विजय दिवस
प्रधानमंत्री नरेंद्र मोदी ह बछर उन्नीस सौ इकहत्तर के भारत-पाकिस्तान युद्ध के वर्षगांठ उपर आज बीहनिया नई दिल्ली स्थ्ति राष्ट्रीय समर स्मारक म श्रद्धांजलि दीन। ए मउका म रक्षामंत्री ह स्वर्णिम विजय वर्ष के स्मृति चिन्ह के घलो अनावरण करीन।
बछर उन्नीस सौ इकहत्तर के युद्ध म पाकिस्तान उपर जीत के सुरता म हरसाल सोला दिसंबर के विजय दिवस मनाये जाथे। इही दिन स्वतंत्र बंग्लादेश के उदय होय रीहिस। एति छत्तीसगढ़ के मुख्यमंत्री ह विजय दिवस के मउका म देश के वीर जवान मन ल नमन करीन।
प्रधानमंत्री किसान आश्वासन
प्रधानमंत्री नरेंद्र मोदी ह एक घांव फेर केहे हे कि केंद्र सरकार ह किसान मनके कल्याण बर हर समय काम करही। गुजरात के कच्छ जिला के धोर्डो म कतकोन विकास परियोजना के आधारशिला राखत ओमन कीहिन कि सरकार ह किसान मनके संसो ल बने ढंग ले दूर करही ।
कोरोना टीका दिशा निर्देश
केंद्र सरकार ह केहे हे कि कोरोना वायरस टीका के कोनो भी प्रकार के समस्या ले निपटे बर जरूरी दिशा निर्देश जारी करे गेहे।
टीका लगाये के बाद लोगन मनके तीस मिनट तक निगरानी करे जाही। हरएक समस्या ले निपटे बर कम ले कम एक ठिन केंद्र बनाये बर केहे गेहे। कोरोना के टीका सबले पहिली स्वास्थ्यकर्मी अउ पचास साल ले जादा उमर के मनखे मन ल दे जाही।
कोरोना समाचार /जागरूकता
प्रदेश म कोरोना संक्रमित मरीज मनके संख्या दू लाख साठ हजार ले जादा होगे हे। काली प्रदेश म कोरोना संक्रमण के सोला सौ पांच नवा मरीज के पहिचान करे गीस।
एति छत्तीसगढ़ के जाने माने लोक गायिका पद्मश्री ममता चंद्राकर ह लोगन मनले कोरोना संक्रमण ले बांचे बर जरूरी सावधानी बरते के अपील करे हे।
धान खरीदी
दंतेवाड़ा जिला के गीदम धान खरीदी केंद्र म किसान मनके सिकइत उपर धान खरीदी केंद्र के प्रभारी ल काम म लापरवाही बरते के सेती ओखर सेवा ल समाप्त कर देहे। ए बारे म आदिम जाति कृषक सेवा सहकारी समिति गीदम के अधिकारी ह आदेश जारी कर देहे।
ओति बिलासपुर सांसद अरूण साव ह आज मुंगेली जिला के धरमपुरा धान खरीदी केंद्र के दउरा करीन। ए दउरान खरीदी केंद्र म बोरा के कमी होय के सिकायत उपर सांसद ह अधिकारी मनले समस्या के समाधान करे बर कीहिन।
कौशिक-किसान पंचायत
नेता प्रतिपक्ष धरमलाल कौशिक ह आज बोदरी मंडल म राखे गे किसान पंचायत म कीहिन हे कि केंद्र ह किसान मनके हित ल धियान म राखके तीन ठिन नवा कृषि कानून बनाय हे। एखर ले किसान मन ल फायदा होही। फेर विपक्ष ह किसान मनके बीच भरम फैलाय के काम करत हे।
ओति राजनंादगंाव म आज ले जिला भाजपा डहार ले केंद्र सरकार कोति ले पारित कृषि कानून के समर्थन म आॅनलाईन अभियान चलाये जात हे। जिला भाजपा अध्यक्ष मधुसूदन यादव ह कीहिन हे कि ए कानून म छोटे अउ सीमंात किसान मन ल फायदा करे के प्रावधान हे।
भाजपा प्रतिक्रिया
भारतीय जनता पार्टी के प्रदेश अध्यक्ष विष्णुदेव साय ह राज्य सरकार के दू साल के कामकाज ल असफल अउ निराशाजनक बताय हे। ओमन कीहिन कि राज्य के कंाग्रेस सरकार ह ए दू साल म कोनो भी योजना ल ठीकठाक नइ ला पाय हे।
उंहें भाजपा महिला मोर्चा के प्रदेश अध्यक्ष शालिनी राजपूत ह कीहिन कि राज्य सरकार ह अपन दू साल के कामकाज म माइलोगिन मनके सुरक्षा के हर मोर्चा म नाकाम रीहिन।
गोधन न्याय योजना पुरस्कार
छत्तीसगढ़ म कृषि विभाग डहार ले चलाये जात गोधन न्याय योजना बर चिप्स डहार ले बनाये गे वेबसाइट अउ मोबाइल एप ल राष्ट्रीय स्तर के पुरस्कार मिले हे आई.टी संस्था एलेट्स टेक्नो मीडिया ह डिजिटल गर्वनेस श्रेणी म गोधन न्याय योजना ल वर्चुअल समारोह म अवार्ड आॅफ एक्सीलेंस दीन। ए कार्यक्रम म प्रदेश के कृषि उत्पादन आयुक्त डॅाक्टर एम.गीता ल सम्मानित करे गीस।
चिप्स के मुख्य कार्यपालन अधिकारी ह बताइन कि चिप्स कोति ले गोधन न्याय योजना के वेबसाइट अउ मोबाइल एप बनइया प्रभारी अधिकारी निलेश सोनी ह ए पुरस्कार ल लीन।
प्रधानमंत्री सड़क योजना-छग. दौरा
प्रधानमंत्री ग्राम सड़क योजना कोति ले बनत काम मनके तीसर स्तर के गुणवत्ता के जांच बर राष्ट्रीय गुणवत्ता समीक्षक अरविंद कुमार भाटिया ह छत्तीसगढ़ आवत हे। ओमन आज ले बीस दिसंबर तक दंतेवाड़ा अउ बाईस ले छब्बीस दिसंबर तक बीजापुर जिला म प्रधानमंत्री ग्राम सड़क योजना के तहत बनत काम के जांच करही।
गांजा-गुटखा जब्त
महासमुंद जिला म बागबाहरा के तीर राष्ट्रीय राजमार्ग उपर एक ठिन फटफटी के तलाशी के दौरान पुलिस ह बीस किलो गांजा बरामद करके तीन झिन लोगन मन ल गिरप्तार करे हे। जब्ती गंाजा के कीमत दू लाख रूपिया बताय जात हे।
उंहें महासमुंद पुलिस ह पैंतीस बोरी जर्दा, गुटखा के संग दू झिन लोगन मन ल पकड़े हे। पकड़े गे दूनो आरोपी हरियाणा के रहइया हरय। इंखर मनके खिलाफ कोटपा एक्ट के तहत कार्रवाई करे जात हे। जब्ती गुटखा के कीमत साढ़े बारा लाख रूपिया बताय गेहे।
फर्जी नियुक्ति
राज्य सरकार ह प्रदेश म फर्जी प्रमाण पत्र के माध्यम ले नौकरी करत दू सौ सड़सठ अधिकारी अउ कर्मचारी मनके सूची जारी करे हे। एमा कतकोन कर्मचारी अइसन हे, जेमन ह हाईकोर्ट ले स्टे ले राखे हे। पाछू दू बछर म पचहत्तर फर्जी प्रमाण पत्र के प्रकरण आगू आय हे । ए बारे म सामान्य प्रशासन विभाग ह आदेश जारी करके फर्जी प्रमाण पत्र के आधार म नौकरी करत अधिकारी अउ कर्मचारी मनके बर्खास्तगी के कार्रवाई शुरू करे बर केहे गेहे।
माओवादी मुठभेड़/आगजनी
बीजापुर जिला म आज सुरक्षा बल मनके संग होय मुठभेड़ म एक झिन माओवादी मारे गीस। घटना वाले जगा ले माओवादी के शव बरामद कर ले गेहे। जानबा के मुताबिक जिला के जगरगुण्डा इलाका म माओवादी मनके होय के सूचना के बाद सुरक्षा बल मनके जवान ह तलाशी अभियान म निकलिन। इही दउरान जंगल म पहिली ले घात लगाये बइठे माओवादी मन ह सुरक्षा बल मन उपर गोलीबारी शुरू कर दीन ।
उंहें फरसेगढ़ थाना क्षेत्र म माओवादी मन ह रद्दा बनाये के काम म लगे छै ठिन गाड़ी म आग लगा दीन।
अइसने इही जिला के उसूर थाना क्षेत्र ले सुरक्षा बल मन ह एक झिन माओवादी ल गिरफ्तार करे हे।
दुर्घटना
बिलासपुर जिला के रतनपुर क्षेत्र म आज होय एक ठिन सड़क दुर्घटना म दू झिन मनखे के मउत होगे। उंहें एक झिन आने मनखे गंभीर रूप ले घायल होगे हे।
हमर संवाददाता ले मिले जानबा के मुताबिक बेलगहना कोति ले आवत फटफटी अउ टरक के बीच टक्कर होइस । ए घटना म दू झिन मनखे के मउकाच म प्राण छूट गे।
ओति कोंडागांव जिला म पिकअप अउ फटफटी के बीच होय टक्कर म जिला पुलिस बल के एक झिन जवान के मउत होगे। पिकअप म दंतेवाड़ा जिला पुलिस बल के चार झिन जवान बइठे रीहिन।
संक्षिप्त समाचार
– राम वनगमन पथ रैली के कोंडागंाव जिला के सीमा म पहुंचे के बाद इंहा के सांसद अउ विधायक मनके संगेसंग बड़का अधिकारी मन स्वागत करीन।
– प्रदेश के कतकोन जिला मुख्यालय मन म पटवारी मनके अनिश्चितकालिन आज घलो चलत हे।
– जांजगीर-चंापा जिला के गांव कांसा म थ्रेशर मशीन ले धान मिंजई के दउरान बियारा म आगी लगे ले पांच एकड़ के फसल जल गे अउ संगेसंग तीर म खड़े ट्रेक्टर म घलो आगी लग गे।
अउ
– बलरामपुर म आज अखिल भारतीय विद्यार्थी परिषद के कार्यकर्ता मन ह जिला म बाढ़त दुष्कर्म के घटना के खिलाफ प्रदर्शन करीन।