केन्द्रीय सड़क परिवहन अउ राजमार्ग मंत्री नितिन गडकरी ह भारतमाला योजना के तहत छत्तीसगढ़ के तीन राजमार्ग मन ल सामिल करे के अनुमति दे दीन हे। ए जानकारी मुख्यमंत्री भूपेश बघेल ह दीन हे। नई दिल्ली प्रवास के दउरान श्री बघेल ह आज श्री गडकरी ले मुलाकात करीन। ए दउरान केन्द्रीय मंत्री ले मुख्यमंत्री ह प्रदेस के माओवाद प्रभावित अउ औद्योगिक क्षेत्र के विकास बर सड़क अउ परिवहन सुविधा म विस्तार करे के आग्रह करीन। मुख्यमंत्री के अनुसार ओमन के आग्रह म केन्द्रीय मंत्री ह छत्तीसगढ़ बर करीब बीस हजार करोड़ रूपिया के सड़क निर्माण कार्य बर अपन सहमति दे दीन।
केन्द्रीय मंत्री ह रायगढ़-धरमजयगढ़ मार्ग, अंबिकापुर-भैंसामुड़ा-वाड्रफनगर- धनगांव-बम्हनी-रेनुकुट-बनारस मार्ग अउ पंडरिया-बजाग-गाड़ासरई मार्ग ल भारतमाला योजना म सामिल करे के अनमुति दीन। एखर अलावा केन्द्रीय मंत्री ह मुख्यमंत्री के अनुरोध म रईपुर-दुर्ग बायपास, रईपुर-विशाखापट्टनम मार्ग अउ बिलासपुर-उरगा मार्ग के निर्माण काम घलो जल्दी सुरू करे के सहमति दीन।बघेल-विमानन मंत्री
उहें, केन्द्रीय विमानन मंत्री हरदीप सिंह पुरी ह बिलासपुर ल दिल्ली हवाई सेवा ले जोड़े के घोसना करीन हे। मुख्यमंत्री ह दिल्ली प्रवास के दउरान केन्द्रीय विमानन मंत्री ले घलो भेंट करीन। चर्चा के दउरान केन्द्रीय मंत्री ल श्री बघेल ह क्षेत्रीय संपर्क योजना के तहत बिलासपुर ल दिल्ली, मुंबई अउ कोलकाता जइसन महानगर ले हवाई सेवा ले जोड़े के आग्रह करीन। एमा केन्द्रीय मंत्री ह बिलासपुर ले दिल्ली के बीच तत्काल हवाई सेवा सुरू करे म सहमति दीन। संगेसंग केन्द्रीय मंत्री ह रईपुर म कार्गों हब के सुविधा सुरू करे बर एयरपोर्ट अथाॅरिटी आॅफ इंडिया के चेयरमैन ल स्थल निरीक्षण करके जरूरी प्रक्रिया सुरू करे बर कहिन।
तोमर-किसान
केन्द्रीय कृषि मंत्री नरेन्द्र सिंह तोमर ह राज्यसभा म जोर देवत कहिन कि प्रधानमंत्री नरेन्द्र मोदी के अगुवई म सरकार देस म गांव, गरीब अउ किसान मनके विकास बर प्रतिबद्ध हवय। राज्यसभा म आज राष्ट्रपति के अभिभाषण उपर धन्यवाद प्रस्ताव म आगे चर्चा होईस। चर्चा म भाग लेवत श्री तोमर ह किहीन कि सरकार किसान मनके आय ल दुगुना करे के लक्ष्य बर प्रतिबद्ध हवय अउ नवा कृषि कानून उही ल प्राप्त करे बर बनाय गेहे।
श्री तोमर ह किसान आंदोलन उपर बात किहीन कि सरकार ह किसान मन ल प्रस्ताव देके घलो कोसिस करीन। ओमन किहीन कि अगर सरकार कोनों संसोधन बर तैयार हे त एखर मायने नइ लगाना चाही कि किसान कानून म कोन्हों गलती हे।
ऐति, अखिल भारतीय कांग्रेस कमेटी किसान संगठन समेत कई ठिन आने संगठन मनके आह्वान म किसान आंदोलन के समर्थन म राज्य म ब्लाॅक स्तर म प्रदर्सन करे जाही।
सुप्रीम कोर्ट-न्यायाधीश
छत्तीसगढ़ उच्च न्यायालय ल दू झिन नवा न्यायाधीश मिले हे। उच्चतम न्यायालय के काली होय काॅलेजियम के बइठका म ए निर्णय ले गीस। न्यायमूर्ति नरेन्द्र कुमार व्यास अउ नरेश कुमार चंद्रवंशी ल छत्तीसगढ़ उच्च न्यायालय के न्यायाधीश नियुक्त करे गेहे। न्यायाधीश श्री चंद्रवंशी वर्तमान म राज्य के विधि विभाग म प्रमुख सचिव के रूप म पदस्थ हवय। उहें, न्यायमूर्ति श्री व्यास वरिष्ठ अधिवक्ता हवय अउ साॅलिसिटर जनरल घलो रहि चुके हे।
हाईकोर्ट-सहायक प्राध्यापक भर्ती
छत्तीसगढ़ उच्च न्यायालय ह रईपुर स्थित इंदिरा गांधी कृषि विश्वविद्यालय म सहायक प्राध्यापक भर्ती प्रक्रिया म अनुसूचित जाति बर आरक्षित एक ठिन पद के भर्ती उपर अवइया सुनवाई तक रोक लगा देहे। न्यायाधीश गौतम भादुड़ी के सिंगल बेंच म छह हफ्ता बाद ए मामला के अगला सुनवाई होही। एक याचिकाकर्ता ह बताय रिहीस कि एक उम्मीदवार ह गैर मान्यता प्राप्त विश्वविद्यालय ले पीएचडी के डिग्री हासिल करे रिहीस अउ संगेसंग सहायक प्राध्यापक के भर्ती प्रक्रिया के दउरान सही जानकारी नइ दीस। ए याचिका उपर सुनवाई करत न्यायालय ह सहायक प्राध्यापक के पूरा भर्ती प्रक्रिया उपर रोक नइ लगावत खाली एके पद उपर भर्ती नइ करे के आदेस देहे।
गृह मंत्री-समीक्षा
गृहमंत्री ताम्रध्वज साहू ह रोजगार के मउका बढ़ाय बर गौठान मन ल बहुउद्देश्यीय कार्यस्थल के रूप म विकसित करे के निरदेस दीन हे। श्री साहू ह आज राजिम म गरियाबंद जिला के विकास कार्य मनके समीक्षा करीन। बइठका म ओमन कृषि, सड़क, राजस्व अउ सार्वजनिक वितरण प्रणाली के कार्य मनके बारे म जानकारी लीन। गृह मंत्री ह अधिकारी मन ल निरदेस दीन कि ओमन किसान के आय बढ़ाय बर ओमन ल धान के अलावा दूसर फसल बर प्रेरित करय। संगेसंग ओमन अधिकारी मन ल नामांतरण, बंटवारा अउ सीमांकन प्रकरण मनके घलो प्राथमिकता के संग निराकरण करे बर किहीन।
पेसा कानून-राष्ट्रीय कार्यशाला
छत्तीसगढ़ म पेसा कानून लागू करे के नियम बनाय उपर विचार-विमर्श खातिर राजधानी रईपुर म राष्ट्रीय कार्यसाला राखे गीस। एमा पंचायत मंत्री टी.एस. सिंहदेव अउ आदिम जाति कल्याण मंत्री डाॅक्टर प्रेमसाय सिंह टेकाम के संग देसभर के आदिवासी समाज के प्रतिनिधि अउ बिसेसज्ञ मन सामिल होईन। निमोरा म राखे गे ए चार दिन के कार्यसाला म बिसेसज्ञ आदिवासी समाज के प्रतिनिधि, गैर सरकारी संगठन अउ संबंधित सासकीय विभाग के अधिकारी मन अपन सुझाव दीन।
पंचायत मंत्री श्री सिंहदेव ह बतईन कि राज्य म पेसा कानून लागू करे बर प्रभावी नियम बनाय के संबंध म कतकोन संगठन के प्रतिनिधि मन ले चर्चा के दौर लगातार जारी हे।
मक्का खरीदी
प्रदेस म ए दिन म समर्थन मूल्य म मक्का के खरीदी चालू हे। अब तक सोलह सौ क्विंटल मक्का के खरीदी करे जा चुके हे। एखर बदला म किसान मन ल उनतीस लाख साठ हजार रूपिया के भुगतान करे गेहे। मक्का बेचे बर राज्य म करीबन एक लाख इक्कीस हजार किसान मन पंजीयन कराय हे। पंजीकृत किसान मन ले अट्ठारह सौ पचास रूपिया प्रति क्विंटल के दर ले मक्का खरीदे जात हे। मक्का खरीदी अवइया इकतीस मई तक चलही।
मौसम
मौसम विभाग ह अवइया चैबीस घंटा के दउरान राज्य म एक-दू जगह म हल्का बरसा होय या गरज-चमक के साथ छींटा पड़े के संभावना जताय हे।
रईपुर स्थित मौसम विज्ञान केन्द्र के अनुसार उत्तर-पूर्व मध्यप्रदेश अउ ओखर आसपास के क्षेत्र म एक चक्रवाती घेरा बने हवय। उहें, एक द्रोणिका घलो सक्रिय हवय। एखर असर ले राज्य के मौसम बदल सकत हे। ए दउरान न्यूनतम तापमान म गिरावट आय के संभावना हे।
अउ अब थोरकुन समाचार सार म-
– भारतीय जनता युवा मोर्चा के प्रदेस अध्यक्ष अमित साहू ह राज्य लोक सेवा आयोग के परीक्षा म कथित अनियमितता के जांच बर न्यायिक जांच समिति गठित करे के मांग करे हे। उहें, आज धमतरी म युवा मोर्चा के पदाधिकारी मन पीएससी परीक्षा म कथित गड़बड़ी के विरोध म प्रदर्सन करीन।- प्रधानमंत्री रोजगार सृजन कारीकरम अउ मुख्यमंत्री युवा स्वरोजगार योजना बर पन्द्रह फरवरी तक आवेदन मंगाय गेहे।
– छत्तीसगढ़ लोक सेवा आयोग डहार ले आयोजित राज्य सेवा प्रारंभिक परीक्षा चैदह फरवरी के होही। ए परीक्षा बर रईपुर सहर म उनहत्तर केन्द्र बनाय गेहे।
– मुख्यमंत्री हाट बाजार क्लीनिक योजना के तहत कांकेर जिला ल दे गे आठ एम्बेलेंस के माध्यम ले पाछु एक हफ्ता म चार सौ मरीज मनके इलाज करे गेहे।
– महासमुंद जिला के सिरपुर क्षेत्र म जंगली हाथी मनके उत्पात चालू हे। पाछु रतिहा तीन दंतैल हाथी मन अछोली गांव म एक किसान के खलियान म पहुंच के धान ल नुकसान पहुंचाई। बाद म हाथी मित्र दल ह ए हाथी मन ल गांव ले बाहिर भगाईस।
अउ
– सुरक्षित यातायात ल धियान म राखत रईपुर जिला कलेक्टर अग्रेसन धाम-वी. डब्ल्यू केन्यान होटल-वीआईपी रोड-फुंडहर चैक-देवपुरी मार्ग म अवइया दू महीना तक बिहनिया छह बजे ले रतिहा दस बजे तक मध्यम अउ भारी मालवाहक मनके आवागमन उपर रोक लगा देहे।