राष्ट्रपति-खेल पुरस्कार
राष्ट्रपति द्रौपदी मुर्मू ह आज बछर-2025 के राष्ट्रीय खेल पुरस्कार अउ 2024 के तेनजिंग नोर्गे राष्ट्रीय साहसिक पुरस्कार प्रदान करिन। बछर 2025 बर कुल 17 खिलाड़ी मन ल अर्जुन पुरस्कार बर चुने गे रिहीस। राष्ट्रपति ह एथलिट तेजस्वीन शंकर अउ प्रियंका गोस्वामी, सतरंज खिलाड़ी दिव्या जितेंद्र देशमुख, हॉकी खिलाड़ी राजकुमार पाल अउ कबड्डी खिलाड़ी पूजा ल अर्जुन पुरस्कार ले सम्मानित करिन।
ऐति, फुटबाल खिलाड़ी इसाया अरू-मैनायगम ल लाइफटाइम श्रेणी म अर्जुन पुरस्कार प्रदान करे गिस। एखर अलावा, उत्कृष्ट योगदान बर 5 कोच मन ल द्रोणाचार्य पुरस्कार ले सम्मानित करे गिस। परवीर सिंह, छोटेलाल यादव अउ नेहा नंदकुमार चव्हाण ल नियमित श्रेणी म, उहें, धर्मेंद्र सिंह यादव अउ वीरेंद्र कुमार ल लाइफटाइम श्रेणी म ए पुरस्कार दे गिस।
खेल मन ल बढ़ावा अउ उंखर योगदान बर आर्मी पैरालंपिक नोड पुणे ल राष्ट्रीय खेल प्रोत्साहन पुरस्कार देय गिस। बलजीत कौर अउ रिमो साहा के संगेसंग 4 लोगन ल तेनजिंग नोर्गे राष्ट्रीय साहसिक पुरस्कार-बछर 2024 ले सम्मानित करे गिस।
मुख्यमंत्री-खिलाड़ी सम्मानित
मुख्यमंत्री विष्णुदेव साय ह एशियन पैरागेम्स बछर-2026 म पदक जीत के छत्तीसगढ़ के मान बढ़इया दू खिलाड़ी मन ल सम्मानित करिन। मुख्यमंत्री ह पैरा तीरंदाजी म स्वर्ण पदक जितइया तोमन कुमार ल 51 लाख रूपिया अउ पैरा बैडमिंटन म कांस्य पदक जितइया अभिजीत सखूजा ल 31 लाख रूपिया देय के घोसना करिन।
बालोद जिला के नवागंाव के रहइया तोमन कुमार पूर्व सीआरपीएफ के जवान हें, जेमन बछर-2022 म झारखंड नक्सल बिरोधी अभियान के बेरा बम बिस्फोट म अपन एक ठन गोड़ ल गंवा दे रिहीस।
उहें, बिलासपुर के अभिजीत सखूजा ननपन ले शारीरिक चुनौती के सामना करत हे। ओमन पैरा बैडमिंटन म कांस्य पदक जीतके अंरर्राष्ट्रीय स्तर म अपन प्रतिभा के प्रदर्सन करिन।
मुख्यमंत्री-लोकार्पण
मुख्यमंत्री विष्णुदेव साय ह आज मुंगेली जिला के कंतेली गांव ल करोड़ांे रूपिया के सौगात देइन। मुख्यमंत्री ह 465 करोड़ रूपिया ले जादा के आने-आने बिकास कारज के लोकार्पण अउ सिलान्यास करिन। ए मउका म मुख्यमंत्री ह किहीन कि-ए परियोजना मनके पूरा होय ले जिला म सड़क, सिंचाई अउ बुनियादी सुविधा मनके बिस्तार होही। एखर ले ग्रामीण अउ सहरी इलाका के लोगन ल जादा सुबिधा मिलही।
कारीकरम म केंद्रीय राज्य मंत्री तोखन साहू अउ उपमुख्यमंत्री अरूण साव घलो सामिल होइन।
किसान-आदान सहायता
राज्य सरकार ह किसान मन ल आदान सहायता देय के नियम म बदलाव करे हे अउ प्रति एकड़ निर्धारित जादा ले जादा 21 कुंटल ले कम धान बेचइया किसान मन ल घलो प्रति एकड़ 13 हजार 839 रूपिया के आदान सहायता मिलही। मुख्यमंत्री विष्णुदेव साय ह काली पत्रकारवार्ता म ए घोसना करिन हें। ए बेरा म ओमन किहीन कि-ए निरनय ले बिसेस रूप ले कम उत्पादन वाला इलाका, लघु अउ सीमांत किसान मनके संग जनजातीय अंचल किसान मन ल फायदा मिलही।
मुख्यमंत्री ह यहू बतइन कि एसो प्रदेस म करीबन साढ़े सत्ताईस लाख किसान मन ले धान खरीदे जाही। एखर बर 360 नवा उपार्जन केंद्र सुरू करे जावत हंे। एखर संग प्रदेस म कुल तीन हजार ले जादा केंद्र म धान खरीदी होही। मुख्यमंत्री ह-गन्ना किसान मन बर घलो उपार्जन के दर 355 रूपिया ले बढ़ाके 425 रूपिया प्रति कुंटल करे जाय के घोसना करिन। ए दउरान ओमन किहीन कि-ए बाढ़े दर के लाभ एसो खरीदे गे गन्ना म घलो दे जाही।
उहें, कृषि मंत्री रामविचार नेताम आज रइपुर म आयोजित पत्रकारवार्ता म बतइन कि-कृषक उन्नति योजना के तहत खरीफ बछर-2023 ले 2025 तक प्रदेस के 25 लाख ले जादा किसान मन ल 35 हजार 904 करोड़ रूपिया ले जादा के भुगतान करे गेहे। धान के जघा म आने फसल लेवइया किसान मन बर सहायता रासि बढ़ाके 15 हजार रूपिया प्रति एकड़ कर दे गेहे। ओमन यहू बतइन कि दलहन, तिलहन, मक्का, कोदो-कुटकी, रागी अउ कपास के खेती करइया किसान मन ल 10 हजार रूपिया प्रति एकड़ सहायता दे जाही। एखर बर अब तक 4 लाख 26 हजार ले जादा किसान मन पंजीयन कराय हें।
रामदास आठवले-पत्रकारवार्ता
केंद्रीय सामाजिक न्याय अउ अधिकारिता राज्यमंत्री रामदास अठावले रइपुर दउरा म हंे। रइपुर म आयोजित एक ठन पत्रकारवार्ता म किहीन कि- केंद्र सरकार ह समाज के सबो वर्ग के कल्याण, सामाजिक न्याय अउ समावेसी बिकास बर प्रतिबध्द हे। प्रधानमंत्री नरेंद्र मोदी के अगुवई म दलित, आदिवासी, किसान, माईलोगन, युवा अउ गरीब मन के उत्थान बर आने-आने योजना संचालित करे जावत हें। देस म सड़क, हवई संपर्क अउ बुनियादी सुविधा मनके बिस्तार होय हे।
श्री अठावले ह यहू किहीन कि-मतदाता सूची के बिसेस गहन पुनरीक्षण लोकतंत्र के मजबूती बर जरूरी हे। हर पात्र नागरिक के नांव मतदाता सूची म सामिल होना चाही।
यूसीसी-बैठक
सर्वोच्च न्यायालय के सेवा निवृत्त न्यायाधीश रंजना प्रकाश देसाई के अध्यक्षता म नई दिल्ली स्थित छत्तीसगढ़ सदन म छत्तीसगढ़ समान नागरिक संहिता-यूसीसी ल लेके उच्च स्तरीय समिति के बइठका होइस। बइठका म समान नागरिक संहिता ले जुड़े आने-आने बिसय मन उपर गोठबात अउ बिचार करे गिस। ए मउका म समिति के सदस्य, सेवानिवृत्त, आईएएस अधिकारी एम. के. राउत, शत्रुघ्न सिंह अउ वरिष्ठ अधिवक्ता मोहन पवार के संगे सेवा निवृत्त प्राचार्य ज्योति रानी सिंह अउ समिति के सचिव श्याम धावड़े मौजूद रिहीन।
जनजातीय गौरव दिवस
भगवान बिरसा मुंडा के जयंती के मउका म 15 नवंबर के रायगढ़ जिला के धरमजयगढ़ म आयोजित होवइया राज्य स्तरीय जनजातीय गौरव दिवस समारोह के बेरा दसहरा मैदान म 50 हजार ले जादा लोगन पहुंचे के संभावना हे। कारीकरम के तियारी के जायजा लेय बर वित्त मंत्री ओपी चौधरी धरमजयगढ़ पहुंचिन। जिंहा ओमन अधिकारी मन ल जरूरी बेवस्था बेरा म पूरा करे के निरदेस देइन।
कारीकरम म आने-आने विभाग के प्रदर्सनी घलो लगाय जाही। संगेसंग जनजातीय हितग्राही मन के सफलता के कहानी ल घलो प्रदर्सित करहीं।
कारीकरम म भारतीय जनता पार्टी के राष्ट्रीय अध्यक्ष नितिन नवीन मुख्य अतिथि के रूप म सामिल होहीं।
डंप-बरामद
बीजापुर जिला म सुरक्षा बल मन माओवादी मनके 3 डंप बरामद करिन हें। पामेड़ अउ गंगालूर थाना इलाका म चलाय गे दू अलग-अलग सर्च आपरेसन के बेरा 136 बीजीएल सेल, कार्डेक्स, वायर अउ भारी मात्रा म आने-आने माओवादी जिनिस जब्त करे गिस। पुलिस के मुताबिक पामेड़ थाना इलाका के तुमरेल-सिंगमपल्ली जंगल म डीआरजी, कोबरा बटालियन, डॉग स्क्वाड के संयुक्त टीम ह एक ठन डंप बरामद करिन। उहें, गंगालूर थाना इलाका के लेकामपारा जंगल म सीआरपीएफ, कोबरा बटालियन अउ डॉग स्क्वाड के टीम ह दू ठन डंप बरामद करिन।
छठ पर्व
छत्तीसगढ़ के संग देसभर के आने-आने जघा आज ले नहाय-खाय के संग 4 दिन के छठ पूजा सुरू होगे। ए परब सुरूज देवता अउ छठी मैया ल समर्पित हे। नहाय-खाय के दिन श्रध्दालु मन के संग साफ-सफाई करके परसाद तियार करथें। रिवाज ले ए दिन कुम्हड़ा-भात बनाय जाथे।
परब के दूसरइया दिन काली खरना मनाय जाही। ए दिन श्रध्दालु मन पूरा दिन उपास राखहीं अउ संझा बेरा पूजा-पाठ के बाद परसाद खाके उपास खोलहीं, एखर बाद निर्जला उपास सुरू होही।
तीसरइया दिन संझा नंदिया, तरिया अउ आने-आने छठघाट म सकला के छठी मैया के पूजा करे जाही अउ बुड़त सुरूज देवता ल अर्घ्य दे जाही। ओखर बाद सम्मार दिन बिहनिया उवत सुरूज देवता ल अर्घ्य देय के संग छठ परब के समापन होही।