अमृत महोत्सव
स्वतंत्रता के पचहत्तरवां वर्षगांठ के मउका म अमृत महोत्सव आज ले चालू होगे हे। ए मउका म प्रधानमंत्री नरेन्द्र मोदी ह किहीन कि भारत के उपलब्धि न सिरिफ भारत बर, फेर पूरा मानवता बर फायदा देवइया हरय।
प्रधानमंत्री ह आजादी के अमृत महोत्सव के संबंध म आने-आने गतिविधि के सुरूवात अउ गुजरात के साबरमती आश्रम ले दांडी तक के पदयात्रा के सुरूआत के मउका म जनसमूह ल संबोधित करत रिहीन।
श्री मोदी ह किहीन कि देस के स्वत्रंता के पचहत्तरवां वर्षगांठ के मतलब पचहत्तर विचार, पचहत्तर उपलब्धि अउ पचहत्तर काम अउ संकल्प ले हवय, जउन ह हमन ल भारत के सपना ल साकार करे बर आगू बढ़ाय के प्रेरणा दीहीं। प्रधानमंत्री ह किहीन कि आत्मनिर्भर भारत के विकास ले दुनिया के विकास ल घलो प्रोत्साहन मिलही।
अमृत महोत्सव-छत्तीसगढ़-01
आजादी के अमृत महोत्सव के तहत छत्तीसगढ़ म आज ले कारीकरम के सिलसिला सुरू होगे हे। राजधानी रईपुर के महंत घासीदास संग्रहालय म चित्र प्रदर्सनी लगाय गेहे। ए प्रदर्सनी के माध्यम ले स्वतंत्रता संग्राम म परमुख भूमिका निभइया नेता मनके जीवनगाधा ल चित्र के माध्यम ले दर्साय गेहे।
पांच दिन तक चलइया ए प्रदर्सनी के सुभारंभ आज राज्य के संस्कृति मंत्री अमरजीत भगत अउ सांसद सुनील सोनी ह करीन। ए मउका म संसदीय सचिव कुंवर सिंह निषाद, राज्य के संस्कृति सचिव अन्बलगन पी., पत्र सूचना कार्यालय के अपर महानिदेशक अभिषेक दयाल अउ संस्कृति विभाग के संचालक विवेक आचार्य घलो मौजूद रिहीन।
कारीकरम ल संबोधित करत संस्कृति मंत्री अमरजीत भगत ह किहीन कि आजादी के अमृत महोत्सव लोगन मन बर सुघ्घर अउ प्रेरणा देवइया हरय। ओमन किहीन कि आज के दिन हमन देस ल आजादी देवइया अपन स्वतत्रंता सेनानी मन ल सुरता करन अउ ओमन ल नमन करन।
ए मउका म संासद सुनील सोनी ह किहीन कि छत्तीसगढ़ के स्वाधीनता सेनानी मनके घलो आजादी के संग्राम म बिसेस योगदान रेहे हे। ओमन किहीन कि नवा पीढ़ी ल ए समझना चाही कि हमन ल आजादी आसानी ले नइ मिले हे। श्री सोनी ह किहीन कि युवा पीढ़ी ल अपन देस ल आत्मनिर्भर अउ आर्थिक रूप ले मजबूत बनाय बर सरलग काम करना चाही।
सोलह मार्च तक चलइया ए चित्र प्रदर्सन के दउरान पांच दिन तक आने-आने प्रतियोगिता अउ सांस्कृतिक कारीकरम आयोजित करे जाही। रईपुर के महंत घासीदास संग्रहालय म लगे ए प्रदर्सनी बिहनिया दस बजे ले संझा छह बजे तक दर्सक मन बर खुले रइही।
अमृत महोत्सव-छत्तीसगढ़-02
आजादी के अमृत महोत्सव के तहत आजे धमतरी जिला म साइकिल रैली के घलो आयोजन करे गीस। ए रैली ल संस्कृति मंत्री अमरजीत भगत ह रईपुर ले वर्चुअल रूप ले हरियर झंडा देखाके रवाना करीन। ए साइकिल रैली धमतरी के शास्त्री चउक ले आज संझा रवाना होय हे, जउन राष्ट्रीय राजमार्ग होवत गौरव ग्राम कंडेल पहुंचही। ए रैली म पचहत्तर झिन साइकिल सवार भाग लेवत हे।
खबर के मुताबिक धमतरी जिला म स्थित कंडेल गांव ले छत्तीसगढ़ म सत्याग्रह आंदोलन चालू होय रिहीस। इहां बाबू छोटेलाल श्रीवास्तव ह बछर उन्नीस सौ बीस म नहर सत्याग्रह के आह्वान करे रिहीन। किसान मनके ए आंदोलन के सेती महात्मा गांधी ह पहिली बखत छत्तीसगढ़ म आय रिहीन।
कोरोना-दिशा-निर्देश
प्रदेस म कोरोना संक्रमण के मामला एक घांव फेर बाढ़त हे। काली राज्य म तीन सौ अठहत्तर नवा मामला आगू आईस।
दुरूग जिला म कोरोना संक्रमण के बाढ़त मामला ल देखत मास्क पहिरे अउ सुरक्षित दूरी बनाय राखे जइसे दिसा-निरदेस के पालन जरूरी कर दे गेहे। जिला म अब सादी समारोह या धार्मिक के संगेसंग सामाजिक आयोजन बर अनुमति लेना जरूरी होही। संगेसंग अइसे आयोजन म दू सौ ले जादा लोगन मन सामिल नइ हो सकय।
फूड पार्क-भूमिपूजन
दुरूग जिला के धमधा ब्लाॅक के बरहापुर गांव म काली फूड पार्क बर भूमिपूजन करे गीस। इहां बाईस एकड़ क्षेत्र म बारह करोड़ रूपिया के लागत ले फूड प्रोसेसिंग यूनिट ल बुनियादी सुविधा दे जाही। ए मउका म कृषि मंत्री रविन्द्र चैबे ह किहीन कि सीड ग्रेडिंग यूनिट अउ फूड प्रोसेसिंग यूनिट के दू अउ इकाई के स्थापना करके जल्दीच चालू करे जाही।
पाली/चित्रकोट/सिरपुर-महोत्सव
महासमुंद जिला के सिरपुर म ‘‘पुरखा के सुरता‘‘ म अंतर्राष्ट्रीय सिरपुर बौद्ध महोत्सव अउ सोध संगोष्ठी के आयोजन आज ले चालू होगे। तीन दिन तक चलइया ए महोत्सव के सुभारंभ नागार्जुन सुरई ससाई ह करीन। एमा देस अउ दुनिया के जाने-माने विद्वान, भाषाविद्, पुरातत्वविद्, इतिहासकार, पत्रकार, लेखक, सोधकर्ता, प्रोफेसर, साहित्यकार अउ बुद्धिजीवी मनके प्रबोधन सत्र होही। एखर संगेसंग धम्म, कला, सिक्षा, संस्कृति, साहित्य, समाज अउ इतिहास म केन्द्रित कारीकरम करे जावत हे।
ओति, जगदलपुर म राखे गे तीन दिवसीय चित्रकोट महोत्सव काली सिरा गे। ए मउका म सांस्कृतिक कारीकरम अउ खेलकूद प्रतियोगिता के विजेता मन ल इनाम दे गीस। सांस्कृतिक कारीकरम म बास्तानार विकासखंड के लोक नर्तक मन ल गौर नृत्य बर पहिली इनाम दे गीस। महोत्सव के दउरान बस्तर संभाग के लोक नर्तक दल मन ह सुघ्घर प्रस्तुति दीस।
उहें, कोरबा जिला म काली ले दू दिवसीय पाली महोत्सव आज सिरावत हेे। महोत्सव म स्थानीय अउ रंगमंच के कलाकार मन डहार ले कलाकार सांस्कृतिक कारीकरम के प्रस्तुति दे जावत हे।
माघी पुन्नी मेला-मुख्यमंत्री
छत्तीसगढ़ के प्रयागराज अउ पवित्र त्रिवेणी संगम के तट म राखे गे राजिम माघी पुन्नी मेला काली सिरा गे। समापन समारोह ल संबोधित करत मुख्यमंत्री भूपेश बघेल ह किहीन कि राजिम एक सहर नहीं, बल्कि धरम, अध्यात्म अउ संस्कृति के परिचय हरय। धार्मिक अउ सामाजिक काम बर इहां चैव्वन एकड़ जमीन ल आरक्षित करे के संगेसंग एला विकसित करे बर रासि के प्रावधान करे गेहे। मुख्यमंत्री ह ए मउका म मेला के दउरान राजिम समेत तीर-तखार के इलाका के सराब दुकान मन ल पन्द्रह दिन तक बंद राखे के घोसना करीन।
माओवादी मुठभेड़
कोंडगांव जिला म काली माओवादी मनके संग होय मुठभेड़ म सुरक्षा बल मन ह एक झिन माओवादी कैडर के संगेसंग कुछेक माओवादी के घायल होय के दावा करे हे। मिले के खबर के मुताबिक मर्दापाल थाना क्षेत्र ले जिला पुलिस बल अउ डिस्ट्रिक्ट रिजर्व गार्ड-डीआरजी के सामलात टीम तलासी अभियान म निकले रिहीस। इही दउरान अदवाल के टोंडाबेड़ा पारा इलाका म पहिली ले घात लगाय बइठे माओवादी मन ह सुरक्षा बल मन उपर गोलीबारी चालू कर दीन। जवान मन डहार ले करे गे जवाबी कार्रवाई के बाद माओवादी जंगल के आड़ लेके भगा गे।
माघी पुन्नी मेला-मुख्यमंत्री
छत्तीसगढ़ के प्रयागराज अउ पवित्र त्रिवेणी संगम के तट म राखे गे राजिम माघी पुन्नी मेला काली सिरा गे। समापन समारोह ल संबोधित करत मुख्यमंत्री भूपेश बघेल ह किहीन कि राजिम एक सहर नहीं, बल्कि धरम, अध्यात्म अउ संस्कृति के परिचय हरय। धार्मिक अउ सामाजिक काम बर इहां चैव्वन एकड़ जमीन ल आरक्षित करे के संगेसंग एला विकसित करे बर रासि के प्रावधान करे गेहे। मुख्यमंत्री ह ए मउका म मेला के दउरान राजिम समेत तीर-तखार के इलाका के सराब दुकान मन ल पन्द्रह दिन तक बंद राखे के घोसना करीन।
रोड सेफ्टी-क्रिकेट टूनामेंट
राजधानी रईपुर के शहीद वीरनारायण सिंह अंतर्राष्ट्रीय क्रिकेट स्टेडियम म रोड सेफ्टी वल्र्ड सीरीज टी-ट्वेंटी क्रिकेट प्रतियोगिता म आज वेस्टइंडीज के मुकाबला बांग्लादेश लीजेंड्स ले होही।
एखर पहिली, काली संझा खेले गे एक ठिन आने मैच म साउथ अफ्रीका लीजेंड्स ह इंग्लैंण्ड लीजेंड्स ल आठ विकेट ले हरईन।
लोकवाणी
मुख्यमंत्री भूपेश बघेल के मासिक रेडियो वार्ता लोकवाणी के सोलहवां कड़ी के प्रसारण अवइया चैदह मार्च इतवार के होही। मुख्यमंत्री लोकवाणी म ए बखत प्रदेस के नारी शक्ति ले गोठबात करही। लोकवाणी के प्रसारण छत्तीसगढ़ स्थित आकाशवाणी के जम्मों केन्द्र, एफ.एम. रेडियो अउ क्षेत्रीय समाचार चैनल ले बिहनिया साढ़े दस बजे ले ग्यारह बजे तक होही।