आरक्षक भर्ती-समय सारिणी
पुलिस मुख्यालय ह आरक्षक संवर्ग के भर्ती बर सारीरिक दक्षता परीक्षा के रेंजवार समय-सारिणी जारी कर देहे। एखर अनुसार अवइया चार जनवरी दू हजार इक्कीस ले सारीरिक दक्षता परीक्षा के कारीकरम जारी करे गेहे। रईपुर रेंज के अभ्यर्थी मन बर चार जनवरी ले तीन फरवरी तक, बिलासपुर रेंज के अभ्यर्थी मन बर चार ले सोलह जनवरी, सरगुजा रेंज बर चार ले बारह जनवरी, बस्तर चार ले उन्नीस जनवरी अउ दुरूग रेंज के अभ्यर्थी मन बर चार जनवरी ले छह फरवरी तक सारीरिक दक्षता परीक्षा आयोजित करे जाही।
उहें, बीस फरवरी दू हजार इक्कीस तक चयन सूची जारी करे के समय घलो निर्धारित करे गेहे। परीक्षा बर हर रेंज स्तर म चैदह नवंबर तक भर्ती समिति के गठन करे जाही। ए परीक्षा म सौ अउ आठ सौ मीटर दउड़, लंबी कूद, ऊंची कूद अउ गोला फेंक निर्धारित करे गेहे।
विश्वविद्यालय/महाविद्यालय-निर्देश
विश्वविद्यालय अनुदान आयोग यूजीसी ह देसभर म विश्वविद्यालय अउ महाविद्यालय ल फिर से खोले बर दिसा-निरदेस जारी करे हे। एमा केहे गेहे कि नवा-निरदेस के अनुसार कंटेनमेंट जोन ल छोड़के बाकी जम्मों क्षेत्र म संबंधित राज्य अउ केन्द्र सासित प्रदेस के सरकार के संग बिचार-बिमर्स करके चरणबद्ध तरीका ले विश्वविद्यालय अउ महाविद्यालय ल खोले जा सकत हे। यूजीसी ह हफ्ता म छह दिन के काम अउ सुरक्षित दूरी राखत कम संख्या म पढ़ईया मनके कक्षा सुरू करे के सलाह देहे।
केन्द्रीय शिक्षा मंत्री डाॅक्टर रमेश पोखरियाल निशंक ह केहे हे कि जम्मों सिक्षण संस्थान विद्यार्थी, अभिभावक अउ एखर ले जुड़े जम्मों लोगन के बने भविष्य अउ जीवन बर कोरोना ले बचाव अउ दिसा-निरदेस के पालन करना जरूरी होही।
स्वास्थ्य मंत्रालय-दिशा-निर्देश
केन्द्रीय स्वास्थ्य मंत्रालय ह कोरोना महामारी ल देखत विदेस ले अवइया लोगन बर नवा दिसा-निरदेस जारी करे हे। जम्मों यात्री मन बर निर्धारित समय म कम से कम बहत्तर घंटा पहिली संबंधित स्वास्थ्य काउंटर म पहुंचे ल पड़ही या फेर आॅनलाईन पोर्टल म स्व-घोषणा पत्र देना होही। सरकारी निरदेस के पालन करत चैदह दिन बर घर म या खुद के निगरानी म रेहे ल पड़ही। निगेटिव आरटीपीसीआर जांच रिपोर्ट देके संग यात्री मन ल होम क्वारेंटाइन के छूट मिल सकही।
लोकवाणी
मुुख्यमंत्री भूपेश बघेल के मासिक रेडियो वार्ता लोकवाणी के बारहवंा कड़ी के प्रसारण इतवार आठ नवंबर के होही। मुख्यमंत्री ह लोकवाणी म ए दरी – बालक, बालिकाओं की पढ़ाई, खेलकूद और भविष्य – विषय उपर प्रदेश के मनखे मन ले गोठबात करहीं।
ए कार्यक्रम के प्रसारण छत्तीसगढ़ के आकाशवाणी के सबो केंद्र एफ.एम. रेडियो अउ क्षेत्रीय समाचार चैनल म बीहनिया साढ़े दस बजे ले ग्यारा बजे तक करे जाही।
राज्य महिला आयोग
राज्य महिला आयोग के अध्यक्ष डाॅक्टर किरणमयी नायक ह केहे हे कि महिला अउ नोनी मन ल भयभीत होय के जरूरत नइ हे। कोंडागांव अउ नारायणपुर जिला म महिला उत्पीड़न ले जुड़े प्रकरण के सुनवाई के बाद ओमन किहीन कि यदि कोन्हों महिला ल प्रताड़ित करे जाथे या ओखर संग घरेलू हिंसा करे जाथे त ओमन महिला आयोग म सिकायत कर सकत हे। ए बेरा कोंडागांव जिला के पांच अउ नारायणपुर जिला के एक ठिन प्रकरण के सुनवाई करे गीस।
कोरोना-जागरूकता
छत्तीसगढ़ के जाने-माने मूर्तिकार पद्मश्री जे.एम. नेलसन ह लोगन मन ले कोरोना ले बचाव बर जरूरी सावधानी बरते के अपील करीन हे।
होल्ड बाईट – जे.एम. नेलसन (30 सेकेंड)
हज-आॅनलाइन आवेदन
हज दू हजार इक्कीस बर आॅनलाईन आवेदन के प्रक्रिया काली सात नवंबर ले सुरू होही। आवेदन केन्द्रीय हज कमेटी के वेबसाइट ले प्राप्त करे जा सकत हे। एखर अलावा केन्द्र सरकार के मोबाइल ऐप्लीकेशन के माध्यम ले घलो आवेदन करे जा सकत हे। आवेदन बर आखिरी तारीख दस दिसंबर राखे गेहे। हज यात्री मनके पहला उड़ान छब्बीस जून दू हजार इक्कीस ले सुरू होही अउ उंखर स्वदेस वापसी तीस जुलाई दू हजार इक्कीस तक होही।
भाजपा प्रशिक्षण-कार्यशाला
भारतीय जनता पार्टी प्रदेस इकाई डहार ले आज ले राजधानी रईपुर म तीन दिवसीय राज्य स्तरीय प्रशिक्षण कार्यसाला के आयोजन करे जावत हे। कुशाभाऊ ठाकरे परिसर म राखे गे ए कार्यसाला के उद्घाटन के बेरा म आज नवा सदस्य मन ल पार्टी के नीति के बारे म जानकारी दे गीस। एमा करीबन दू सौ कार्यकर्ता मन ल प्रसिक्षण दे जात हे।
कार्यसाला म भाजपा के प्रदेस अध्यक्ष विष्णुदेव साय, राष्ट्रीय उपाध्यक्ष अउ पूर्व मुख्यमंत्री डाॅक्टर रमन सिंह, विधानसभा म नेता प्रतिपक्ष धरमलाल कौशिक, पवन साय के अलावा रामप्रताप सिंह के संग दूसर पदाधिकारी अउ कार्यकर्ता उपस्थित रिहीस।
ईओडब्ल्यू-एसीबी कार्रवाई
आर्थिक अपराध अन्वेषण ब्यूरो अउ एंटी करप्शन ब्यूरो के नाव म ठगी करइया तीन झिन आरोपी ल पुलिस ह गिरफ्तार करे हे। एमा एक झिन बर्खास्त अउ एक झिन निलंबित पुलिसकर्मी घलो सामिल हे।
आधिकारिक जानकारी के अनुसार पुलिस विभाग म उपनिरीक्षक के पद ले बर्खास्त सत्येन्द्र सिंह वर्मा ल भाटापारा-बलौदाबाजार पुलिस ह, उहें राजेश तराते ल रईपुर के सिविल लाइन पुलिस अउ रईपुर के जिला पुलिस के निलंबित सहायक उपनिरीक्षक विनोद वर्मा ल बलौदाबाजार के कोतवाली पुलिस ह गिरफ्तार करे हे।
विस्फोटक बरामद/जवान आत्महत्या
दंतेवाड़ा जिला म सुरक्षा बल ह तीन अउ पांच किलो के आईईडी बम बरामद करे हे। खबर मिले हे कि केन्द्रीय रिजर्व पुलिस बल-सीआरपीएफ के दल तलाशी अभियान म निकले रिहीस। इही बेरा अरनपुर थाना क्षेत्र के कोडासावली-नीलवाया मार्ग म माओवादी मन ह जवान मन ल नुकसान पहुंचाय के उद्देश्य ले तीन अउ पांच किलो के विस्फोटक लगाय रिहीस, जेला सुरक्षा बल ह बरामद करके मउकाच म निष्क्रिय कर दीस।
ऐति, राजनांदगांव जिला के बसेली कैम्प म पदस्थ आईटीबीपी के एक झिन जवान के गोली लगे ले मउत होगे। मामला के जांच करे जात हे।
नेचरल फार्मिंग-कार्यशाला
प्रदेस म नेचरल फार्मिंग अउ कृषि क्षेत्र म क्रियान्वयन के संभावना के संबंध म रईपुर म एक ठिन कार्यसाला के आयोजन करे गीस। ए बेरा म आंध्रप्रदेश के कृषि बिसेसज्ञ टी.विजय कुमार ह केहे हे कि नेचरल फाॅर्मिंग छत्तीसगढ़ के किसान बर उपयोगी अउ लाभदायी साबित हो सकत हे। ओमन किहीन कि एखर ले धान के उत्पादन म नौ प्रतिसत के बढ़ोतरी अउ लागत म करीबन बीस प्रतिसत के कमी घलो आही। संगेसंग सरकार डहार ले खाद अउ बिजली म देवइया सब्सिडी के बचत घलो होही।
उहें, राज्य योजना आयोग के उपाध्यक्ष अजय सिंह ह कृषि विभाग अउ कृषि विश्वविद्यालय ल नेचरल फॅार्मिंग ल पाॅयलट प्रोजेक्ट के रूप म लागू करे के सुझाव घलो देहे।
ट्रेन-यात्री सुविधा
रेलयात्री के सुविधा ल धियान म राखत रेलवे ह सिकंदराबाद-सीतामढ़ही बर पूजा स्पेशल ट्रेन के सुविधा देहे। ए ट्रेन के परिचालन सिकंदराबाद ले दस नवंबर के करे जाही। उहें, राजेन्द्रनगर-दुर्ग-राजेन्द्रनगर पूजा स्पेशल ट्रेन के परिचालन घलो करे जात हे। ए ट्रेन दस नवंबर के राजेन्द्रनगर ले अउ बारह नवंबर के दुरूग ले चलाय जाही।