राष्ट्रपति प्रवास
राष्ट्रपति द्रौपदी मुर्मु आज ले छत्तीसगढ़ के दू दिन के प्रवास म हे। अपन ेप्रवास के पहिली दिन राष्ट्रपति ह आज रायपुर के सरदार बलबीर सिंह जुनेजा इंडोर स्टेडियम म ‘‘सेवा सम्मान पर्व अउ युवा प्रबोधन‘‘ कार्यक्रम म सामिल होइन। कार्यक्रम ल संबोधित करत श्रीमती मुर्मु ह युवा मन ले ईमानदारी अउ निष्ठा के संग देस ल बछर दू हजार सैंतालीस तक विकसित बनाय के आह्वान करीन।
राष्ट्रपति ह कहिन कि छत्तीसगढ़ म माओवाद के खात्मा के बाद आतंक के अंधकार के समाप्ति होय हे अउ युवा नक्सलवाद के भटकाव ले मुक्त होके समाज के मुख्यधारा म सामिल होगे हे।
श्रीमती मुर्मू ह कहिन कि सेवा सम्मान पर्व अन्न उपजाय म किसान मनके योगदान अउ मनुष्य बर प्रकृति के उदारता के पर्व घलो हे।
ए कार्यक्रम ल राज्यपाल रमेन डेका अउ मुख्यमंत्री विष्णुदेव साय ह घलो संबोधित करीन। कार्यक्रम म केन्द्रीय राज्यमंत्री तोखन साहू, उपमुख्यमंत्री विजय शर्मा, उपमुख्यमंत्री अरूण साव अउ विधायक पुरंदर मिश्रा घलो मौजूद रिहीन। कार्यक्रम म सेवा संकल्प अभियान के तहत रक्तदान करइया ग्यारह सौ ले जादा माईलोगिन मनके सम्मान करे गीस।
एखर पहिली, राष्ट्रपति ह लोकभवन म छत्तीसगढ़ मंडपम म पूज्य माता हासी देवी के सम्मान म दू सौ रूपिया के स्मारक सिक्का जारी करीन। ए मउका म राज्यपाल रमेन डेका अउ मुख्यमंत्री विष्णुदेव साय मौजूद रिहीन।
रायपुर स्थित शदाणी दरबार के पांचवां पीठाधीश माता हासी देवी के दू सौवां जयंती म केन्द्रीय वित्त मंत्रालय डहार ले दू सौ रूपिया के स्मारक सिक्का जारी करे गेहे। ए सिक्का म माता हासी देवी के छबि अंकित हवय। सिक्का के एक कोति अशोक स्तंभ के सिंह शीर्ष अउ दू सौ रूपिया के मूल्य ल दर्साय गेहे।
अपन प्रवास के दूसर दिन राष्ट्रपति काली तेईस अक्टूबर के जगदलपुर जाही। इहां ओमन बिहनिया ग्यारह बजे मां दंतेवश्वरी मंदिर म पूजा-पाठ करही। एखर बाद श्रीमती मुर्मू ह मंझनिया बारह बजके पैंतालीस मिनट ले जगदलपुर म बस्तर दशहरा के मउका म राखे गे मुरिया दरबार अउ सार्वजनिक कार्यक्रम म सामिल होही।
राष्ट्रपति के बस्तर प्रवास ल देखत प्रसासनिक स्तर म सुरक्षा के कड़ा इंतजाम करे गेहे। सुरक्षा ल देखत प्रशासन डहार ले चिन्हित संवेदनशील क्षेत्र ल नो ड्रोन फ्लाइंग जोन घोषित करे गेहे।
डॉ. मोहन भागवत-बिलासपुर
राष्ट्रीय स्वयंसेवक संघ-आरएसएस के सर संघचालक डॉक्टर मोहन भागवत ह आज ले बिलासपुर के दू दिन के दउरा म हे। अपन प्रवास के पहिली दिन डॉक्टर भागवत ह प्रांत के पदाधिकारी अउ कार्यकर्ता मन ले भेंट करीन। एखर संगेसंग ओमन आने-आने संगठनात्मक बिसय उपर घलो गोठबात करही।
प्रवास के दूसर दिन काली तेईस अक्टूबर के बिसेस प्रांत स्तरीय बइठका के आयोजन करे जाही, जेमा आरएसएस के प्रमुख पदाधिकारी सामिल होही। बइठका के बाद डॉक्टर भागवत ह जबलपुर बर रवाना हो जही।
डॉक्टर भागवत के कार्यक्रम स्थल अउ तीर-तखार के जघा मन म अउ रेलवे स्टेसन म सुरक्षा के कड़ा प्रबंध करे गेहे।
मुख्यमंत्री-कार्यशाला
मुख्यमंत्री विष्णुदेव साय ह काली नवा रायपुर म ‘‘अर्बन चैलेंज फंड अउ अर्बन इन्वेस्ट विंडो‘‘ बिसय उपर राखे गे पहिली क्षेत्रीय कार्यशाला के सुभारंभ करीन। ओमन कहिन कि विकसित भारत अउ विकसित छत्तीसगढ़ के निर्माण म सहर मनके भूमिका महत्वपूर्ण हवय। अर्बन चैलेंज फंड ले छत्तीसगढ़ के सहर के विकास ल गति मिलही। मुख्यमंत्री ह नगरीय निकाय मन ले कहिन कि विकास के योजना सिरिफ आज के परेसानी के समाधान ल ध्यान म राखके नइ, बल्कि अवइया कई दसक के जरूरत ल ध्यान म राखके बनाय जाना चाही। कार्यशाला के दउरान नगरीय प्रशासन विभाग, हुडको अउ सेप्ट विश्वविद्यालय के बीच समझौता ज्ञापन उपर दस्तखत करे गीस।
सेवारत शिक्षक-टीईटी
राज्य सरकार ह प्रदेस के सेवारत सासकीय सिक्षक मन बर सिक्षक पात्रता परीक्षा-टीईटी के बिसेस आयोजन ल मंजूरी दे देहे। ए परीक्षा छत्तीसगढ़ कर्मचारी चयन मंडल के माध्यम ले कम्प्यूटर आधारित टेस्ट-सीबीटी पद्धति ले आयोजित करे जाही। स्कूल शिक्षा विभाग के आदेस के मुताबिक, ए फइसला सर्वोच्च न्यायालय के फइसला के अनुपालन म ले गेहे। न्यायालय के निरदेस के मुताबिक कक्षा पहली ले आठवीं तक पढ़ाने वाला अइसन सेवारत सिक्षक, जेखर सेवा के समय पांच बछर या ओखर ले जादा हवय, उंखर बर सेवा म बने रेहे या पदोन्नति पाय बर निर्धारित स्तर के टीईटी परीक्षा पास करना जरूरी हवय।
वित्तीय समावेशन अभियान
वित्त मंत्रालय ह काली ले ग्राम पंचायत अउ सहरी स्थानीय निकाय के स्तर म राष्ट्रव्यापी वित्तीय समावेशन अभियान सुरू करे हे। ए अभियान इकतीस दिसंबर तक चलही अउ एखर अंतर्गत दू लाख सत्तर हजार ग्राम पंचायत अउ सहरी स्थानीय निकाय मन ल सामिल करे जाही। वित्तीय सेवा विभाग के मुताबिक बैंक, प्रधानमंत्री जीवन ज्योति बीमा योजना, प्रधानमंत्री सुरक्षा बीमा योजना अउ अटल पेंशन योजना म नामांकन बर सिविर लगावत हे। ए अभियान रबी मौसम ले पहिलीच किसान क्रेडिट कार्ड के आवेदन अउ प्रधानमंत्री फसल बीमा योजना म नामांकन ल घलो बढ़ावा दीहीं।
दुर्घटना
मनेन्द्रगढ़-चिरमिरी-भरतपुर जिला म आज होय एक ठिन सड़क हादसा म छह झिन लोगन के मउत होगे। उहें, पन्द्रह ले जादा लोगन घायल होगे हे। मिले खबर के मुताबिक एक यात्री बस मनेन्द्रगढ़ ले केल्हारी जावत रिहीस। इही दउरान केल्हारी थना क्षेत्र के सेमरधानी मोड़ के तीर बस अनते-तनते होके पेड़ ले टकरा गे। ए हादसा म एक झिन लइका समेत छह झिन लोगन के मउत होगे। सूचना मिलतेच मउका म पहुंचे पुलिस अउ स्वास्थ्य विभाग के टीम ह रेरक्यू ऑपरेशन चलाके घायल मन ल इलाज बर अस्पताल म भर्ती करईन। बताय जात हे कि बस म करीबन तीस यात्री बइठे रिहीन।
ओति, दंतेवाड़ा जिला के बचेली थाना क्षेत्र के राजा बांग्ला मोड़ के तीर पाछु संझा होय सड़क हादसा म सियान समेत तीन झिन लोगन के मउत होगे। मिले खबर के मुताबिक एक ठिन तेज रफ्तार गाड़ी ह सड़क पार करत एक झिन सियान ल अपन चपेट म ले लीस। ए दउरान गाड़ी ह अनते-तनते होके पलट गे। ए हादसा म दू झिन आने लोगन के घलो मउत होगे। उहें, दस झिन आने मनखे घायल होगे हे। सबो घायल मन ल दंतेवाड़ा जिला अस्पताल म भर्ती कराय गेहे।
नगर सैनिक-मानदेय
राज्य सासन ह नगर सैनिक मनके मानदेय म बढ़ोतरी करे हे। अब ओमन ल हर महीना साढ़े उन्नीस हजार रूपिया के जगह तीस हजार आठ सौ सत्तर रूपिया तनखा मिलही। ए बढ़ोतरी के फायदा प्रदेस के सात हजार नौ सौ नगर सैनिक मन ल मिलही। नवा प्रस्ताव के मुताबिक नगर सैनिक मन ल साढ़े उन्नीस हजार रूपिया मूल मानदेय के संगेसंग ग्यारह हजार तीन सौ दस रूपिया के महंगाई भत्ता अउ साठ रूपिया वर्दी धोवाय बर भत्ता दे जाही। ए ह हरेक दिन के हिसाब ले करीबन एक हजार उनतीस रूपिया हे। नगर सैनिक – होमगार्ड के मानदेय म ए बढ़ोतरी न्यायालय के निरदेस, बाढ़त महंगाई अउ नगर सैनिक मनके सुघ्घर काम के आधार म करे गेहे।
विशेष कार्यक्रम
आकाशवाणी केन्द्र रायपुर डहार ले बस्तर संभाग म आत्मसमर्पित माओवादी के पुनर्वास बर करे जावत कार्य म केन्द्रित विशेष कार्यक्रम के प्रसारण आज संझा सात बजे करे जाही। ए कार्यक्रम ल छत्तीसगढ़ स्थित आकाशवाणी के जम्मों केन्द्र रिले करही।