प्याज कीमत
केंद्र सरकार ह केहे हे कि ए बछर के रबी फसल म प्याज के सुरक्षित भंडारण करे गेहे। प्याज के कीमत ल सामान्य बनाय बर सरकार ह सितंबर महीना के दूसरा पखवाड़ा ले सफल केंद्रीय भंडार अउ एन सी सी एफ के संग राज्य सरकार के प्रमुख मंडी मनके माध्यम ले नियम के अनुसार प्याज देवावत हे। उपभोक्ता कार्य, खाद्य अउ सार्वजनिक वितरण मंत्रालय ह केहे हे कि कीमत म नियंत्रण बर अवइया कुछ दिन म उपाय करे जाही। ए खरीफ मौसम के दौरान करीबन सैंतीस लाख मीटरिक टन प्याज के मंडी म आय के संभावना हे, जेखर ले बाढ़त कीमत ल कम करे म मदद मिलही।
एति छत्तीसगढ़ म खाद्य नागरिक आपूर्ति अउ उपभोक्ता संरक्षण विभाग डहार ले सबो जिला कलेक्टर मन ल उंखर जिला म प्याज के उपलब्धता अउ खुदरा बाजार मूल्य के निगरानी बर दिशा निर्देश जारी करे गेहे। जेखर अनुसार जिला म प्याज के उपलब्धता, आयात, परिवहन अउ उचित भंडारण बर केहे गे हावय। संगेसंग विक्रय स्थल म प्याज के उपलब्ध स्टाॅक अउ थोक विक्रय मूल्य के जानकारी देखाना जरूरी होही। उंहें प्याज के थोक अउ खुदरा बाजार भाव के प्रचार प्रसार करे बर घलो केहे गे हावय।
काॅलेज-प्रवेश तिथि
प्रदेश के काॅलेज मन म विद्यार्थी मन ह अब उनतीस अक्टूबर तक प्रवेश ले सकही। ए संबंध म उच्च शिक्षा विभाग ह आदेश जारी करे हे। एखर पहिली प्रवेश के आखरी तारीख बाईस अक्टूबर रीहिस। कोरोना वायरस महामारी के सेती छात्र हित म ये फैसला करे गे हावय।
खबर के मुताबिक उच्च शिक्षा विभाग के सचिव धनंजय देवंागन ह वीडियो काॅन्फे्रसिंग के माध्यम ले सबो विश्वविद्यालय के कुलपति अउ महाविद्यालय के प्राचार्य मनले काॅलेज म प्रवेश, आॅनलाईन क्लास, परीक्षा परिणाम अउ पाठ्यक्रम के बारे म गोठबात करे रीहिन। ए दउरान आने आने विश्वविद्यालय के कुलपति मन ह सुझाव दे रीहिन कि काॅलेज म प्रवेश बर निर्धारित तिथि बढ़ाय जाय।
केंद्रीय दल दौरा
केंद्रीय स्वास्थ्य मंत्रालय के उच्च स्तरीय दल ए बखत छत्तीसगढ़ के दौरा म हावय। तीन सदस्य वाले ये दल ह प्रदेश म कोरोना ले बांच के तियारी अउ प्रयास के समीक्षा करे के संगेसंग कोरोना ले रोकथाम के बारे म जरूरी सलाह घलो दीही।
ये उच्च स्तरीय दल ह आज राजनंादगंाव शहर के उदयांचल क्षेत्र म चलत धर्मार्थ कोविड-19 केयर सेंटर के निरीक्षण करीन। एखर पहिली ओमन ह रायपुर अउ दुर्ग म घलो आने आने अस्पताल के निरीक्षण करे रीहिन।
कोरोना जागरूकता
तिहारी मौसम ल देखत प्रदेस म कोरोना संक्रमण ले बचाव खातिर लोगन मन ल जरूरी सावधानी बरते के बारे म जागरूक करे के उद्देश्य ले जम्मों शहर अउ गांव गवतरी मन म जागरूकता अभियान चलाय जात हे।
इही कड़ी म मुंगेली जिला म स्कूल के लईका मन ल कोरोना ले बांचे बर जागरूक करे जावत हे, एमा कविता, नारा लेखन, निबंध, अउ चित्रकला प्रतियोगिता कराये जावत हे। ए प्रतियोगिता मनले लईका मन ह कोरोना के बारे म पूरा जानकारी पावत हे। संगेसंग ओमन ह अपन परिवार के सदस्य मन ल सफाई सिखावत हे।
इही बीच पूर्व अंतर्राष्ट्रीय महिला हाॅकी खिलाड़ी अउ पद्मश्री, अउ अर्जुन पुरस्कार ले सम्मानित सबा अंजुम ह घलो लोगन ले कोरोना ले बचाव बर जरूरी सावधानी बरते के अपील करीन हे।
मरवाही उपचुनाव
मरवाही उपचुनाव म अस्सी बछर या ओखर ले जादा उमर के वरिष्ठ नागरिक, दिव्यांग, कोविड-19 ले प्रभावित मतदाता मन ल डाक मतपत्र ले मतदान के सुविधा देगे हावय। एखर बर डाक मतपत्र ल सकेले के काम आजले शुरू होगे हावय जउन चैबीस अक्टूबर तक चलही।
गौरेला-पेण्ड्रा-मरवाही के जिला निर्वाचन अधिकारी डोमन सिंह ह बताइन कि डाक मतपत्र संग्रहण बर मतदान दल बना दे गेहे। डाक मतपत्र ले मतदान प्रकिया के दौरान हरएक दल म मतदान अधिकारी, पुलिस अधिकारी के संगरा वीडियाग्राफर घलो रीही, जउन पूरा प्रक्रिया के वीडियाग्राफी करही।
इही बीच, उपनिर्वाचन बर भारत निर्वाचन आयोग डहार ले चुने गे पे्रक्षक जयसिंह ह बचरवार, अमरपुर, झाबल, कुदरी अउ भाड़ी गांव के मतदान केंद्र के निरीक्षण करीन।
उंहें केंद्रीय निर्वाचन आयोग ह राज्य मन म चुनाव प्रचार के दौरान राजनीतिक दल अउ उम्मीदवार मन डहार ले भीड़ ले बांचे के नियम के पालन म ढिलाई बरते म गंभीरता दिखाय हे। आयोग ह केहे हे कि राज्य के मुख्य चुनाव अधिकारी अउ जिला के अन्य अधिकारी मन ल जिम्मेदार उम्मीदवार अउ आयोजक मनके खिलाफ कानूनी प्रावधान म कार्रवाई करयं।
कुपोषण वजन त्यौहार
प्रदेश म कुपोषण मुक्ति बर पाछू एक हप्ता ले अभियान चलाये जात हे। एखर तहत महिला अउ बाल विकास विभाग के सचिव आर. प्रसन्ना के अध्यक्षता म काली आने आने सहयोगी विभाग मनके आॅनलाईन बइठका होइस।
बइठका म श्री प्रसन्ना ह कीहिन कि कुपोषण, एनीमिया अउ जनम के बेरा वजन के निर्धारित मानक ल हासिल करे बर प्रदेश म पोषण अभियान चलाये जात हे। ओमन प्रदेश के दस आकंाक्षी जिला मन म कुपोषण दूर करे खातिर विशेष धियान देबर कीहिन।
ओति राज्यव्यापी कुपोषण मुक्ति अभियान के तहत रायगढ़ जिला म पाछू एक हप्ता ले वजन तिहार मनाये जावत हे।
माओवादी मुठभेड़
बीजापुर जिला के बासागुड़ा क्षेत्र म पाछू दिन होय मुठभेड़ म घायल महिला माओवादी के मौत होय के खबर हे। जिला के पुलिस अधीक्षक कमलोचन कश्यप ह बताइन हे कि ये मुठभेड़ पेद्दागल्लूर के जंगल म परसो होय रीहिस। ए मुठभेड़ म दू झिन जवान घलो घायल होय रीहिन, उंहें एक झन माओवादी मारे गे रीहिस।
संक्षिप्त समाचार
अउ अब थोरकुन समाचार सार म-
– छत्तीसगढ़ राज्य विधिक सेवा प्राधिकरण कोति ले धमतरी जिला म इकतीस अक्टूबर के ई-मेगा शिविर के आयोजन करे जाही। एखर शुरूआत हाईकोर्ट के मुख्य न्यायाधीश पी.आर. रामचंद्र मेनन करही।
– राम वनगमन पर्यटन परिपथ लोगो डिजाइन प्रतियोगिता के प्रविष्ठी बर आखरी तारीख अठाईस अक्टूबर तक बढ़ा देगे हवय। प्रतिभागी मन ह पर्यटन मंडल के वेबसाइट ले ए बारे म जानकारी ले सकत हे।
– राजनंादगंाव जिला म माइलोगिन मनके उत्पीड़न ले जुड़े मामला के सुनवाई काली राज्य महिला आयोग के अध्यक्ष डॅाक्टर किरणमयी नायक करहीं।
– इही जिला के सुरगी, सिंघोला, धामनसरा, गांव के किसान मन ह कृषि विधेयक के विरोध म आज हस्ताक्षर अभियान चलाइन।
– रायगढ़ जिला के घरघोड़ा पुलिस ह रेत के अवैध परिवहन म लगे चार ठन गाड़ी ल जब्त करे हे।
– कोंडागांव जिला म पुलिस ह सतहत्तर किलो गांजा के संग दू झन आरोपी मन ल गिरप्तार करे हे। गांजा के कीमत तीन लाख रूपिया ले जादा बताये जावत हे ।
अउ
– लोक निर्माण मंत्री ताम्रध्वज साहू ह आज अपन रायपुर के निवास कार्यालय ले वीडियो कॅान्फे्रसिंग के माध्यम ले एशियाई विकास बैंक परियोजना म मंजूर होय निपनिया-लटुआ-बलौदाबाजार रद्दा बनाये के काम के भूमिपूजन करीन।