प्रधानमंत्री-नीति आयोग
प्रधानमंत्री नरेन्द्र मोदी ह ए बात म जोर देवत किहीन कि सहकारी संघवाद ल अधिक सार्थक बनाय खातिर केन्द्र अउ राज्य मन ल मिलजुल के काम करना चाही। नीती आयोग के सासकीय परिषद के 6वां बइठका म आज वीडियो कान्फ्रेंस के माध्यम ले अपन सुरूवाती संबोधन म श्री मोदी ह ए गोठबात किहीन।
प्रधानमंत्री ह किहीन हे कि ए बछर के बजट म उठायगे रचनात्मक कदम मनके स्वागत होय हे, जेखर ले राष्ट्र के विचार के पता चलथे। श्री मोदी ह किहीन कि आत्मनिर्भर अभियान भारत के निर्माण के महत्वपूर्ण उपाय हे। एखर उद्देश्य न केवल खुद के, बल्कि विश्व के जरूरत मन ल घलो पूरा करना हे।
प्रधानमंत्री ह किहीन कि भारत के निजी क्षेत्र घलो बड़ उछाह के साथ आगू आवत हे। ओमन किहीन कि वर्तमान बजट म बुनियादी ढांचा खातिर करेगे धन आवंटन सराहनीय कदम हवय। एखर ले रोजगार के बढ़िया अवसर पैदा होही।
मुख्यमंत्री-नीति आयोग
प्रधानमंत्री के अध्यक्षता म आयोजित नीति आयोग के गवर्निंग काउंसिल के बइठका म छत्तीसगढ़ के मुख्यमंत्री भूपेश बघेल रईपुर स्थित अपन निवास कार्यालय ले वीडियो कान्फ्रेंसिंग के माध्यम ले सामिल होईन। बइठका म मुख्यमंत्री ह प्रधानमंत्री ले छत्तीसगढ़ राज्य ल बिसेस पैकेज देके मांग करीन।
बइठका म मुख्यमंत्री ह कहिन कि छत्तीसगढ़ वन-आच्छादित, आदिवासी बहुल अउ खनिजधारित प्रदेस हवय, जिहां उद्योग-कारखाना मनके विकास खातिर बिसेस पैकेज के जरूरत हे। श्री बघेल ह प्रदेस म उद्योग, कृषि क्षेत्र, अधोसंरचना, माओवाद प्रभावित क्षेत्र मन म विकास के संगेसंग बस्तर म सिंचाई सुविधा बढ़ाय सहित राज्य सरकार के आने-आने योजना अउ नीति मनके जानकारी देवत छत्तीसगढ़ ल अतिरिक्त आर्थिक संसाधन उपलब्ध कराय के आग्रह करीन। ओमन वर्मी कम्पोस्ट खाद म घलो रसायनिक उर्वरक जइसन सब्सिडी दे जाय के बात किहीन अउ नगरनार इस्पात संयंत्र के विनिवेश नइ करे के संगेसंग कार्गो हब अउ निर्यात खातिर पोर्ट सुविधा के मंजूरी देके के बात घलो किहीन।
बइठका म मुख्यमंत्री ह केन्द्रीय पूल म छत्तीसगढ़ ले 60 लाख मीटरिक टन चाउर ले खातिर अउ बोधघाट बहुउद्देशीय सिंचाई परियोजना खातिर केन्द्र सरकार ले सहयोग दे जाय के अनुरोध करीन। श्री बघेल ह माओवाद प्रभावित क्षेत्र मन म सड़क अउ पुलिया निर्माण अउ अधोसंरचना विकास के काम मन खातिर लगाय गे सर्त मन ल सिथिल करे के आग्रह करीन।
मुख्यमंत्री-रक्षा मंत्री पत्र
मुख्यमंत्री भूपेश बघेल ह केन्द्रीय रक्षा मंत्री राजनाथ सिंह ल पत्र लिखके बिलासपुर म थल सेना छावनी के स्थापना जल्द ले जल्द करे जाय के निवेदन करीन हे। मुख्यमंत्री ह अपन पत्र म लिखीन हे कि छत्तीसगढ़ सरकार ह बिलासपुर म लगभग 1000 एकड़ भूमि रक्षा मंत्रालय ल थल सेना छावनी के स्थापना खातिर आवंटित करे हे। लेकिन थल सेना छावनी के स्थापना के प्रक्रिया अब तक लंबित हवय।
सुरूआत म थल सेना छावनी के स्थापना खातिर हवाई पट्टी के आवश्यकता बताय गे रिहीस। एला ध्यान म राखत राज्य सरकार ह बिलासपुर म हवाई पट्टी के विस्तार करा के आवश्यक प्रक्रिया ल पूरा कर ले हवय। बिलासपुर स्थित बिलासा बाई केवटीन हवाई अड्डा अब डी.जी.सी.ए. डहार ले थ्री-सी वी.एफ.आर. कैटेगरी म मान्यता प्राप्त हवय। ए हवाई पट्टी सिविल एविएशन अउ थन सेना के विमानन संबंधी आवश्यकता मन ल पूरा करे खातिर उपलब्ध हवय।
स्वास्थ्य मंत्री-कोविड टीका
केन्द्रीय स्वास्थ्य मंत्री डाॅक्टर हर्षवर्धन ह एक घांव फेर केहे हे कि कोविड के टीका सुरक्षित हवय। ओमन जम्मों नर्स, आंगनबाड़ी कार्यकर्ता, स्वास्थ्य सेवा अउ अग्रिम पंक्ति के कार्यकर्ता मन ले अपील करीन हे कि ओमन कोविड वैक्सीन लगवाय खातिर आगू आवय। कोविड टीकाकरण के बारे म गलत सूचना, अफवाह अउ नकारात्मक संदेस मन ल खारिज करत डाॅक्टर हर्षवर्धन ह किहीन कि कुछु भ्रम पैदा करइया धारणा ल जानबूझ के फइलाय जावत हे, जउन ह ठीक नइ हवय। ओमन लोगन ले किहीन कि अइसन भ्रम ले बचना चाही। ओमन किहीन कि अभी तक एक करोड़ ले जादा कोविड वैक्सीन के खुराक सफलतापूर्वक अउ सुरक्षित रूप ले दे गे हवय, जउन सिद्ध करथे कि टीका सुरक्षित हवय। स्वास्थ्य मंत्री ह लोगन मन ले एकजुट होके कोविड के खिलाफ लड़े खातिर संदेस दीन।
भाजपा महिला मोर्चा-प्रदर्शन
प्रदेस म माईलोगिन उपर होवइया अत्याचार अउ अनाचार के घटना मनके विरोध म भारतीय जनता पार्टी महिला मोर्चा डहार ले आज राजधानी रईपुर सहित प्रदेसभर म धरना-प्रदर्शन करे गीस। ए मउका म महिला मोर्चा के पदाधिकारी मन ह राज्य सरकार उपर आरोप लगावत किहीन कि प्रदेस म माईलोगिन मनके खिलाफ अपराध के घटना म लगातार बढ़ोतरी होवत हे। ए घटना मन ल रोके म राज्य सरकार पूरा तरह ले असफल रेहे हे। धरनास्थल म कोरबा जिला के लेमरू पंचायत के ग्राम बरपाली म एकेच कोरवा आदिवासी परिवार के तीन झन लोगन मनके हत्या के पीड़ित परिवार के एकमात्र माईलोगिन घलो मंच म पहुंचीन।
धरना-प्रदर्शन के बाद महिला मोर्चा के एक ठिन प्रतिनिधिमंडल ह राजभवन म राज्यपाल अनुसुईया उइके ले भेंट करके ओमन ल ज्ञापन सौंपीन। प्रतिनिधिमंडल म राज्ससभा संासद सरोज पांडेय, पूर्व मंत्री लता उसेंडी, रमशीला साहू, प्रभा दुबे अउ संगीता शर्मा घलो सामिल रिहीन।
उहें, विधानसभा म नेता प्रतिपक्ष धरमलाल कौशिक ह आरोप लगाईन हे कि राज्य सरकार प्रदेस म बाढ़त अपराध के आंकड़ा ल छिपाय खातिर भ्रामक जानकारी देवत हे। छत्तीसगढ़ जम्मों देस म अपराध के मामला म पहिली स्थान म हवय।
महिला उत्पीड़न-पुलिस कार्रवाई
छत्तीसगढ़ पुलिस के कहना हे कि महिला मनके विरूद्ध होवइया अपराध मन खातिर छत्तीसगढ़ पुलिस त्वरित कार्रवाई करत हवय। पुलिस द्वारा महिला उत्पीड़न के मामला म आरोपी मन ल न केवल गिरफ्तार करे जावत हे, बल्कि तुरते चालान पेस करके आरोपी मन ल न्यायालय ले सजा घलो दिलाय जावत हे।
छत्तीसगढ़ पुलिस डहार ले माईलोगिन मनके विरूद्ध अपराध मन म बिसेस कार्रवाई करइया पुलिस अधिकारी मन खातिर सुपर इन्वेस्टिगेटर सम्मान प्रारंभ करे गे हवय। एखर तहत पुलिस महानिदेशक डी.एम. अवस्थी ह 16 झन पुलिस अधिकारी मन ल सुपर इन्वेस्टिगेटर सम्मान ले सम्मानित करीन।
हमर ग्राम सभा
पंचायत अउ ग्रामीण विकास मंत्री टी.एस. सिंहदेव काली रतिहा साढ़े सात बजे आकाशवाणी रायपुर ले प्रसारित बिसेस कारीकरम ‘‘हमर ग्राम सभा‘‘ म राज्य सासन के नीति, योजना अउ कारीकरम मनके बारे म जानकारी दीहीं। ए कारीकरम ल मीडियम वेव 981 किलोहर्ट्ज म सुने जा सकत हे। ए कारीकरम ल प्रदेस स्थित आकाशवाणी के सबो केन्द्र एके संघरा रिले करही।
हाथी-उत्पात
धमतरी जिला के गंगरेल बांध इलाका म ए बेरा हाथी मनके दल ह किंजरत हवय। हाथी मनके दल ह गंगरेल बांध के पास बने गार्डन म उत्पात मचाईन अउ उहां लगे पेड़-पौधा, झूला, बिजलीखंभा, गेट अउ सी.सी.टी.वी. कैमरा मन ल तोड़ के नुकसान कर दीन। वन विभाग के टीम द्वारा ए हाथी मन ल बांध के ओ पार जंगल डहार खदेड़े के प्रयास करे जावत हे। एखर बावजूद हाथी मनके दल गंगरेल बांध के आसे-पास मौजूद हवय।
हाथी मनके विचरण के सेती धमतरी कलेक्टर ह गंगरेल पर्यटन क्षेत्र के गार्डन, बगीचा अउ अंगार मोती मंदिर म अवइया पर्यटक मनके दर्सन अउ वाटर स्पोर्ट्स गतिविध मन म आगामी आदेस तक प्रतिबंध लगा दीन हे। एखर अलावा हाथी मन जउन ग्राम पंचायत म घुमत हवय, उहां के मनखे मनके सुरक्षा खातिर हाई अलर्ट घोषित कर दे गे हवय।
लाइट मेट्रो रेल
छत्तीसगढ़ म घलो अब लाइट मेट्रो रेल दौड़ही। राजधानी रईपुर म लाइट मेट्रो खातिर जल्द ही डीपीआर बनाय के काम सुरू होही। केन्द्रीय आवासीय अउ सहरी विकास मंत्री हरदीप सिंह पुरी ह लाइट मेट्रो परियोजना म अपन सहमति जतावत प्रोजेक्ट तैयार करे खातिर हरी झंडी दीन हे।
प्रदेस के नगरीय प्रशासन मंत्री डाॅक्टर शिवकुमार डहरिया ह नई दिल्ली म केन्द्रीय मंत्री ले भेंट करके ओमन ल छत्तीसगढ़ म करे जावत विकास कार्य के संबंध म विस्तार ले जानकारी दीन।