भारत खिलौना मेला
प्रधानमंत्री नरेन्द्र मोदी ह किहीन कि भारत खिलौना मेला आत्मनिर्भर भारत के निर्माण अउ देस के सदियों पुरानी पंरपरा मन ल सृदृढ़ करे के दिसा म एक महत्वपूर्ण कदम आय। भारत खिलौना मेला के वीडियो कान्फ्रेंस के माध्यम ले उद्घाटन करत हुए श्री मोदी ह किहीन कि भारत के स्थानीय खिलौना अपेक्षाकृत अधिक सस्ता अउ पर्यावरण के अनुकूल वस्तु मन से निर्मित होथे। ओमन भारतीय खिलौना निर्माता मन ल पर्यावरण अउ मस्तिष्क के अनुकुल खिलौना बनाय के अनुरोध करीन। श्री मोदी ह किहीन कि कोई भी संस्कृति म जब खेल अउ खिलौना आस्था के केन्द्र के हिस्सा बन जथे, त एखर अर्थ ये हे कि वो समाज खेल के विज्ञान ल समझथे।
श्री मोदी ह किहीन कि पहिली खिलौना मेला व्यापारिक या आर्थिक गतिविधि नइ आय, बल्कि देस के सदियों पुराना खेल मनके संस्कृति ल मजबूती प्रदान करे के आयोजन आय। प्रधानमंत्री ह किहीन कि देस के खिलौना उद्योग मन म बहुत बड़े ताकत छुपे हे अउ आत्मनिर्भर भारत अभियान से एमा अउ वृद्धि होवत हे।
कोरोना समाचार
केन्द्रीय गृह सचिव अजय कुमार भल्ला ह राज्य अउ केन्द्रशासित प्रदेश मन ल कोविड महामारी उपर पूरी तरह से नियंत्रण पाय बर उचित सावधानी अउ कड़ा निगरानी रखे बर केहे हे। कोविड के मौजूदा दिशा-निर्देश मन ल इकतीस मार्च तक बढ़ाय के बारे म सबो राज्य अउ केन्द्रशासित प्रदेश मन ल पत्र लिखे गेहे। ओमन किहीन कि पाछु कुछ महीना म देस म सक्रिय अउ नवा मामला मनके संख्या म गिरावट आय हे, लेकिन सावधानी बरते अउ कड़ी निगरानी के आवश्यकता हे। राज्य अउ केन्द्रशासित प्रदेश से सावधानीपूर्वक कंटेनमेंट जोन बनाय बर केहे गेहे।
इही बीच, केन्द्रीय स्वास्थ्य मंत्रालय ह केहे हे कि देशभर म अब तक एक करोड़ बयालीस लाख ले जादा लोगन मन ल कोविड के टीका लगाय जा चुके हे। उहें, देस म कोविड से स्वस्थ होय के दर संतानवे दशमलव एक-चार प्रतिशत होगे हे। मंत्रालय ह किहीन हे कि एक करोड़ सात लाख से जादा मरीज ये बीमारी से पहिली ही स्वस्थ्य हो चुके हे।
ऐति, छत्तीसगढ़ म कोरोना संक्रमित मरीज मनके संख्या तीन लाख बारह हजार ले अधिक होगे हे। एमा से तीन लाख पांच हजार से अधिक लोगन मन स्वस्थ्य हो चुके हे। वर्तमान में लगभग दू हजार आठ सौ मरीज मनके इलाज अलग-अलग अस्पताल अउ होम आइसोलेशन म चलत हे। उहें, प्रदेश म अब तक दू लाख उनतीस हजार से ज्यादा लोगन मन ल कोरोना के टीका लगाय जा चुके हे।
इही बीच, राजनांदगांव के दिग्विजय महाविद्यालय के समाजशास्त्र अउ समाज कार्य विभाग के विद्यार्थी मन डहार ले कोरोना संक्रमण से बचाव के संबंध म लोगन मन ल जागरूक करे के उद्देश्य ले रैली अउ नुक्कड़ नाटक के आयोजन करे गीस।
केन्द्र-खाद्य सब्सिडी
केन्द्र सरकार डहार ले छत्तीसगढ़ बर खाद्य सब्सिडी के रासि चार हजार आठ सौ करोड़ रूपिया जल्दी ही जारी करे जाही। केन्द्रीय खाद्य मंत्री पीयूष गोयल ह छत्तीसगढ़ के मुख्यमंत्री भूपेश बघेल के संग नई दिल्ली म होय बैठक म ए जानकारी दीन। बैठक के दउरान बताय गीस कि छत्तीसगढ़ ले केन्द्रीय पूल बर खरीदे जाने वाला चावल के मात्रा बर चैबीस लाख मीटरिक टन के अधिकतम सीमा लगाय गेहे, जेन ह पाछु बछर स्वीकृत मात्रा के बराबर हे। खरीदे जाने वाला मात्रा समेत केन्द्रीय पूल बर खरीद संचालन पूरा तरह ले केन्द्र सरकार, भारतीय खाद्य निगम अउ संबंधित राज्य सरकार के बीच एम.ओ.यू. उपर आधारित हे।
बइठका म खरीदी विपणन बछर दू हजार बीस-इक्कीस के दउरान राज्य म 40 लाख मीटरिक टन चावल ल स्वीकार करे उपर घलो चर्चा होईस।
माद्यी पुन्नी मेला
छत्तीसगढ़ के प्रयाग के नाम से प्रसिद्ध राजिम म आज ले माद्यी पुन्नी मेला सुरू होगे हे। ये अवसर म महानदी, पैरी अउ सोंढूर के त्रिवेणी संगम म श्रद्धालु मन डूबकी लगाईन अउ भगवान राजीव लोचन अउ कुलेश्वर महादेव के दर्शन करीन। ये मेला आगामी ग्यारह मार्च महाशिवरात्रि तक चलही। माघी पुन्नी मेला म हर दिन संझा छत्तीसगढ़ के सुप्रसिद्ध लोक कलाकार मन डहार ले पारंपरिक कला अउ संस्कृति पर आधारित कार्यक्रम प्रस्तुत करे जाही।
उहें, जांजगीर-चांपा जिला के शिवरीनारायण म घलो माघी स्नान के संगेसंग मेला सुरू होगे हे। ए अवसर म त्रिवेणी संगम म श्रद्धालु मन डूबकी लगाईन अउ भगवान नर-नारायण के दर्शन करीन।
मुख्यमंत्री भूपेश बघेल ह राजिम माघी पुन्नी मेला अउ शिवरीनारायण मेला के प्रदेसवासी मन ल बधाई अउ शुभकामना दीन।
अबूझमाड़ पीस हाफ मैराथन
नारायणपुर जिला म आज अबूझमाड़ पीस हाफ मैराथन के आयोजन करे गीस। जेमा देश-विदेश के लगभग ग्यारह हजार धावक सामिल होईन। ए मैराथन म हैदराबाद के अनीब थापा ह प्रथम स्थान हासिल करीस। उहें, महाराष्ट्र के अंगारिया विक्रम ह दूसरइया अउ दीपक बापू ह तीसरइया स्थान म रिहीस। महिला वर्ग म उत्तरप्रदेश के रीनू पहिली स्थान म रिहीस। जबकि उत्तरप्रदेश के ही तामसी सिंह ह दूसरइया अउ महाराष्ट्र के ज्योति. जे. चैहान ह तीसरइया स्थान प्राप्त करीस। मैराथन दौड़ ओरछा विकासखंड के ग्राम बासिंग म संपन्न होईस, जिहां बस्तर सांसद दीपक बैज अउ दूसर अतिथि मन जीतइया प्रतिभागी मन ल पुरस्कृत करीन।
ए अवसर म राज्यसभा सांसद फूलोदेवी नेताम, विधायक चंदन कश्यप अउ देवेन्द्र यादव मौजूद रिहीन।
शिक्षा मंत्री-स्पष्टीकरण
स्कूल शिक्षा मंत्री डाॅक्टर प्रेमसाय सिंह टेकाम म स्पष्ट करे हे कि छत्तीसगढ़ म कोरोना के कारण इकतीस मार्च तक स्कूल बंद करइया संबंधी खबर पूरी तरह ले निराधार अउ भ्रामक आय।
लोक शिक्षण संचालक जितेन्द्र शुक्ला ह ए संबंध म बतईन कि अइसन कोई भी आदेश विभाग डहार ले जारी नइ करे गेहे। ओमन बतईन कि प्रदेस म स्कूल संचालन के जेन आदेस राज्य सरकार डहार ले दे गे रिहीस हे, उही तरीका ले संचालित होवत रइही। सब्बो परीक्षा घलो पूर्व निर्धारित कार्यक्रम के अनुसार संचालित होही। ओमन किहीन कि लोगन मन अइसन भ्रामक खबर से सचेत राहय अउ विभाग डहार ले जारी आधिकारिक आदेस में ही भरोसा करय।
मन की बात
प्रधानमंत्री नरेन्द्र मोदी काली आकाशवाणी से मन की बात कार्यक्रम म देस-विदेश के लोगन मन से अपन विचार साझा करही। ए ह मासिक रेडियो कार्यक्रम के चैहत्तवीं कड़ी आय। आकाशवाणी अउ दूरदर्शन के सब्बो नेटवर्क म एखर प्रसारण होही। ये आकाशवाणी समाचार के वेबसाइट अउ न्यूज आॅन एआईआर मोबाइल ऐप म घलो उपलब्ध रइही। मन की बात कार्यक्रम, आकाशवाणी, दूरदर्शन समाचार, प्रधानमंत्री कार्यालय अउ सूचना अउ प्रसारण मंत्रालय के यू-ट्यूब चैनल मन म घलो सीधा प्रसारित होही।
आकाशवाणी से हिन्दी में प्रसारण के तुरंत बाद क्षेत्रीय भासा मन में घलो एला प्रसारित करे जाही। क्षेत्रीय भासा में एला रात आठ बजे फेर सुने जा सकत हे।
हमर ग्राम सभा
पंचायत अउ ग्रामीण विकास मंत्री टी.एस. सिंहदेव काली रतिहा साढ़े सात बजे आकाशवाणी रायपुर ले प्रसारित बिसेस कार्यक्रम ‘‘हमर ग्राम सभा‘‘ म राज्य सासन के नीति, योजना अउ कार्यक्रम मनके बारे म जानकारी दीही। ए कार्यक्रम ल मीडियम वेव 981 किलोहटर््स म सुने जा सकत हे। ए कार्यक्रम ल प्रदेस स्थित आकाशवाणी के सबो केन्द्र एक संग रिले करही।
भाजपा-बेटी बचाओ
बेटी बचाओ-बेटी पढ़ाओ अभियान के तहत भारतीय जनता पार्टी प्रदेस कार्यसमिति के बइठका रायपुर के एकात्म परिसर स्थित पार्टी कार्यालय म आयोजित करे गीस। बइठका म प्रदेसभर ले आय पदाधिकारी मन ह बेटी बचाओ-बेटी पढ़ाओ अभियान ल सार्थक बतावत हुए ए संकल्प लीन कि अब कोनों भी क्षेत्र के बेटी मन उपर अत्याचार होही, त ओला बर्दास्त नइ करे जाय।
प्रदेस प्रभारी विभा राव ह किहीन कि महिला मन उपर अत्याचार के सूचना मिलही, त बेटी बचाओ-बेटी पढ़ाओ समिति ह आगू बढ़के बेटी मन ल इंसाफ दिलाय के काम करही। ओमन किहीन कि ए अभियान समाज म महिला मनके संग होवत अन्याय अउ अत्याचार के विरूद्ध एक पहल आय।
अभियान के प्रदेस संयोजक अंजय शुक्ला ह किहीन कि बेटी बचाओ-बेटी पढ़ाओ अभियान के उद्देश्य बेटी मनके अस्तिव ल बचाना अउ उंखर सुरक्षा ल सुनिश्चित करना आय।
थल सेना भर्ती रैली
भारतीय थल सेना द्वारा दुर्ग के पंडित रविशंकर शुक्ल स्टेडियम म तीन से बारह मार्च तक भर्ती रैली के आयोजन करे जाही। ये भर्ती रैली म छत्तीसगढ़ के अट्ठाईस जिला के करीब चालीस हजार उम्मीदवार मन सामिल होही।
आयोजक मन ह कोरोना संक्रमण से बचाव बर भर्ती म सामिल होवइया उम्मीदवार मन से चिकित्सा अधिकारी मन डहार ले जारी प्रमाण पत्र लाय बर केहे हे। उम्मीदवार मन बर आवास अउ भोजन के व्यवस्था दुर्ग जिला प्रशासन द्वारा करे जाही।
ओति, जांजगीर-चांपा के पुलिस ग्राउंड अउ अकलतरा के पंडित दीनदयाल स्टेडियम म भर्ती रैली म सामिल होने वाला जिला के अभ्यर्थी मन ल काली अट्ठाईस फरवरी के निःशुल्क प्रशिक्षण दे जाही।
धान/ई-नीलामी
प्रदेस के खरीफ विपणन बछर दू हजार बीस-इक्कीस म उपार्जित सरप्लस धान के नीलामी आॅनलाइन प्लेटफाॅर्म के माध्यम ले तीन मार्च ले सुरू होही। नीलामी बर अब तक 30 बिडर्स मनके पंजीयन करे जा चुके हे। नीलामी बर ई-आॅक्सन प्लेटफाॅर्म म क्रेता पंजीयन के प्रक्रिया के संबंध म इच्छुक प्रतिभागी मन ला मेसर्स एन.सी.डी.ई.एक्स.ई.-मार्केट लिमिटेड डहार ले आज गूगल मिट के माध्यम ले आॅनलाइन जानकारी दे गीस। एखर अलावा पंजीयन अउ नीलामी प्रक्रिया के संबंध म एक मार्च के घलो मंझनिया तीन बजे ले रायपुर स्थित नवीन विश्राम गृह म प्रसिक्षण कार्यक्रम आयोजित करे जाही। नीलामी के समय-सारिणी अउ सूचना के प्रकासन मार्कफेड डहार ले करे जा चुके हे।
नेहरू युवा केन्द्र-बैठक
प्रदेस म नेहरू युवा केन्द्र द्वारा सासकीय विभाग मन से समन्वय कर नसा मुक्ति, बालिका शिक्षा अउ पर्यावरण संरक्षण ल लेके जन-जागरूकता अभियान चलाय जाही। खेल अउ युवा कल्याण मंत्री उमेश पटेल ह राज्य स्तरीय सलाह समिति के बइठका म नेहरू युवा केन्द्र राज्य संचालक ल ए संबंध म जरूरी निर्देश दीन। श्री पटेल ह किहीन कि ए काम म अधिक से अधिक युवा मनके भागीदारी सुनिश्चित करे जाना चाही।
नेहरू युवा केन्द्र संगठन के राज्य संचालक श्रीकांत पांडेय ह बतईन कि संगठन द्वारा सासन के दूसर विभाग मन से समन्वय स्थापित कर प्रदेस म अलग-अलग जनकल्याणकारी गतिविधि अउ कौशल विकास प्रशिक्षण जइसे कार्यक्रम मनके संचालन करे जात हे। ओमन बतईन कि प्रदेस के सोलह जिला म नेहरू युवा केन्द्र के कार्यालय स्थापित हे। शेष बारह जिला मन म घलो कार्यालय सुरू करे के कार्रवाई करे जात हे।
उच्च शिक्षा-नैक ग्रेडिंग
उच्च शिक्षा मंत्री उमेश पटेल ह प्रदेश म संचालित सब्बो शासकीय उच्च शिक्षण संस्थान मनके नैक ग्रेडेशन म सुधार लाय बर मिशन मोड म काम करे के निर्देश देहे। श्री पटेल ह मंत्रालय म आयोजित बइठका म राष्ट्रीय मूल्यांकन अउ प्रत्यायन परिषद-नैक के ग्रेडेशन ल लेके प्रदेस म संचालित शासकीय विश्वविद्यालय अउ महाविद्यालय मनके गतिविधि मन उपर समीक्षा करीन। ओमन नैक ग्रेडेशन म सुधार बर प्रभारी कार्ययोजना बनाय अउ ओखर क्रियान्वयन करे के निर्देश विश्वविद्यालय मनके कुलपति अउ महाविद्यालय मनके प्राचार्य ल दीन। नैक ग्रेडेशन में सुधार कार्य के निगरानी अउ माॅनिटरिंग बर राज्य, जिला अउ विश्वविद्यालय स्तर म दल मनके गठन घलो करे जाही।