मरवाही उपचुनाव-नामांकन रद्द
मरवाही विधानसभा उपचुनई बर आज नामांकन पत्र के जांच के दउरान जिला निर्वाचन अधिकारी ह जनता कांग्रेस छत्तीसगढ़-जे, के प्रत्यासी अमित जोगी अउ उंखर पत्नी ऋचा जोगी के नामांकन रद्द कर दीन। नामांकन पत्र के जांच के दउरान उच्च स्तरीय छानबीन समिति डहार ले श्री जोगी के जाति प्रमाण पत्र ल लेके जारी करे गे रिपोर्ट ल निर्वाचन कार्यालय म पेस करे गीस, जेखर बाद दूनों झन के नामांकन पत्र ल रद्द करे के आदेस दीन।
जानबा के मुताबिक जिला निर्वाचन अधिकारी के आगू अमित जोगी के नामांकन पत्र उपर कांग्रेस के संगेसंग गोंडवाना गणतंत्र पार्टी ह घलो आपत्ति लगाय रिहीन।
विधायक अउ पूर्व मंत्री बृजमोहन अग्रवाल ह जोगी के जाति प्रमाण पत्र ल रद्द करे ल नैतिक आधार म गलत बताय हे।
मतदान दस्तावेज-नामांकन
तीन नवंबर के होवइया मरवाही विधानसभा उपचुनाव बर निर्वाचन आयोग ह पहिचान पत्र बर मतदाता फोटो परिचय पत्र के संगेसंग बारह ठिन दस्तावेज ल घलो मान्य करे हे।
मुख्य निर्वाचन पदाधिकारी ह बतईन कि मतदाता मन ल वोट डारे बर आधार कार्ड, ड्राईविंग लाइसेंस, मनरेगा जाॅब कार्ड, स्वास्थ्य बीमा कार्ड, पैन कार्ड के संगेसंग फोटू वाले पेंशन दस्तावेज के प्रयोग कर सकथे।
उहें, मरवाही उपचुनई बर उन्नीस अभ्यर्थी मन ह नामांकन पत्र दाखिल करे हे।
पंजीयन-नियम
जमीन के ई-रजिस्ट्री के काम ल सरल बनाय अउ एमा लगइया बेरा ल कम करे बर पंजीयन विभाग ह एक ठिन नवा नियम लागू करे हे। एखर मुताबिक अब जमीन के कीमत के पांच फीसदी स्टाम्प पेपर बिसाय के बादेच रजिस्ट्री बर आॅनलाइन तारीख मिलही।
त ऐति, राजधानी रईपुर के पंजीयन कार्यालय म जादा दस्तावेज जमा होय के सेती पांचवां उप पंजीयक कार्यालय खोले के मंजूरी घलो दे गेहे। ए पंजीयन कार्यालय म उन्नीस अक्टूबर ले पक्षकार मन अपन तारीख ले सकथे। एखर बर हेल्पलाइन नंबर घलो जारी करे गेहे।
स्पेशल ट्रेन
रेलवे ह अवइया तिहार मन ल धियान म राखत स्पेशल रेलगाड़ी चलाय के फइसला लेहे। एमा बिलासपुर अउ पटना के बीच साप्ताहिक पूजा स्पेशल ट्रेन तेईस अक्टूबर ले अट्ठाईस नवंबर तक चलही। ए गाड़ी पहिली चलत बिलासपुर-पटना एक्सप्रेस के समय सारणी के मुताबिक चलही। त उहें, पोरबंदर ले हावड़ा के बीच द्वि-साप्ताहिक पूजा स्पेशल ट्रेन के सुविधा इक्कीस अक्टूबर ले सुरू होही। एखर अलावा पच्चीस अक्टूबर ले ओखा अउ हावड़ा के बीच साप्ताहिक पूजा स्पेशल ट्रेन चलाय जाही।
नीट-परिणाम
राष्ट्रीय परीक्षा एजेंसी ह राष्ट्रीय पात्रता सह प्रवेस परीक्षा-नीट के परिणाम घोषित कर देहे। ए परीक्षा म ए बार तेरह लाख छैसठ हजार ले जादा छात्र मन सामिल होय रिहीन, जेमा ले सात लाख इकहत्तर हजार ले जादा छात्र मन पास होय हे। नीट परीक्षा म ओड़िसा के शोएब अफताब ह सात सौ बीस अंक पा के पूरा देस म पहिली जघा बनाय हे।
एसो अखिल भारतीय आयुर्विज्ञान संस्थान-एम्स अउ जवाहर लाल आॅफ पोस्ट ग्रेजुएट मेडिकल एजुकेसन एंड रिसर्च के एमबीबीएस कारीकरम म घलो प्रवेस नीट के माध्यम ले करे जाही।
प्रवासी श्रमिक-सुविधा
लाॅकडाउन के दउरान लहुटे प्रवासी मजूर मन ल सुविधा देके मामला म छत्तीसगढ़ ह देस म अव्वल राज्य के दर्जा पाय हे। ए बात आई.एस.एस.आर.एफ डहार ले करे गे सर्वें म आगू आय हे। ए फाउंडेशन ह देस म छत्तीसगढ़ के संगेसंग छह ठिन प्रमुख प्रवासी मजूर मनके वापसी वाले राज्य मन म सर्वें करे हे। सर्वें के मुताबिक प्रदेस लहुटे सत-प्रतिसत प्रवासी मजूर मन ल क्वारेंटाइन के सुविधा मिले रिहीस।
बस्तर-मलेरिया मुक्त अभियान
बस्तर संभाग म मलेरिया मुक्त अभियान के एसो बढ़िया असर दिखत हे। पाछु साल के मुकाबला म मलेरिया के मामला म करीबन पैंसठ फीसदी के कमी दर्ज करे गेहे। अभियान के दूनों चरण के दउरान स्वास्थ्य विभाग के टीम ह बस्तर के कट-कटउवन जंगल अउ पहाड़ ले घिरे मुश्किल जघा म घरों-घर जाके हरेक मनखे मनके मलेरिया के जांच करीन अउ संगेसंग संभाग म एनीमिया अउ कुपोसन ल दुरिहा भगाय के घलो अभियान चलाय जात हे।
कोरोना समाचार
राजनांदगांव म जिला प्रशासन ह लोगन मन ल कोरोना संक्रमण ले बांचे खातिर जागरूक करे बर ‘‘सात दिन-सात रंग‘‘ नाव के एक ठिन अभियान के सुरूवात करे हे। अभियान के दूसर दिन आज प्रसासन कोति ले लोगन मन ल ‘‘मास्क ही वैक्सीन‘‘ के शपथ देवाईन। बाईस अक्टूबर तक चलइया ए अभियान के दउरान रोजे जागरूकता उपर आने-आने आयोजन करे जाही।
त ओति, महासमुंद जिला के मुख्य चिकित्सा अउ स्वास्थ्य अधिकारी ह लोगन मन ले अपील करे हवय कि ओमन कोरोना वायरस ल लेके अफवाह उपर धियान झन देवय अउ डाॅक्टर मनके सलाह लेवय।
नवरात्र-बस्तर दशहरा
शक्ति के आराधना के परब शारदेय नवरात्रि आज ले सुरू होगे। आज ले नौ दिन जम्मों सक्तीपीठ अउ देवी मंदिर मन म मां दुर्गा के बिसेस पूजा-पाठ करे जाही। मंदिर मन म आज ले घट स्थापना के संगेसंग ज्योति कलश घलो जल गेहे। प्रदेस के प्रमुख सक्तीपीठ, दंतेवाड़ा म मां दंतेश्वरी, रतनपुर अउ रईपुर स्थित महामाया मंदिर अउ डोंगरगढ़ म मां बम्लेश्वरी के मंदिर मन म बिसेस धार्मिक आयोजन होही। एसो कोरोना महामारी ल देखत प्रदेस के जम्मों मंदिर मन म दिसा-निरदेस के पालन करे के निरदेस दे गेहे।
त ऐति, अंबिकापुर स्थित मां महामाया मंदिर म नवरात्रि परब के दउरान श्रद्धालु मनके प्रवेस उपर रोक लगा दे गेहे। उहें, महासमुंद जिला के चंडी मंदिर अउ खल्लारी मंदिर मन म घलो आम लोगन मन ह ज्योति कलश के दर्शन नइ कर सकय।
ओति, पचहत्तर दिन तक चलइया ऐतिहासिक बस्तर दशहरा म काछनगादी के रसम पूरा कर ले गेहे। जगदलपुर स्थित मां काछनगुड़ी म काली विधि-विधान के संग पूजा-पाठ करे गीस। बस्तर दशहरा समिति के अध्यक्ष अउ जिला कलेक्टर ह लोगन मन ले अपील करे हे कि कोरोना संक्रमण ले बचाव बर ओमन सोसल मीडिया के माध्यम ले ही बस्तर दशहरा के आयोजन ल देखय।
टी.एस. सिंहदेव-कोरोना सावधानी अपील
स्वास्थ्य मंत्री टी.एस. सिंहदेव ह नवरात्रि अउ अवइया तिहार ल देखत लोगन मन ले कोरोना संक्रमण ले बचाव बर जरूरी सावधानी बरते के अपील करे हे। ओमन प्रदेस के लोगन मन ल नवरात्रि के सुभकामना देवत किहीन –
होल्ड बाईट – टी.एस.सिंहदेव
( 40 सेकेंड)
प्रयास आवासीय विद्यालय-प्रवेश
कोरोना महामारी ल देखत राज्य म चलत प्रयास आवासीय विद्यालय मन म अवइया सैक्षणिक सत्र म कक्षा नौवीं म प्रवेस बर पांच नवंबर के परीक्षा होही। ए बारे म जिला कलेक्टर ह जारी निर्देश म केहे हे कि यदि कोनों जिला म परीक्षा केन्द्र स्थल कंटेनमेंट जोन म आथे, त अइसन स्थिति म परीक्षार्थी मन बर दूसर परीक्षा केन्द्र दे जाही।
मौसम
अवइया चैबीस घंटा के दउरान प्रदेस म एक-दू जघा म गाज गिरे के चेतावनी दे गेहे। त उहें, प्रदेस के दक्षिणी जघा म बरसा होय के संभावना हे।
रईपुर स्थित मौसम विज्ञान केन्द्र के मुताबिक मध्य बंगाल के खाड़ी अउ आंध्रप्रदेश के दक्षिण तटीय इलाका म एक ठिन चक्रवाती घेरा बने हे। त उहें, पूर्व मध्य अउ उत्तर-पूर्व अरब सागर म बने निम्नदाब के क्षेत्र ह अउ जादा सक्तीसाली होवत हे। एखर प्रभाव ले काली राज्य म कोनों-कोनों जघा म हल्का ले मध्यम बरसा हो सकथे।
ए ऐति, सरलग बरसा के सेती सुकमा जिला के कतकोन जघा म अवई-जवई प्रभावित होय के समाचार मिले हे।