आज दिनभर के खबर ल अपन गुरतुर छत्तीसगढ़ी भाखा म पढ़व

राष्ट्रपति न्यायिक व्यवस्था
राष्ट्रपति रामनाथ कोविंद ह कीहिन हे कि न्यायिक व्यवस्था के उद्देश्य सिरिफ विवाद के समाधान नो हे। भलुक न्यायिक व्यवस्था ल अक्षुण्ण बनाये रखना घलो हे। न्याय म अबेर ल खतम करना, न्याय ल संरक्षित करे के दिशा म महत्वपूर्ण कदम हवय।
मध्यप्रदेश के जबलपुर म अखिल भारतीय न्यायिक अकादमी निदेशक मनके समारोह म बोलत राष्ट्रपति ह ये बात ल कीहिन । श्री कोविंद ह कीहिन कि न्यायिक अउ अर्धन्यायिक पद म बइठे अधिकारी मन ल मुख्य रूप ले जिला अदालत म मामला के जल्दी निपटारा बर प्रशिक्षित करे जाना चाही।
कोरोना टीकाकरण
देश म अब तक करीबन एक करोड़ चैरानबे लाख संतानबे हजार ले जादा लोगन ल कोविड ले बचाव बर टीका लगाये गेहे। इही बीच देश म कोविड ले स्वस्थ होवइया मनके दर छियानबे दशमलव नौ आठ प्रतिशत होगे हे। अब तक कोविड के एक करोड़ आठ लाख ले जादा मरीज ठीक होगे हे।
एति छत्तीसगढ़ म कोविड टीकाकरण अभियान जोरदरहा चलत हे। अब तक राज्य म आने आने श्रेणी के करीबन पांच लाख बंयासी हजार लोगन ल टीका लग गेहे।
राज्य के स्वास्थ्य विभाग के मुताबिक साठ बछर ले जादा के अंठावन हजार लोगन ल अउ पैंतालिस बछर ले जादा गंभीर बीमारी ले पीड़ित करीबन बारा हजार लोगन ल ये टीका लगाये गेहे। इही बीच छत्तीसगढ़ म काली कोरोना संक्रमण के दू सौ चैहत्तर नवा मामला आगू आय हे। जेखर बाद राज्य म कोरोना संक्रमित मनके संख्या बाढ़के तीन लाख तेरह हजार आठ सौ आठ होगे हे। एमा ले करीबन तीन लाख सात हजार मरीज इलाज के बाद स्वस्थ होय हे।
कोरोना विशेषज्ञ डॅाक्टर सलाह
पंडित जवाहरलाल नेहरू मेडिकल काॅलेज रायपुर के पलमोनरी मेडिसीन के विशेषज्ञ डॅाक्टर आर.के. पांडा ह लोगन ले अपील करीन हे कि कोरोना संक्रमण ल रोके के सबले आसान उपाय ये हे कि जइसने सर्दी, खांसी, जर के लक्षण दिखय, तुरते कोरोना के जांच करांवय अउ डॅाक्टर के सलाह म दवई लेवय।
उंहें डॅाक्टर भीमराव अंबेडकर अस्पताल रायपुर के विशेषज्ञ चिकित्सक डॅाक्टर ओ.पी. सुंदरानी ह बताइन कि अभी साठ बछर ले जादा उमर के मरीज मनके मउत जादा होवत हे। एखर सेती लोगन ल अपन परिवार के सियान मनखे मनके देखभाल बने असन करना हे। कोनो किसम के तकलीफ होय म तुरते अस्पताल लेगयं।
कार चालक एयरबैग
केंद्र सरकार ह अब कार चलइया के संग वाले सीट बर एयरबैग के बेवस्था ल जरूरी कर देहे। केंद्रीय सड़क परिवहन अउ राजमार्ग मंत्रालय ह ए बारे म अधिसूचना जारी करे हे।
अधिसूचना के मुताबिक एसो एक अप्रैल ले तियार करे जात नवा माॅडल म चालक के बाजू वाले सीट म बैठे मनखे बर घलो एयरबैग के बेवस्था करना होही। इकतीस अगस्त ले मौजूदा माॅडल मन म घलो एयरबैग लगाये बर परही । चालक के संग वाले यात्री बर एयरबैग नइ होय के सेती दुर्घटना होय के आशंका बाढ़ जाथे। मंत्रालय के अधिसूचना सड़क सुरक्षा म उच्चतम न्यायालय के समिति के सुझाव उपर आधारित हे।
इंद्रधनुष सम्मान
पुलिस महानिदेशक डी.एम. अवस्थी ह दुष्कर्म के आरोपी मन ल जल्दी आजीवन कारावास के सजा देवाय बर उत्कृष्ट विवेचक मन ल सुपर इंवेस्टिगेटर सम्मान ले सम्मानित करीन। संगेसंग सुघ्घर काम करे बर इंक्यावन झिन पुलिस कर्मचारी मन ल इंद्रधनुष सम्मान दे गीस।
ए मउका म श्री अवस्थी ह कीहिन कि आरोपी मन ल जल्दी सजा मिले म आम लोगन मनके भरोसा पुलिस बर बाढ़थे। ओमन कीहिन कि घटना के बाद घटना  के जगा म पुलिस के तुरते पहुंचे ले सफलता जरूर मिलथे। उंहें माइलोगिन मनके खिलाफ अपराध होय म जादा संवेदनशीलता के संग जांच करे जाना चाही।
त्रिभुवन पांडेय निधन
छत्तीसगढ़ के वरिष्ठ साहित्यकार त्रिभुवन पांडेय के  धमतरी म निधन होगे। राज्यपाल अनुसूइया उइके ह उंखर निधन म दुख जताइन हे। राज्यपाल ह कीहिन कि स्वर्गीय पांडेय ह अपन पूरा जीवन साहित्य ल समर्पित कर दीन। उंखर जिनगी के एके उद्देश्य रीहिस लोगन ल साहित्य ले जोड़ना। उंखर रचना नवा पीढ़ी ल पे्ररणा देत रीहि।
जवान घायल
छत्तीसगढ़ की सीमा ले लगे महाराष्ट्र के गढ़चिरौली जिला म माओवादी मन संग होय मुठभेड़ म एक झिन जवान घायल होगे। घायल जवान ल इलाज बर हेलिकाॅप्टर ले नागपुर लाये गेहे।
खबर के मुताबिक भामरागढ़-कोरपरसी के जंगल म माओवादी मनके इकट्ठा होय के सूचना मिले रीहिस, जेखर बाद सुरक्षा बलके टीम ह रवाना होगे  जवान मन ह मउका म पहुंचके माओवादी मनके हथियार बनाये के कारखाना ल तोड़ दीन। एखर बाद जवान मन वापिस लहुटन रीहिन, तभे माओवादी मन ह फायरिंग शुरू कर दीन, जेमा एक जवान ह घायल होगे।
ईडी कार्रवाई
प्रवर्तन निदेशालय – ईडी ह रायपुर के कारोबारी सुभाष शर्मा अउ ओखर ले जुड़े कंपनी के करीबन साढ़े इकतीस करोड़ रूपिया के संपत्ति अटैच करे हे। ईडी के ये कार्रवाई मनी लाॅन्ड्रींग अधिनियम के तहत करे गेहे। ईडी के  आधिकारिक जानकारी के मुताबिक कारोबारी उपर बैंक ले लोन के नाव म करोड़ो रूपिया के धोखाधड़ी करे के आरोप हे।
कारोबारी के खिलाफ आने आने कंपनी के नाव म फर्जी कागजात ले बैंक ले करीबन साढ़े अड़तीस करोड़ रूपिया के लोन लेके मामला म छत्तीसगढ़ पुलिस कोति ले एफआईआर दरज करे गेहे।
हादसा
कोंडागांव जिला म आज भिनसरहा एक रद्दा दुर्घटना म तीन झिन युवक के मउत होगे। खबर के मुताबिक फटफटी सवार तीनो मन बिहाव म संघरे बर फरसगांव कोति आत रीहिन। इही बेरा जैतपुरी-लंजोड़ा के तीर रद्दा किनारे खड़े ट्रैक्टर-ट्राॅली ले फटफटी टकरा गीस। ए हादसा म तीनो युवक मनके मउकाच म ही मउत होगे।
उंहें राजनांदगांव जिला के अंबागढ़ चैकी के मुख्य रद्दा म पंागरी मोड़  तीर तेज रफ्तार चैपहिया गाड़ी के टक्कर ले फटफटी सवार दू झिन मनखे के मउत होगे।
हमर गा्रम सभा
प्रदेश के पंचायत अउ ग्रामीण विकास मंत्री टी.एस. सिंहदेव ह काली रतिहा साढ़े सात बजे आकाशवाणी रायपुर ले प्रसारित विशेष कार्यक्रम -हमर ग्राम सभा- म राज्य शासन के नीति, योजना अउ कार्यक्रम के बारे म जानकारी दीहीं। ए कार्यक्रम ल मीडियम वेव नौ सौ इक्यासी किलोहर्ट्ज म सुने जा सकत हे। ए कार्यक्रम ल प्रदेश स्थित आकाशवाणी के जम्मों केंद्र एके संगरा रिले करहीं।
अउ अब थोरकुन समाचार सार म-
– छत्तीसगढ़ ग्रामीण सड़क विकास अभिकरण ह प्रधानमंत्री ग्राम सड़क योजना म स्टेट क्वालिटी माॅनिटर्स के बढ़वार बर पंद्रा मार्च तक बर अर्जी मंगाय गेहे।
– रायपुर जिला के उरला थानाक्षेत्र म एक मनखे ह अपन महतारी अउ भाई के लुगाई के हत्या कर दीस। पुलिस ह आरोपी ल गिरप्तार कर लेहे।
– बिलासपुर जिला के रतनपुर थानाक्षेत्र म बायपास रोड खुुंडीपहाड़ के तीर ले दू झिन माइलोगिन के शव बरामद करे गेहे। पुलिस ह मामला कं जांच करत हे।
– राजनंादगंाव जिला के गेंदाटोला क्षेत्र के करीबन दू दर्जन लोगन संग नौकरी लगाये के नाव म ठगी करइया आरोपी मन ल पुलिस ह भिलाई ले गिरप्तार करे हे।
अउ
– जांजगीर चंापा जिला के नैला थाना म पदस्थ दू झिन पुलिस आरक्षक मन ल काम म कोताही बरते के आरोप म लाईन अटैच कर दे गेहे। ये आरक्षक मन उपर एक आरोपी ल छोड़े जाय के आरोप हवय।