लोकवाणी
मुख्यमंत्री भूपेश बघेल ह केहे हे कि छत्तीसगढ़ के लइका मन अपन सेहत, सिक्षा, हुनर अउ खेलकूद कौशल ले देस अउ दुनिया म अपन बिसिष्ट पहिचान बनाय। राज्य सरकार लइका मन बर कतकोन योजना संचालित करत हे। मुख्यमंत्री ह आज मासिक रेडियोवार्ता कारीकरम ‘‘लोकवाणी‘‘ के बारवां कड़ी म ‘‘बालक-बालिकाओं की पढ़ाई, खेलकूद, भविष्य‘‘ बिसय म अपन विचार साझा करीन। ओमन बतईन कि छत्तीसगढ़ के संस्कृति ल संझोय बर कतकोन परयास करे जावत हे।
लोकवाणी म मुख्यमंत्री ह प्रदेसवासी मन ल देवारी तिहार के संघरा गौरा-गौरी, गोवर्धन पूजा, मातर, भाई-दूज, जेठउनी अउ पुन्नी मेला के सुभकामना देहे।
श्री बघेल ह चैदह नवंबर के पूर्व प्रधानमंत्री स्वर्गीय जवाहर लाल नेहरू के जन्म दिन ‘बाल दिवस‘ उपर लइका मनके पूछे गे सवाल के जवाब घलो दीन। ओमन कहिन कि आज घलो नेहरू जी के विचार के संग आगे बढ़े के जरूरत हे, जेमा महात्मा गांधी के आदर्स के सम्मान घलो हे अउ देस बर बलिदान अउ योगदान देवइया जम्मों महापुरूष मनके सम्मान घलो हे। संगेसंग ओमन आंगनबाड़ी केन्द्र म चलाय जात नवाचार कारीकरम के घलो सराहना करीन।
मुख्यमंत्री ह किहीन हे कि नारायणपुर जिला म खेलो इंडिया केन्द्र सुरू करे के प्रस्ताव हे। संगेसंग प्रदेस म मलखंभ अकादमी बनाय के प्रयास घलो करे जात हे।
साय-बयान
भारतीय जनता पार्टी के प्रदेस अध्यक्ष विष्णु देव साय ह राज्य म सरलग बाढ़त अपराध उपर चिंता करत राज्य सरकार के कामकाज उपर सवाल उठाय हे। श्री साय ह राजनांदगांव जिला के अंबागढ़ चैकी म एक झिन नोनी अउ पेण्ड्रा म आंगनबाड़ी कार्यकर्ता के संग होय दुष्कर्म अउ राजधानी रईपुर म एक झिन महिला के हत्या जइसे घटना के निंदा करत केहे हे कि नारी ससक्तिकरण अउ सम्मान के रक्षा के सरकार के जम्मों दावा खोखला साबित होवत हे। ओमन आरोप लगाय हे कि अपराधी मन राजनीतिक संरक्षण म कानून के उल्लंघन करत हे।
किसान-आत्महत्या
रईपुर जिला के अभनपुर विकासखंड के गांव तोरला म पाछु दिन किसान प्रकाश तारक डहार ले आत्महत्या करे के मामला ल लेके गठित जांच कमेटी ह अपन रिपोर्ट राज्य सरकार ल सौंपे हे। रिपोर्ट म मृतक किसान उपर कोन्हों करज बकाया नइ होय, उंखर परिवार ल नियमित रूप ले पीडीएस के रासन मिले अउ ओखर अवसाद ले ग्रसित होय के उल्लेख करे गेहे।
उहें, पटवारी ह अपन रिपोर्ट म किसान के फसल के स्थिति ल सामान्य बताय हे।
इही बीच, नेता प्रतिपक्ष धरमलाल कौशिक ह किसान के आत्महत्या के मामला म जांच समिति डहार ले पेस करे गेहे रिपोर्ट उपर सवाल उठाय हे। ओमन केहे हे कि मृतक किसान ह अवसाद ले ग्रसित नइ रिहीस। फेर ओखर ुफसल ल नुकसान पहुंचे रिहीस। श्री कौशिक ह राज्य सरकार ले मृतक के परिवार के एक झिन मनखे ल नौकरी दे अउ फसल के होय नुकसान के मुआवजा देेके मांग करीन। श्री कौशिक ह मृतक के परिजन मन ले मिलीन अउ ओमन ल इक्कीस हजार रूपिया के आर्थिक सहायता दीन। ओमन किहीन कि प्रदेस म नकली दवा, खाद अउ नकली बीज के सेती किसान मनके चिंता बाढ़ गेहे।
हमर ग्राम सभा
पंचायत अउ ग्रामीण विकास मंत्री टी.एस. सिंहदेव ह आज रतिहा साढ़े सात बजे आकाशवाणी रईपुर ले प्रसारित बिसेस कारीकरम ‘‘हमर ग्राम सभा‘‘ म राज्य सासन के नीति, योजना अउ कारीकरम मनके बारे म जानकारी दीहीं। ए कारीकरम ल मीडियम वेब नौ सौ इक्यासी किलोहटर््स म सुने जा सकत हे, जेला प्रदेस स्थित आकाशवाणी के जम्मों केन्द्र एक संग रिले करही।
कोरोना-जागरूकता
धमतरी जिला के समाजसेवी सरिता दोषी ह लोगन मन ले कोरोना ले बचाव बर जरूरी सावधानी बरते के अपील करे हे।
होल्ड बाईट – सरिता दोषी (20 सेकेंड)
माओवादी-मुठभेड़/स्मारक ध्वस्त
बीजापुर जिला म आज सुरक्षा बल अउ माओवादी मनके बीच होय मुठभेड़ म एक झिन मााओवादी मारे गीस। उहें, मुठभेड़ म दू झिन जवान घायल होगे।
पुलिस अधीक्षक कमलोचन कश्यप ह घटना के पुष्टि करत बतईन कि पामेड़ थाना क्षेत्र के भट्टीगुड़ा के तीर सुरक्षा बल अउ माओवादी के बीच करीबन एक घंटा तक मुठभेड़ होईस। एखर बाद सुरक्षा बल ह घटनास्थल ले एक झिन माओवादी के सव के अलावा चार हथियार, चालीस ले पचास पाईप बम अउ गोलाबारूद बरामद करीन। उहें, मुठभेड़ म घायल होय जवान ल हेलीकाॅप्टर ले रईपुर लाय गीस अउ अस्पताल म भर्ती कराय गीस।
ऐति, दंतेवाड़ा जिला के कटेकल्याण थाना क्षेत्र म सुरक्षा बल ह तीन किलोवजन के टिफिन बम बरामद करे हे, जेला बम निरोधक दस्ता ह मउकाच म निष्क्रिय कर दीस।
उहें, सुकमा जिला म डीआरजी के जवान मन गोलापल्ली के सिंगाराम गांव म ग्रामीण मनके मदद ले एक ठिन माओवादी स्मारक ल ध्वस्त करे हे।
मुख्यमंत्री-पाटन
मुख्यमंत्री भूपेश बघेल ह केहे हे कि प्रदेस म ग्रामीण क्षेत्र के विकास सरकार के सबले बड़े प्राथमिकता हे। मुख्यमंत्री ह काली पाटन ब्लाॅक के ग्राम सेलूद पहुंचीन अउ इहां करीबन आठ करोड़ रूपिया के लागत ले मिनी स्टेडियम बनाय अउ इंग्लिश मीडियम स्कूल खोले के घोसना करीन। ओमन गौठान म माईलोगिन मनके आर्थिक गतिविधि ल संचालित करे अउ शेड बनाय बर पांच करोड़ रूपिया अउ पच्चीस जगह म ओपन जिम खोले के घलो स्वीकृति दीन। श्री बघेल ह पाटन क्षेत्र के ग्राम पंचायत मन म विकास अउ निर्माण काम बर तकरीबन पौने दस करोड़ रूपिया के घलो मंजूरी दीन। ओमन यहू बतईन कि कोरोना काल के बेरा प्रदेस म रोज छब्बीस लाख लोगन ल मनरेगा म रोजगार दे गेहे।
अपन प्रवास के बेरा मुख्यमंत्री ह पाटन ब्लाॅक के ग्राम पतोरा घलो पहुंचीन अउ उहां महिला स्व-सहायता समूह डहार ले बनाय जावत छत्तीसगढ़ी व्यंजन अउ सजावटी सामान के अवलोकन करीन। ए बेरा म ओमन बिहान बाजार के बुकलेट के लोकार्पण घलो करीन।
बैठक-निर्देश
कोरोना संक्रमण ल देखत राज्य सरकार ह प्रदेस के जम्मों विभाग प्रमुख मन ले केहे गेहे कि एकदम जरूरी होयच म बइठका के आयोजन करे जाय। ए बारे म सामान्य प्रसासन विभाग डहार ले संभाग आयुक्त अउ कलेक्टर मन ल चिट्ठी लिखके वर्चुअल मीटिंग करे के सलाह दे गेहे।
नंदकुमार पटेल-जयंती
कांग्रेस के पूर्व प्रदेस अध्यक्ष अउ पूर्व गृह मंत्री स्वर्गीय नंदकुमार पटेल के आज जयंती हे। ए बेरा म जिला अउ ब्लाॅक मुख्यालय म स्वर्गीय पटेल ल श्रद्धांजलि दे बर प्रार्थना सभा अउ गोष्ठी के आयोजन करे गीस।
उहें, छत्तीसगढ़ प्रदेश कांग्रेस कमेटी डहार ले राजधानी रईपुर के राजीव भवन म कांग्रेसी मन स्वर्गीय पटेल ल पुष्पांजलि अउ श्रद्धांजलि अर्पित करीस। ए बेरा म प्रदेस कांग्रेस अध्यक्ष मोहन मरकाम, कांग्रेस के बड़का पदाधिकारी अउ कतकोन कार्यकर्ता मन उपस्थित रिहीन।
मुख्यमंत्री भूपेश बघेल ह पूर्व गृह मंत्री स्वर्गीय पटेल ल याद करत कहिन कि ओमन जमीन ले जुड़े राजनेता रिहीन अउ छत्तीसगढ़ ल विकास के उंचाई म ले जाय खातिर सपना देखीन।