शिवराज चौहान-सक्ती
केन्द्रीय ग्रामीण विकास अउ कृषि मंत्री शिवराज सिंह चौहान अउ मुख्यमंत्री विष्णुदेव साय ह आज सक्ती जिला के ग्राम जेठा म ग्रामीण विकास के आने-आने योजना के सुभारंभ करीन। ए दउरान प्रधानमंत्री आवास योजना के तहत दू लाख आवास के गृह प्रवेस, पंचायत पदाधिकारी मनके सम्मान अउ लखपति दीदी सम्मेलन के घलो आयोजन करे गीस। ए मउका म एक सौ इक्कीस करोड़ रूपिया ले जादा के लागत के आने-आने विकास काम के लोकार्पण अउ भूमिपूजन करे गीस। कारीकरम ल संबोधित करत केंद्रीय मंत्री ह सक्ती जिला म कृषि विज्ञान केंद्र अउ न्याय आवास के स्वीकृति समेत कई ठिन घोसना घलो करीन।
श्री चौहान ह किहीन कि प्रधानमंत्री नरेंद्र मोदी के अगुवई म छत्तीसगढ़ तेजी ले विकास करत हे। ओमन किहीन कि छत्तीसगढ़ धान के कटोरा के संघरा साग-भाजी मनके घलो परमुख उत्पादक बने के दिसा म आगू बाढ़त हे। ओमन बतइन कि प्रधानमंत्री आवास योजना के तहत प्रदेस म अट्ठारा लाख ले जादा आवास के स्वीकृति दे गेहे अउ आज दू लाख आवास के गृहप्रवेस कराय गीस। ओमन किहीन कि नक्सलवाद के खिलाफ निर्णायक कारवाई के बाद अब बस्तर के गंवई मन म घलो विकास काम तेजी ले आगू बाढ़त हे।
उहें, मुख्यमंत्री विष्णुदेव साय ह किहीन कि आज प्रदेस ल तीन लाख पैंसठ हजार ले जादा प्रधानमंत्री आवास के सौगात मिले हे। मुख्यमंत्री ह किहीन कि नक्सल मुक्त बस्तर क्षेत्र म प्रधानमंत्री आवास बर चलत सर्वे के समय-सीमा बढ़ाके इकतीस अक्टूबर कर दे गेहे।
कारीकरम म केंद्रीय राज्य मंत्री तोखन साहू, उपमुख्यमंत्री विजय शर्मा, कौशल विकास मंत्री गुरू खुशवंत साहेब समेत दूसर जन प्रतिनिधि अउ आम नागरिक मौजूद रिहीन।
मुख्यमंत्री-जल संरक्षण निर्देश
मुख्यमंत्री विष्णुदेव साय ह राज्य म जल संरक्षण अउ जल जीवन मिसन के काम ल सर्वोच्च प्राथमिकता के साथ मिसन मोड म पूरा करे के निरदेस दीन। राजधानी रईपुर म जल संसाधन अउ लोक स्वास्थ्य यांत्रिकी विभाग के समीक्षा बइठका म मुख्यमंत्री ह मार्च दू हजार अट्ठाईस तक जम्मो जल संरचना मन ल गुणवत्ता के साथ पूरा करे उपर घलो जोर दीन। ओमन किहीन कि जल जीवन मिसन के तहत हर घर तक नल ले साफ पिये के पानी पहुंचाना सरकार के मुख्य लक्ष्य हरय।
दुर्घटना-मौत
महाराष्ट्र के भंडारा जिला म आज बिहनिया होय सड़क हादसा म छत्तीसगढ़ के आठ मनखे मनके मउत होगे। ए हादसा-लाखनी तहसील के माने गांव अउ पिंपलगांव के बीच नागपुर-रईपुर राष्ट्रीय राजमार्ग क्रमांक तिरपन म होइस, जेमा तीन लइका समेत आठ लोगन के मउत होगे। जानकारी के मुताबिक एक कार म संवार होके ए जम्मो झन रईपुर ले नागपुर जात रिहीन, तभे पिंपलगांव करा ओमन के गाड़ी टरक ले टकरा गीस। हादसा म घायल तीन दूसर लोगन मन ल सकोली सब-डिस्ट्रिक्ट हॉस्पिटल म भर्ती कराय गेहे।
मुख्यमंत्री विष्णुदेव साय ह दुर्घटना उपर गहरा दुख व्यक्त करीन हे। ओमन किहीन कि राज्य सरकार ए कठिन बेरा म प्रभावित परिवार मन संग पूरा संवेदनसीलता के साथ हे अउ ओमन ल हर संभव सहायता दे जाही। दुर्घटना म घायल नागरिक मनके समुचित उपचार अउ प्रभावित परिवार मन ल जरूरी सहायता देवाय बर छत्तीसगढ़ ले अधिकारी मनके एक टीम घटना स्थल बर भेज दे गेहे।
विकसित भारत यंग लीडर्स डायलॉग
विकसित भारत यंग लीडर्स डायलॉग-दू हजार सत्ताईस म छत्तीसगढ़ के युवा मन ल सीधा प्रधानमंत्री के आगू अपन विचार राखे के मउका मिलही। केंद्रीय युवा कारीकरम अउ खेल मंत्रालय के ‘माई भारत‘ पोर्टल म पंद्रह ले उनतीस बछर के युवा तीस सितंबर तक विकसित भारत क्विज म भाग ले सकत हे। माय भारत के राज्य निदेसक अर्पित तिवारी ह बतइन कि चयन प्रक्रिया के तहत क्विज के बाद निबंध प्रतियोगिता, जिला अउ राज्य स्तरीय प्रतियोगिता राखे जाही। चयनित युवा जनवरी महिना म नई दिल्ली म होवइया राष्ट्रीय संवाद म केंद्रीय मंत्री अउ नीति बिसेसज्ञ मन ले संवाद करही। क्षेत्रीय फाइनलिस्ट ल प्रधानमंत्री के आगू अपन बिचार प्रस्तुत करे के मउका मिलही।
राष्ट्रीय लोक अदालत
प्रदेस के जम्मों जिला अउ व्यवहार न्यायालय मन म काली बारह सितंबर के राष्ट्रीय लोक अदालत के आयोजन करे जाही। लोक अदालत के माध्यम ले बैंक संबंधी प्रकरण, बिजली बिल, टेलीफोन बिल विवाद, मोटर दुर्घटना दावा प्रकरण, पारिवारिक अउ वैवाहिक विवाद, चेक बाउंस प्रकरण के संघरा सिविल अउ दूसर प्रकरण के आपसी सहमति ले निराकरण करे जाही।
राज्यपाल संवाद
सैनिक स्कूल अंबिकापुर के विद्यार्थी मन आज राज्यपाल रमेन डेका ले लोकभवन म भेंट करके गोठबात करीन। ए मउका म राज्यपाल ह विद्यार्थी मन ल सफलता बर अनुशासन, आत्म नियंत्रण अउ कठोर परिश्रम ल जीवन के आधार बनाय के प्ररेणा दीन। राज्यपाल ह किहीन कि विद्यार्थी सौभाग्यसाली हे ओमन सैनिक स्कूल जइसे उत्कृष्ट सैक्षणिक संस्था म अध्ययन करे के मउका मिले हे। ओमन किहीन कि सफलता के आधारभूत बिन्दु अनुशासन हे।
विद्यार्थी दूपहिया वाहन
प्रदेस म अट्ठारा बछर ले कम आयु के विद्यार्थी मन कोति ले दूपहिया वाहन चलाय उपर अब सख्ती करे जाही। परिवहन विभाग ह प्रदेस के जम्मो विद्यालय मन म बिसेस जांच अभियान चलाय अउ नियम के उल्लंघन पाय जाय म कार्रवाई के निरदेस दीन हे। विभाग ह किहीन कि नाबालिक मन के बिना वैध ड्राइविंग लाइसेंस गाड़ी चलाना मोटरयान अधिनियम के उल्लंघन के संघरा सड़क सुरक्षा बर घलो गंभीर खतरा हे। ए संबंध म क्षेत्रीय परिवहन अधिकारी ह रईपुर के जम्मो स्कूल अउ महाविद्यालय मन ल निरदेसित करीन हे कि ओमन विद्यार्थी मनके अभिभावक मन ल नाबालिक मनके दू चक्का गाड़ी चलाय ले रोके बर सूचित करय।
बैंक कर्मचारी-हड़ताल
पांच दिन के बैंकिंग हफ्ता लागू करे समेत दूसर लंबित मांग ल लेके छत्तीसगढ़ समेत देसभर के बैंक कर्मचारी, अधिकारी आज एक दिन के हड़ताल म रिहीन। यूनाइटेड फोरम ऑफ बैंक यूनियन ह एखर बाद अट्ठाईस, उनतीस अउ तीस सितंबर के घलो अखिल भारतीय हड़ताल के आह्वान करे हे। मांग पूरा नइ होय म छब्बीस अक्टूबर ले अनिश्चितकालीन हड़ताल के चेतावनी दे गेहे।
हनुमान अंश-टैक्स फ्री
राज्यपाल रमेन डेका, मुख्यमंत्री विष्णुदेव साय अउ विधानसभा अध्यक्ष डॉक्टर रमन सिंह ह सह परिवार काली राजधानी रईपुर म हनुमान अंश फिलिम देखिन। फिलिम देखे के बाद मुख्यमंत्री श्री साय ह एला छत्तीसगढ़ म टैक्स फ्री करे के घोसना करीन। ओमन किहीन कि भारतीय संस्कृति अउ संत परंपरा म आधारित अइसन फिलिम नइ पीढ़ी ल संस्कार अउ मानवीय मूल्य ले जोड़े के माध्यम हरय।
बातों-बातों-में
प्रादेशिक समाचार एकांश के समसामयिक बिसय उपर आधारित कारीकरम ‘‘बातों-बातों-में‘‘ ए बखत ‘राष्ट्रपति ले राष्ट्रीय शिक्षक सम्मान ले सम्मानित सारंगढ़-बिलाईगढ़ के शिक्षिका सुनीता यादव ले लेगे भेंटवार्ता के प्रसारण करे जाही। एखर प्रसारण काली बारह सितंबर के आकाशवाणी केंद्र रइपुर डहार ले एफ.एम. अउ प्रायमरी चैनल म बिहनिया 9 बजे ले करे जाही। एला छत्तीसगढ़ स्थित आकाशवाणी के जम्मों केंद्र रिले करहीं।
अउ अब थोरकुन समाचार सार म –
– छत्तीसगढ़ माध्यमिक शिक्षा मंडल ह डी.एल.एड. प्रथम अउ द्वितीय बछर के पूरक अवसर परीक्षा के समय सारिणी म जारी कर देहे। प्रथम बछर के परीक्षा सोलह नवंबर ले दू दिसंबर अउ द्वितीय बछर के परीक्षा सत्रह नवंबर ले तीस नवंबर तक होही।
– जांजगीर-चांपा जिला के देवरी पिकनिक स्पाट म हसदेव नदी म नहात बेरा तीन झन युवक डूब गे। पंतोरा पुलिस अउ रेस्क्यू टीम युवक मन के तलास म जुटे हे।
अउ
– गौरेला-पेंड्रा-मरवाही जिला के युवा मन ल अग्निवीर भर्ती बर शारीरिक दक्षता परीक्षा के पहिली निसुल्क प्रसिक्षण दे जाही। इच्छुक अभ्यर्थी छत्तीसगढ़ शासन के आधिकारिक वेबसाइट म प्रदर्सित लिंक के माध्यम ले अपन पंजीयन करा सकत हे।