आज दिनभर के खबर ल अपन गुरतुर छत्तीसगढ़ी भाखा म पढ़व

केंद्र ह देश म व्यापक कोविड टीकाकरण अभियान बर दिशा निर्देश जारी कर देहे। स्वास्थ्य अउ परिवार कल्याण मंत्रालय पहिली चरण म लगभग तीस करोड़ लोगन मन ल वैक्सिन देके योजना बनावत हे। फाइजर, सीरम इंस्टीट्यूट आॅफ इंडिया अउ भारत बायोटेक ह अपन वैक्सीन के उपयोग बर अनुमति खातिर आवेदन करे हे। कोविड-19 वैक्सीन के आपात उपयोग बर सरकार डहार ले अनुमति मिलतेच टीकाकरण अभियान शुरू कर दे जाही।

 सबसे पहिली वैक्सीन स्वास्थ्यकर्मी, अग्रिम पंक्ति के कर्मचारी अउ पचास बछर ले जादा उमर के लोगन मन ल दे जाही। एखर बाद दूसर बीमारी ले पीड़ित पचास बछर ले कम उमर के लोगन मनके टीकाकरण करे जाही।

भारतीय रेलवे आज ले इक्कीस रेलवे भर्ती बोर्ड के माध्यम ले लगभग एक लाख चालीस हजार खाली पद ल भरे बर बड़ा अभियान शुरू करत हे।

 रेल मंत्रालय के अनुसार देशभर के दू करोड़ चंवालिस लाख ले जादा उम्मीदवार एमा भाग लीहीं। ए परीक्षा के पहिली चरण आज ले अठारा दिसंबर के बीच होही। एखर बाद दूसर चरण म एनटीपीसी श्रेणी मन बर अठाईस दिसंबर ले मार्च दू हजार इक्कीस तक अउ तीसरा चरण म अप्रैल ले जून तक भर्ती करे जाही। रेलवे भर्ती बोर्ड ह कोविड महामारी के समय म परीक्षा आयोजित करे बर व्यापक प्रबंध करे हे। उम्मीदवार मनके परीक्षा केंद्र म प्रवेश करे के पहिली तापमान के जांच करे जाही अउ निर्धारित सीमा ले जादा तापमान वाले उम्मीदवार मन ल प्रवेश के अनुमति नइ दे जाही। ए संबंध म सूचना ओमन के पंजीकृत ई-मेल अउ मोबाइल नंबर म घलो भेजे जावत हे।

मुख्यमंत्री भूपेश बघेल ह सूरजपुर जिला के भैयाथान ल अनुभाग अउ बिहारपुर ले तहसील बनाय के घोषणा करीन हे। काली जिला मुख्यालय सूरजपुर म राखे गे सभा ल संबोधित करत कीहिन कि किसान मन ल धान खरीदी म कोनो किसम के समस्या नइ आवय। ओमन कीहिन कि राज्य सरकार किसान मनके धान ल पाछू दू बछर ले समर्थन मूल्य म खरीदत हे अउ यहू बछर खरीदही। ओमन कीहिन कि अवइया बछर म प्रदेश के सबो विकासखंड म अंगे्रजी माध्यम के स्कूल खोले जाही ।

मुख्यमंत्री भूपेश बघेल ह आज जिला मुख्यालय सूरजपुर म हाईटेक बस स्टेण्ड के लोकार्पण करीन।

 ए मउका म स्वास्थ्य मंत्री टी.एस. सिंहदेव, स्कूल शिक्षामंत्री पे्रमसाय सिंह टेकाम अउ नगरीय प्रशासन मंत्री डॅाक्टर शिवकुमार डहरिया समेत दूसर जन प्रतिनिधि अउ वरिष्ठ अधिकारी मौजूद रीहिन। एखर पहिली मुख्यमंत्री ह सूरजपुर सर्किट हाउस म कतकोन समाज के प्रतिनिधि मंडल मनले मुलाकात करीन। ए मउका म ओमन सबो संगठन प्रमुख मन ले बातचीत करीन अउ ओमन के परेसानी अउ मंाग के निराकरण बर उचित पहल करे के बात कीहिन ।

आवास अउ पर्यावरण मंत्री मोहम्मद अकबर ह कीहिन हे कि राज्य सरकार ह पाछू दू बछर म गांव, गरीब, मजदूर, किसान, महिला, लईका, नवजवान अउ वनवासी समेत प्रदेश के हरएक वर्ग के लोगन मनके विकास बर कतकोन कदम उठाय हे।

 ओमन आज दुर्ग म राखे गे पत्रकारवार्ता ल संबोधित करत रीहिन। ओमन कीहिन कि परसों सतरह दिसंबर के भुपेश बघेल सरकार के अगवई म राज्य सरकार दू बछर पूरा करत हे। ए दू बछर म राज्य सरकार ह किसान मन बर जल संवर्धन, पशु संवर्धन, मृदा स्वास्थ्य अउ प्रदेश के सबो छोटे बड़े नरवा नाला ल पुर्नजीवित करे के कतकोन योजना चलाय हे।

राज्य सरकार ह समर्थन मूल्य म धान खरीदी बर बारदाना के कमी देखत पुराना बारदाना के उपयोग करे के निर्णय लीन हे। ए संबंध म खाद्य नागरिक आपूर्ति विभाग डहार ले आदेश जारी कर देहे।

 जारी आदेश के अनुसार बेमेतरा, बीजापुर, बालोद समेत राज्य के आने आने जिला मनले धान खरीदी बर बारदाना के कमी होय के कारण विकल्प के रूप म किसान मन करा मौजूद पुराना बारदाना के उपयोग करे के अनुरोध करे हे। एला धियान म राखत किसान डहार ले उपलब्ध कराय गे पुराना जूट बारदाना म ही धान खरीदी करे के अनुमति दे गेहे। जेला धान खरीदी अउ मिलिंग के बाद किसान मन ल लहुटा दे जाही।

प्रदेश म बाल श्रमिक मनके खोज करके ओमन ल मुख्यधारा ले जोड़े बर आज ले बाल श्रमिक सर्वेक्षण अभियान शुरू होगे हे।

 ए अभियान अवइया पंद्रह जनवरी तक चलही। जेखर उद्देश्य अभावग्रस्त परिस्थिति के कारण जउन लइका मन मजदूरी करे बर मजबूर हो जाथे, ओमन ल मुख्यधारा म लाके ओखर भविष्य ल व्यवस्थ्ति करे जा सकय।

 ए कड़ी म मुंगेली जिला म आई.सी.पी.एस. महिला अउ बाल विकास विभाग, श्रम विभाग अउ चाइल्ड लाइन के अधिकारी-कर्मचारी मनके टीम तियार करे गेहे। ये टीम आने आने प्रतिष्ठान मन म जाके कम उमर के लइका मनके तलाश करही।

प्रदेश म जमीन के दस्तावेज के रजिस्ट्रेशन अब एन.आई.सी. पुणे डहार ले विकसित एन.जी.डी.आर.एस. साफ्टवेयर ले करे जाही। एखर शुभारंभ पाॅयलट रन के रूप म अवइया पंद्रह दिसंबर ले उप पंजीयक कार्यालय धमतरी म करे जाही।

 जानबा के मुताबिक एनजीडीआरएस साॅफ्टवेयर ल देश के दस राज्य मन डहार ले अपनाय जा चुके हे। छत्तीसगढ़ एला अपनाये जाने वाला ग्यारहवंा राज्य हे। ए साॅफ्टवेयर म दूसर राज्य मन म प्रचलित बने प्रावधान मनके समावेश करे गेहे।  ए नवा बेवस्था के लागू होय ले दस्वावेज मनके पंजीयन बेवस्था अउ आसान हो जाही।

भारतीय जनता पार्टी के प्रदेश महामंत्री अउ विधायक नारायण चंदेल ह बिलासपुर म राखे गे पत्रकार वार्ता ल संबोंधित करत कीहिन कि केंद्रीय कृषि कानून के पारित होय ले किसान मन ल अपन उपज बेचे के आजादी मिले हे। ओमन कीहिन कि नवा मंडी एक्ट ले किसान मनके कोनो नुकसान नइ होही। एखर ले फसल के एमएसपी प्रभावित नइ होही।

 ओमन बताइन कि भाजपा अवइया तीन दिन म प्रदेश के लगभग चार सौ धान खरीदी केंद्र मन  म किसान चैपाल आयोजित करही। उंहें रायगढ़, कबीरधाम, महासमुंद म किसान महा पंचायत के आयोजन करे जाही।

बीजापुर जिला म सुरक्षा बलके टीम ह दू माओवादी मन ल गिरप्तार करे हे। मिले जानकारी के मुताबिक जिला के भैरमगढ़ थाना क्षेत्र ले डीआरजी अउ पुलिस बल के संयुक्त टीम ह तलाशी अभियान बर निकले रीहिस। ए दउरान उसपरि पहाड़ उपर दू झिन माओवादी मन ल पकड़े गीस। ए मनके ख्लिाफ कतकोन थाना म हत्या समेत कई ठन अपराध मामला दर्ज हे।

 इही जिला के गंगालूर थाना क्षेत्र म तलाशी अभियान के दउरान डीआरजी अउ सीएएफ के संयुक्त टीम ह गंगालूर-पुसना रद्दा म दू आई ई डी बरामद करे हे, जेला बम निरोधक टीम ह मउकाच म निष्क्रिय कर दीन।

रेलयात्री मनके सुविधा ल धियान म राखत रेल प्रशासन डहार ले कामाख्या- एलटीटी-कामाख्या के बीच अतिरिक्त सुपरफास्ट साप्ताहिक स्पेशल ट्रेन के परिचालन करे जात हे। ए ट्रेन छब्बीस दिसंबर के हरएक शनिवार के कामाख्या ले संझा छै बजे रवाना होही। ये ट्रेन रायगढ़, बिलासपुर, रायपुर, अउ गोंदिया होवत एलटीटी पहुंचही। अइसने एलटीटी-कामाख्या साप्ताहिक स्पेशल ट्रेन हरएक मंगलवार के एलटीटी ले मंझनियंा एक बजके पंद्रा मिनट म रवाना होही। जउन ह तीसर दिन कामाख्या पहुंचही।

 उंहें, हैदराबाद-रक्सौल-हैदराबाद पूजा स्पेशल ट्रेन के परिचालन के बिस्तार करे गेहे। ये ट्रेन अब सतरह जनवरी दू हजार इक्कीस तक चलही। ए गाड़ी हैदराबाद ले हरएक गुरूवार अउ रक्सौल ले हरएक रविवार के चलही।

प्रधानमंत्री ग्राम सड़क योजना के निर्माणाधीन काम म तीसर स्तर के गुणवत्ता के जांच बर राष्ट्रीय गुणवत्ता समीक्षक अरविंद कुमार भाटिया छत्तीसगढ़ आवत हे। श्री भाटिया परसों सतरह ले बीस दिसंबर तक दंतेवाड़ा अउ बाईस ले छब्बीस दिसंबर तक बीजापुर जिला म प्रधानमंत्री ग्राम सड़क योजना म  निर्माणाधीन सड़क के जांच करही।

राज्य सरकार के महत्वाकांक्षी योजना मलेरिया मुक्त बस्तर अभियान के तीसरा चरण बर आज प्रचार रथ ल रवाना करे गीस। राज्य कार्यक्रम अधिकारी डॅाक्टर जितेन्द्र ह बताइन कि बस्तर जिला म मलेरिया मुक्त बस्तर अभियान आज ले तीस जनवरी दू हजार इक्कीस तक चलही। ए दउरान सात विकासखंड के एक सौ अंठानवे गांव मनके दौरा करके स्वास्थ्य विभाग के टीम घर-घर जाके सर्वे करही।