खेल अधोसरंचना
केंद्र सरकार के युवा कल्याण अउ खेल मंत्रालय कोति ले खेलो इंडिया योजना म अंबिकापुर म इंडोर हाॅल अउ महासमुंद म सिंथेटिक एथलेटिक ट्रैक बनाय के प्रस्ताव ल मंजूरी दे गेहे। ये दूनो प्रस्ताव राज्य सरकार के खेल अउ युवा कल्याण विभाग कोति ले कंेद्र सरकार ल भेजे गे रीहिस।
एमा अंबिकापुर म करीबन साढ़े चार करोड़ रूपिया ले इंडोर हाॅल बनाये जाही। उंहें महासमुंद म एथलेटिक ट्रैक बनाय बर छै करोड़ साठ लाख रूपिया जारी करे जाही। जेखर ले प्रदेश म खेलबो, जीतबो, गढ़बो नवा छत्तीसगढ़ के सोच पूरा होवत हे।
मुख्यमंत्री भूपेश बघेल अउ खेलमंत्री उमेश पटेल ह प्रस्ताव मंजूर होय म प्रदेश के खिलाड़ी अउ खेल विभाग के लोगन ल बधाई दीन हे ।
मंत्रिपरिषद बैठक
राज्य मंत्रिपरिषद ह प्रदेश म औद्योगिक नीति दू हजार उन्नीस-चैबीस म संशोधन के प्रस्ताव ल मंजूरी दे देहे। एमा वनोपज, अउ वन म आधारित आने उत्पाद के प्रसंस्करण, खाद्य प्रसंस्करण अउ उत्पाद बनाये, कीमत तय करे के काम राज्य म ही करे जाही।
मुख्यमंत्री भूपेश बघेल के अगवई म आज रायपुर म उंखर निवास कार्यालय म होय राज्य मंत्रिपरिषद के बइठका म विशेष निवेश प्रोत्साहन पैकेज ल घलो मंजूरी दे गीस। एखर संगेसंग मंत्रिपरिषद ह छत्तीसगढ़ औद्योगिक भूमि अउ प्रबंधन नियम दू हजार पंद्रा म घलो फेरबदल के अनुमोदन करीन। एमा उद्योग विभाग कोति ले चलाय जात औद्योगिक क्षेत्र म बिजली उपकेन्द्र लगाय बर कोनो किसम के किराया नइ ले जाही।
कोरोना संक्रमण के सेती जउन उद्योग नइ लगाय जा सके हे, ओमन ल एक बछर के अउ जादा बेरा दे जाही। मंत्रिमंडल ह छत्तीसगढ़ कृषि उपज मंडी संशोधन विधेयक के प्रारूप ल घलो मंजूरी देहे। एखर संगेसंग छत्तीसगढ़ राज्य ग्रामीण अउ आने पिछड़ा वर्ग क्षेत्र विकास प्राधिकरण के पुनर्गठन के प्रस्ताव ल मंजूर करे गीस।
प्रदेश म नशामुक्त अभियान ल समाज कल्याण विभाग ल सौंपे के फैसला ले गेहे। अइसने मंत्रिपरिषद ह केंद्रीय जलशक्ति मंत्रालय कोति ले चलाय जात जलजीवन मिशन के जम्मों अरजी ल निरस्त करे के फैसला करे गेहे।
हमर ग्राम सभा
पंचायत अउ ग्रामीण विकास मंत्री टी.एस. सिंहदेव ह कीहिन हे कि प्रदेश म अइसन गांव, जनपद अउ जिला पंचायत म जिहंा दिव्यांग प्रतिनिधि चुनके नइ आय हे, उंहा ये वरग के प्रतिनिधि बनाय जाही। गांव अउ जनपद पंचायत म एक-एक अउ जिला पंचायत म दू झिन दिव्यांग प्रतिनिधि चुने जाही।
आकाशवाणी रायपुर ले प्रसारित विशेष कार्यक्रम हमर ग्रामसभा म श्री सिंहदेव ह काली श्रोता मन कोति ले पुछे गे सवाल के जुवाब देवत ये बात कीहिन। ओमन पेसा कानून के संबंध म बताइन कि कोरोना महामारी के सेती एखर तियारी म अबेर होवत हे। ये प्रस्ताव ल विधानसभा के बजट सत्र म लाये के प्रयास करे जाही। मनरेगा के संबंध म पूछे गे सवाल के जुवाब देवत श्री सिंहदेव ह कीहिन कि छत्तीसगढ़ लहुटे प्रवासी श्रमिक मन ल उंखर शौक अउ योग्यता के मुताबिक कौशल विकास करके मनरेगा म काम देवाय के परयास करे जात हे ।
प्रधानमंत्री-सतर्कता जागरूकता
प्रधानमंत्री नरेन्द्र मोदी काली राष्ट्रीय सतर्कता अउ भ्रष्टाचार रोधी सम्मेलन के उद्घाटन करही। ए सम्मेलन के बिसय – ‘‘सतर्क भारत, समृद्ध भारत‘‘ हवय। एखर आयोजन केन्द्रीय अन्वेषण ब्यूरो-सीबीआई ह करे हे। खबर के मुताबिक देस म सत्ताईस अक्टूबर ले दू नवंबर तक हरेक बछर सतर्कता जागरूकता सप्ताह मनाय जाथे।
राजेश कुमार चैहान -अपील
पूर्व अंतर्राष्ट्रीय क्रिकेट खिलाड़ी राजेश कुमार चैहान ह लोगन ले कोरोना ले बचाव बर जरूरी सावधानी राखे के अपील करीन हे।
होल्ड बाईट – राजेश कुमार चैहान (35 सेकेंड)
विजयादशमी
बुराई उपर अच्छाई अउ असत म सत के जीत के प्रतीक दशहरा परब आज घलो छत्तीसगढ़ म उछाह के संग मनाये जात हे। राजनंादगंाव जिला म राष्ट्रीय दशहरा उत्सव समिति कोति ले अबले थोरिक देर म स्टेट हाईस्कूल मैदान म दस फीट के रावण दहन करे जाही। समिति के पदाधिकारी मन बताइन कि ये कार्यक्रम के सोझे प्रसारण सोशल मीडिया, फेसबुक अउ वाट्सअप म करे जाही। जेखर ले लोगन मन एला घर बइठे देख सकही।
इही बीच राजनंादगंाव पुलिस लाइन म आज पुलिस अधीक्षक डी. श्रवण अउ आने पुलिस अधिकारी मन ह शस्त्र पूजा करके लोगन के रक्षा करे के संकल्प लीन।
उंहें महासमुंद जिला म घलो रक्षित केंद्र पुलिस लाइन परसदा समेत जिला के जम्मों थाना अउ चैकी म शस्त्र पूजा करे गीस। एखर पहिली मुख्यमंत्री भूपेश बघेल काली संझा रायपुर के रावणभाटा मैदान म राखे गे दशहरा उत्सव कार्यक्रम म संघरीन। ये मउका म ओमन कीहिन कि दशहरा के परब अंहकार अउ बुराई ल खतम करके सत के रद्दा म आगू बढ़े के सीख देथे।
बस्तर दशहरा
बस्तर दशहरा म काली रतिहा माउली परघाव के रसम पूरा करे गीस। एमा माउली माता अउ दंतेश्वरी के छतरी ल रथ म सजाके निकाले गीस। माउली परघाव के रसम म बस्तर राज परिवार के सदस्य कमलचंद भंजदेव, अउ बस्तर के सांसद दीपक बैज के संगेसंग स्थानीय जनप्रतिनिधि मन सामिल होइन। एखर बाद जोगी उठाई के रसम घलो पूरा करे गीस।
मुख्यमंत्री सलाहकार गौठान निरीक्षण
मुख्यमंत्री के सलाहकार प्रदीप शर्मा ह आज बिलासपुर जिला के कोटा म आने आने गौठान के जांच करीन। ए बेरा म ओमन गोधन न्याय योजना के संबंध म जानकारी लीन अउ गौठान म ग्रामीण उद्योग पार्क बनाय बर गोठबात करीन।
उंखर संग बिलासपुर कलेक्टर डॅाक्टर सारांश मित्तर मौजूद रीहिन। श्री शर्मा आदिवासी बहुल ग्राम पंचायत मोहदा अउ कंचनपुर के गौठान पहुंचीन। मोहदा म स्व सहायता समूह के माइलोगिन मन वर्मी कम्पोस्ट खातु बनावत ओमन बताइन कि अभी तक बीस कुंटल खातु वन विभाग ल बेचे हे।
दुर्घटना
प्रदेश म पाछू चैबीस घंटा म होय आने आने रद्दा दुर्घटना म पांच झिन के मउत होगे, उंहें चार झिन घायल होगे हे।
कोंडागांव जिला के मस्सुकोकोड़ा गांव म पाछू रतिहा टरक अउ चैपहिया गाड़ी के बीच होय भिडंत म दू झिन के मउकाच म मउत होगे। उंहें राजनांदगंाव जिला के चिचोला थाना क्षेत्र म रानीतालाब घाघरा मंदिर तीर एक टरक ह अंते तंते होके पलट गे, जेमा टरक ड्रायवर के मउत होगे अउ एक झन गंभीर रूप ले घायल होगे हे जउन ल छुरिया के सामुदायिक स्वास्थ्य केंद्र म भर्ती कराय गेहे।
ओति रायगढ़, सारंगढ़ राष्ट्रीय राजमार्ग म आज बीहनिया चिखली अउ रैबार के बीच कार अउ ट्रेलर के टक्कर होय ले एक मनखे के मउत होगे अउ तीन झन घायल होगे हे। इही जिला के खरसिया के बड़े डूमरपाली गांव म ट्रेलर के चपेट म आय ले एक मनखे के मउत होगे।
कोरबा हाथी मौत
प्रदेश म पाछू कुछएक महीना ले हाथी मनके मउत के घटना सरलग आगू आवत हे। आज बीहनिया कोरबा जिला म कटघोरा वनमंडल के लालपुर गांव म हाथी के एक नान्हे लइका के शव तरिया तीर मिले हे। मउत के कारण के अभी पता नइ चले हे। सूचना मिलते वन विभाग के टीम मउका म पहुंच के जांच करत हे। आज के घटन ल मिलाके पाछू पांच महीना म चैदा हाथी के मउत होय हे।