राज्य स्थापना दिवस-01
छत्तीसगढ़ राज्य आज अपन इक्कीसवां स्थापना दिवस मनावत हे। ए राज्य के गठन एक नवंबर दू हजार के करे गे रिहीस। उप राष्ट्रपति वेंकैया नायडू, प्रधानमंत्री नरेन्द्र मोदी, केन्द्रीय गृह मंत्री अमित शाह अउ राज्यपाल अनुसुईया उइके ह छत्तीसगढ़ के स्थापना दिवस के मउका म प्रदेसवासी मन ल अपन सुभाकामना दीन हे।
उप राष्ट्रपति ह किहीन हे कि अपन अनूठा संस्कृति अउ प्रकृति ले लोगन के जुड़ाव छत्तीसगढ़ ल खास पहिचान देथे। उहें, अपन ट्वीटर संदेस म प्रधानमंत्री ह किहीन कि प्राचीन काल ले आने-आने संस्कृति के केन्द्र रेहे छत्तीसगढ़ ह समृद्धि के रद्दा म आगू बाढ़त राहय। केन्द्रीय गृहमंत्री ह घलो अपन संदेस म किहीन हे कि राज्य के जीवंत संस्कृति म जम्मों देस ल गर्व हे। उहें, राज्यपाल अनुसुईया उइके ह छत्तीसगढ़ी भाखा म अपन संदेस म किहीन हे कि कोंटा ले कोरिया तक अउ नांदगांव ले जशपुर तक जल, जंगल, खनिज अउ पहाड़ के प्राकृतिक सुंदरता के संग जुन्ना संस्कृति ल सहेज के रखइया छत्तीसगढ़ ह देस म अपन अलगे पहिचान बनाय हे। ए दउरान छत्तीसगढ़ ह कतकोन उपलब्धि हासिल करे हे अउ आगू घलो करही।
कोरोना संक्रमण ल देखत राज्य स्थापना दिवस के मउका म ए बखत राज्योत्सव के बड़े आयोजन नइ करे गीस। आज मुख्यमंत्री के रईपुर निवास म सिरिफ वर्चुअल रूप म अलंकरण समारोह के आयोजन करे गीस। ए मउका म लोकसभा सांसद राहुल गांधी के वर्चुअल मौजूदगी म राज्य के उन्नीस लाख किसान मनके खाता म राजीव गांधी किसान न्याय योजना के तीसरा किश्त पन्द्रह सौ करोड़ रूपिया के रासि हितग्राही मनके खाता मन म आॅनलाइन जमा करे गीस। उहें, स्वामी आत्मानंद इंग्लिश मीडियम स्कूल योजना अउ मुख्यमंत्री शहरी स्लम स्वास्थ्य योजना म राज्य के तीस ठन नगरीय स्लम एरिया म मोबाइल हाॅस्पिटल सह-लेबोरेटरी के घलो सुरूवात करे गीस।
राज्य स्थापना दिवस-02
ए मउका म सांसद राहुल गांधी ह प्रदेस के लोगन ल राज्योत्सव के सुभकामना दीन। ओमन किहीन कि राज्य सरकार डहार ले सुरू करे गे ए तीनों योजना ले देस ल मजबूती मिलही। श्री गांधी ह किहीन कि किसान मनके मदद, जमीन के रक्षा अउ उद्योग-धंधा ल बढ़ावा दे जाय के संग ग्रामीण अउ युवा मन ल स्वालंबी बनाय के मामला म छत्तीसगढ़ ह पूरा देस ल रस्ता दिखाए हे। श्री गांधी ह किहीन कि छत्तीसगढ़ अइसन राज्य हे, जउन ह जल, जंगल, जमीन अउ प्राकृतिक संपदा ले भरपूर हे।
कारीकरम म मुख्यमंत्री भूपेश बघेल ह किहीन कि राज्य म अधोसंरचना ल मजबूत करे के काम तेजी ले चलत हे। धरसा विकास योजना म गांव के कच्चा रद्दा मन ल पक्का करे के दिसा म तेजी ले काम करे जावत हे। ओमन किहीन कि राज्य म तेरह हजार करोड़ रूपिया के लागत ले सड़क अउ पुल-पुलिया बनाय के योजना उपर घलो काम होवत हे। युवा मन ल रोजगार के मउका दे जाय बर ई-श्रेणी म पंजीयन सुरू करे गेहे। ओमन किहीन कि स्लम म रहइया श्रमिक मन बर संझा-बिहनिया चिकित्सा ले जुड़े सुविधा देवाय जाही।
राज्य स्थापना दिवस-03
राज्य स्थापना दिवस के मउका म प्रदेस म आज ले आयरन अउ विटामिन वाले फोर्टिफाइड चाउर बांटे योजना घलो सुरू करे गेहे। भोजन म जरूरी पौष्टिक तत्व के पूर्ति अउ कुपोसन म रोक लगाय बर ए योजना प्रदेस के कोंडागांव जिला म पाॅयलट प्रोजेक्ट के रूप म सुरू करे जावत हे। हितग्राही मन ल चाउर उचित मूल्य के दुकान ले मिलही।
मुख्यमंत्री ह आज कोरबा के सतरेंगा बोर्ड क्लब अउ रिसाॅर्ट के संग ट्राईबल टूरिज्म सर्किट म पांच ठन नवा बने टूरिस्ट रिसाॅर्ट के लोकार्पण घलो करीन। उहें, रामवनगमन परिपथ म राजिम अउ शिवरीनारायण म कराय गे विकास काम के भूमिपूजन करीन। एखर अलावा मुख्यमंत्री ह बीजापुर जिला म नवा बने विद्युत उप केन्द्र अउ बारसूर-बीजापुर विद्युत लाइन के घलो ई-लोकार्पण करीन। अइसने, राजधानी रईपुर के ऐतिहासिक बूढ़ातालाब ल मनोरंजन अउ पर्यटन के सुविधा देवाय बर करे गे काम के लोकार्पण घलो करीन।
राज्य स्थापना दिवस के मउका म राखे गे अलंकरण समारोह म विशिष्ठ सेवा बर चुने गे व्यक्ति अउ संस्था मन ल सम्मानित करे गीस।
कोरोना समाचार/जागरूकता
विश्व स्वास्थ्य संगठन के छत्तीसगढ़ के सब रिजनल टीम लीडर डाॅक्टर प्रणित कुमार फटाले ह किहीन हे कि कोरोना संक्रमण ले बचाव तभे हो सकत हे जब सुरक्षा के उपाय अपनाय जाय। एखर बर जारी दिसा-निरदेस के पालन सब ल करना चाही।
इही बीच, छत्तीसगढ़ के समाजसेवी पद्मश्री धर्मपाल सैनी ह लोगन ले कोरोना संक्रमण ले बचाव बर जरूरी सावधानी राखे के अपील करीन हे।
मरवाही उपचुनाव
मरवाही विधानसभा उपचुनाव बर आज संझा छह बजे ले चुनाव प्रचार थम गे हवय। अब प्रत्यासी मन ह सिरिफ घर-घर जाके व्यक्तिगत रूप म अपन प्रचार कर सकत हे। ए दउरान कोन्हों भी प्रकार के सभा, जुलूस अउ रैली के अनुमति नइ होही। जिला निर्वाचन अधिकारी डोमन सिंह ह बतईन कि मतदान बर एक अभ्यर्थी, एक एजेंट अउ पार्टी बर एक ठिन गाड़ी के अनुमति होही। फेर, एमन ल कोनों भी प्रकार के प्रचार काम के अनुमति नइ होही। ओमन बतईन कि कोराना संक्रमण ले देखत ए बखत एक आंगनबाड़ी कार्यकर्ता के घलो मतदान केन्द्र म ड्यूटी लगाय जाही। मतदान वाले दिन मतदान केन्द्र के दू सौ मीटर के अंदर कोनों भी मनखे प्रचार वाले मास्क अउ उम्मीदवार के फोटो वाले मास्क के संग प्रवेस नइ कर सकही। ओमन बतईन कि कोनों मतदान अभिकर्ता के तापमान जांच करे म जादा पाय जाथे त ओमन ल मतदान केन्द्र म प्रवेस नइ दे जाही। अइसने, मतदान केन्द्र म कोनों भी प्रकार के इलेक्ट्राॅनिक उपकरण लाय के मंजूरी नइ होही।
इही बीच, प्रचार-प्रसार थमे के बाद जिला के बाहर ले आय आने-आने दल के कार्यकर्ता अउ प्रचारक मन ह घलो जिला ले बाहिर जाना सुरू कर दीन हे। ऐति, प्रसासन ह घलो मतदान के तैयारी सुरू कर देहे। उहें, मतदान दल के रवानगी घलो सुरू होगे हे। खबर के मुताबिक एक लाख इंक्यानवे हजार ले जादा मतदाता वाले ए विधानसभा क्षेत्र म तीन नवंबर के मतदान होही। जिहां, दू सौ छियासी मतदान केन्द्र म वोट डारे जाही। एक सौ छब्बीस मतदान केन्द्र ल संवेदनशील घोषित करे गेहे। मतदान बिहनिया सात बजे ले संझा छह बजे तक होही। ए उपचुनाव म कोरोना संक्रमित मरीज, दिव्यांग अउ अस्सी बछर ले जादा उमर के सियान मन ह डाक मतपत्र के माध्यम ले अपन मताधिकार के प्रयोग कर सकही।
एखर अलावा चुनाव आयोग ह ‘‘माई वोट-माई सेल्फी‘‘ थीम म मतदान केन्द्र तीर सेल्फी बूथ बनाय हे। दस उत्कृष्ट सेल्फी लेइवया मतदाता मन ल दू हजार रूपिया के रासि पुरस्कार के रूप म दे जाही।
माओवादी समर्पण/गिरफ्तार
दंतेवाड़ा जिला म आज पांच इनामी अउ दू वारंटी संघरा सत्ताईस झिन माओवादी मन ह पुलिस के आगू आत्मसमर्पण करीन हे।
मिले जानकारी के अनुसार माओवादी उन्मूलन अभियान म सबो थाना, कैम्प अउ पंचायत मन म माओवादी मनके नाव के संग गांव-गांव म लोन वर्राटू अभियान चलाय जावत हे, जेखर ले प्रभावित होके सत्ताईस झिन माओवादी मन ह बारसूर थाना म पुलिस अनुविभागीय अधिकारी के आगू आत्मसमर्पण करीन।
ओति, सुकमा जिला म पुलिस एक झिन माओवादी ल गिरफ्तार करे हे। एखर तीर ले भारी मात्रा म माओवादी जिनीस घलो बरामद करे गेहे। बताय जात हे कि ए माओवादी ह मिनपा माओवादी हमला संघरा दूसर कतकोन गतिविधि म सामिल रेहे हे।
हमर ग्राम सभा
पंचायत अउ ग्रामीण विकास मंत्री टी.एस. सिंहदेव आज रतिहा साढ़े सात बजे आकाशवाणी रईपुर ले प्रसारित बिसेस कारीकरम ‘‘हमर ग्राम सभा‘‘ वन अधिकार अधिनियम के जानकारी दीही। ए दउरान ओमन ह पत्र, एसएमएस अउ वाट्सऐप के माध्यम ले श्रोता मन डहार ले पूछे गे सवाल के जवाब घलो दीहीं। ए कारीकरम ल मीडियम वेब नौ सौ इक्यासी किलोहटर््स म सुने जा सकत हे। ए कारीकरम ल प्रदेस के सबो आकाशवाणी केन्द्र मन ह एके संघरा रिले करही।
विधानसभा-सचिव
दिनेश शर्मा छत्तीसगढ़ विधानसभा के नवा सचिव बनाय गे हवय। विधानसभा अध्यक्ष डाॅक्टर चरणदास महंत के सचिव श्री शर्मा ह विधानसभा के अपर सचिव के रूप म काम करत रिहीन। ओमन ल आज सचिव पद म पदोन्नत करे जाय के आदेस जारी करे गीस।
लंबित भुगतान-जारी
राज्य सरकार ह आज साक्षरता मिशन प्राधिकरण के जिला अउ ब्लाॅक स्तरीय कमरचारी मन ल एक बछर के लंबित वेतन के भुगतान के स्वीकृति दीन हे। एखर बर वित्त विभाग डहार ले दू करोड़ पैंसठ लाख रूपिया के रासि जारी करे गेहे।