मुख्यमंत्री-सरगुजा
मुख्यमंत्री भूपेश बघेल ह आज सरगुजा जिला मुख्यालय अंबिकापुर म करीबन छह सौ चैंतीस करोड़ रूपिया के लागत वाले एक सौ दस आने-आने निर्माण – विकास काम के लोकर्पण अउ सिलान्यास करीन। अपन प्रवास के दउरान मुख्यमंत्री ह अंबिकापुर म प्रदेस के पहिली गोधन एम्पोरियम के उद्घाटन घलो करीन। ए एम्पोरियम म गोधन न्याय योजना के तहत गोठान मन म बिसाय गे गोबर ले माईलोगिन समूह मन डहार ले बनाए गे सामान ल बेचे जाही।
मुख्यमंत्री ह अंबिकापुर म महामाया मंदिर के तीर पहाड़ी म बनाय गे आॅक्सीजन पार्क के उद्घाटन करीन। उहें, ओमन अंबिकापुर स्थित स्वामी आत्मानंद अंग्रेजी माध्यम स्कूल के लोकार्पण घलो करीन। श्री बघेल ह सरगुजा जिला के मेंड्राकला धान खरीदी केन्द्र के निरीक्षण करीन। ए मउका म ओमन केन्द्र म आए किसान मन ले गोठबात करीन अउ ओखर मन ले धान खरीदी के बेवस्था अउ भुगतान के बारे म जानकारी लीन।
जवान-शहीद
सुकमा जिला म काली माओवादी मन डहार करे गे विस्फोट म गंभीर रूप ले घायल होय कोबरा बटालियन के डिप्टी कमांडेंट विकास कुमार के रतिहा निधन होगे। सहीद विकास कुमार काली जिला के कांसाराम नरवा के तीर विस्फोटक होय के खबर मिले म छत्तीसगढ़ पुलिस के संग मिलके एला निष्क्रिय करत रिहीस। इही दउरान विस्फोट होगे अउ हादसा म ओमन गंभीर रूप ले घायल होगे रिहीस। ओमन ल इलाज बर रईपुर लाय गीस, जिहां पाछु रतिहा उंखर निधन होगे।
मुख्यमंत्री भूपेश बघेल ह डिप्टी कमांडेंट विकास कुमार के निधन म गहरा दुख जतावत किहीन कि उंखर सहादत बेकार नइ जाय। ओमन यहू किहीन कि अब माओवादी मनके खिलाफ सुरक्षा बल के आॅपरेशन अउ तेज होही।
इही बीच, बीजापुर जिला म कुटरू थाना क्षेत्र के केतुलनार म माओवादी मन ह मोबाइल नेटवर्क के काम म लगे दू ठिन जेसीबी गाड़ी म आगी लगा दीन।
उहें, सुकमा जिला म सुरक्षा बल के जवान मन ह दू माईलोगिन समेत चार माओवादी मन ल गिरफ्तार करे हे।
रथ यात्रा/बाईक रैली
छत्तीसगढ़ के कांग्रेस सरकार के दू बछर पूरा होय के मउका म आज ले प्रदेस म राम वनगमन पथ के पर्यटन जघा मन म रथ-यात्रा अउ बाइक रैली चालू होगे हे। ए यात्रा प्रदेस के उत्तरी भाग म कोरिया जिला के सीतामढ़ी-हरचैका अउ दक्षिणी भाग म सुकमा जिला के रामाराम ले एक संघरा सुरू होईस। कोरिया जिला मुख्यालय म क्षेत्रीय विधायक गुलाब कमरो अउ कलेक्टर एस.एन. राठौर ह रथयात्रा ल झंडा देखाके रवाना करीन। उहें, सुकमा जिला म कलेक्टर विनीत नंदनवार ह ए यात्रा मन ल झंडा देखाके भेजीन। कोरिया अउ सुकमा जिला म जगह-जगह लोगन मन ह फूल के बरसा करके यात्रा म सामिल लोगन मनके स्वागत करीन।
चार दिन तक चलइया ए यात्रा म करीबन सोलह किलोमीटर के दूरिहा तय करे जाही। ए यात्रा सत्रह दिसंबर के रईपुर के तीर चंदखुरी गांव के माता कौशिल्या मंदिर म सिराही। ए यात्रा म हरेक जिला के माटी रथ म राखे जाही, जेला आखिरी दिन चंदखुरी म रूख-राई लगाय म बउरे जाही।
बाल श्रमिक सर्वेक्षण अभियान
प्रदेस म बाल श्रमिक के तलास करके ओमन ल मुख्यधारा म जोड़े बर काली ले बाल श्रमिक सर्वेक्षण अभियान सुरू करे जाही। ए अभियान के उद्देश्य कमजोरहा परिस्थिति के सेती जउन लइका मन ह मजदूरी करे म मजबूर हे, ओमन ल मुख्यधारा म लाके उंखर भविष्य ल सुरक्षित करे जा सकही।
इही कड़ी म राजनांदगांव जिला म बाल श्रमिक सर्वेक्षण अभियान के तैयारी बर कलेक्टर टोपेश्वर वर्मा ह आज जिला बाल संरक्षण समिति के बइठका लीन। कलेक्टर के निरदेस म ए अभियान बर पांच दल बनाए गेहे, जउन ह आने-आने जघा मन म जाके कमती उमर के लइका मन ल खोजही। ए दल म महिला अउ बाल विकास विभाग के परियोजना अधिकारी मनके संग कतकोन स्कूल के हेड मास्टर अउ आंगनबाड़ी कार्यकर्ता मन ल घलो सामिल करे गेहे। ए सर्वेक्षण पन्द्रह जनवरी तक चलही।
मुख्यमंत्री-सरगुजा
मुख्यमंत्री भूपेश बघेल ह आज सरगुजा जिला मुख्यालय अंबिकापुर म करीबन छह सौ चैंतीस करोड़ रूपिया के लागत वाले एक सौ दस आने-आने निर्माण – विकास काम के लोकर्पण अउ सिलान्यास करीन। अपन प्रवास के दउरान मुख्यमंत्री ह अंबिकापुर म प्रदेस के पहिली गोधन एम्पोरियम के उद्घाटन घलो करीन। ए एम्पोरियम म गोधन न्याय योजना के तहत गोठान मन म बिसाय गे गोबर ले माईलोगिन समूह मन डहार ले बनाए गे सामान ल बेचे जाही।
मुख्यमंत्री ह अंबिकापुर म महामाया मंदिर के तीर पहाड़ी म बनाय गे आॅक्सीजन पार्क के उद्घाटन करीन। उहें, ओमन अंबिकापुर स्थित स्वामी आत्मानंद अंग्रेजी माध्यम स्कूल के लोकार्पण घलो करीन। श्री बघेल ह सरगुजा जिला के मेंड्राकला धान खरीदी केन्द्र के निरीक्षण करीन। ए मउका म ओमन केन्द्र म आए किसान मन ले गोठबात करीन अउ ओखर मन ले धान खरीदी के बेवस्था अउ भुगतान के बारे म जानकारी लीन।
किसान प्रदर्शन
जांजगीर-चांपा जिला के जैजेपुर क्षेत्र म स्थानीय बसपा विधायक केशव चन्द्रा के अगुवई म आज किसान मन ह बाराद्वार-हसौद मार्ग म चक्काजाम करीन। ए किसान मन ह कचन्दा गांव म धान खरीदी केन्द्र दुबारा सुरू करे के मांग करत रिहीन।
ओति, धमतरी म आज जिला के किसान यूनियन ह कृषि कानून ल रद्द करे के मांग ल लेके धरना-प्रदर्शन करीन।
जावड़ेकर-संबोधन
केन्द्रीय सूचना अउ प्रसारण मंत्री प्रकाश जावड़ेकर ह किहीन कि भारत म कोरोना संक्रमण ले पूरा तरह ले निपटे जावत हे। आज नई दिल्ली म कोरोना संक्रमण उपर केन्द्रित अंतर्राष्ट्रीय लघु फिल्म महोत्सव म बोलत श्री जावड़ेकर ह किहीन कि जनवरी म ही प्रधानमंत्री नरेन्द्र मोदी डहार ले कोरोना महामारी के पहिचान कर ले गे रिहीस अउ ओमन एखरे ले निपटे बर पूरा बछर मजबूती के संग काम करीन।
कोरोना-जागरूकता
प्रदेस म कोरोना संक्रमण ले बचाव बर सरलग जन-जागरूकता अभियान चलाय जावत हे। इही कड़ी म जांजगीर-चांपा जिला म घलो महात्मा गांधी राष्ट्रीय ग्रामीण रोजगार गांरटी योजना-मनरेगा के तहत जन आंदोलन के माध्यम ले लोगन मन ल कोरोना ले बचाव बर जागरूक करे जावत हे।
अभियान के दउरान ग्रामीण अउ मजदूर मनके इकट्ठा होय के सार्वजनिक जगह म ओमन ल सपथ देवा के सचेत करे जावत हे। उहें, जिला के गौठान मन म घलो हालचे म मनाए गे पैरादान दिवस के मउका म डभरा जनपद पंचायत के आने-आने गांव मन म घलो गांव वाले मन ल सपथ देवाय गीस। ए दउरान स्थानीय लोगन मन ल मास्क पहिरे अउ सार्वजनिक जघा म दू गज के दूरी बनाय राखे के सलाह दे गेहे। एखर अलावा संक्रमण ले बचाव बर घेरी-बेरी साबुन ले हाथ धोय अउ साफ-सफाई राखे बर घलो केहे गेहे।
जांजगीर-चांपा जिला पंचायत के सीईओ तीर्थराज अग्रवाल ह बतईन हे कि मनरेगा जनआंदोलन के माध्यम ले दीवाल लेखन समेत सूचना पटल म जागरूकता संदेश ल प्रसारित करे जावत हे। ए संदेस ल आने-आने पंचायत संस्था के सोसल मीडिया ग्रुप म घलो भेजे जावत हे।
दुर्घटना
राजनांदगांव जिला म पाछु रतिहा होय सड़क हादसा म एक झिन मनखे के मउत होगे। मिले खबर के मुताबिक छुरिया विकासखंड के कल्लुबंजारी गांव के तीर चारपहिया गाड़ी ह फटफटी ल पाछु ले टक्कर मार दीस ए हादसा म फटफटी चालक के मउकाच म मउत होगे।
उहें, रईपुर के सरस्वती नगर थाना क्षेत्र के महोबा-बाजार ओवरब्रिज म दू ठिन कार के बीच होय टक्कर म दू झिन नोनी समेत चार झिन लोगन गंभीर रूप ले घायल होगे। टक्कर अतका जोरदरहा रिहीस हे कि एक ठिन कार के आगू के चक्का निकले के पुलिया के नीचे फेंका गे।
हाथी-ग्रामीण मौत
कोरबा जिला के कटघोरा वनमंडल के पसान क्षेत्र म पाछु हफ्ता के दउरान जंगली हाथी मनके हमला म तीन झिन गांव वाले मनके मउत होगे हे। काली रतिहा हरदेवा ग्राम पंचायत के घुटरापारा इलाका म जंगली हाथी मनके हमला म एक झिन सियान के मउत होगीस। एखर पहिली, लेमरू क्षेत्र म घलो जंगली हाथी मनके हमला म दू झिन गांव वाले मनके मउत होगे हे।