प्रारूप मतदाता सूची-प्रकाशन
विशेष संक्षिप्त पुनरीक्षण-एसआईआर म आज प्रदेस के सबो मतदान केन्द्र म प्रारूप मतदाता सूची के प्रकासन करे गीस। प्रारूप सूची के अनुसार छत्तीसगढ़ म एक करोड़ नब्बे लाख सोलह हजार ले जादा मतदाता पंजीकृत हवय। एमा पुरूष मतदाता मनके संख्या चौरानवे लाख चौरासी हजार छह सौ पैंतीस अउ महिला मतदाता मनके संख्या पंचानवे लाख इकतीस हजार सात सौ इक्कीस हवय। एखर अलावा थर्ड जेंडर मतदाता मनके संख्या चार सौ बारह हे। उहें, राज्य म वर्तमान म कुल मतदान केन्द्र के संख्या छब्बीस हजार आठ सौ चौव्वन होगे हवय। एमा सहरी क्षेत्र म पांच हजार आठ सौ छिहत्तर अउ गंवई क्षेत्र म बीस हजार नौ सौ अठहत्तर मतदान केन्द्र हवय।
राज्य के सबो मतदाता मन ले अनुरोध करे गेहे कि ओमन ह ‘‘वोटर हेल्पलाइन‘‘ म मोबाइल ऐप या आधिकारिक वेबसाइट के माध्यम ले प्रकासित ड्राफ्ट मतदाता सूची म अपन नाम जांच लेवय। मतदाता मन ह अपन क्षेत्र के बूथ लेवल अधिकारी ले संपर्क करके या टोल-फ्री हेल्पलाइन नंबर – एक नौ पांच शून्य (1950) म संपर्क करके मतदाता सूची म अपन नाव ल देख सकत हे। कहूं कोनों व्यक्ति के नाव मतदाता सूची म नइ हे, तब या जानकारी अधूरा हे तब या फिर कोनों दूसर मनखे के नाव जुड़ गेहे, तब लोगन ऑनलाइन या ऑफलाइन फारम बीएलओ के माध्यम ले जमा कर सकत हे। एक जनवरी दू हजार सत्ताईस के अट्ठारह बछर के उमर पूरा करइया युवा मन के अलावा एक अप्रैल, एक जुलाई अउ एक अक्टूबर के पात्र होवइया युवा मन घलो फॉर्म-छह म मतदाता पंजीकरण बर आवेदन कर सकत हे।
प्रारूप मतदाता सूची के प्रकासन होय के बाद दावा अउ आपत्ति दर्ज कराय के तारीख ग्यारह दिसंबर तय करे गेहे। दावा-आपत्ति के निपटारा अट्ठाईस दिसंबर तक करे जाही। उहें, मतदता सूची के अंतिम प्रकासन चार जनवरी के होही।
प्रधानमंत्री-दिवाली मिलन समारोह
प्रधानमंत्री नरेन्द्र मोदी ह किहीन हे कि भारत ह बछर दू हजार सैंतालीस तक विकसित राष्ट्र बने के लक्ष्य तय करे हे। नई दिल्ली म भारतीय जनता पार्टी मुख्यालय म राखे गे दिवाली मिलन समारोह म ओमन किहीन कि देस के आजादी के सौ बछर पूरा होय ले पहिली भारत ल विकसित राष्ट्र बनाए बर सबो झन ल मिल-जुल के काम करना पड़ही। श्री मोदी ह किहीन कि दिवाली के तिहार अभी सिराय हे अउ छठ परब के तियारी अंतिम चरण म हे। प्रधानमंत्री ह ए सबो तिहार के बधई लोगन ल दीन।
विस-शीतकालीन सत्र
छत्तीसगढ़ विधानसभा के शीतकालीन सत्र चौदह दिसंबर ले सुरू होही। सत्रह दिसंबर तक चलइया ए सत्र के दउरान कुल चार ठिन बइठका होही। ए बारे म आज छत्तीसगढ़ विधानसभा के सचिव दिनेश शर्मा ह अधिसूचना जारी कर दे हवय। शीतकालीन सत्र म वित्तीय कामकाज के संग दूसर सरकारी काम घलो करे जाही।
लोक सेवा प्रसारण दिवस
आज लोक सेवा प्रसारण दिवस हे। ए दिन हर बछर राष्ट्रपिता महात्मा गांधी डहार ले आकासवाणी के माध्यम ले देगे ऐतिहासिक संबोधन के सुरता म मनाए जाथे। प्रसारण के इतिहास म ऐहा एक ठन बड़े दिन हे। बछर उन्नीस सौ सैंतालीस म इही दिन महात्मा गांधी ह नई दिल्ली के ब्रॉडकास्टिंग हाउस के अपन पहिली अउ एकमात्र दउरा करे रिहीन।
एफटीए-कार्यशाला
केन्द्र सरकार के वाणिज्य अउ उद्योग मंत्रालय, विदेश व्यापार महानिदेशालय अउ आई.टी.पी.ओ. के संघरा प्रयास म आज रईपुर म ‘‘मुक्त व्यापार समझौतों के प्रभावी उपयोग‘‘ बिसय म राज्य स्तरीय कार्यशाला कराय गीस। कार्यशाला म मुख्य अतिथि के रूप म वाणिज्य अउ उद्योग मंत्री लखनलाल देवांगन सामिल होइन। कार्यशाला म प्रदेस के आने-आने औद्योगिक अउ व्यापारिक क्षेत्र म निर्यात के संभावना, अंतर्राष्ट्रीय बाजार तक पहुंच, मुक्त व्यापार समझौता के फायदा अउ निर्यात ले जुड़े बिसय उपर चर्चा करे गीस।
उद्योग मंत्री श्री देवांगन ह निर्यातक मन बर एफटीए के फायदा पहुंचाय बर चार ठन बड़े घोषणा करीन। एमा छत्तीसगढ़ एफटीए एक्सेलेटर सुरू करे के संगेच दिसंबर महीना म मार्गदर्शिका के अंग्रेजी संस्करण अउ अवइया बछर जनवरी म हिन्दी संस्करण उपलब्ध कराना सामिल हे। एखर अलावा फरवरी महीना तक प्रदेस के सबो संभाग म निर्यातक मनके मार्गदर्शन बर एफटीए कार्यशाला आयोजित करना हे।
मुख्यमंत्री-पत्रकारवार्ता
मुख्यमंत्री विष्णुदेव साय ह आज भारतीय जनता पार्टी के प्रदेस कार्यालय कुशाभाऊ ठाकरे परिसर म आयोजित पत्रकारवार्ता ल संबोधित करत हुए बतईन कि जनजातीय गौरव दिवस के उपलक्ष्य म पन्द्रह नवंबर के रायगढ़ के धरमजयगढ़ म राज्य स्तरीय कार्यक्रम आयोजित करे जाही। ए कार्यक्रम म भारतीय जनता पार्टी के राष्ट्रीय अध्यक्ष नितिन नबीन सामिल होही।
वीबी-जीरामजी-कार्यशाला
रईपुर के निमोरा के ठाकुर प्यारेलाल सिंह राज्य ग्रामीण विकास संस्थान म विकसित भारत – जीरामजी योजना म काम बर आज बर कार्यसाला कराए जावत हे। तीन दिन के एक कार्यसाला के सुरूआत विकसित भारत – जीरामजी योजना के आयुक्त तारन प्रकाश सिन्हा ह करीन। ओमन किहीन कि छत्तीसगढ़ म विकसित भारत – जीरामजी योजना म आजीविका डबरी, कंटूर टेªंच, बालिका शौचालय अउ मुक्तिधाम सेड जइसन काम ल प्राथमिकता दे जावत हे। एखर माध्यम ले गवई क्षेत्र म रोजगार सृजन के संगेच स्थानीय ग्रामीण संपत्ति के विकास घलो होवत हे।
पहिली दिन केन्द्र सरकार के प्रतिनिधि के रूप म विकसित ग्राम पंचायत योजना के बिशेषज्ञ मन ह योजना निर्माण ले जुड़े मार्गदर्सन दीन। ए मउका म प्रतिभागी मन ल तकनीकी मार्गदर्सिका पुस्तिका, तीन सौ पचहत्तर प्रकार के काम के सूची, विकसित ग्राम पंचायत योजना, धार-अपार अउ सुघ्घर बारी पुस्तक बांटे गीस। ए कार्यसाला म प्रदेस के सब्बों तैंतीस जिला के अधिकारी-कर्मचारी मन ह सामिल होवत हे।
कृषि विवि-जागरूकता कार्यक्रम
देस के पूर्वी क्षेत्र के राज्य मन बर काली तेरह नवंबर के रईपुर के इंदिरा गांधी कृषि विश्वविद्यालय म ‘‘ वन नेशन वन सब्सक्रिप्शन-ओ.एन.ओ.एस.‘‘ म क्षेत्रीय प्रसिक्षण सह-जागरूकता कार्यक्रम के आयोजन करे जाही। एखर माध्यम ले प्रतिभागी मन ल ओ.एन.ओ.एस. के कार्यप्रणाली ल समझे के, एखर पहुंच अउ उपयोग के सुविधा के जानकारी दे जाही।
मुख्य सचिव-बैठक
मुख्य सचिव विकासशील के अध्यक्षता म आज मंत्रालय म छत्तीसगढ़ स्थानीय प्राधिकारी निर्वाचन अपराध अधिनियम के प्रस्तावित संसोधन के बारे म बइठका करे गीस। ए दउरान छत्तीसगढ़ म निर्वाचन अपराध ले जुड़े कानून अउ ओखर प्रावधान के बारे म चर्चा करे गीस। ए दउरान मुख्य सचिव ह प्रशासनिक काम ल अउ जादा आसान बनाय बर सामान्य प्रसासन विभाग के अधिकारी मन ल निरदेस दीन। ओमन किहीन कि अवइया दस बछर म आने-आने विभाग के जरूरत के हिसाब ले पद बनाय जाय अउ प्रशासनिक संरचना के संग पुनर्गठन के रूपरेखा तैयार करे जाय।
विशेष कार्यक्रम
आकाशवाणी केन्द्र रायपुर डहार ले बस्तर संभाग म आत्मसमर्पित माओवादी मनके पुनर्वास बर होवत काम म केन्द्रित बिसेस कार्यक्रम के प्रसारण आज संझा सात बजे करे जाही। ए कार्यक्रम ल छत्तीसगढ़ के आकाशवाणी के सबो केन्द्र रिले करही।
दुर्घटना
कबीरधाम जिला म पाछु संझा होय एक ठिन सड़क हादसा म चार झिन के मउत होगीस अउ दू झन घायल होगे हवय। ए हादसा रणवीरपुर चौकी क्षेत्र के बनिया गांव तीर उतका बखत होइस, जब दू ठन फटफटी म टक्कर होगे। पुलिस के मुताबिक एक ठिन फटफटी म चार झिन अउ दूसर फटफटी म तीन झिन बइठे रिहीन। घायल मन ल इलाज पर अस्पताल म भर्ती कराय गेहे।
छठ पर्व
नहाय खाय के संग काली तेरह नवंबर ले चार दिन के छठ महापरब सुरू हो जही। बिलासपुर, कोरबा अउ रईपुर संघरा प्रदेस के कतकोन नंदियां-तरिया म छठ पूजा के आयोजन होही। नगर निगम डहार ले बिसेस अभियान चलाके तरिया मनके साफ-सफई के संग लाईटिंग अउ टंेंट जइसन व्यवस्था करे जावत हे।
रईपुर के छठ महापरब आयोजन समिति के अध्यक्ष राजेश कुमार सिंह ह बतइन कि ए बछर छठ परब तेरह नंवबर ले सुरू होके सोलह नवंबर के सिराही। चौदह नवंबर के खरना के रस्म होही। उहें, पन्द्रह नवंबर के अस्त होवत सूरज ल पहिली अर्घ्य दे जाही अउ सोलह नवंबर के उगत सूरज ल अर्घ्य देके संगे ए परब सिराही।