केन्द्रीय बजट-01
केन्द्रीय वित्त मंत्री निर्मला सीतारमन ह लोकसभा म आज वित्त बछर दू हजार इक्कीस-बाईस के डिजिटल बजट पेस करत कई ठिन घोषणा करीन। बजट म आत्मनिर्भर भारत उपर बिसेस धियान केन्द्रित करे गेहे।
बजट म पचहत्तर बछर ले जादा के बड़का नागरिक अउ सिरिफ पेंसन उपर निर्भर मनखे मन ल आयकर रिटर्न भरे ले छूट दे गेहे। बजट म उत्पादन ले जुड़े प्रोत्साहन योजना-पीएसआई घोसित करे हे। एखर बर सरकार चालू वित्तीय बछर ले सुरू करत पांच बछर म करीबन एक लाख संतावन हजार करोड़ रूपिया के बेवस्था करे बर वचनबद्ध हवय।
बजट प्रस्ताव म नवा आर्थिक काॅरीडोर बनाय अउ तीन ठिन नवा रेल परियोजना सुरू करे के घोसना करे गेहे। उहें, पर्यटक मार्ग मन म सुंदर रूप ले डिजाइन करे गे बिस्टाडोम एलएचवी कोच सुरू करे के प्रावधान हे।
बजट म उज्जवला योजना के तहत केन्द्र सरकार ह एमा एक करोड़ परिवार मन सामिल करे के प्रस्ताव करे हे। वित्त मंत्री ह किहीन कि एक नवा केन्द्र प्रायोजित योजना – पीएम आत्मनिर्भर स्वस्थ भारत योजना चैसठ हजार एक सौ अस्सी करोड़ रूपिया के परिव्यय के संग छह बछर बर सुरू करे जाही।
केन्द्रीय बजट-02
बजट म सत्रह हजार सात सौ अठासी ग्रामीण अउ ग्यारह हजार ले जादा सहरी स्वास्थ्य अउ वेलनेस केन्द्र खोले के प्रावधान करे गेहे। राज्य मन म जम्मों जिला म एकीकृत लोक स्वास्थ्य प्रयोगसाला अउ तीन हजार तीन सौ बयासी ब्लाॅक लोक स्वास्थ्य इकाई स्थापित करे जाही। उहें, छह सौ दू जिला अउ बारह केन्द्रीय संस्थान म क्रिटिकल केयर अस्पताल ब्लाॅक स्थापित करे जाही।
केन्द्रीय वित्त मंत्री ह किहीन कि जल जीवन मिशन-सहरी सुरू करे जाही। उहें, बजट म जुन्ना गाड़ी मन ल चरणबद्ध रूप ले हटाय बर स्वैच्छिक वाहन स्क्रैपिंग नीति के घोसना करे गेहे।
वित्त मंत्री ह बतईन कि बजट म कोरोना वैक्सीन बर पैंतीस हजार करोड़ रूपिया दे जाही अउ जरूरत पड़े म जादा रासि दे बर सरकार प्रतिबद्ध हवय। बजट म स्वास्थ्य अउ कल्याण बर दू लाख तेईस हजार आठ सौ छियालीस करोड़ रूपिया के प्रावधान करे गेहे।
बजट म करे गे प्रावधान के मुताबिक केन्द्र सरकार भारतीय जीवन बीमा निगम के इनिशियल पब्लिक आॅफर-आईपीओ घलो लाही।
किसान मन ल समुचित करजा दे बर केन्द्र सरकार ह अवइया वित्त बछर म कृषि ऋण के लक्ष्य ल बढ़ाके सोलह लाख पचास हजार करोड़ रूपिया निर्धारित करे हे।
बजट म प्रवासी मजदूर बर किफायती आवास आपूर्ति बर अधिसूचित किफायती किराया आवास परियोजना मन बर कर म छूट के मंजूरी देके घलो प्रस्ताव हवय।
बजट प्रतिक्रिया
प्रधानमंत्री नरेन्द्र मोदी ह किहीन हे कि ए बजट ले उद्योग, निवेस अउ बुनियादी ढांचा क्षेत्र म बड़ सकारात्मक बदलाव होही। ओमन एला ऐतिहासिक बतावत किहीन कि ए बजट म आत्मनिर्भरता के दृष्टिकोण ल देखे जा सकथे। प्रधानमंत्री ह किहीन कि स्वास्थ्य अउ आरोग्य उपर आधारित ए बजट ले सबो झिन ल फायदा होही। ओमन किहीन कि ए बजट ले युवा मन बर रोजगार के मउका पैदा होही।
ऐति, भाजपा के राष्ट्रीय उपाध्यक्ष अउ पूर्व मुख्यमंत्री डाॅक्टर रमन सिंह ह केन्द्र सरकार डहार ले पेस करे गे बजट ल आत्मनिर्भर भारत के बजट बतईन हे।
उहें, भाजपा के प्रदेस अध्यक्ष विष्णुदेव साय ह आम बजट ल देस के जरूरत मन ल धियान म राखत लोगन म न ल राहत पहुंचाय वाला बजट बतईन हे।
एखर अलावा नेता प्रतिपक्ष धरमलाल कौशिक ह आम बजट ल देस ल आर्थिक विकास के दिसा म आगू लेगइया बतईन हे।
दूसर कोति, प्रदेस अध्यक्ष मोहन मरकाम ह केन्द्रीय बजट म कोन्हों वर्ग के धियान नइ राखे गेहे अउ एला निरासाजनक बजट बतईन हे।
मुख्यमंत्री-सुकमा
मुख्यमंत्री भूपेश बघेल ह आज सुकमा जिला म करीबन दू सौ पच्यासी करोड़ रूपिया के आने-आने विकास काम के लोकार्पण अउ भूमिपूजन करीन। ए विकास म सड़क, स्कूल, पंचायत अउ आंगनबाड़ी भवन के संगेसंग कई ठिन काम सामिल हवय। ए मउका म मुख्यमंत्री ह कुम्हाररास म स्वामी आत्मानंद सरकारी अंग्रेजी माध्यम स्कूल के लोकार्पण घलो करीन।
एखर पहिली, मुख्यमंत्री ह काली दंतेवाड़ा दउरा के दउरान एक ठिन कारीकरम ल संबोधित करत जिला ल गारमेंट हब के रूप म विकसित करे जाय के घोसना करीन। ओमन उम्मीद जतईन कि दंतेवाड़ा म तैयार डेनेक्स गारमेंट के सप्ताई पूरा देस म करे जाही। मुख्यमंत्री ह यहू कहिन कि बस्तर संभाग के सात ठिन जिला म देवगुड़ी मनके कायाकल्प करे जाही।
डीजीपी-कार्रवाई
राज्य के पुलिस महानिदेशक डी.एम. अवस्थी ह अवैध रूप ले सराब बिक्री अउ तस्करी के मामला म रईपुर पुलिस के खिलाफ कार्रवाई करे हे। ओमन अतिरिक्त पुलिस अधीक्षक अउ सीएसपी ल नोटिस जारी करे हे। संगेसंग एक झिन थाना प्रभारी ल सस्पेंड घलो कर देहे। श्री अवस्थी ह राजधानी के राजेन्द्र नगर थाना क्षेत्र म बड़ मात्रा म अवैध रूप ले रखे सराब बरामद होय के मामला म ए कार्रवाई करे हे।
सड़क हादसा
बस्तर जिला म काली होय एक ठिन सड़क हादसा म नौ झिन माईलोगिन मनके मउत होगे। उहें, तेरह झिन लोगन घायल होगे हे।
मिले खबर के मुताबिक ए घटना छत्तीसगढ़-ओड़िसा सीमा म स्थित कोटपाड इलाका म होय हे। बताय जात हे कि जगदलपुर म रहइया एके परिवार के लोगन ओड़िसा के मूरताहांडी गांव म सोक कारीकरम म सामिल होय के बाद वापिस लहुटत रिहीन। इही दउरान उंखर गाड़ी अनते-तनते होके एक ठिन पेड़ ले टकरा गे। घटना जघा म नौ झिन माईलोगिन के मउत होगे। घायल लोगन मन ल कोटापाड अउ कोरापुट के अस्पताल म भर्ती कराय गेहे।
ऐति, दुरूग-नागपुर राष्ट्रीय राजमार्ग म कुम्हारी के तीर काली होय एक ठिन सड़क हादसा म तीन झिन युवक के मउत होगे। उहें, एक झिन युवक घायल होगे हे। पुलिस के मुताबिक तेज रफ्तार कार ह पहली एक ठिन फटफटी ल टक्कर मार दीस। एखर बाद ए कार खड़े ट्रक ले जा के टकरा गे। ए हादसा म फटफटी सवार एक झिन युवक अउ कार म सवार दू झिन युवक के मउकाच म मउत होगे।
सिनेमा हाॅल-अनुमति
केन्द्र सरकार ह अपन पूरा क्षमता के संग सिनेमा हाॅल खोले के मंजूरी दे देहे। केन्द्रीय सूचना अउ प्रसारण मंत्री प्रकाश जावड़ेकर ह काली सिनेमा हाॅल अउ थियेटर म कोविड-नाइंटीन के प्रसार ल रोके बर जरूरी उपाय म नवा मानक संचालन प्रक्रिया-एसओपी जारी करीन। मानक संचालक प्रक्रिया म केहे गेहे कि कंटेन्मेंट जोन म सिनेमा देखाय के मंजूरी नइ दे जाही।
रोशनलाल अग्रवाल-निधन
रायगढ़ के पूर्व विधायक अउ भाजपा नेता रोशनलाल अग्रवाल के आज मंझनिया नई दिल्ली म निधन होगे। श्री अग्रवाल पाछु मंगलवार के चक्कर आय के बाद सीढ़िया ले गिरके घायल होगे रिहीन। एखर बाद ओमन ल इलाज बर नई दिल्ली लेगे रिहीस।
भाजपा के राष्ट्रीय उपाध्यक्ष अउ पूर्व मुख्यमंत्री डाॅक्टर रमन सिंह ह श्री अग्रवाल के निधन ल पार्टी बर अपूरणीय क्षति बतईन हे। उहें, राष्ट्रीय उपाध्यक्ष सौदान सिंह, प्रदेस अध्यक्ष विष्णुदेव साय अउ प्रदेश भाजपा संगठन महामंत्री पवन साय ह घलो श्री अग्रवाल के निधन म सोक जताईन हे।
पक्षी महोत्सव
बेमेतरा जिला के गिधवा-परसदा जलासय देस-बिदेस ले अवइया पक्षी बर एक ठिन सुघ्घर जगह के रूप म हवय। एला देखत ए जलासय म पहिली घांव ‘‘हमर चिरई-हमर चिन्हारी‘‘ पक्षी महोत्सव के आयोजन करे जावत हे। जाड़ के मौसम ल हरेक बछर ए क्षेत्र म करीबन डेढ़ सौ प्रजाति के प्रवासी पक्षी मन आथे।
प्रधान मुख्य वन संरक्षक राकेश चतुर्वेदी ह ए पक्षी महोत्सव के सुभारंभ करत किहीन कि अवइया बेरा म गिधवा-परसदा जलासय के चिन्हारी अंतर्राष्ट्रीय मानचित्र म स्थापित होही। श्री चतुर्वेदी ह यहू किहीन हे कि अवइया दिसंबर महीना म राज्य के सात ठिन जघा म पक्षी महोत्सव के आयोजन करे जाही।
मौसम
प्रदेस म ए दिन सुष्क हवा आवत हे। एखर असर ले अवइया दिन म जाड़ा कम होय के आसार हे। रईपुर स्थित मौसम विज्ञान केन्द्र ले मिले खबर के मुताबिक अवइया चैबीस घंटा के दउरान राज्य म मौसम सुष्क रइही।