विस-विशेष सत्र
छत्तीसगढ़ विधानसभा के विशेष सत्र सत्ताईस अउ अठाईस अक्टूबर के राखे गेहे। विधानसभा सचिवालय कोति ले एखर अधिसूचना जारी कर दे गेहे। विशेष सत्र म शासकीय कार्य संपादित करे जाही।
गोधन न्याय योजना भुगतान
मुख्यमंत्री भूपेश बघेल ह गोधन न्याय योजना के तहत प्रदेश के छियासी हजार ले जादा गोबर विक्रेता मनले खरीदे के गोबर के एवज म छठवंा किस्त के पइसा नौ करोड़ बारा लाख रूपिया के आॅनलाइन भुगतान कर देहे।
ए योजना म अब तक उनतालिस करोड़ रूपिया के भुगतान करे जा चुके हे। ए मउका म मुख्यमंत्री ह रायपुर स्थित अपन निवास म वीडियो काॅन्फ्रेसिंग के माध्यम ले बलौदाबाजार भाटापारा जिला के गोढ़ी अउ रायगढ़ जिला के ननसिया के गौठान के स्व सहायता समूह के माइलोगिन मनले गोठबात करीन। ओमन कीहिन कि गौठान म बनाये जात खाद ल बेचे के काम सोसायटी के माध्यम ले करे जाही।
धान खरीदी
राज्य सरकार ह खरीफ विपणन वर्ष दू हजार बीस-इक्कीस म वन अधिकार पट्टाधारी किसान मन ले घलो समर्थन मूल्य म धान बिसाही।
खाद्य विभाग डहार ले वन अधिकार पट्टा वाले किसान मनके पंजीयन बर जरूरी निर्देश दे गेहे। खाद्य विभाग के सचिव ह अइसन वन अधिकार पट्टाधारी किसान मनके पंजीयन कराय के निर्देश जम्मों कलेक्टर मन ल देहे, जेमन अपन पट्टा के भुंइया म धान के फसल बोय हे । ए बेरा समर्थन मूल्य म धान खरीदी बर किसान मनके पंजीयन करे जात हे। जउन ह इकतीस अक्टूबर तक चलही।
मरवाही उप चुनाव
मरवाही विधानसभा उपचुनई बर चुनाव प्रचार अभियान अब जोर पकड़ लेहे। कंाग्रेस के प्रदेश अध्यक्ष मोहन मरकाम ह आज कतकोन गांव मन म दौरा करके पार्टी प्रत्याशी के पक्ष म प्रचार करीन। त उंहें भाजपा उम्मीदवार के पक्ष म प्रदेश उपाध्यक्ष ह घलो विधानसभा क्षेत्र के गांव गंवतरी मन म जाके चुनाव प्रचार करत हे।
एति सामान्य पे्रक्षक जयसिंह ह काली कलेक्ट्रेट म राखे गे बइठका म मरवाही उपचुनई बर कानून बेवस्था के समीक्षा करीन। त उंहे निर्वाचन आयोग डहार ले मरवाही उपचुनई बर आदित्य कमलाकर सोमकुंअर ल व्यय पे्रक्षक बनाय गेहे।
पुलिस स्मृति दिवस
आज पुलिस स्मृति दिवस हरय। पुलिसकर्मी मनके निष्ठा अउ राष्ट्र के प्रति उंखर बलिदान ल सम्मानित करे बर हर साल इक्कीस अक्टूबर के ये दिन मनाये जाथे। आजे के दिन बछर उन्नीस सौ उनसठ म केंद्रीय रिजर्व पुलिस बल ह लद्दाख के बीहड़ दर्रा म अपन हिम्मत अउ बलिदान के गाथा लिखे रीहिन। चीनी सैनिक मनके संग होय मुठभेड़ म सीआरपीएफ के दस जवान मन ह शहीद होय रीहिन।
उपराष्ट्रपति एम. वेंकैया नायडू , प्रधानमंत्री अउ केंद्रीय गृहमंत्री ह पुलिस स्मृति दिवस के मउका म शहीद पुलिसकर्मी मन ल श्रद्धंाजलि देहे।
एति छत्तीसगढ़ के राज्यपाल अनुसूइया उइके, मुख्यमंत्री अउ गृहमंत्री ह आज पुलिस स्मृति दिवस के मउका म माना रायपुर स्थित चैथी वाहिनी, सीएएफ परिसर म राखे गे कार्यक्रम म शहीद जवान मन ल श्रद्धंाजलि दीन।
ए मउका म रायपुर के राजीव स्मृति वन स्थित शहीद वाटिका के अमर जवान स्तंभ म घलो श्रद्धंाजलि दे गीस। त उंहें राजनांदगंाव अउ कबीरधाम के संगेसंग प्रदेश के आने जिला मन म घलो पुलिस के शहीद जवान मन ल श्रद्धंाजलि दे गीस।
माओवादी मुठभेड़
दंतेवाड़ा जिला म आज सुरक्षा बल मन अउ माओवादी मनके बीच मुठभेड़ होइस। एमा कोनो के हताहत होय के समाचार नइ हे।
पुलिस अधीक्षक अभिषेक पल्लव ह बताइन कि डीआरजी, एसटीएफ अउ जिला पुलिस बल के संयुक्त टीम ह अरनपुर थाना क्षेत्र म तलाशी अभियान म निकले रीहिन इही दउरान गोमुडी गंाव के तीर सुरक्षा बल अउ माओवादी मनके बीच मुठभेड़ होगे। जवान मन डहार ले करे गे गोलीबारी के बाद माओवादी मन ह जंगल कोति भाग गे। घटना वाले जगा ले टिफिन बम, कारतूस, के संगेसंग अब्बड़ अकन जीनिस बरामद करे गेहे।
कोरोना समाचार
केंद्रीय स्वास्थ्य मंत्रालय के उच्च स्तरीय ेदल ह ए बेरा छत्तीसगढ़ आय हे। तीन सदस्यीय ए दल ह प्रदेश म कोरोना ले बचाव के तियारी अउ प्रयास के समीक्षा करे के संगेसंग जरूरी सलाह घलो दीही।
राज्य शासन के स्वास्थ्य विभाग के अपर मुख्य सचिव अउ आने अधिकारी मन ह रायपुर स्थित राज्य कोरोना कंट्रोल एंड कमांड सेंटर म केंद्रीय दल के सदस्य मन ल प्रदेश म कोरोना के स्थिति के बारे म जानबा दीन। केंद्रीय संयुक्त सचिव ऋचा शर्मा के अगवई म केंद्रीय दल के सदस्य मन ह आज दुर्ग अउ रानजंादगंाव जिला म घलो कोरोना संक्रमण ले निपटे बर करे जात उपाय के जानबा लीन।
एति स्वास्थ्य मंत्री ह कीहिन हे कि अवइया चार हप्ता के भीतर प्रदेश के जम्मों मेडिकल काॅलेज अउ जिला अस्पताल मन म आॅक्सीजन संयंत्र लगाय के काम पूरा हो जाही। उंहें कोरोना संक्रमण ल देखत कोंडागंाव जिला कलेक्टर ह पेट्रोल पंप मन म जउन मनखे ह मास्क नइ पहिने रीही , ओमन ल पेट्रोल-डीजल नइ देके निर्देश देहे।
उंहें कबीरधाम जिला के जम्मों नगरीय निकाय मन म चलत व्यवसायी मनके संगेसंग कर्मचारी अउ ग्राहक मन ल मास्क पहिनना जरूरी कर देहे।
त राजनंादगंाव जिला म कोरोना संक्रमण के बाढ़त मामला ल देखत राज्य शासन डहार ले जारी दिशा निर्देश के कड़ाई ले पालन करे के निर्देश देहे। निर्देश के उल्लंघन करइया मन उपर कड़ा कार्रवाई करे जाही।
कोरोना जागरूकता
तिहारी मौसम ल देखत प्रदेस म कोरोना संक्रमण ले बचाव खातिर लोगन मन ल जरूरी सावधानी बरते के बारे म जागरूक करे के उद्देश्य ले जम्मों शहर अउ गांव गवतरी मन म जागरूकता अभियान चलाय जात हे।
दुर्ग पुलिस डहार ले मास्क ही ब्रम्हास्त्र ह। – के संदेस ल लेके अब तक के सबले बड़का मास्क बनाके अपन नाव लिखाय हे। अइसने राजनंादगंाव जिला प्रशासन अउ स्वास्थ्य विभाग डहार ले जिला म चलाये जात कोरोना सुरक्षा सप्ताह के तहत काली दीप दिवस मनाये गीस।
एति सामाजिक कार्यकर्ता पद्मश्री शमशाद बेगम ह लोगन मनले कोरोना संक्रमण ले बचाव बर जरूरी सावधानी बरते के अपील करे हे।
संक्षिप्त समाचार
अउ अब थोरकुन समाचार सार म-
– केंद्रीय नीति आयोग डहार ले बालोद जिला के स्कूल मन म घलो अटल लैब के स्थापना करे जात हे।
– छत्तीसगढ़ माध्यमिक शिक्षा मंडल डहार ले कक्षा दसवीं अउ बारहवीं के पुर्नगणना अउ पुर्नमूल्यांकन के परीक्षा परिणाम घोषित कर दे गेहे ।
– पर्यटन विभाग डहार ले राम वनगमन पर्यटन परिपथ बर लोगो डिजाइन प्रतियोगिता राखे गेहे। जम्मों प्रतिभागी मन पच्चीस अक्टूबर तक विभाग के ई-मेल म अपन डिजाइन भेज सकथे। जितइया प्रतिभागी मन ल दस हजार रूपिया के इनाम के संगेसंग प्रमाण पत्र दे जाही ।
– रायपुर जिला म आदिम जाति विकास विभाग डहार ले अनुसूचित जनजाति अनुसूचित जाति अउ अन्य पिछड़ा वर्ग के छात्र मनले पोस्ट मैट्रिक छात्रवृत्ति बर आॅनलाइन अर्जी ल तीस नवंबर तक मंगाय हे।
– कोंडागांव जिला म स्वास्थ्य विभाग डहार ले ग्रामीण स्वास्थ्य संयोजक पद के मेरिट सूची जारी कर देहे। अभ्यर्थी मन तेईस अक्टूबर तक दावा आपत्ति पेश कर सकथे।
अउ
– कोरिया वनमंडल के सोनहत अउ देवगढ़ वनपरिक्षेत्र के रजौली-भैसवार रद्दा म वन भुंइया उपर करे गे अतिक्रमण ल वन विभाग अउ पुलिस के संयुक्त टीम डहार ले हटाये के कार्रवाई करे गीस।