कैबिनेट बैठक
प्रदेस म चालू खरीफ मौसम के समर्थन मूल्य म धान खरीदी एक दिसंबर ले चालू होही। मुख्यमंत्री भूपेश बघेल के पगरइति म आज राज्य मंत्रिमंडल के बइठका म धान अउ मक्का खरीदी के संगेसंग कस्टम मिलिंग के नीति ल मंजूरी दे गीस।
कृषि मंत्री रविन्द्र चैबे ह बइठका म ले गे फइसला के जानकारी देवत बतईन कि धान खरीदी के काम एक दिसंबर ले इकतीस जनवरी तक करे जाही। उहें, मक्का के खरीदी एक दिसंबर ले सुरू होही, जउन ह इकतीस मई तक चलही। ए बछर प्रदेस म करीबन नब्बे लाख मीटरिक टन धान खरीदी के लक्ष्य राखे गेहे। धान बेचे बर इक्कीस लाख छप्पन हजार किसान मन ह पंजीयन कराय हे। सहकारी समिति मन म किसान मन ल टोकन बांटे जात हे। कृषि मंत्री ह बतईन कि सर्वर म आय तकनीकी खराबी के सेती टोकन बांटे के काम प्रभावित होय हे, जउन ल अब ठीक कर ले गेहे। धान खरीदी बर पर्याप्त संख्या म बारदाना के घलो बेवस्था करे जावत हे।
कृषि मंत्री ह बतईन कि कैबिनेट म आईटीआई के अंतिम परीक्षा म सामिल होइवया परीक्षार्थी मन ल प्रायोगिक प्रसिक्षण पूरा कराय बर औद्योगिक प्रसिक्षण संस्थान मन ल खोले जाय के फइसला ले गेहे।
बइठका म यहू सुझाव दे गीस कि स्नातकोत्तर के कक्षा दस दिसंबर अउ स्नातक के कक्षा पन्द्रह दिसंबर ले सुरू करे जाय। ए बिसय म कुलपति मन ले रिपोर्ट मंगाय के बाद आखिरी फइसला ले जाही।
उहें, कैबिनेट ह फइसला लेहे कि गोधन न्याय योजना म चलत आने-आने सरकारी संस्थान अउ गौठान डहार ले उत्पादित जैविक खातू के सासन के आने-आने विभाग डहार ले सीधा क्रय करे जा सकही। जैविक खातू दर के निर्धारण कृषि विभाग समय-समय म करही। एखर बर भंडार क्रय नियम म संसोधन करे जाही।
भाजपा-आरोप
भारतीय जनता पार्टी के प्रदेस अध्यक्ष विष्णुदेव साय ह राज्य सरकार उपर किसान विरोधी होय के आरोप लगावत किहीन कि प्रदेस म समर्थन मूल्य म धान खरीदी के तैयारी आधा होय हे अउ टोकन बांटे के काम म घलो अव्यवस्था हे। श्री साय ह मुख्यमंत्री ले धान खरीदी ल गंभीरता ले लेके अउ किसान मन ल टोकन ले म होवत परेसानी ल खतम करे के संगेसंग उपर्जान केन्द्र मन म अव्यवस्था ल दूरिहा करे के मांग करीन हे। श्री साय ह चेतावनी दीन हे कि कहूं किसान मनके मांग पूरा नइ होही त भाजपा चुप नइ बइठे।
उद्यानिकी फसल-बीमा
मौमस आधारित फसल बीमा योजना म प्रदेस म रबी मौसम के अधिसूचित उद्यानिकी फसल – पताल, भाटा, फूलगोभी, पत्तागोभी, गोदली अउ आलू के बीमा पन्द्रह दिसंबर तक करे जाही। बीमा योजना म जम्मों ऋणी अउ अऋणी किसान सामिल हो सकत हे। किसान मन ल फसल बीमा कराय बर अपन क्षेत्र के एलायंज जनरल इंश्योरेंस कंपनी लिमिटेड के प्रतिनिधि, लोक सेवा केन्द्र, बैंक साखा, सहकारी समिति अउ सरकारी उद्यान रोपणी ले संपर्क करना होही।
मनरेगा-रोजगार
छत्तीसगढ़ म महात्मा गांधी राष्ट्रीय ग्रामीण रोजगार गांरटी योजना-मनरेगा म चालू वित्तीय बछर म अब तक एक लाख इक्कीस हजार सात सौ चालीस परिवार मन ल सौ दिन ले जादा के रोजगार देवाय गेहे। सबले जादा परिवार मन ल सौ दिन के रोजगार देवाय के मामला म छत्तीसगढ़ देस म छठवां स्थान म हे।
अधिकारी मन बतईन कि ए बछर करीबन उन्नीस हजार सात सौ निन्यानवे परिवार मन ल सौ दिन ले जादा के रोजगार देवाय गेहे। ए मामला म छत्तीसगढ़ देस म ओड़िसा के बाद दूसर स्थान म हे।
मन की बात
प्रधानमंत्री नरेन्द्र मोदी काली बिहनिया ग्यारह बजे आकाशवाणी ले ‘‘मन की बात‘‘ कारीकरम म अपन बिचार साझा करही। ये मासिक रेडियो कारीकरम के इकहत्तरवां कड़ी होही। एला आकाशवाणी अउ दूरदर्शन के जम्मों नेटवर्क म प्रसारित करे जाही। ए कारीकरम ल आकाशवाणी समाचार के वेबसाइट अउ मोबाइल ऐप म घलो सुने जा सकही। संगेसंग आकाशवाणी, डीडी न्यूज, प्रधानमंत्री कार्यालय अउ सूचना प्रसारण मंत्रालय के यू-ट्यूब चैनल मन म लाइव स्ट्रीम करे जाही। हिन्दी म प्रसारण के बाद आकाशवाणी ले ए कारीकरम ल क्षेत्रीय भासा म प्रसारित करे जाही। क्षेत्रीय भासा म रतिहा आठ बजे एला फेर सुने जा सकही।
पूर्व आईएसएस-ईडी कार्रवाई
प्रवर्तन निदेशालय-ईडी ह पूर्व आईएएस अधिकारी बाबूलाल अग्रवाल के खिलाफ कार्रवाई करत सत्ताईस करोड़ छियासी लाख रूपिया के संपत्ति कुरकी करे हे। ईडी ले मिले जानकारी के मुताबिक बाबूलाल अग्रवाल के खिलाफ आपराधिक कदाचार अउ धोखाधड़ी ले जुड़े मामला म धन सोधन निवारण अधिनियम के तहत कार्रवाई करे गेहे। कुरकी करे गे संपत्ति म फैक्ट्री अउ मसीन, बैंक खाता म बाचे रासि अउ बाबूलाल अग्रवाल अउ उंखर परिवार के सदस्य मनके अचल संपत्ति सामिल हे।
अनुसूचित जनजाति-प्रकरण वापसी
प्रदेस के बस्तर संभाग अउ राजनांदगांव जिला म अनुसूचित जनजाति वर्ग के लोगन मनके खिलाफ चलत मामला ल निपटाय म अब तेजी लाय जाही। मुख्यमंत्री भूपेश बघेल ह गृह विभाग के अधिकारी मनके बइठका लेके आदिवासी मनके खिलाफ चलत मामला के संबंध म समीक्षा करीन अउ ए मामला मन ल जल्दीच निपटाय के निरदेस दीन।
बइठका म बताय गीस कि बस्तर संभाग के सात जिला अउ राजनांदगांव जिला म चार सौ चैरानवे प्रकरण म अनुसूचित जनजाति वर्ग के लोगन मनके कुल संख्या आठ सौ उनहत्तर हे।
छत्तीसगढ़ी राजभाषा दिवस
आज छत्तीसगढ़ी राजभासा दिवय हरय। छत्तीसगढ़ी ल सरकारी कामकाज के भासा बनाय अउ ओखर प्रसार बर छत्तीसगढ़ी राजभासा आयोग के गठन करे गेहे। आठवां छत्तीसगढ़ी राजभासा दिवस के मउका म आज राजधानी रईपुर समेत प्रदेस के आने-आने जघा म कतकोन कारीकरम होवत हे।
रईपुर के महंत घासीदास स्मारक संग्रहालय के सभागार म घलो गोष्ठी के आयोजन करे गीस। मुख्यमंत्री भूपेश बघेल ह रईपुर स्थित अपन निवास कार्यालय ले ए गोष्ठी के वर्चुअल सुभारंभ करीन। ए मउका म ओमन छत्तीसगढ़ी राजभासा के प्रचार-प्रसार, साहित्य सृजन अउ संवर्धन म बिसेस काम करइया प्रदेस के नौ विभूति मन ल साल अउ नरियल देके सम्मानित करीन।
मुख्यमंत्री ह प्रदेसवासी मन ल छत्तीसगढ़ी राजभासा दिवस के बधाई देवत किहीन कि छत्तीसगढ़ी भासा के विकास अउ छत्तीसगढ़ी भासा म साहित्य सृजन के बड़ जरूरत हे। ओमन किहीन कि प्रदेस के गोंडी, हल्बी, कुडुख अउ सरगुजिहा जइसन भासा म घलो लइका मन ल सिक्षा दे जावत हे।
बाल अधिकार आयोग
प्रदेस म चउक-चउराहा म लइका मन ले भीख मांगे ल रोके खातिर अउ एमा सामिल लइका मनके पुनर्वास बर राज्य बाल अधिकार संरक्षण आयोग डहार ले अभियान चलाय जाही। एखर बर चउक-चउराहा ल चिन्हारी करके बिसेस कार्ययोजना बनाय जाही। आयोग के अध्यक्ष प्रभा दुबे ह वीडियो कान्फ्रेंसिंग के माध्यम ले पुलिस, जम्मों जिला के बिसेस किशोर इकाई, बाल कल्याण समिति, बाल संरक्षण इकाई अउ महिला बाल विकास विभाग के अधिकारी मन ल ए संबंध म जरूरी कार्रवाई करे निरदेस दीन।
नर्सिंग छात्राएं-उपस्थिति
प्रदेस म बीएससी नर्सिंग, पोस्ट बेसिक नर्सिंग अउ एमएससी नर्सिंग के छात्रा मन ल क्लीनिकल प्रशिक्षण बर उपस्थित रेहे के निरदेस जारी करे गेहे। ए संबंध म पहली नर्सिंग पाठ्यक्रम के पढ़ई करत छात्रा मन ल क्लीनिकल प्रसिक्षण ले बर अपन-अपन संस्था म मौजूद होय के निरदेस दे गेहे। फेर, अभी घलो कुछेक नर्सिंग छात्रा प्रसिक्षण बर उपस्थित नइ होवत हे।
पूरक परीक्षा
छत्तीसगढ़ माध्यमिक शिक्षा मंडल डहार ले राखे गे कक्षा दसवीं अउ बारहवीं के पूरक परीक्षा के संगेसंग डीएलएड प्रथम वर्ष के परीक्षा आज ले सुरू होगे हे। ए परीक्षा म करीबन सत्यासी हजार परीक्षार्थी सामिल होवत हे। कोरोना संक्रमण ल देखत परीक्षा केन्द्र मन म हरेक कक्षा म सिरिफ दस झिन विद्यार्थी मनके बइठे के बेवस्था करे गेहे। उहें, परीक्षा केन्द्र मन म जम्मों विद्यार्थी अउ सिक्षक मन ल मास्क पहिरना जरूरी हे।
प्रवासी पक्षी-प्रक्षेत्र
प्रवासी पक्षी मन बर प्रसिद्ध दुरूग जिला के बेलौदी गांव म पक्षी विचरण प्रक्षेत्र बनाय जाही। प्रक्षेत्र बने ले प्रवासी पक्षी मनके संख्या म बढ़ोतरी होही। संगेसंग इहां बर्ड वाचिंग अउ पर्यटन के घलो संभावना बाढ़ही। मुख्यमंत्री भूपेश बघेल के निरदेस म दुरूग कलेक्टर डाॅक्टर सर्वेश्वर नरेन्द्र भूरे ह ए क्षेत्र के जांच करीन।
पर्यावरण वन
प्रदेस म पर्यटन ल बढ़ावा दे खातिर बिलासपुर वनमंडल म सीपत-बलौदा रद्दा के ग्राम लूतरा म ‘‘पर्यावरण वन‘‘ के स्थापना करे गेहे।
वन मंत्री मोहम्मद अकबर ह बतईन कि पर्यावरण वानिकी योजना म ए पर्यावरण वन के निर्माण करीबन एक करोड़ चालीस लाख रूपिया के लागत ले करे गेहे। ए वन लोगन मन म पर्यावरण के प्रति जागरूकता लाय म बिसेस भूमिका निभाही।