अमृत महोत्सव-मोदी
प्रधानमंत्री नरेन्द्र मोदी काली आजादी के अमृत महोत्सव ले संबंधित गतिविधि के उद्घाटन करही। ए महोत्सव भारत के स्वतंत्रता के पचहत्तरवां जयंती के सिलसिला म सरकार कोति ले आयोजित होवइया आने-आने कारीकरम के श्रृंखला हावय। एखर आयोजन जन भागीदारी के भावना ले लोक परब के रूप म करे जाही। एमा पन्द्रह अगस्त दू हजार बाईस के आयोजित होवइया अमृत महोत्सव ले पचहत्तर हफ्ता पहिली के सुरूवाती गतिविधि काली ले सुरू होवत हे।
प्रधानमंत्री काली अहमदाबाद म साबरमती आश्रम ले पदयात्रा ल रवाना करही अउ आजादी के अमृत महोत्सव ले जुड़े सुरूवाती गतिविधि के उद्घाटन करही।
ऐति, छत्तीसगढ़ म घलो आजादी के अमृत महोत्सव म कतकोन कारीकरम होही, जउन बारह मार्च ले सुरू होही। काली राजधानी रईपुर के महंत घासीदास संग्रहालय परिसर म एक चित्र प्रदर्सनी लगाय जाही। जेमा स्वतंत्रता संग्राम अउ स्वाधीनता सेनानी मनके चित्र प्रदर्सित होही। एखर आयोजन भारत सरकार के पत्र सूचना कार्यालय अउ प्रादेशिक लोक संपर्क कार्यालय के संग छत्तीसगढ़ सरकार के संस्कृति विभाग जुलमिलके करत हे। ए प्रदर्सनी पांच दिन चलही, जेमा आने-आने प्रतियोगिता होही।
एखर संगेसंग काली धमतरी म एक साईकिल रैली निकलही, जउन कंडेल पहुंच के सिराही।
कोरोना टीकाकरण
त्तीसगढ़ म कोरोना टीकाकरण जोरदरहा चलत हे। राज्य म अब तक करीबन सात लाख उनचालीस हजार लोगन ल कोविड टीका के पहिली खुराक दे गेहे।
इही बीच, प्रदेश म कोरोना संक्रमण एक घांव फेर बाढ़े लगे हे। काली प्रदेस म कोरोना के चार सौ छप्पन नवा मामला आगू आईस। प्रदेश म कोरोना संक्रमित मरीज मनके आंकड़ा तीन लाख पन्द्रह हजार के पार पहुंच गेहे।
उहें, रईपुर जिला म कोरोना संक्रमण के बाढ़त मामला ल देखत जिला कलेक्टर डाॅक्टर एस. भारतीदासन ह दिसा-निरदेस के कड़ाई ले पालन करे बर किहीन हे। ओमन किहीन कि जउन मन मास्क नइ बउरे, उंखर खिलाफ कड़ा कार्रवाई करे जाही। कोरोना संक्रमण ले बचाव संबंधी आदेस अउ निरदेस के पालन नइ करइया मन उपर प्राथमिकी दरज करे के निरदेस दे गेहे।
परीक्षा पे चर्चा
प्रधानमंत्री नरेन्द्र मोदी के ‘‘परीक्षा पे चर्चा‘‘ कारीकरम के चैथा संस्करण इही महीना म वर्चुअली आयोजित होही। प्रधानमंत्री अवइया परीक्षा के संबंध म स्कूल पढ़ईया लइका, सिक्षक अउ पालक मन संग गोठगात करही। ए कारीकरम बर पंजीकरण माई.जी.ओ.वी. प्लेटफाॅर्म म सुरू होगे हे, जउन इतवार तक चलही। कक्षा नौवीं ले बारहवीं के पढ़ईया लइका मन ले परीक्षा के तनाव ले निपटे खातिर प्रश्न ए प्लेटफाॅर्म म मंगाय गेहे। देसभर के करीबन दू हजार पढ़ईया लइका, सिक्षक अउ पालक मन म विजेता चुने जाही अउ ओमन ल इनाम घलो दे जाही।
लोकवाणी
मुख्यमंत्री भूपेश बघेल के मासिक रेडियो वार्ता लोकवाणी के सोलहवां कड़ी के प्रसारण अवइया चैदह मार्च इतवार के होही। मुख्यमंत्री लोकवाणी म ए बखत प्रदेस के नारी शक्ति ले गोठबात करही। लोकवाणी के प्रसारण छत्तीसगढ़ स्थित आकाशवाणी के जम्मों केन्द्र, एफ.एम. रेडियो अउ क्षेत्रीय समाचार चैनल ले बिहनिया साढ़े दस बजे ले ग्यारह बजे तक होही।
दुर्ग-मनरेगा रोजगार
महात्मा गांधी राष्ट्रीय ग्रामीण रोजगार गारंटी योजना-मनरेगा म दुरूग जिला ह दस हजार ले जादा लोगन ल सौ दिन ले उपर के रोजगार देके रिकाॅर्ड बनाय हे। एखर पहिली, करीबन पांच हजार लोगन ल ही सौ दिन के रोजगार देवाय गे रिहीस। आज जारी आंकड़ा के मुताबिक जिला म दस हजार एक सौ छिहत्तर लोगन ल सौ दिन के रोजगार दे गीस। एसो इंक्यानवे हजार लोगन ल मनरेगा ले रोजगार मिले हे।
बठेना कांड
मुख्यमंत्री भूपेश बघेल ह पुलिस ल दुरूग जिला के बठेना गांव म पाछु दिन एके परिवार के पांच झिन मउत के मामला म बने असन जांच करे के निरदेस दीन हे। श्री बघेल ह आज बठेना गांव पहुंच के मउत होय लोगन के परिवार वाले मन ले भेंट करीन अउ सहायता रासि के रूप म पांच लाख रूपिया देके बात किहीन। ए मउका म मुख्यमंत्री संग दुरूग रेंज पुलिस महानिरीक्षक विवेकानंद सिन्हा अउ जिला के पुलिस अधीक्षक संग बड़का अधिकारी मौजूद रिहीन।
माओवादी-समाचार
बीजापुर जिला के भैरमगढ़ थाना क्षेत्र म सुरक्षा बल अउ माओवादी मनके बीच मुठभेड़ होय हे। फेर एमा काखरो हताहत होय के खबर नइ हे। मिले जानकारी के मुताबिक एस.टी.एफ. अउ डीआरजी के संयुक्त टीम गश्त म निकले रिहीस। इही इंद्रावती नंदियां तीर कोलनार अउ छोटेपल्ली के जंगल म माओवादी मनके मौजूदगी के सूचना मिलीस। सुरक्षा बल ह जब माओवादी मनके खिलाफ कार्रवाई करीन त माओवादी मन ह जंगल के आड़ लेके भाग निकलीन। घटना के जगह ले माओवादी मनके कतकोन जिनीस बरामद करे गेहे।
महाशिवरात्रि
देसभर म महाशिवरात्रि के परब आज उछाह के संग मनाय जात हे। राजधानी रईपुर समेत प्रदेस के सब्बो सिवालय म भिनसरहाच ले जल चढ़ाय अउ पूजापाठ खातिर श्रद्धालु मनके भीड़ मंदिर म होय लगे रिहीस। ए मउका म श्रद्धालु मन ह नंदियां म पुण्य स्नान करीन।
मुख्यमंत्री भूपेश बघेल ह आज रईपुर के महादेवघाट म हटकेश्वर महादेव के पूजापाठ करके प्रदेसवासी मन बर सुख-समृद्धि के कामना करीन। महाशिवरात्रि के मउका म मंदिर म बिसेस सजावट करे गेहे। इहां मेला घलो लगे हे।
एखर पहिली, मुख्यमंत्री दुरूग के ठकुराईन टोला घाट के महाशिवरात्रि मेला मिलन समारोह म संघरीन।
महासमुंद जिला म सिरपुर के गंधेश्वरनाथ महादेव, श्वेता गंगा, बम्हनी के बम्हनेश्वर महादेव अउ कनेकेरा के स्वयंभू कनेकेश्वर महादेव मंदिर म बिहनियाच ले भक्त मनके तांता लगे रिहीस। अइसने, बिलासपुर जिला के रतनपुर के वृदेश्वर महादेव मंदिर म बिसेस पूजापाठ होवत हे।
मुंगेली के मल्हापारा के सिव मंदिर ले हर्राघाट तक भगवान शंकर के बरात निकाले गीस। राजनांदगांव के सिवनाथ नंदियां के शिव मंदिर म जलाभिषेक अउ रूद्राभिषेक के कारीकरम होईस। ए बेरा म गुरूनानक चैक ले बाबा महाकाल के झांकी निकाले गीस अउ ए सोभायात्रा म लोक नर्तक दल ह राउत नाचा अउ पंथी नृत्य करत सहर म घुमीन।
पाली/चित्रकोट/सिरपुर-महोत्सव
कोरबा जिला म आज ले दू दिवसीय पाली महोत्सव सुरू होईस। एखर सुभारंभ संस्कृति मंत्री अमरजीत भगत ह करीन। कारीकरम के अध्यक्षता राजस्व मंत्री जयसिंह अग्रवाल ह करीन। ए महोत्सव म स्थानीय अउ रंगमंच के कलाकार मन कोति ले आज सांस्कृतिक कारीकरम के प्रस्तुति दीही।
ओति, जगदलपुर म राखे गे तीन दिवसीय चित्रकोट महोत्सव के आज समापन होवत हे। इंद्रावती नंदियां के चित्रकोट जल प्रपात तीर राखे गे ए महोत्सव म सुकमा जिला के मिसमा, कोंडागांव जिला के किवईबालेंगा अउ बीजापुर जिला के अमबेली लोक नर्तक मन ह प्रस्तुति दीन। संगेसंग बस्तर जिला के दरभा विकासखंड के लोक नर्तक मन ह धुरवा मड़ई नाच, बस्तर विकासखंड के गेड़ी नृत्य अउ बस्तानार विकासखंड के गौर-नृत्य ह सुघ्घर कारीकरम दीन। कारीकरम के दूसर दिन काली राष्ट्रीय अउ अंतर्राष्ट्रीय स्तर के कई ठन आने कलाकार मन घलो कारीकरम दीन।
ऐति, महासमुंद जिला के सिरपुर म ‘‘पुरखा के सुरता‘‘ म अंतर्राष्ट्रीय सिरपुर बौद्ध महोत्सव अउ सोध संगोष्ठी के आयोजन काली बारह मार्च ले करे जाही। एमा कला, सिक्षा, संस्कृति, साहित्य, समाज अउ इतिहास म केन्द्रित कारीकरम राखे जाही।
माघी पुन्नी मेला
महानदी, पैरी अउ सोंढूर नंदियां के त्रिवेणी संगम म आयोजित राजिम माघी पुन्नी मेला के आज आखिरी दिन हे। मुख्यमंत्री भूपेश बघेल आज संझा ए मेला के समापन करही। आज बिहनिया महाशिवरात्रि के मउका म माघी पुन्नी मेला म अंतिम शाही स्नान करे गीस। साधु-संत मन ह शाही स्नान के बाद सबले पहिली नागा साधु मन ह शस्त्र पूजा करीन। एखर बाद आने-आने आश्रम, अखाड़ा अउ शक्तिपीठ के साधु-संत मन ध्वजा संग संत समागम म सामिल होईन। आज महाशिवरात्रि के सेती पंचकोशी परिक्रमा बर घलो भिनसरहाच ले लाईन लगे रिहीस।