प्रधानमंत्री-संबोधन
प्रधानमंत्री नरेन्द्र मोदी ह राष्ट्र के नाव अपन संदेस किहीन हे कि तिहार के ए मौसम म हमन ल ए नइ भूलना चाही कि लाॅकडाउन भले चले गेहे फेर कोरोना वायरस हमर बीच ले नइ गेहे। ओमन एक घांव फेर जोर देके किहीन कि जब तक दवाई नहीं, तब तक ढिलाई नहीं। प्रधानमंत्री ह किहीन कि कहूं कोनांें मनखे लापरवाही बरतत हे, त ओ ह अपन संगेसंग अपन परिवार ल घलो संकट म डालत हे। प्रधानमंत्री ह किहीन कि तिहार के ए खुसी के बेरा हमन ल कोरोना ले बांचे बर मास्क लगाना चाही, भीड़-भीड़ वाले जघा मन म सुरक्षित दूरी के पालन करना चाही अउ समय-समय म साबुन अउ पानी ले हाथ धोवत रहना चाही।
विस-विशेष सत्र
राज्यपाल अनुसुईया उइके ह राज्य सरकार कोति ले सत्ताईस अउ अट्ठाईस अक्टूबर के विधानसभा के विशेष सत्र बलाय बर जरूरी जानकारी मांगे हे। ए संबंध म राज्यपाल ह सरकार कोति ले भेजे गे फाईल ल लहुटा देहे अउ राज्यपाल ह केहे हे कि पहिली दे गे प्रस्ताव म राज्य सरकार कोति ले बिसेस सत्र बलाय के कोनों किसम के जानकारी नइ दे रिहीस। राज्यपाल कोति ले ए पूछे गेहे कि अंठावन दिन पहिली विधानसभा के मानसून सत्र बलाय गे रिहीस हे। अइसन म अइसे कोन से बिसेस कारण हे जेखर बर बिसेस सत्र बलाय के जरूरत पड़त हे।
इही बीच, राज्यपाल कोति ले मांगे जानकारी संग ए फाईल राज्य सरकार कोति ले फेर ले राजभवन भेजे गेहे। एमा राज्य सरकार कोति ले लिखे गेहे कि केन्द्र सरकार कोति ले बनाय गे कृषि संबंधी तीनों कानून ले राज्य के किसान मनके हित प्रभावित होवत हे। अइसन म प्रदेस म किसान मनके भलई बर कानून बनाय खातिर बिसेस सत्र बलाय जाही।
राज्य सरकार कोति ले यहू केहे गेहे कि राज्य म धान बिसाय के बेरा आ गेहे। अइसन म बिसेस सत्र तुरते बलाना जरूरी हे। एखर पहिली, मीडिया संग होय गोठबात म मुख्यमंत्री भूपेश बघेल ह किहीन कि पूर्ण बहुमत के सरकार ल विधानसभा के बिसेस सत्र बलाय ले कोनो नइ रोक सकय।
कोेरोना समाचार
कोरोना सघन सामुदायिक सर्वें अभियान म सरगुजा जिला म अब तक कोरोना जांच ले करीबन साढ़े चार प्रतिसत लोगन पाॅजिटिव पाय गेहे। ए जानकारी सरगुजा के मुख्य चिकित्सा अउ स्वास्थ्य अधिकारी डाॅक्टर पी.एस. सिसोदिया ह दीन हे। ओमन बतईन कि अभियान म स्वास्थ्य विभाग के टीम करीबन दू लाख घर म पहुंचीन।
ऐति, दुरूग जिला म व्यवसायिक गतिविधि चलाय म लगे प्रतिबंध हटा ले गेहे। सिरिफ आठ बजे के बाद कोन्हों भी दुकान खुल्ला नइ रइही। पेट्रोल पंप अउ दवई दुकान अपन तय बेरा म खुलही। ए बात जिला कलेक्टर डाॅक्टर सर्वेश्वर नरेन्द्र भूरे ह एक आदेस जारी करके किहीन हे। उहें, कोविड केयर केन्द्र के सुभीता ल लेके स्वास्थ्य विभाग कोति ले कराय गे सर्वें म दुरूग जिला पहिली स्थान म हवय अउ होम आइसोलेशन के बेरा मरीज मन ल मिलइया सुभीता के मामला म रईपुर जिला पहिली अउ दुरूग दूसर स्थान म हवय।
कोरोना जागरूकता
तिहारी मौसम ल देखत प्रदेस म कोरोना संक्रमण ले बचाव खातिर लोगन सावधानी राखय, एखर बर जागरूकता अभियान चलाय जात हे। रईपुर जिला कलेक्टर एस. भारतीदासन ह किहीन कि जिला म संक्रमण के दर म कमी आय हे, फेर खतरा अभी टले नइ हे।
उहें, दुरूग म नान्हें दुर्गा ल जागरूकता अभियान के सुभंकर बनाय गेहे। जिला कलेक्टर डाॅक्टर सर्वेश्वर नरेन्द्र भूरे ह नान्हें दुर्गा के कटआउट के लोकार्पण करीन। ए जगह-जगह जाके लोगन ल कोरोना ले बाचे बर जागरूक करही।
इही बीच, छत्तीसगढ़ के लोकगायक संजय सुरीला ह लोगन ले कोरोना संक्रमण ले बचाव बर जरूरी सावधानी राखे के अपील करीन हे।
होल्ड बाईट – संजय सुरीला (55 सेकेंड)
हमर ग्राम सभा
पंचायत अउ ग्रामीण विकास मंत्री टी.एस. सिंहदेव ह किहीन हे कि नरवा, गरूवा, घुरवा अउ बाड़ी योजना म गांव अउ खेती-खार मजबूत होही। संगेसंग ओहा के लोगन आर्थिक रूप ले सक्षम बनही। ए बात श्री सिंहदेव ह आकाशवाणी रईपुर ले प्रसारित बिसेस कारीकरम ‘‘हमर ग्राम सभा‘‘ म किहीन। ओमन बतईन कि गौठान अउ चरवाही बेवस्था ल नवा सुभीता संग जोड़े ले लोगन ल आर्थिक रूप ले फायदा होवत हे अउ स्व-सहायता समूह के माईलोगिन मन ल स्व-रोजगार के संग ओमन वर्मी कम्पोस्ट, बकरी पालन, मछलीपालन अउ साग-भाजी जइसन व्यवसाय के संगेसंग अगरबत्ती, साबुन, दोना-पत्तल, दीया जइसन जिनीस बनावत हे।
भाजपा-रैली
प्रदेस म कथित रूप ले बिगड़त कानून बेवस्था ल लेके भाजपा ह आज राजधानी रईपुर म जन आक्रोश रैली निकालीन। ए बेरा म पुलिस कर्मचारी अउ भाजपा कार्यकर्ता मनके बीच झूमाझटकी होय के खबर मिले हे। भाजपा नेता मनके अगुवई म कार्यकर्ता गृह मंत्री के घर के घेराव करे बर निकले रिहीन। तभे पुलिस ए मन ल सप्रे शाला के आगू रोक दीन। ए बेरा म विधायक बृजमोहन अग्रवाल, पूर्व मंत्री राजेश मूणत अउ भाजपा के जिला अध्यक्ष श्रीचंद सुंदरानी समेत कतकोन कार्यकर्ता मन ल पुलिस ह गिरफ्तार करके सप्रे स्कूल ल अस्थायी जेल बनाके इहां राखे गे रिहीस।
रैली के पहिली आयोजित आमसभा म बोलत श्री मूणत ह राज्य म कमजोर कानून व्यवस्था के सेती नशा अउ अपराध बाढ़े के आरोप लगाईन। श्री अग्रवाल ह किहीन कि राज्य सरकार कोति ले कानून व्यवस्था म सुधार नइ होही त आगू आंदोलन करे जाही।
लेमरू-एलीफेंट-वन मंत्री
वन मंत्री मोहम्मद अकबर ह किहीन कि लेमरू एलीफेंट रिजर्व ले काखरो विस्थापन नइ होही अउ गांव वनवासी मनके अधिकार म रइही। वन मंत्री ह किहीन कि कुछेक लोगन अपन स्वार्थ बर एलीफेंट रिजर्व के संबंध म अफवाह फैलावत हे। एखर बने ले कोयला खनन, बड़े उद्योग अउ जीव-जंतु के सिकार के संग जंगल म आगी लगे जइसन घटना म रोक लगही। वन मंत्री ह बतईन कि तमिलनाडु के मामला म सुप्रीम कोर्ट के फइसला के आधार म भरम फइलाय जात हे। ओमा कोनों किसम के सच्चाई नइ हे।
ओमन किहीन कि लेमरू बर वन विभाग कोति ले कोनों भी किसम के भूईंया नइ ले जाही। अधिसूचना म सिरिफ सरकारी भूईंया सामिल होही। श्री अकबर ह बतईन कि एलीफेंट रिजर्व बने के बाद वनवासी मन ल कोनों दिगर जघा नइ भेजे जाही।
किसान-ज्ञापन
राजनांदगांव जिला म डोंगरगढ़ ब्लाॅक के किसान मन ह रद्दा चैड़ीकरण म भूईंया अधिग्रहित करे जाय म मुआवजा के मांग ल लेके जिला कलेक्टर के नाव ज्ञापन सौंपे हे।
जिला किसान संघ के संयोजक सुदेश टीकम के अगुवई म बुढ़ानछापर पंचायत के पीपरखार गांव के आश्रित किसान मन ह कलेक्ट्रेट पहुंच के जिला कलेक्टर ले भेंट करीन। अधिग्रहण ले प्रभावित आदिवासी किसान मन ह बतईन कि पीपरखार ले कारूटोला तक रद्दा बनाय बर उंखर भूईंया पहिलीच ले गे रिहीस। अब ए रद्दा के चैड़ीकरण खातिर भूईंया के कुछेक हिस्सा अउ लेके तियारी होवत हे। फेर किसान मन ल अभी तक भूईंया के मुआवजा नइ दे गेहे। किसान मनके मांग म जिला कलेक्टर टी.के. वर्मा ह ए मामला के जांच करा के प्रभावित किसान ल मुआवजा देवाय के भरोसा देवाईन हे।
हाथी-भालू
राजनांदगांव जिला कोति आवत जंगली हाथी के दल भानूप्रतापपुर कोति लहुट गेहे, जेखर ले वन विभाग ह सीमा म रहइवया लोगन ल अलर्ट रेहे के सलाह देहे। वन विभाग के मुताबिक भानूप्रतापपुर कोति ले हाथी के एक दल राजनांदगांव आवत रिहीस। ए दल म चार लइका समेत बाईस हाथी सामिल हे। वन विभाग हाथी के आय-जाय म सरलग नजर राखत हे।
ऐति, कोरिया जिला के गदबदी गांव म आज भिनसरहा एक मनखे उपर भालू ह हमला कर दीस। जेमा मनखे ह घायल होगे हे।
मौसम
प्रदेस ले मानसून अब बिदाई लेवत हे। मौसम विभाग के मुताबिक मध्य बंगाल के खाड़ी अउ ओखर तीर-तखार म एक निम्नदाब के क्षेत्र बने हे। उहें, उपरी हवा म बने एक चक्रवाती घेरा के अवइया अड़तालीस घंटा म सक्रिय होगे आगू बढ़े के संभावना हवय। एखर परभाव ले प्रदेस के दक्षिणी हिस्सा संग कतकोन जघा म मध्यम बरसा हो सकत हे।
मौसम विभाग ह अवइया चैबीस घंटा म प्रदेस के दक्षिणी हिस्सा म एक-दू जघा म गाज गिरे के चेतावनी देहे।
दक्षता-आंकलन
प्रदेस म प्राथमिक अउ माध्यमिक स्कूल के लइका मनके दक्षता के जांच ए महीना म करे जाही। इंखर बर जिला मिसन समन्वयक नोडल अधिकारी होही। ए संबंध म राज्य सैक्षिक अनुसंधान अउ प्रसिक्षण परिषद कोति ले बइठका राखे गीस, जेमा बताय गीस कि सरकार के आने-आने योजना म लइका मन ल जउन पढ़ई कराय जात हे, ओखर जांच करे के फइसला ले गेहे।