प्रधानमंत्री नरेन्द्र मोदी ह वीडियो कान्फ्रेंसिंग के माध्यम ले अलीगढ़ मुस्लिम विश्वविद्यालय के शताब्दी समारोह ल संबोधित करत देसवासी मन ले अपील करे हे कि आत्मनिर्भर भारत के माध्यम ले नवा भारत बनाय बर एकजुट होके आगू आय। प्रधानमंत्री ह किहीन कि सरकार ‘‘सबके साथ-सबके विकास अउ सबके विश्वास‘‘ मंत्र के संग काम करत हे। श्री मोदी ह किहीन कि नवा सिक्षा नीति देस ल प्रगति के रद्दा म लेगही अउ इक्कीसवीं सदी ल प्रतिस्पर्धी बनाही।मोतीलाल वोरा-अंतिम संस्कार
अविभाजित मध्यप्रदेश के पूर्व मुख्यमंत्री अउ उत्तरप्रदेश के राज्यपाल रेहे वरिष्ठ कांग्रेस नेता मोतीलाल वोरा के पार्थिव सरीर पंचतत्व म विलीन होगे। उंखर अंतिम संस्कार आज पूरा राजकीय सम्मान के संग दुर्ग जिला के शिवनाथ नदी के पार म स्थित मुक्तिधाम म करे गीस। एखर ले पहिली दिवंगत मोतीलाल वोरा के पार्थिव सरीर जनता के आखिरी दर्सन बर प्रदेश कांग्रेस मुख्यालय राजीव भवन म राखे गीस, जिहां मुख्यमंत्री भूपेश बघेल समेत मंत्रिमंडल के सदस्य, विधायक अउ कांग्रेस कार्यकर्ता मन ह श्रद्धांजलि दीन। एखर बाद दिवंगत वोरा के पार्थिव सरीर ल दुर्ग स्थित उंखर निवास लेगे गीस, जिहां मध्यप्रदेश के मुख्यमंत्री शिवराज सिंह चैहान अउ आने जनप्रतिनिधि सहित स्थानीय लोगन मन ह श्रद्धांजलि दीस।
बतादन कि मोतीलाल वोरा के काली नई दिल्ली के एक ठिन निजी अस्पताल म उपचार के बेरा निधन होगे। ओमन 93 साल के रिहीन। श्री वोरा के जनम राजस्थान के नगौर म 20 दिसंबर 1928 के होय रिहीस। ओमन 1968 म दुर्ग नगर निगम म पार्षद निर्वाचित होईन। ए बाद बछर 1972 म श्री वोरा पहिली दरी कांग्रेस पार्टी के विधायक बनीन। ओमन 2 घांव मध्यप्रदेश के मुख्यमंत्री पद के अउ उत्तरप्रदेश के राज्यपाल पद के जिम्मेदारी संभालीन।
विस-मोतीलाल वोरा-श्रद्धांजलि
छत्तीसगढ़ विधानसभा म आज अविभाजित मध्यप्रदेश के पूर्व मुख्यमंत्री मोतीलाल वोरा ल श्रद्धांजलि दे गीस। विधानसभा उपाध्यक्ष मनोज सिंह मंडावी ह श्री वोरा के निधन के सूचना सदन म दीन। ओमन किहीन कि श्री वोरा अविभाजित मध्यप्रदेश म विधायक अउ दू घांव मध्यप्रदेश के मुख्यमंत्री रिहीन। ओमन ह केन्द्रीय मंत्री अउ संगठन म घलो आने-आने पद के जिम्मेदारी संभालीन। उंखर पूरा जीवन आदर्श अउ सिद्धांत मन बर समर्पित रिहीस। उंखर निधन ले न सिरिफ छत्तीसगढ़ ल बल्कि देस ल बड़का नुकसान होय हे।
मुख्यमंत्री भूपेश बघेल, नेता प्रतिपक्ष धरमलाल कौशिक, संसदीय कार्यमंत्री रविन्द्र चैबे सहित मंत्री परिषद के सदस्य अउ सदन के सदस्य मन ह श्री वोरा ल सुरता करत श्रद्धांजलि दीन।
सदन म मुख्यमंत्री ह किहीन कि लगन, परिश्रम, निष्ठा अउ नेतृत्व बर ओमन समर्पित रिहीन। उंखर सजगता, सरलता अउ मिलनसार व्यवहार उंखर अंतिम समय तक रिहीस। उंखर निधन पार्टी के संग पूरा देस बर बड़का नुकसान हरय।
उहें, पूर्व मुख्यमंत्री डाॅक्टर रमन सिंह ह किहीन कि विपक्षी दल के सर्वोच्च नेता श्री वोरा के सम्मान करथन। ओमन सबो दल म लोकप्रिय रिहीन। ओमन सबो बर पिता के बराबर रिहीन।
नेता प्रतिपक्ष धरमलाल कौशिक ह किहीन कि श्री वोरा ह दिल्ली म छत्तीसगढ़ के पहिचान रिहीन।
कोरोना-टीकाकरण
केन्द्र सरकार ह किहीस कि देस म कोरोना टीकाकरण के सुरूवाती चरण म प्राथमिकता समूह वाले लोगन अउ महामारी ले निपटे म लगे अग्रिम पंक्ति के कार्यकर्ता मन ल टीका लगाय जाही। टीका के उपलब्ध होय म 50 साल ले जादा उमर के लोगन मन ल पहिली दौर म टीका लगाय जा सकथे। टीकाकरण के आने पहलु मनके बारे म स्वास्थ्य मंत्रालय ह बार-बार पूछइया प्रश्न अउ ओखर उत्तर तैयार करे हे। टीका लगाय बर पात्र लोगन मन ल उंखर रजिस्टर्ड मोबाइल नंबर के माध्यम ले ओ स्वास्थ्य केन्द्र अउ तारीख के जानकारी दे जाही। जहां ओमन ल टीका लगाय जाना हे। अइसे एखर सेती करे जात हे कि लाभार्थी मन ल पंजीयन अउ टीकाकरण म कोन्हों परेसानी झन होवय।
इही बीच, छत्तीसगढ़ के राजनांदगांव जिला म कोविड-19 के संभावित वैक्सीन के टीकाकरण के बाद प्रतिकूल प्रभाव ले निपटे बर डाॅक्टर मनके टीम बनाय जात हे। आधिकारिक जानकारी के अनुसार केन्द्रीय स्वास्थ्य अउ परिवार कल्याण के निर्देश के अनुसार जिला स्तर म टीम मनके गठन करे जाही। एखर अंतर्गत स्वास्थ्य कर्मी मन लोगन मन ल जागरूक करही। बतादन कि संभावित टीकाकरण के प्रक्रिया चार चरण म पूरा करे जाही।
धान खरीदी
केन्द्र सरकार ह किहीस कि चालू खरीफ विपणन मौसम म धान के खेती करइया 48 लाख 96 हजार किसान मन ल न्यूनतम समर्थन मूल्य म खरीदी ले फायदा होय हे। एखर बर 78 हजार 433 करोड़ रूपिया के भुगतान करे गेहे। कृषि मंत्रालय ह बतईस कि छत्तीसगढ़ सहित आने राज्य मन ले 415 लाख टन धान के खरीदी करे गेहे।
ऐति, छत्तीसगढ़ म एक दिसंबर ले समर्थन मूल्य म सुरू होय धान खरीदी के अंतर्गत अब तक 21 लाख 16 हजार मीटरिक टन ले जादा धान के खरीदी कर ले गेहे। आधिकारिक जानकारी के अनुसार राज्य के 8 लाख 38 हजार ले जादा किसान मन ह समर्थन मूल्य म धान बेचे हे। उहें, प्रदेस के राईस मिलर संचालक मन ल 8 लाख 59 हजार मीटरिक टन ले जादा धान के डी.ओ. जारी करे गेहे।
मुख्यमंत्री युवा स्व-रोजगार योजना
महासमुंद जिला म मुख्यमंत्री युवा स्व-रोजगार योजना के अंतर्गत युवा मन ल स्व-रोजगार स्थापित करे बर ऋण उपलब्ध कराय जात हे। एखर अंतर्गत इच्छुक आवेदक जिला व्यापार अउ उद्योग केन्द्र म 5 जनवरी तक आवेदन जमा कर सकथे। आवेदन पत्र के संग परियोजना प्रतिवेदन, रासन कार्ड, स्थायी निवास प्रमाण पत्र, जन्म तिथि ले जुड़े प्रमाण पत्र, परिवार के वार्षिक आय के बारे म प्रमाण पत्र अउ आने जरूरी दस्तावेज के संग दू सेट के आवेदन करना होही।
कलेक्टर-एसपी निरीक्षण
बस्तर संभाग म बीते कुछु दिन ले जोरदार ठंड पड़त हे। एला देखत जगदलपुर कलेक्टर रजत बंसल अउ पुलिस अधीक्षक दीपक झा ह बीते रतिहा सहर के सिरहासार चैक, संजय बाजार अउ बस स्टैंड के दौरा करीन। ए बेरा कलेक्टर अउ पुलिस अधीक्षक ह फूटपाथ, बस स्टैंड अउ खुल्ला म रात बीतइया लोगन मन ल साल अउ कम्बल बांटीन। संगेसंग लोगन के हालचाल जानीन।
पादक जीनोम संरक्षण पुरस्कार
देसी अउ परंपरागत फसल के किसम मनके संरक्षण बर ‘‘पादप जीनोम संरक्षण पुरस्कार‘‘ बर 12 फरवरी तक आवेदन मंगाय गेहे। छत्तीसगढ़ के अइसे किसान जउन कोन्हों भी परंपरागत देसी प्रजाति के संरक्षण अउ चयन करके विकास के काम करत हे, ओमन पौधा के किसम अउ कृषक अधिकार संरक्षण प्राधिकरण के अंतर्गत पंजीकृत होके ए पुरस्कार ल पा सकथे।
संक्षिप्त समाचार
अउ अब थोरकुन समाचार सार म-
– रायपुर रेलमंडल के मांढर-उरकुरा स्टेशन के बीच स्थित समपार फाटक जरूरी मरम्मत काम के सेती काली तेईस दिसंबर बिहनिया नौ बजे ले चैबीस दिसंबर संझा छह बजे तक सड़क आवागमन बर बंद रइही।
– बिलासपुर सिविल लाइन थाना के पुलिस ह लूट के दू आरोपी मन ल गिरफ्तार करे हे।
– इही जिला के एक ठिन आने घटना म सासकीय भूईंया म फर्जीवाड़ा करके धोखाधड़ी करइया आरोपी ल तारबहार पुलिस ह उत्तप्रदेश के गाजियाबाद ले गिरफ्तार करे हे।
अउ
– कबीरधाम जिला म रकम ल तीन गुना करे के झांसा देवइया दू आरोपी मन ल पुलिस ह गिरफ्तार करे हे। मामला के एक आरोपी फरार हे। पुलिस ह आरोपी मन करा ले उनचास हजार रूपिया नगद बरामद करे हे।