पुलिस शौर्य पदक
छत्तीसगढ़ राज्य स्थापना दिवस म अवइया एक नवंबर के उत्कृष्ट कार्य बर प्रदेश के सात पुलिस जवान मन ल शौर्य पदक ले सम्मानित करे जाही। गृहमंत्री ताम्रध्वज साहू ह पुरस्कार पवइया सबो पुलिस जवान मन ल बधाई अउ शुभकामना देहें।
ओमन ह कीहिन कि कानून बेवस्था अउ जनसेवा बर पुरस्कार मिलना गौरव के बात हरे। पुलिस शौर्य पदक दू हजार बीस बर चयनित पुलिस जवान मन म निरीक्षक मोहसिन खान, उपनिरिक्षक जितेन्द्र एसैया सुकमा, सहायक उपनिरीक्षक गणेश करमकार, प्रधान आरक्षक रामलाल कश्यप, अउ कुटुमथ राव के अलावा आरक्षक देवा आनंबम अउ आरक्षक गोपी इस्ताम सामिल हे। ये पुरस्कार मुख्यमंत्री निवास म आयोजित राज्योत्सव कार्यक्रम के दौरान दे जाही।
मरवाही उपचुनाव प्रचार
मरवाही विधानसभा उपचुनाव बर प्रचार अभियान चरम म हे। भाजपा अउ कंाग्रेस सहित आने आने दल के नेता, उम्मीदवार अउ समर्थक चुनाव प्रचार म जुटे हे। मुख्यमंत्री भूपेश बघेल ह आज चुनाव प्रचार के बेरा मरवाही के डोंगरिया, कोडगार अउ जोगीसार गांव म कंाग्रेस उम्मीदवार डॅाक्टर के.के. ध्रुव के पक्ष म चुनाव प्रचार करीन।
उंहें स्वास्थ्य मंत्री टी.एस. सिंहदेव ह लालपुर, सिवनी, अउ कोटमी म चुनावी सभा करीन। संगेसंग सांसद ज्योत्सना महंत ह घलो पीपलामार म कंाग्रेस उम्मीदवार के पक्ष म चुनावी सभा ल संबोधीत करीन। एखर अलावा खाद्य मंत्री अमरजीत भगत अउ आबकारी मंत्री कवासी लखमा ह घलो आने आने क्षेत्र मन म चुनावी सभा करीन।
एति भाजपा के राष्ट्रीय उपाध्यक्ष अउ पूर्व मुख्यमंत्री डॅाक्टर रमनसिंह ह घलो मरवाही म भाजपा उम्मीदवार डॅाक्टर गंभीर सिंह के पक्ष म चुनावी सभा मन ल संबोधित करीन। एखर अलावा राज्यसभा सांसद सरोज पांडे, सांसद गोमती साय ह घलो भाजपा उम्मीदवार के पक्ष म चुनावी सभा करीन।
मरवाही उपचुनाव
गौरला-पेण्ड्रा-मरवाही जिला के निर्वाचन अधिकारी डोमन सिंह ह चुनाव खर्चा समय म प्रस्तुत नइ करे जाय म चार उम्मीदवार मन ल नोटिस जारी करे हे। ओमन बताइन कि ए अभ्यर्थी मन ल व्यय के ब्यौरा प्रस्तुत करे बर तीन दिन के समय देगे रीहिस।
इही बीच जिला निर्वाचन अधिकारी डोमन सिंह ह मरवाही विधानसभा उपचुनाव बर नियुक्त करे गे सेक्टर अउ सहायक सेक्टर अधिकारी मनके संग बइठका करीन। ए बेरा ओमन बताइन कि एक अउ दू नवंबर के मतदान दल मनके मतदान केंद्र बर रवानगी कर दे जाही। ओमन बताइन कि हर दू घंटा म मतदान प्रतिशत के जानकारी निर्वाचन आयोग ल दे जाही। जेखर जानकारी इकट्ठा करे बर विशेष रूप ले कर्मचारी मन ल नियुक्त करे जात हे। ओमन कीहिन कि सबो मतदान केंद्र मन म जरूरत के अनुसार कोरोना संक्रमण ले बचाव बर सामान बांटे जाही।
बइठका म ओमन सबो सेक्टर अधिकारी मन ल मतदान केंद्र मन म बिजली, पानी, शौचालय के बेवस्था के संग मतदान पर्ची वितरण के बेवस्था सुनिश्चित करे के निर्देश दीन।
इही बीच मरवाही विधानसभा क्षेत्र बर होवइया उपचुनाव ल देखत मतदान दिवस तीन नवंबर के चुनाव क्षेत्र म सार्वजनिक अउ सामान्य अवकाश घोषित करे गेहे।
रेल-मेरी सहेली अभियान
रेल सुरक्षा बल डहार ले दक्षिण पूर्व मध्य रेलवे के नौ ठिन ट्रेन मन म मेरी सहेली अभियान चलाये जात हे। एखर तहत यात्री ट्रेन मन म एके झन यात्रा करइया महिला के सुरक्षा के विशेष धियान दे जाही।
यात्रा के बेरा महिला आरपीएफ कर्मी ह व्यक्तिगत रूप ले महिला यात्री मनले मिलके उंखर समस्या के समाधान करत हे। संगेसंग ओमन ल जागरूक करके उंखर सहायता घलो करत हे।
उंहें रायपुर रेलमंडल यात्री मनके सुविधा बर अइवया छै नवंबर के दुर्ग-रखसौल अउ सात नवंबर के दुर्ग-पटना स्पेशल ट्रेन चलाय जाही। ये दूनो ट्रेन तेईस कोच के संग सिरिफ एक फेरा बर चलाय जाही।
ईद-मिलाद-उल-नबी
काली ईद-मिलाद-उन-नबी हे। राज्यपाल अनुसूइया उइके अउ मुख्यमंत्री भूपेश बघेल ह ईद-मिलाद-उन-नबी के मउका म प्रदेशवासी मन ल बधाई दीन।
अपन संदेश म राज्यपाल ह कीहिन कि पैगम्बर हजरत मोहम्मद साहब के जनमदिन ईद-मिलाद-उन-नबी लोगन मन ल प्रेम, समानता अउ सौहाद्र के संदेश देथे।
उंहें मुख्यमंत्री ह कीहिन कि हजरत साहब के संदेश खुशहाल समाज बनाये के दिशा म रद्दा दिखाथे। मुख्यमंत्री ह कीहिन कि कोरोना संक्रमण के खतरा अभी खतम नइ होय हे। एखरे सेती सबो लोगन संक्रमण ले बांचे बर दू गज के दूरी, मास्क अउ सेनेटाइजेशन जइसे जरूरी दिशा निर्देश मनके पालन करत रहो।
मुख्यमंत्री बस्तर दौरा
मुख्यमंत्री भूपेश बघेल काली जगदलपुर के लालबाग म झीरम शहीद स्मारक के भूमिपूजन करीन। ए बेरा ओमन पांच सौ इकचालीस करोड़ रूपिया ले जादा के आने आने विकास कार्य के लोकार्पण अउ शिलान्यास करीन। ए बेरा मुख्यमंत्री ह जगदलपुर शहर के विकास बर गढ़बो नवा जगदलपुर के संकल्प के संग तियार कार्य योजना के घलो अवलोकन करीन।
माओवादी मुठभेड़
सुकमा जिला म पुलिस अउ माओवादी मनके बीच होय मुठभेड़ म एक महिला माओवादी मारे गीस। मिले जानकारी के अनुसार पुलिस जवान मनके दल निपका क्षेत्र म तलाशी अभियान म निकले रीहिन, इही बेरा माओवादी मन ह अचानक हमला कर दीन। दूनो डहार ले होय गोलीबारी म एक महिला माओवादी मारे गीस। पुलिस ल मउका ले एक थ्री-नाॅट-थ््राी रायफल सहित आने माओवादी समान मिले हे ।
कस्टडी मौत
रायपुर के पंडरी थाना म बीते रतिहा पुलिस हिरासत म एक आरोपी के मौत होगे। ए मामला म पुलिस अधीक्षक अजय यादव ह एक उप निरीक्षक सहित चार पुलिसकर्मी मन ल लाइन अटैच करे हे।
बताये जात हे कि दू दिन पहिली पंडरी क्षेत्र म होय एक युवक के हत्या के मामला म ए आरोपी अश्विनी मानिकपुरी ल गिरप्तार करे गे रीहिस। जेन ह बीते रतिहा शौचालय म कथित रूप ले फंासी लगाके आत्महत्या कर लीस।
केसुभाई पटेल/हीरा सिंह मरकाम-निधन
गुजरात के पूर्व मुख्यमंत्री केसुभाई पटेल के आज निधन होगे। ओमन बयानबे बछर के रीहिन। पाछू महीना कोरोना संक्रमण ले ठीक होय के बाद उंखर स्वास्थ्य खराब होगे रीहिस।
राज्यपाल अनुसूइया उइके अउ मुख्यंत्री भूपेश बघेल ह केसुभाई पटेल के निधन उपर दुख जताइन। राज्यपाल अउ मुख्यमंत्री ह उंखर आत्मा के शांति बर प्रार्थना करीन।
इही बीच गोंडवाना स्वतंत्र पार्टी के राष्ट्रीय अध्यक्ष अउ प्रदेश के वरिष्ठ आदिवासी नेता हीरासिंह मरकाम के काली निधन होगे। राज्यपाल अनुसूइया उइके अउ मुख्यमंत्री भूपेश बघेल ह उंखर निधन म दुख जताइन । राज्यपाल ह कीहिन कि श्री मरकाम ह जनजाति समाज म जागरूकता फैलाय बर अपन योगदान दीन। उंखर निधन ले समाज ल बड़का नुकसान होय हे।
कोरोना जागरूकता
प्रदेश म बीते कुछु दिन ले कोरोना संक्रमण के मामला म कमी आय हे। फेर लोगन मन अभी घलो संक्रमित होवत हे। एला देखत राजधानी रायपुर स्थ्ति भीमराव अंबेडकर अस्पताल के चिकित्सक डॅाक्टर ओ.पी.सुंदरानी ह ठंड के मौसम म लोगन मनले विशेष सावधानी बरते के सलाह देहे।
ओमन कीहिन कि ठंड अउ प्रदूषण के सेती सांस के शिकायत वाले मरीज मन ल दिक्कत होथे। अइसन लोगन मनके स्थिति कोरोना संक्रमण होय म चिंताजनक हो सकत हे।
इही बीच सीमा सुरक्षा बल बीएसएफ के उप महानिरीक्षक जे.एस.एन.डी प्रसाद ह घलो कोरोना ले बचाव बर जरूरी सावधानी बरते के अपील करीन।