सतर्कता जागरूकता सप्ताह
प्रधानमंत्री नरेन्द्र मोदी ह किहीन हे कि प्रसासनिक प्रक्रिया मन ल पारदर्सी, जिम्मेदार, जवाबदेह अउ विकास बर लोगन मनके प्रति उत्तरदायी होना चाही। सतर्कता अउ भ्रष्टाचार ल रोके बर काली ले सुरू होय तीन दिन के राष्ट्रीय सम्मेलन के उद्घाटन करत प्रधानमंत्री ह किहीन कि पाछु बछर ले देस ह भ्रष्टाचार ल बर्दास्त नइ करे के नीति उपर अमल करत हे। ओमन किहीन कि सरकार ह लोगन मनके जिनगी ल अउ जादा सरल बनाय बर प्रयास करत हे।
ऐति, छत्तीसगढ़ म घलो सतर्कता जागरूकता सप्ताह मनाय जात हे। एसो के बिसय हे – ‘‘सतर्क भारत, समृद्धि भारत‘‘।
इही कड़ी म दुरूग जिला के भिलाई-रिसाली स्थित सीमा सुरक्षा बल के मुख्यालय म घलो सतर्कता जागरूकता सप्ताह मनाय गीस। ए मउका म बीएसएफ के अधिकारी-करमचारी अउ जवान मन ह भ्रष्टाचार ल भगाय बर काम करे के सपथ लीन।
कृषि उपज मंडी विधेयक
छत्तीसगढ़ विधानसभा के बिसेस सत्र म काली छत्तीसगढ़ कृषि उपज मंडी संसोधन विधेयक-दू हजार बीस ल चरचा के बाद ध्वनिमत ले पारित कर दे गीस।
कृषि मंत्री रविन्द्र चैबे ह ए विधेयक उपर सदन म होय चरचा के जवाब देवत किहीन कि ए संसोधन विधेयक के कोनों भी प्रावधान केन्द्र सरकार के कानून के उल्लंघन नइ करत हे। ए संसोधन विधेयक के माध्यम ले छत्तीसगढ़ के किसान, गरीब, मजदूर के हित अउ अधिकार मनके रक्षा हो सकही। कृषि मंत्री ह किहीन कि किसान मनके उपज के गुणवत्ता के आधार म सही भाव, सही तौल अउ बेरा म भुगतान ल ठीक करे बर डीम्ड मंडी अउ इलेक्ट्राॅनिक ट्रेडिंग प्लेटफाॅर्म स्थापना करे जाना किसान मनके हित म जरूरी हे।
किसान पंजीयन
प्रदेस म चालू खरीफ विपणन बछर म समर्थन मूल्य म धान अउ मक्का खरीदी बर किसान मनके पंजीयन के तिथि ल दस नवंबर तक बढ़ा दे गेहे। पहिली पंजीयन के तारीख इकतीस अक्टूबर राखे गे रिहीस। खाद्य विभाग ह ए बारे म जम्मों संभागीय आयुक्त, जिला कलेक्टर, पंजीयक सहकारी संस्था अउ अपेक्स बैंक के प्रबंध संचालक ल जरूरी कार्रवाई करे के निरदेस देहे।
मरवाही उपचुनाव प्रचार
मरवाही विधानसभा उपचुनई बर प्रचार अभियान अब जोर पकड़ लेहे। भाजपा अउ कांग्रेस के संगेसंग आने-आने दल के नेता, उम्मीदवार अउ उंखर समर्थन मन चुनाव प्रचार म लगे हे।
इही बीच, गौरेला-पेण्ड्रा-मरवाही जिला भारतीय जनता पार्टी युवा मोर्चा के कतकोन कार्यकर्ता मन ह आज प्रभारी मंत्री जयसिंह अग्रवाल के मौजूदगी म कांग्रेस म प्रवेस करीन।
जानबा के मुताबिक मरवाही उपचुनई बर तीन नवंबर के वोट डारे जाही।
नेशनल वाटर अवाॅर्ड
केन्द्र सरकार के जलशक्ति मंत्रालय डहार ले पानी ल ठीक-ठाक बचाय बर छत्तीसगढ़ के बिलासपुर अउ सूरजपुर जिला ल बछर दू हजार उन्नीस के नेशनल वाटर पुरस्कार दे गेहे। एमा बिलासपुर जिला ल ईस्ट अंडर रिवाइवल आॅफ रिवर कैटेगिरी म अउ सूरजपुर जिला ल ईस्ट अंडर वाटर कन्जर्वेशन कैटेगिरी म राष्ट्रीय स्तर म प्रथम पुरस्कार बर चुने गेहे। ए पुरस्कार नवंबर महीना म दे जाही।
किसान रेल
भारतीय रेलवे डहार ले किसान मनके मदद करे अउ देसभर म कृषि उत्पाद के तेजी ले ढुलाई करे के उद्देश्य ले किसान रेल चलाय जात हे।
दक्षिण पूर्व मध्य रेलवे डहार ले आज नागपुर मंडल के छिंदवाड़ा ले हावड़ा स्टेसन तक अट्ठारह कोच वाले किसान स्पेशल ट्रेन महाराष्ट्र, छत्तीसगढ़, बिहार, अउ पश्चिम बंगाल राज्य मनके बीच चलाय जात हे। वापसी म ए रेलगाड़ी काली उनतीस अक्टूबर के हावड़ा ले छिंदवाड़ा स्टेसन बर छूटही। ए किसान रेल म सब्जी अउ फल के परिवहन भाड़ा म पचास फीसदी के छूट दे जात हे।
माओवादी-मुठभेड़
सुकमा जिला म माओवादी मन संग होय मुठभेड़ के बाद सुरक्षा बल मन ह मउका ले बड़ मात्रा म माओवादी साहित्य अउ आने-आने जिनीस बरामद करे हे। संगेसंग माओवादी मनके एक ठिन कैम्प ल घलो खतम कर देहे।
हमर संवाददाता ले मिले जानबा के मुताबिक किस्टाराम थाना क्षेत्र म माओवादी मनके होय के सूचना मिले के बाद कोबरा बटालियन, डीआरजी अउ एसटीएफ के संयुक्त टीम ह तलाशी अभियान म निकले रिहीन। इही दउरान गांव पालाचलमा के जंगल म माओवादी मन ह सुरक्षा बल मन उपर गोलीबारी सुरू कर दीन। जवान मन डहार ले करे गे जवाबी कार्रवाई के बाद माओवादी मन ह जंगल कोति भाग गे।
बस्तर दशहरा-मुरिया दरबार
विश्व प्रसिद्ध बस्तर दशहरा म आज जगदलपुर म मुरिया दरबार राखे गीस। मुरिया दरबार म मुख्यमंत्री भूपेश बघेल के संगेसंग बड़ संख्या म जनप्रतिनिधि, मांझी, चालकी, मेंबरीन अउ लोगन मन सामिल होईन। इहां पहुंच के बाद मुख्यमंत्री ह जगदलपुर स्थित दंतेश्वरी माई मंदिर म पूजापाठ करीन।
नेता प्रतिपक्ष-अपील
छत्तीसगढ़ विधानसभा म नेता प्रतिपक्ष धरमलाल कौशिक ह लोगन मन ले कोरोना ले बचाव बर जरूरी सावधानी राखे के अपील करे हे।
होल्ड बाईट – श्री धरमलाल कौशिक (35 सेकेंड)
राज्य स्थापना दिवस
छत्तीसगढ़ राज्य स्थापना दिवस के मउका म एक नवंबर के राजधानी रईपुर के संगेसंग जम्मों जिला मुख्यालय मन म स्थित सरकारी भवन मन म छालर लाईट ले जगमगाय जाही। कोरोना संक्रमण ल देखत एसो राज्योत्सव के बड़का आयोजन नइ होवय। सिरिफ राज्य अलंकरण समारोह के वर्चुअल आयोजन मुख्यमंत्री निवास म करे जाही।
सामान्य प्रसासन विभाग ह ए बारे म जम्मों विभाग के अधिकारी मन ल चिट्ठी जारी कर दे हे।
बिहान-गोबर दीयें
राष्ट्रीय ग्रामीण आजीविका मिशन-बिहान के तहत स्व-सहायता समूह के माईलोगिन मन डहार ले गोबर के दीया अउ धान के सुघ्घर ग्रीटिंग कार्ड बनाय जात हे।
महासमुंद जिला के गांव कांपा म राधाकृष्ण स्व-सहायता समूह अउ गांव कछारडीह के जयश्री कृष्ण स्व-सहायता समूह के माईलोगिन मन डहार ले घरेलू सामान ले सजावटी ग्रीटिंग कार्ड बनाय जात हे। ए सुघ्घर ग्रीटिंग कार्ड मनके भाव घलो कमती हवय, जेखर ले बाजार म एखर मांग बाढ़ गेहे।
संक्षिप्त समाचार
अउ अब थोरकुन समाचार सार म-
– छत्तीसगढ़ किसान यूनियन कोति ले किसान मन ह आज धमतरी म समर्थन मूल्य म धान खरीदी एक नवंबर ले सुरू करे अउ चैबीस कुंटल प्रति एकड़ के हिसाब ले धान खरीदे के मांग ल लेके धरना-प्रदर्सन करीन।
– राजनांदगांव के जयस्तंभ चैक म सहर महिला कांग्रेस के कार्यकर्ता मन डहार ले गोंदली के भाव म बढ़ोतरी के विरोध म धरना-प्रदर्सन करे गीस।
– इही जिला म प्रयास बालक अउ कन्या आवासीय विद्यालय मन म सैक्षणिक सत्र दू हजार बीस-इक्कीस म कक्षा नौवीं बर प्रवेस परीक्षा पांच नवंबर के होही।
अउ
– महासमुंद जिला म स्कूल, अस्पताल अउ रिहायसी जगह के तीर-तखार म पटाखा बेचइया मनके खिलाफ कार्रवाई करे जाही।