विधानसभा समाचार-01
राज्य विधानसभा के सीतकालीन सत्र आज ले सुरू होगे। तीस दिसंबर तक चलइया ए सत्र म कुल सात बइठका होही। आज सत्र के पहिली दिन मुख्य विपक्षी दल भारतीय जनता पार्टी ह धान खरीदी अउ किसान आत्महत्या के मामला म स्थगन प्रस्ताव लाईन। ए मुद्दा ल लेके विधानसभा म गजब हंगामा होईस। पाछु सदन के कार्यवाही काली तक बर स्थगित कर दे गीस।
आज सदन म भाजपा सदस्य शिवरतन शर्मा, अजय चंद्राकर अउ नारायण चंदेल ह काम रोको प्रस्ताव के सूचना देके धान खरीदी अउ किसान के मउत के मामला म सदन म तुरते चर्चा कराय के मांग करीन। श्री चंदेल ह गिरदावरी म गड़बड़ी के आरोप लगाईन। जुवाब म सहकारिता मंत्री डाॅक्टर प्रेमसाय सिंह ह विपक्ष के आरोप ल गलत बतावत किहीन कि जउन किसान मनके विपक्षी सदस्य मन बात करीन हे ओमन बैंक ले कोनों किसम के करजा नइ ले रिहीन। मंत्री ह किहीन कि राज्य सरकार ह किसान मनके स्थिति ल मजबूत बनाय बर कतकोन काम करे हे। किसान मनके करजा माफ करे गेहे। पाछु बछर चैदह हजार करोड़ रूपिया ले जादा के धान बिसाय गेहे। उहें, करीबन छह हजार करोड़ रूपिया के रकम किसान मन ल प्रोत्साहन रासि के रूप म दे गेहे। फेर, विपक्ष के सदस्य मंत्री के जुवाब ले संतुष्ट नइ होईन। पूर्व मुख्यमंत्री डाॅक्टर रमन सिंह ह किहीन कि विपक्ष ह सरकार ले प्रति किसान पच्चीस लाख रूपिया के मुआवजा दे अउ दोसी अधिकारी मन उपर कार्रवाई करे हे। फेर, मंत्री के जुवाब म ए संबंध म कोनों किसम के बात नइ केहे गेहे।
विधानसभा समाचार-02
इही बीच, सभापति सत्यनारायण शर्मा ह विपक्ष कोति ले लाय गे स्थगन प्रस्ताव ल मंजूर कर लीन। फेर, सरकार के जुवाब ले असंतुष्ट भाजपा सदस्य नाराबाजी करत गर्भगृह म चल दीन अउ जम्मों सदस्य स्वमेव निलंबित होगे। आसंदी ह सदन के कार्यवाही काली तक बर स्थगित कर दीन।
एखर पहिली, आज सदन के कार्यवाही सुरू होय म विधानसभा अध्यक्ष डाॅक्टर चरणदास महंत ह छत्तीसगढ़ विधानसभा के पूर्व सदस्य हीरा सिंह मरकाम, लाल महेन्द्र सिंह टेकाम, घनाराम साहू अउ अविभाजित मध्यप्रदेश विधानसभा के पूर्व सदस्य पूरन लाल जांगड़े के निधन के उल्लेख करत ओमन श्रद्धांजलि दीन। मुख्यमंत्री भूपेश बघेल, नेता प्रतिपक्ष धरमलाल कौशिक समेत पक्ष अउ विपक्ष के आने सदस्य मन घलो दिवंगत नेता मन ल अपन श्रद्धांजलि दीन।
मोतीलाल वोरा-निधन
कांग्रेस के बड़का नेता अउ अविभाजित मध्यप्रदेश के पूर्व मुख्यमंत्री मोतीलाल वोरा के आज निधन होगे। ओमन तिरानवे बछर के रिहीन। श्री वोरा ह आज मंझनिया बाद नई दिल्ली के फोर्टिज एस्कार्ट अस्पताल म आखिरी सांस लीन। श्री वोरा के राजनीतिक जीवन बहुत लंबा रिहीस, ओमन दू घांव अविभाजित मध्यप्रदेश के मुख्यमंत्री रिहीन। उत्तरप्रदेश के राज्यपाल अउ केन्द्रीय मंत्री के रूप म अपन दायित्व के पालन करीन। उंखर निधन के खबर मिलते छत्तीसगढ़ समेत देसभर म सोक के लहर दउड़ गे।
राष्ट्रपति रामनाथ कोविंद ह श्री वोरा के निधन म दुख जतावत किहीन कि ओमन मानवता के प्रतिमूर्ति रिहीन।
प्रधानमंत्री नरेन्द्र मोदी ह मोतीलाल वोरा के निधन म दुख जतावत किहीन कि वोरा जी कांग्रेस के बड़का नेता रिहीन। उंखर तीर कई दसक के अपन राजनीतिक जीवन म प्रसासनिक अउ संगठन के लंबा अनुभव रिहीस हे।
राज्यपाल अनुसुईया उइके ह श्री वोरा के निधन म दुख जतावत किहीन कि श्री वोरा सार्वजनिक जीवन म उच्च मानदंड स्थापित करीन अउ आखिरी समय तक समाज बर काम करीन।
उहें, मुख्यमंत्री भूपेश बघेल ह श्री वोरा के निधन म दुख जतावत श्रद्धांजलि दीन हे अउ किहीन कि जमीनी स्तर ले राजनीति सुरू करके राष्ट्रीय स्तर तक ओमन एक अलग पहिचान बनाईन अउ आजीवन एक समर्पित बने रिहीन।
कांग्रेस के प्रदेस अध्यक्ष मोहन मरकाम ह श्री वोरा के निधन ल निजी पारिवारिक अउ राष्ट्रीय क्षति बतईन हे।
वोरा निधन-राजकीय शोक
राज्य सरकार ह श्री वोरा के निधन म आज ले तीन दिन के राजकीय सोक घोषित करे हे। ए बेरा म तेईस दिसंबर तक प्रदेस के जम्मों सासकीय भवन के राष्ट्रीय ध्वज आधा झुके रइही। राजकीय सोक के बेरा म कोनों किसम के मनोरंजक अउ सांस्कृतिक कारीकरम नइ करे जाही। सामान्य प्रसासन विभाग ह ए आदेस जार करे हे।
नीति आयोग-सराहना
भारत सरकार के नीति आयोग ह छत्तीसगढ़ म महिला स्व-समूह कोति ले आत्मनिर्भरता बर करे जात काम के प्रंससा करीन हे। आयोग कोति ले ट्वीट करके आकांक्षी जिला कांकेर म सीताफल के प्रोसेसिंग के काम ले माईलोगिन मन ल आर्थिक रूप ले मजबूत बनाय गेहे। आयोग ह बढ़ते कदम आत्मनिर्भता की ओर टैग लाइन ले लिखे हे कि कांकेर के कई ठिन गांव म महिला स्व-सहायता समूह सीताफल के गुदा ल सुरक्षित करे एला बाजार हाट म बने कीमत म बेचे के काम करत हे।
बस्तर-फुटबाॅल मैदान
बस्तर संभाग के खेल प्रतिभा ल आगू लाय बर केन्द्र सरकार ह जगलदपुर म सिंथेटिक टर्फ फुटबाॅल मैदान बनाय बर मंजूरी दे देहे। एखर बर पांच करोड़ रूपिया के रकम मंजूर करे गेहे। राज्य सरकार ह खेलो इंडिया कारीकरम जगदलपुर म सिंथेटिक फुटबाॅल मैदान अउ रनिंग ट्रैक बनाय के प्रस्ताव केन्द्र सरकार ल भेजे रिहीस। एखर मंजूरी मिले म मुख्यमंत्री भूपेश बघेल अउ खेल मंत्री उमेश पटेल ह खुसी जताईन हे।
हत्या/आत्महत्या
राजधानी रईपुर तीर के अमलेश्वर क्षेत्र म अज्ञात हमलावर मन ह एके परिवार के चार झन के हत्या कर दीन। ए घटना खुड़मुड़ा गांव के हे, जिहां पहिलीच एक मकान ले सांस अउ बहू के सव बरामद होईस। उहें, पिता अउ बेटा के सव पानी के टंकी म मिले हे। उहें, परिवार के ग्यारह बछर के बाबू गंभीर रूप ले घायल हवय, जेखर इलाज अस्पताल म चलत हे।
पुलिस के मुताबिक खुड़मुड़ा गांव म ए परिवार बस्ती ले दुरिहा अपन बाड़ी म मकान बनाके राहत रिहीन। बताय जात हे कि पाछु रतिहा अज्ञात लोगन मन ए परिवार उपर हमला कर दीन। पुलिस अधीक्षक अउ आने बड़का अधिकारी मन ह घटनास्थल म पहुंच के स्थिति के जांच करत हे।
उहें, राजनांदगांव के पुलिस प्रशिक्षण विद्यालय म पाछु रतिहा एक आरक्षक ह सर्विस रिवाल्वर ले खुद ल गोली मार के आत्महत्या कर लीस। मृतक आरक्षक के नाव विनोद साहू हे। आत्महत्या के कारण के जांच करे जात हे।
ओति, सुकमा जिला के गोरगुंडा के तोयापारा म पाछु दिन होय एक दंपत्ति के हत्या के मामला म पुलिस ह चार झिन आरोपी ल गिरफ्तार करे हे। बताय जात हे कि आरोपी मन ह अंधविश्वास के सेती ए दंपत्ति के हत्या करे बात मंजूर करे हे।
पुलिस बैठक/इंजीनियर रिहा
सुकमा जिला के माओवाद प्रभावित क्षेत्र किस्टारम म पुलिस अउ प्रसासनिक अधिकारी मनके बीच होय एक बइठका म स्थानीय लोगन के समस्या ल सुलझाय खातिर गोठबात होईस। एमा जिला कलेक्टर विनीत नंदनवार अउ पुलिस अधीक्षक कन्हैया लाल धु्रव मौजूद रिहीन। बइठका म बताय गीस कि माओवादी मन के सेती किस्टारम क्षेत्र म बंद सरकारी स्कूल, अस्पताल अउ बिजली विभाग के कार्यालय ल फेर ले सुरू करे जाय के संबंध म गोठबात करे गीस।
ओति, कोंडागांव जिला के विश्रामपुरी थाना क्षेत्र ले माओवादी मन कोति ले अगुवा करे गे पंचायत के सब इंजीनियर ल पाछु रतिहा छोड़ दे गीस। पुलिस के मुताबिक उहां ले छूटे के बाद सब इंजीनियर ह पुलिस अधीक्षक ले भेंट करके ए घटना के संबंध म जानकारी दीन।
स्वास्थ्य मंत्री-कोरोना टीका
केन्द्रीय स्वास्थ्य मंत्री डाॅक्टर हर्षवर्धन ह किहीन हे कि बिसेसज्ञ मनके सलाह के बाद सरकार ह कोरोना टीका लगाय बर तीस करोड़ लोगन के प्राथमिकता तय करे हे। एमा स्वास्थ्य कर्मी, पुलिस, सेना अउ स्वच्छता करमचारी मन सामिल हे। एक समाचार एजेंसी ले गोठबात करत स्वास्थ्य मंत्री ह किहीन कि ए टीका पचास बछर ले जादा उमर के लोगन अउ पचास बछर ले कमती उमर के ओ लोगन मन पहिली दे जाही, जउन मन ल आने बीमारी हवय।
डाॅक्टर हर्षवर्धन किहीन कि ओमन भरोसा हवय कि अवइया बछर जनवरी के कोनों हफ्ता म हम अइसन स्थिति म आ जबो कि देसवासी मन ल कोविड टीका के पहिली खुराक दे जा सकही।
किसान-बातचीत
केन्द्र सरकार ह आंदोलन करइया किसान मन ले अवइया दउर के गोठबात बर तारीख तय करे बर केहे हे। केन्द्रीय कृषि मंत्रालय के संयुक्त सचिव विवेक अग्रवाल ह किसान संगठन ल लिखे चिट्ठी म मुद्दा ल सुलझाय खातिर गोठबात के आग्रह करे हे। ओमन किहीन कि केन्द्र सरकार किसान कोति ले उठाय गे जम्मों मुद्दा के हल ढूंढे के परयास करत हे। ओमन चिट्ठी म लिखे हे कि सरकार ह आने किसान संगठन संग बइठका करीन अउ ए मुद्दा म उंखर ले सुझाव मांगे हे।
पदस्थापना
राज्य सासन ह भारतीय वन सेवा के अधिकारी मनके नवा पदस्थापना आदेस जारी करे हे। एखर मुताबिक तपेश झा ल जैव विविधता संरक्षण मंडल के सदस्य सचिव, एम.टी. नंदी अपर प्रधान मुख्य वन संरक्षक प्रशासन राजपत्रित अउ अरूण कुमार पांडेय ल अपर प्रधान मुख्य वन संरक्षक विकास के प्रभार सौंपे गेहे। उहें, मुख्य वन संरक्षक के रूप म मोहम्मद शाहिद ल जगलदपुर, राजेश कुमार पांडेय ल उदंती सीतानगर टाइगर रिजर्व, जनक राम नायक ल रायपुर वृत्त अउ अभय कुमार श्रीवास्तव ल इंद्रावती टाईगर रिजर्व के संग सोमादास ल बांस मिशन के जिम्मेवारी दे गेहे।
संक्षिप्त समाचार
अउ अब थोरकुन समाचार सार म-
– संसदीय कार्य मंत्री रविन्द्र चैबे ह बलौदाबाजार के पलारी विकासखंड के हरीनभट्टा के गौठान के जांच करीन। ए बेरा म श्री चैबे ह आने-आने योजना म हितग्राही मन ल चेक अउ उपकरण दीन।
– बलौदाबाजार जिला प्रशासन ह खनिज न्यास निधि मद ले जिला के चालीस ठिन स्कूल म करीबन सोलह हजार किताब देवाय हे। सांसद छाया वर्मा ह एक कारीकरम स्कूल के प्राचार्य मन ल ए किताब दीन।
– पुलिस अधिकारी अउ करमचारी मन म तनाव कमती करे बर बालोद म स्पंदन कारीकरम राो गीस। ए मउका म जिला के बड़का पुलिस अधीक्षक जितेन्द्र सिंह मीणा ह पुलिस करमचारी मनके समस्या ल जानीन।
– दिल्ली यूनिवसिर्टी के मेडिकल कालेज म भर्ती देवाय के नाम म बिलासपुर म चार झिन ले करीबन अस्सी लाख रूपिया के ठगी के मामला आगू आय हे।
– कोरबा पुलिस कोति ले आपराधिक घटना म रोक लगाय बर आभूषण कारोबारी समेत आने व्यावसायिक प्रतिष्ठान के संचालक मन ल वेबिनार ले जागरूक करे गीस।
– श्रवण बाधित मन ल नवा तकनीक ले जोड़े बर राजनांदगांव म राखे गे पांच दिवसीय तकनीकी प्रशिक्षण कारीकरम म आने-आने राज्य के प्रतिनिध सामिल होईन।
अउ
– कोरबा जिला के नवागांव म वन विभाग ह हिंसक भालू ल पकड़ लेहे। ए भालू के हमला म एक सियान माईलोगिन के मउत होगे रिहीस अउ छै झिन आने मनखे घायल होगे रिहीन।