गीस।
बतादन कि प्रदेसभर ले करीबन दू लाख तिरासी हजार परीक्षार्थी घर बइठे बारहवीं के परीक्षा देवत हे। कोरोना संक्रमित छात्र मन घलो अपन परिजन के माध्यम ले प्रश्न पत्र अउ उत्तर पुस्तिका लेके अनुमति दे गेहे। कोरोना संक्रमित छात्र के परिजन मन ल छात्र के प्रवेस पत्र अउ संक्रमित होय के प्रमाण पत्र अउ आधार कार्ड या दूसर फोटो वाला पहिचान पत्र दिखाय बर होही।
लाॅकडाउन
प्रदेस म कोरोना संक्रमण के रफ्तार कम होय के सेती अधिकांश जिला मन म लाॅकडाउन म छूट के संगेसंग व्यावसायिक कामकाज सुरू होगे हे। राज्य सरकार ह विभिन्न जिला मन म लाॅकडाउन के संबंध म कलेक्टर मन ल निरदेस जारी करे हे। एखर तहत रायगढ़, जांजगीर-चांपा अउ सूरजपुर जिला म लाॅकडाउन जारी राखे बर केहे गेहे। ए तीन जिला म कोरोना संक्रमण के दर पांच प्रतिशत ले जादा हे। हालांकि, ए जिला म लाॅकडाउन म थोड़ा राहत दे गेहे अउ संझा छह बजे तक जम्मों दुकान मन ल खोले जा सकत हे। नाइट कफ्र्यू चालू रइही।
उहें, जउन जिला म कोरोना संक्रमण के दर पांच प्रतिशत ले कम हे उहां लाॅकडाउन हटा ले गेहे। हालांकि, उहू जिला मन म घलो कुछु-कुछु गतिविधि मन उपर प्रतिबंध चालू रइही। राज्य सरकार के निरदेस के मुताबिक सिनेमा हाॅल, माॅल, पार्क, स्वीमिंग पूल, वाटर पार्क, जंगल सफारी बंद रइही। चैपाटी घलो नइ खुलही। ए जिला म जम्मों दुकान बिहनिया अपन सुविधा अनुसार कोनों समय खोले जा सकी। लेकिन, संझा छह बजे तक जम्मों दुकान मन ल बंद करना होही। संझा छह बजे ले बिहनिया छह बजे तक नाइट कफ्र्यू रइही। हालांकि होटल, क्लब, अउ बार ल रतिहा दस बजे तक खुला राखे के छूट दे जाही। उहें, शादी समारोह म केवल पचास लोगन मनके सामिल होय के अनुमति होही। लेकिन, होटल अउ मैरिज हाॅल म बैठक बेवस्था के आधा क्षमता के अनुसार ही लोगन मन ल आमंत्रित करे जा सकही। सरकारी दफ्तर म पहली अउ दूसरा श्रेणी के सब्बो अधिकारी मन ल उपस्थित रहना होही। उहें, तृतीय अउ चतुर्थ श्रेणी के कुल करमचारी मन ले आधा लोगन मन ल ही बारी-बारी दफ्तर बुलाय जा सकही।
तुंहर सरकार-तुंहर द्वार
प्रदेस के लोगन मन ल अब घर बइठे ड्राइविंग लाइसेंस समेत परिवहन विभाग के बाईस सेवा मनके लाभ मिल सकही। ड्राईविंग लाइसेंस अउ पंजीयन संबंधी सेवा ल आधार नंबर ले जोड़ के आॅनलाइन सुविधा देवइया छत्तीसगढ़ देस के पहिली राज्य बन गेहे। मुख्यमंत्री भूपेश बघेल ह आज अपन रईपुर स्थित निवास कार्यालय म परिवहन विभाग के नवा सुविधा ‘तुंहर सरकार-तुंहर द्वार‘‘ के सुभारंभ करीन। ए नवा सुविधा ले लोगन मन ल नवा गाड़ी मनके आर-सी बुक यानि रजिस्ट्रेसन सर्टिफिकेट के अलावा गाड़ी मनके खरीदी-बिक्री म नामांतरण समेत आने-आने प्रकार के सेवा के लाभ मिलही।
परिवहन विभाग डहार ले ए आॅनलाइन सुविधा के जरिया कतकोन प्रकार के दस्तावेज स्पीड पोस्ट के माध्यम ले आवेदक अउ वाहन मालिक के घर के पता म पहुंचाय जाही। ए सेवा के लाभ ले बर आवेदक मन ल परिवहन विभाग के वेबसाइट म आवेदन करना होही। ए सुविधा म स्वैच्छिक आधार प्रमाणीकरण ले परिवहन सेवा तुरते मिलही।
मुख्यमंत्री वृक्षारोपण प्रोत्साहन योजना
प्रदेस म वृक्षारोपण ल प्रोत्साहित करे बर आज ले ‘‘मुख्यमंत्री वृक्षारोपण प्रोत्साहन योजना‘‘ सुरू होगे हे। ए योजना के तहत जउन किसान मन पाछु बछर धान के फसल लेहे, यदि ओमन ए साल धान के बदला अपन खेत म वृक्षारोपण करथे, त ओमन ल अवइया तीन बछर तक हर साल दस हजार रूपिया प्रति एकड़ के दर ले प्रोत्साहन रासि दे जाही।
ए योजना म किसान मन ल गैर इमारती, फलदार वृक्ष, बांस, लघु वनोपज अउ औषधीय पौधा लगाय बर बिसेस रूप ले प्रोत्साहित करे जाही। ए योजना के माध्यम ले किसान मनके आय म बढ़ोतरी करे के उद्देश्य हे। योजना के लाभ ले बर छत्तीसगढ़ के सब्बो नागरिक निजी भूमि के उपलब्धता अनुसार अउ जम्मों ग्राम पंचायत अउ संयुक्त वन प्रबंधन समिति मन पात्र होही। योजना के लाभ ले बर पौधारोपण के छह महीना के भीतर संबंधित वन परिक्षेत्र कार्यालय म पंजीयन कराना अनिवार्य होही।
कार्यबल-गठन
प्रदेस के विकास खातिर उपाय सुझाय बर राज्य सरकार ह एक ठिन कार्यबल गठित करे हे। ए कार्यबल डहार ले कृषि, आदिवासी विकास अउ स्कूल सिक्षा म सुधार बर देवइया सुझाव के आधार म राज्य सरकार कार्ययोजना बनाही। ए कार्यबल म देस के ख्यातिप्राप्त बिसय-बिसेसज्ञ मन ल घलो सामिल करे गेहे। ए कार्यबल राष्ट्रीय अउ अंतर्राष्ट्रीय स्तर म पहिली ले सफल कारीकरम अउ योजना मन ल प्रदेस म लागू करे उपर घलो बिचार करही।
भाजपा-सेवा ही संगठन
केन्द्र म भारतीय जनता पार्टी के सरकार के सात साल पूरा होय के उपलक्ष्य म प्रदेस के भाजपा कार्यकर्ता गांव-गांव जाके सेवा कार्य म लगे हुए हे। इही कड़ी म राजनांदगांव जिला म अंबागढ़ चैकी के अंतर्गत डोंगाघाट, सोनसायटोला, बांधाबाजार अउ पांगरी गांव म भाजपा कार्यकर्ता मन जाके उहां के लोगन मन ल केन्द्र सरकार के उपलब्धि बतईन। संगेसंग जरूरमंद ल सूखा रासन, दवई, मास्क अउ सैनिटाईजर बांटीन। काली होय कारीकरम म राजनांदगांव क्षेत्र के पूर्व सांसद अउ जिला भाजपाध्यक्ष मधुसूदन यादव ह किहीन कि मोदी सरकार ‘‘सबका साथ-सबका विकास अउ सबका विश्वास‘‘ के भावना ले काम करत हे।
ओति, जगदलपुर म घलो भारतीय जनता युवा मोर्चा के कार्यकर्ता मन सेवा ही संगठन कारीकरम के तहत सहर के गोलबाजार म कोरोना संक्रमण ल रोके बर जन-जागरूकता अभियान चलाईन अउ लोगन मन ल मास्क अउ सेनिटाईजर बांटीन। ओमन लोगन मन ले वैक्सीन लगवाय के अपील घलो करीन।
माओवादी-मुठभेड़
कोंडागांव जिला के कुंएमारी क्षेत्र म तलाशी अभियान के दउरान सुरक्षा बल मन संग होय मुठभेड़ म दू झिन माओवादी मारे गेहे। जिला के पुलिस अधीक्षक सिद्धार्थ तिवारी ह बतईन कि मुठभेड़ के बाद माओवादी जंगल कोति भाग गीन। ओमन बतईन कि मुठभेड़ के बाद सुरक्षा बल मन घटनास्थल ले एक महिला समेत दू माओवादी मनके सव बरामद करे हे। मउका ले चार ठिन बंदूक अउ दूसर सामान घलो मिले हे।
क्षयरोग उन्मूलन
क्षयरोग यानि टीबी ल नियंत्रित करे म बीजापुर जिला प्रदेस म पहली स्थान म हे। पाछु बछर राष्ट्रीय क्षय रोग उन्मूलन कारीकरम के दउरान हरेक तिमाही म ए बीमारी उपर प्रभावी नियंत्रण बर करे गे काम के मूल्यांकन के बाद पूरा प्रदेस म बीजापुर जिला ल सबले जादा अंक मिले हे। ए कारीकरम ल लागू म सुकमा जिला ल दूसरा अउ कोरिया ल तीसरा स्थान मिले हे। उहें, गरियाबंद चैथा अउ नारायणपुर जिला पांचवां स्थान म हे।
कलेक्टर-सीमांकन
रईपुर जिला म जमीन सीमांकन के लंबित मामला मनके निराकरण पन्द्रह जून ले पहिली करे के निरदेस दे गेहे। कलेक्टर डाॅक्टर एस. भारतीदासन ह वीडियो कान्फ्रेंसिंग के जरिया राजस्व अधिकारी मनके बइठका म किहीन कि पटवारी अउ राजस्व निरीक्षक के टीम बनाके ए काम ल प्राथमिकता के आधार म करे जाना चाही। ओमन लोक सेवा गारंटी, मुख्यमंत्री जन चैपाल समेत दूसर लंबित मामला के घलो जानकारी लीन।