प्रधानमंत्री-किसान सम्मान निधि
प्रधानमंत्री नरेन्द्र मोदी ह आज प्रधानमंत्री किसान सम्मान निधि म अट्ठारह हजार करोड़ रूपिया ले जादा के रकम वीडियो कान्फ्रेंसिंग ले करीबन नौ करोड़ किसान मनके खाता म जारी करीन। ए मउका म प्रधानमंत्री ह छह ठिन राज्य के लाभार्थी किसान मन ले गोठबात करीन। किसान मन ह प्रधानमंत्री संग कतकोन सरकारी कल्याण कारीकरम के संबंध म अपन अनुभव साझा करीन।
अपन भाषण म श्री मोदी ह किहीन कि जब ले ए योजना सुरू होय हे तब ले एक लाख दस हजार करोड़ रूपिया ले जादा किसान मनके खाता म पहुंच चुके हे। ओमन किहीन कि सोझे खाता म पइसा आय ले हेराफेरी नइ हो सकय अउ राज्य सरकार मन कोति ले किसान मनके आॅनलाईन रजिस्ट्रेसन होय के बाद उंखर आधार नंबर अउ बैंक खाता के जांच के बाद ए बेवस्था करे गेहे।
प्रधानमंत्री ह यहू किहीन कि कुछेक लोगन कोति ले ए भरम फइलाए जात हे कि कहूं किसान मन ह अनुबंध म खेती करही, त उंखर भूईंया ल छीन ले जाही।
ओमन किहीन कि किसान मनके फसल बर बने बीमा सुभीता दे खातिर प्रधानमंत्री फसल बीमा योजना सुरू करे गेहे, जेखर फायदा करोड़ों किसान मन ल मिलत हे। संगेसंग सरकार ह देस के एक हजार ले जादा कृषि मंडी ल आॅनलाईन जोड़े हे, जउन किसान मन बर फायदा के हवय।
ऐति, छत्तीसगढ़ के राजधानी रईपुर म घलो प्रधानमंत्री के भाषण के सोझे प्रसारण जयस्तंभ चउक म करे गीस।
कोरोना-टीकाकरण
केन्द्र सरकार देसभर म कोरोना महामारी बर टीकाकरण सुरू कराय के तैयारी करत हे। आने-आने राज्य मन म टीकाकरण करे बर टीका लगइया मन ल ट्रेनिंग दे जात हे। एखर बर कारीकरम तियार कर ले गेहे। डाॅक्टर, टीका लगइया अउ कारीकरम ले जुड़े आने-आने स्तर के कार्यकर्ता मन ल परसिक्षण दे गेहे।
ऐति, छत्तीसगढ़ म घलो टीकाकरण ल लेके तियारी होगे हे। राजनांदगांव जिला म चैव्वन ठन कोल्डचेन पाइंट बनाय गेहे, जेमा पहिली चरण म चैदह हजार लोगन ल टीका लगाय जाही।
उहें, महासमुंद जिला म कोरोना के टीका लगाय बर हितग्राही मनके सूची विभागीय पोर्टल म अपलोड कर ले गेहे। एखर बर एनआईसी कोति ले दावा आपत्ति इकतीस दिसंबर तक मंगाय गेहे।
इही बीच, कोरोना संक्रमण ल देखत बिसेसज्ञ मन ह लोगन ल तुरते जांच कराय के सलाह देहे।
मुख्यमंत्री-धान खरीदी
मुख्यमंत्री भूपेश बघेल ह किहीन हे कि प्रदेस म समर्थन कीमत म होवत धान खरीदी म किसान मन ल कोनों किसम के परेसानी नइ होही। उहें, खरीदी केन्द्र मन म बारदाना के पूरा बेवस्था करे गेहे। ओमन किहीन कि डायल-एक सौ बारह सुविधा म किसान मनके समस्या ल सुलझाय जात हे।
इही बीच, प्रदेस म अब तक चालीस लाख बीस हजार मीटरिक टन धान बिसाय गेहे। संगेसंग धान के अवैध परिवहन रोके खातिर प्रदेस के सीमावर्ती क्षेत्र मन म चैकसी बढ़ा दे गेहे। कबीरधाम जिला के चिल्फी पुलिस अउ जिला खाद्य विभाग के टीम ह संयुक्त कार्रवाई करत एक ट्रक ले साढ़े पांच सौ बोरी धान जब्त करे हे।
ऐति, महासमुंद जिला म तीन सौ चैव्वन बोरा धान एक गाड़ी जब्त होय हे। ए मामला दस झन उपर कार्रवाई करे गेहे।
उहें, विधायक अंबिका सिंहदेव ह कोरिया जिला के सलबा, झरनापारा समेत कई ठिन धान खरीदी के जांच करीन अउ खरीदी काम म गड़बड़ी करइया उपर कार्रवाई करे के निरदेस दीन।
माओवादी-मुठभेड़
सुकमा जिला म सुरक्षा बल अउ माओवादी मनके बीच होय मुठभेड़ म एक जवान घायल होगे।
खबर के मुताबिक सुकमा अउ दंतेवाड़ा के सीमा म माओवादी मनके होय के सूचना म सुरक्षा बल रवाना करे गे रिहीस। तभे माओवादी मन ह एक आईईडी विस्फोट कर दीन, जेमा डिस्ट्रिक्ट रिजर्व गार्ड के एक जवान घायल होगे। उहें, मुठभेड़ म माओवादी मनके घायल होय के खबर हे। ए बेरा म सुरक्षा बल ह माओवादी मनके दू ठन सिविर ल ध्वस्त कर दीन।
ऐति, बीजापुर जिला म सुरक्षा बल अउ माओवादी मनके बीच होय मुठभेड़ म माओवादी मनके घायल होय के खबर हे। पुलिस अधीक्षक कमलोचन कश्यप ह बतईन कि पामेड़ थाना कोमटपल्ली के जंगल म जिला पुलिस बल, एसटीएफ अउ कोबरा बटालियन के जवान मन संग माओवादी मनके मुठभेड़ होईस। जंगल के फायदा उठा के माओवादी भाग गे। पाछु सुरक्षा बल ह घटना के जघा ले माओवादी साहित्य, कारतूस अउ आने जिनीस बरामद करे हे।
अटल बिहारी वाजपेयी-जयंती
राष्ट्र आज पूर्व प्रधानमंत्री अटल बिहारी वाजपेयी के जयंती म अपन श्रद्धांजलि देवत हे। ए दिन सुसासन दिवस के रूप म मनाय जाथे।
उहें, महान स्वतंत्रता संग्राम सेनानी अउ सिक्षाविद् भारतरत्न पंडित मदनमोहन मालवीय ल घलो उंखर जयंती म राष्ट्र आज सुरता करीन।
राष्ट्रपति रामनाथ कोविंद अउ प्रधानमंत्री नरेन्द्र मोदी ह सदैव अटल समाधि स्थल म पूर्व प्रधानमंत्री अटल बिहारी वाजपेयी ल पुष्पांजलि दीन।
ए बेरा म श्री मोदी ह अटल बिहारी वाजपेयी के पार्लियामेंट: ए को-मैमोरेटिव वाॅल्यूम नाव पुस्तक के विमोचन करीन।
केन्द्रीय सूचना अउ प्रसारण मंत्री प्रकाश जावड़ेकर ह पूर्व प्रधानमंत्री अटल बिहारी वाजपेयी ल उंखर जयंती म श्रद्धांजलि दीन।
छत्तीसगढ़ के राज्यपाल अनुसुईया उइके ह राजभवन म श्री वाजपेयी के छायाचित्र म पुष्पहार चढ़ाईन।
इही बीच, छत्तीसगढ़ विधानसभा म श्री वाजपेयी के जयंती म विधानसभा परिसर म विधानसभा उपाध्यक्ष मनोज मंडावी ह श्रद्धासुमन अर्पित करीन। ए बेरा म नेता प्रतिपक्ष धरमलाल कौशिक, विधायकगण अउ आने अधिकारी मौजूद रिहीन।
उहें, कोरबा म सुसासन दिवस के मउका म प्रधानमंत्री के राष्ट्र के नाव दे गे भासन ल प्रोजेक्टर के माध्यम ले सुने गीस।
क्रिसमस
देसभर म आज क्रिसमस के परब उछाह के संग मनाय जात हे। ए बेरा म गिरिजाघर म बिसेस प्रार्थना सभा राखे गीस।
राष्ट्रपति रामनाथ कोविंद, उप राष्ट्रपति एम. वेंकैया नायडू अउ प्रधानमंत्री नरेन्द्र मोदी ह देसवासी मन ल अपन सुभकामना दीन हे। उहें, छत्तीसगढ़ के राज्यपाल अनुसुईया उइके अउ मुख्यमंत्री भूपेश बघेल ह प्रदेसवासी मन ल बधाई अउ सुभाकामना दीन।
मुख्यमंत्री ह राजधानी रईपुर के सेंटपाॅल केथेड्रल पहुंच के मसीही समाज समेत प्रदेसवासी मन ल सुभकामना देवत किहीन कि प्रभू यीशू ह संपूर्ण मानव जाति के कल्याण बर करूणा, प्रेम, दया अउ सेवा के के रद्दा देखाईन। मसीही समाज के लोगन मन मुख्यमंत्री ल छत्तीसगढ़ी बाइबिल भेंट करीन।
उहें, रईपुर के बैरनबाजार, अमलीडीह अउ आने गिरिजाघर म घलो पाछु रतिहा ले ही कतकोन कारीकरम चलत हे।
ओति, धमतरी जिला म सुंदरगंज मेनोनाईट चर्च म प्रार्थना सभा के बाद कतकोन कारीकरम करे गीस। राजनांदगांव म प्रार्थना सभा के बाद संगीत के कारीकरम राखे गीस।
मुख्यमंत्री-खुड़मुड़ा
मुख्यमंत्री भूपेश बघेल आज दुरूग जिला के गांव खुड़मुड़ा पहुंचके स्वर्गीय बालाराम सोनकर के परिवार मन ले भेंट करीन। ए बेरा म मुख्यमंत्री ह स्वर्गीय सोनकर के चारों लइका के पढ़ई के खरचा राज्य सरकार कोति ले उठाय अउ चारों लइका बर एक-एक लाख रूपिया के फिक्स डिपाॅजिट करे के बात किहीन। मुख्यमंत्री ह हत्याकांड के जांच करके उचित कार्रवाई करे के निरदेस दीन।
खबर के मुताबिक श्री सोनकर समेत परिवार के चार झिन हत्या कुछेक दिन पहिली अज्ञात मनखे मन कर दे रिहीन।
फास्टैग-अनिवार्य
केन्द्रीय सड़क परिवहन अउ राजमार्ग मंत्री नितिन गडकरी ह नवा बछर ले देस म जम्मों गाड़ी बर फास्टैग जरूरी करे के घोसना करीन हे। वर्चुअल माध्यम ले राखे गे एक समारोह म श्री गडकरी ह किहीन कि अवइया बछर एक जनवरी ले फास्टैग लागू होही। ओमन किहीन कि गाड़ी चालक बर ए उपयोगी हवय, काबर कि एमा ओमन नगद भुगतान बर टोल प्लाजा म रूके बर नइ पड़य एखर ले ईंधन अउ बेरा के बचत होही।